໗. ວນປຕ຺ຖປຣິຍາຍສຸຕ຺ຕວຓ຺ຓນາ

໑໙໐. ວນີຍຕິ ວິເວກກາເມຫິ ຠຊີຍຕິ, ວນຸເຕ ວາ ເຕ ອຕ຺ຕສມ຺ປຕ຺ຕິຍາ ວສນຕ຺ຖາຍ ຍາຈນ຺ໂຕ ວິຍ ໂຫຕີຕິ ວນໍ, ປຕິຏ຺ຐນ຺ຕິ ເອຕ຺ຖ ວິເວກກາມາ ຍຖາຘິປ຺ເປຕວິເສສາຘິຄເມນາຕິ ປຕ຺ຖໍ, ວເນສຸ ປຕ຺ຖໍ ຄຫນຏ຺ຐາເນ ເສນາສນໍ ວນປຕ຺ຖໍ. ປຣິຍາຍຕິ ອຕ຺ຕໂນ ຜລໍ ປຣິຄ຺ຄເຫຕ຺ວາ ວຕ຺ຕຕີຕິ ປຣິຍາໂຍ, ກາຣຓນ຺ຕິ ອາຫ ‘‘ວນປຕ຺ຖປຣິຍາຍນ຺ຕິ ວນປຕ຺ຖກາຣຓ’’ນ຺ຕິ. ວນປຕ຺ຖຎ຺ຫິ ຕໍ ອຸປນິສ຺ສາຍ ວິຫຣໂຕ ອຸປນິສ຺ສຍກາຣຓໍ. ເຕນາຫ ‘‘ວນປຕ຺ຖໍ ອຸປນິສ຺ສາຍ ວິຫຣຕີ’’ຕິ. ປຣິຍາຍຕິ ເທເສຕພ຺ພມຕ຺ຖໍ ປຕິຏ຺ຐເປຕີຕິ ປຣິຍາໂຍ, ເທສນາ. ວນປຕ຺ຖໍ ອາຣພ຺ຠ ປວຕ຺ຕາ ເທສນາ ວນປຕ຺ຖເທສນາ, ຕໍ, ອຸຠຍຕ຺ຖາປິ ວນປຕ຺ຖຄ຺ຄຫຓໍ ລກ຺ຂຓມຕ຺ຕໍ ຄາມາທີນມ຺ເປຕ຺ຖ ກາຣຓຠາວສ຺ສ, ເທສນາຍ ວິສຍຠາວສ຺ສ ຈ ລພ຺ຠມານຕ຺ຕາ.

໑໙໑. ນິສ຺ສາຍາຕິ ອປສ຺ສາຍ, ວິເວກວາສສ຺ສ ອປສ຺ສຍໍ ກຕ຺ວາຕິ ອຕ຺ໂຖ. ນ ອຸປຏ຺ຐາຕີຕິອາທີຫິ ຕສ຺ມິໍ ວນປຕ຺ເຖ ເສນາສນສປ຺ປາຍາຠາວໍ, ອຸຕຸປຸຄ຺ຄລຘມ຺ມສ຺ສວນສປ຺ປາຍາຠາວມ຺ປິ ວາ ທສ຺ເສຕິ. ຊີວິຕສມ຺ຠາຣາຕິ (ອ. ນິ. ຏີ. ໓.໙.໖) ຊີວິຕປ຺ປວຕ຺ຕິຍາ ສມ຺ຠາຣາ ປຈ຺ຈຍາ. ສມຸທາເນຕພ຺ພາຕິ ສມ຺ມາ ຎາເຍນ ອນວຊ຺ຊອຸຎ຺ຉາຈຣິຍາທິນາ ອຸທ຺ຘໍ ອຸທ຺ຘໍ ອາເນຕພ຺ພາ ປາປຸຓິຕພ຺ພາ. ເຕ ປນ ຕຖາ ສມຸທານິຕາ ສມາຫຏາ ນາມ ໂຫນ຺ຕີຕິ ອາຫ ‘‘ສມາຫຣິຕພ຺ພາ’’ຕິ. ທຸກ຺ເຂນ ອຸປ຺ປຊ຺ຊນ຺ຕີຕິ ສຸລຠຸປ຺ປາທາ ນ ໂຫນ຺ຕິ. ເອເຕນ ໂຠຊນສປ຺ປາຍາທິອຠາວໍ ທສ຺ເສຕິ. ຣຕ຺ຕິຠາຄໍ ວາ ທິວສຠາຄໍ ວາຕິ ຠຸມ຺ມຕ຺ເຖ ອຸປໂຍຄວຈນນ຺ຕິ ອາຫ ‘‘ຣຕ຺ຕິໂກຏ຺ຐາເສ ວາ ທິວສໂກຏ຺ຐາເສ ວາ’’ຕິ. ຣຕ຺ຕິໍເຍວ ປກ຺ກມິຕພ຺ພໍ ສມຓຘມ຺ມສ຺ສ ຕຕ຺ຖ ອນິປ຺ຜຊ຺ຊນໂຕ.

໑໙໒-໓. ສງ຺ຂາປີຕິ ‘‘ຍທຕ຺ຖມຫໍ ປພ຺ພຊິໂຕ, ນ ເມຕໍ ອິຘ ນິປ຺ຜຊ຺ຊຕິ, ຈີວຣາທິ ປນ ສມຸທາຄຈ຺ຉຕິ, ນາຫໍ ຕທຕ຺ຖໍ ປພ຺ພຊິໂຕ, ກິໍ ເມ ອິຘ ວາເສນາ’’ຕິ ປຏິສງ຺ຂາຍປິ. ອນນ຺ຕຣວາເຣ ສງ຺ຂາປີຕິ ‘‘ຍທຕ຺ຖມຫໍ ປພ຺ພຊິໂຕ, ຕໍ ເມ ອິຘ ນິປ຺ຜຊ຺ຊຕິ, ຈີວຣາທິ ປນ ນ ສມຸທາຄຈ຺ຉຕິ, ນາຫໍ ຕທຕ຺ຖໍ ປພ຺ພຊິໂຕ’’ຕິ ປຏິສງ຺ຂາຍປີຕິ ອຕ຺ໂຖ. ເຕນາຫ ‘‘ສມຓຘມ຺ມສ຺ສ ນິປ຺ຜຊ຺ຊນຠາວໍ ຊານິຕ຺ວາ’’ຕິ.

໑໙໕-໗. ໂສ ປຸຄ຺ຄໂລ ອນາປຸຈ຺ຉາ ປກ຺ກມິຕພ຺ພໍ, ນານຸພນ຺ຘິຕພ຺ໂພຕິ ‘‘ໂສ ປຸຄ຺ຄໂລ’’ຕິ ປທສ຺ສ ‘‘ນານຸພນ຺ຘິຕພ຺ໂພ’’ຕິ ອິມິນາ ສມ຺ພນ຺ໂຘ. ຍສ຺ສ ເຍນ ຫິ ສມ຺ພນ຺ໂຘ, ທູຣຏ຺ເຐນປິ ໂສ ຠວຕິ. ຕໍ ປຸຄ຺ຄລນ຺ຕິ ‘‘ໂສ ປຸຄ຺ຄໂລ’’ຕິ ປຈ຺ຈຕ຺ຕວຈນໍ ອຸປໂຍຄວເສນ ປຣິຓາເມຕ຺ວາ ຕໍ ປຸຄ຺ຄລໍ ອນາປຸຈ຺ຉາ ປກ຺ກມິຕພ຺ພນ຺ຕິ ອຕ຺ໂຖ. ອຕ຺ຖວເສນ ຫິ ວິຠຕ຺ຕິວິປຣິຓາໂມຕິ. ຕໍ ອາປຸຈ຺ຉາ ປກ຺ກມິຕພ຺ພນ຺ຕິ ເອຕ຺ຖາປິ ເອເສວ ນໂຍ. ອາປຸຈ຺ຉາ ປກ຺ກມິຕພ຺ພນ຺ຕິ ຈ ກຕຎ຺ຎຸຕກຕເວທິຕາຍ ນິໂຍຊນໍ.

໑໙໘. ເອວຣູໂປຕິ ຍໍ ນິສ຺ສາຍ ຠິກ຺ຂຸໂນ ຄຸເຓຫິ ວຸທ຺ຘິເຍວ ປາຏິກງ຺ຂາ, ປຈ຺ຈເຍຫິ ຈ ນ ປຣິສ຺ສໂມ, ເອວຣູໂປ ທຓ຺ຑກມ຺ມາທີຫິ ນິຄ຺ຄຓ຺ຫາຕິ ເຈປິ, ນ ປຣິຈ຺ຈຊິຕພ຺ໂພຕິ ທສ຺ເສຕິ ‘‘ສເຈປີ’’ຕິອາທິນາ.

ວນປຕ຺ຖປຣິຍາຍສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.