໑໐. ຈູຬສາໂຣປມສຸຕ຺ຕວຓ຺ຓນາ

໓໑໒. ປິງ຺ຄລຘາຕຸໂກຕິ ປິງ຺ຄລສຠາໂວ ປິງ຺ຄລຈ຺ຉວິໂກ, ປິງ຺ຄລກ຺ໂຂຕິ ວາ ອຕ຺ໂຖ. ປພ຺ພຊິຕສມູຫສງ຺ຂາໂຕ ສງ຺ໂຆ, ນ ສີລາທິຄຸເຓຫິ ສງ຺ຄຫິຕພ຺ພຠາເວນ. ສງ຺ໂຆ ເອເຕສໍ ອຕ຺ຖິ ປຣິວາຣຠູໂຕຕິ ສງ຺ຆິໂນ. ສ຺ເວວາຕິ ໂສ ເອວ ປພ຺ພຊິຕສມູຫສງ຺ຂາໂຕ. ອາຈາຣສິກ຺ຂາປນວເສນາຕິ ອຕ຺ຕນາ ປຣິກປ຺ປິຕອເຈລວຕາທິອາຈາຣສິກ຺ຂາປນວເສນ. ປຎ຺ຎາຕາຕິ ຍຖາສກໍ ສມາທິນ຺ນວຕວເສນ ເຈວ ວິຎ຺ຎາຕລທ຺ຘິວເສນ ຈ ປຎ຺ຎາຕາ. ລທ຺ຘິກຣາຕິ ຕສ຺ສາ ມິຈ຺ຉາທິຏ຺ຐິຍາ ອຸປ຺ປາທກາ. ພຫຸຊນສ຺ສາຕິ ປຸຖຸຊນສ຺ສ. ຕສ຺ສ ປນ ອາຄມສມ຺ປທາປິ ນາມ ນຕ຺ຖິ, ກຸໂຕ ອຘິຄໂມຕິ ເອກໍສໂຕ ອນ຺ຘປຸຖຸຊ຺ຊໂນ ເອວາຕິ ອາຫ ‘‘ອສ຺ສຸຕວໂຕ ອນ຺ຘພາລປຸຖຸຊ຺ຊນສ຺ສາ’’ຕິ. ນ ຫິ ວິຎ຺ຎູ ອປ຺ປສາທນີເຍ ປສີທນ຺ຕິ. ມງ຺ຄເລສຸ ກາຕພ຺ພທາສກິຈ຺ຈກໂຣ ທາໂສ ມງ຺ຄລທາໂສ.

ຕນ຺ຕາວຸຕານນ຺ຕິ ຕນ຺ເຕ ປສາເຣຕ຺ວາ ວີຕານໍ. ຄຓ຺ຐນກິເລໂສຕິ ສໍສາເຣ ພນ຺ຘນກິເລໂສ. ເອວໍ ວາທິຕາຍາຕິ ເອວໍ ປຏິຎ຺ຎຕາຍ, ເອວໍ ທິຏ຺ຐິຕາຍ ວາ. ນິຍ຺ຍານິກາຕິ ນິຍ຺ຍານຄຕິສປ຺ປາຏິຫີຣກາ ອນຸປາຣມ຺ຠຠູຕຕ຺ຕາຕິ ອຘິປ຺ປາໂຍ. ໂນ ເຈ ນິຍ຺ຍານິກາຕິ ອາເນຕ຺ວາ ໂຍຊນາ. ເຕສໍ ສພ຺ພຎ຺ຎຸປຏິຎ຺ຎາຍ ອຠູຕຕ຺ຕາ ຕສ຺ສາ ອຠູຕຠາວກຖເນນ ຕສ຺ສ ພ຺ຣາຫ຺ມຓສ຺ສ ນ ກາຈິ ອຕ຺ຖສິທ຺ຘີຕິ ອາຫ ‘‘ເນສໍ ອນິຍ຺ຍານິກຠາວກຖເນນ ອຕ຺ຖາຠາວໂຕ’’ຕິ.

໓໑໘. ນິຫີນໂລກາມິເສ ລີໂນ ອຊ຺ຌາສໂຍ ເອຕສ຺ສ, ນ ປນ ນິພ຺ພາເນຕິ. ລີນຊ຺ຌາສໂຍ. ສາສນໍ ສິຖິລໍ ກຕ຺ວາ ຄຓ຺ຫາຕິ ສິກ຺ຂາຍ ນ ຕິພ຺ພຄາຣວຕ຺ຕາ.

໓໒໓. ເຫຏ຺ຐາຕິ ອນນ຺ຕຣາຕີຕສຸຕ຺ເຕ ມຫາສາໂຣປເມ. ປຐມຊ຺ຌານາທິຘມ຺ມາ ວິປສ຺ສນາປາທກາຕິ ວິປສ຺ສນາຍ ປທຏ຺ຐານຠູຕາ. ອິຘາຕິ ອິມສ຺ມິໍ ຈູຬສາໂຣປເມ ອາຄຕາ. ນິໂຣຘປາທກາຕິ ອນາຄາມິໂນ, ອຣຫນ຺ໂຕ ວາ ນິໂຣຘສມາປຕ຺ຕິໍ ສມາປຊ຺ຊິຕຸໍ ສມຕ຺ຖາ. ຕສ຺ມາຕິ ນິໂຣຘປາທກຕ຺ຕາ. ປຐມຊ຺ຌານາທິຘມ຺ມາ ຎາຓທສ຺ສນໂຕ ອຸຕ຺ຕຣິຕຣາຕິ ເວທິຕພ຺ພາ.

ຈູຬສາໂຣປມສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.

ນິຏ຺ຐິຕາ ຈ ໂອປມ຺ມວຄ຺ຄວຓ຺ຓນາ.