໗. ອາວຕ຺ຕຫາຣວຓ຺ຓນາ

‘‘ອສ຺ສຸຕວາ ປຸຖຸຊ຺ຊໂນ’’ຕິ ອິມິນາ ໂຍນິໂສມນສິກາຣປຏິກ຺ເຂປມຸເຂນ ອໂຍນິໂສມນສິກາຣປຣິຄ຺ຄໂຫ ທີປິໂຕ. ‘‘ອຣິຍານໍ ອທສ຺ສາວີ’’ຕິອາທິນາ ສປ຺ປຸຣິສູປນິສ຺ສຍາທິປຏິກ຺ເຂປມຸເຂນ ອສປ຺ປຸຣິສູປນິສ຺ສຍາທິປຣິຄ຺ຄໂຫ ທີປິໂຕ. ເຕສຸ ປຸຣິມນເຍນ ອາສຍວິປຕ຺ຕິ ກິຕ຺ຕິຕາ, ທຸຕິເຍນ ປໂຍຄວິປຕ຺ຕິ. ປຸຣິເມນ ຈສ຺ສ ກິເລສວຏ຺ຏໍ, ຕຎ຺ຈ ຍໂຕ ວິປາກວຏ຺ຏນ຺ຕິ ສກລໍ ສໍສາຣຈກ຺ກມາວຕ຺ຕຕິ. ‘‘ປຖວິໍ ມຎ຺ຎຕີ’’ຕິອາທິນາ ຕຕ຺ຖ ຕິສ຺ໂສ ມຎ຺ຎນາ ວຸຕ຺ຕາ. ຕາສຸ ຕຓ຺ຫາມຎ຺ຎນາ ‘‘ເອຕໍ ມມາ’’ຕິ ຕຓ຺ຫາຄ຺ຄາໂຫ, ມານມຎ຺ຎນາ ‘‘ເອໂສຫມສ຺ມີ’’ຕິ ມານຄ຺ຄາໂຫ, ທິຏ຺ຐິມຎ຺ຎນາ ‘‘ເອໂສ ເມ ອຕ຺ຕາ’’ຕິ ທິຏ຺ຐິຄ຺ຄາໂຫ. ຕຕ຺ຖ ຕຓ຺ຫາຄ຺ຄາເຫນ ‘‘ຕຓ຺ຫໍ ປຏິຈ຺ຈປຣິເຍສນາ’’ຕິອາທິກາ (ທີ. ນິ. ໒.໑໐໓; ທີ. ນິ. ໓.໓໕໙; ອ. ນິ. ໓.໒໓; ວິຠ. ໙໖໓) ນວ ຕຓ຺ຫາມູລກາ ຘມ຺ມາ ອາວຕ຺ຕນ຺ຕິ. ມານຄ຺ຄາເຫນ ‘‘ເສຍ຺ໂຍຫມສ຺ມີ’’ຕິອາທິກາ ນວ ມານວິຘາ ອາວຕ຺ຕນ຺ຕິ. ທິຏ຺ຐິຄ຺ຄາເຫນ ‘‘ຣູປໍ ອຕ຺ຕໂຕ ສມນຸປສ຺ສຕີ’’ຕິອາທິກາ (ສໍ. ນິ. ໔.໓໔໕) ວີສຕິວຕ຺ຖຸກາ ສກ຺ກາຍທິຏ຺ຐິ ອາວຕ຺ຕຕິ. ຕີສຸ ຈ ຄາເຫສຸ ຍາຍ ສຎ຺ຎາຍ ຕຓ຺ຫາຄ຺ຄາຫສ຺ສ ວິກ຺ຂມ຺ຠນາ, ສາ ທຸກ຺ຂສຎ຺ຎາ ທຸກ຺ຂານຸປສ຺ສນາ. ຍາຍ ສຎ຺ຎາຍ ມານຄ຺ຄາຫສ຺ສ ວິກ຺ຂມ຺ຠນາ, ສາ ອນິຈ຺ຈສຎ຺ຎາ ອນິຈ຺ຈານຸປສ຺ສນາ. ຍາຍ ປນ ສຎ຺ຎາຍ ທິຏ຺ຐິຄ຺ຄາຫສ຺ສ ວິກ຺ຂມ຺ຠນາ, ສາ ອນຕ຺ຕສຎ຺ຎາ ອນຕ຺ຕານຸປສ຺ສນາ. ຕຕ຺ຖ ປຐມຄ຺ຄາຫວິສຠາຄໂຕ ອປ຺ປຓິຫິຕວິໂມກ຺ຂມຸຂໍ ອາວຕ຺ຕຕິ, ທຸຕິຍຄ຺ຄາຫວິສຠາຄໂຕ ອນິມິຕ຺ຕວິໂມກ຺ຂມຸຂໍ ອາວຕ຺ຕຕິ, ຕຕິຍຄ຺ຄາຫວິສຠາຄໂຕ ສຸຎ຺ຎຕວິໂມກ຺ຂມຸຂໍ ອາວຕ຺ຕຕິ.

ເສກ຺ຂຄ຺ຄຫເຓນ ອຣິຍາຍ ສມ຺ມາທິຏ຺ຐິຍາ ສງ຺ຄໂຫ, ຕໂຕ ຈ ປຣໂຕໂຆສໂຍນິໂສມນສິກາຣາ ທີປິຕາ ໂຫນ຺ຕິ. ປຣໂຕໂຆເສນ ຈ ສຸຕວາ ອຣິຍສາວໂກຕິ ອາວຕ຺ຕຕິ, ໂຍນິໂສມນສິກາເຣນ ນວ ໂຍນິໂສມນສິກາຣມູລກາ ຘມ຺ມາ ອາວຕ຺ຕນ຺ຕິ, ຈຕຸພ຺ພິຘຎ຺ຈ ສມ຺ປຕ຺ຕິຈກ຺ກໍ. ‘‘ມາ ມຎ຺ຎີ’’ຕິ ມຎ຺ຎນານໍ ວິປ຺ປກຕປ຺ປຫານຕາຄຫເຓນ ເອກຈ຺ຈາສວປຣິກ຺ຂໂຍ ທີປິໂຕ ໂຫຕິ, ເຕນ ຈ ສທ຺ຘາວິມຸຕ຺ຕທິຏ຺ຐິປ຺ປຕ຺ຕກາຍສກ຺ຂິຠາວາ ອາວຕ຺ຕນ຺ຕິ. ‘‘ອຣຫໍ ຂີຓາສໂວ’’ຕິອາທິນາ ອເສກ຺ຂາ ສີລກ຺ຂນ຺ຘາທໂຍ ທສ຺ສິຕາ ໂຫນ຺ຕິ, ສີລກ຺ຂນ຺ຘາທິປາຣິປູຣິຍາ ຈ ທສ ນາຖກຣຓາ ຘມ຺ມາ ອາວຕ຺ຕນ຺ຕິ. ‘‘ນ ມຎ຺ຎຕີ’’ຕິ ມຎ຺ຎນາປຏິກ຺ເຂເປນ ປຎ຺ຈສຸ ອຸປາທານກ຺ຂນ຺ເຘສຸ ‘‘ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາ’’ຕິ ສມ຺ມາປຏິປຕ຺ຕິ ທສ຺ສິຕາ, ຕາຍ ຈ ສາຕິສຍາ ນິກນ຺ຕິປຣິຍາທານມານສມຸຄ຺ຆາຏນທິຏ຺ຐິອຸຄ຺ຆາຏນານິ ປກາສິຕານີຕິ ອປ຺ປຓິຫິຕານິມິຕ຺ຕ-ສຸຎ຺ຎຕວິໂມກ຺ຂາ ອາວຕ຺ຕນ຺ຕິ.

‘‘ຕຖາຄໂຕ’’ຕິອາທິນາ ສພ຺ພຎ຺ຎຸຄຸຓາ ວິຠາວິຕາຕິ ຕທວິນາຠາວໂຕ ທສພລ-ຈຕຸເວສາຣຊ຺ຊອສາຘາຣຓຎາຓອາເວຓິກພຸທ຺ຘຘມ຺ມາ ອາວຕ຺ຕນ຺ຕິ. ‘‘ນນ຺ທີ ທຸກ຺ຂສ຺ສ ມູລ’’ນ຺ຕິອາທິນາ ສທ຺ຘິໍ ເຫຕຸນາ ວຏ຺ຏວິວຏ຺ຏໍ ກຖິຕນ຺ຕິ ປວຕ຺ຕິນິວຕ຺ຕິຕທຸຠຍເຫຕຸວິຠາວເນນ ຈຕ຺ຕາຣິ ອຣິຍສຈ຺ຈານິ ອາວຕ຺ຕນ຺ຕິ. ‘‘ຕຓ຺ຫານໍ ຂຍາ’’ຕິອາທິນາ ຕຓ຺ຫປ຺ປຫານາປເທເສນ ຕເທກຏ຺ຐຠາວໂຕ ທິຍຑ຺ຒສ຺ສ ກິເລສສຫສ຺ສສ຺ສ ປຫານໍ ອາວຕ຺ຕຕິ. ‘‘ສພ຺ພໂສ ຕຓ຺ຫານໍ ຂຍາ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’’ຕິ ຈ ວຸຕ຺ຕຕ຺ຕາ ‘‘ນນ຺ທີ ທຸກ຺ຂສ຺ສ ມູລ’’ນ຺ຕິ, ‘‘ອິຕິ ວິທິຕ຺ວາ’’ຕິອາທິນາ ວຸຕ຺ຕສ຺ສ ມຎ຺ຎນາຠາວເຫຕຸຠູຕສ຺ສ ປຈ຺ຈຍາກາຣເວທນສ຺ສ ສາວເກຫິ ອສາຘາຣຓຎາຓຈາຣຠາໂວ ທສ຺ສິໂຕ, ເຕນ ຈຕຸວີສຕິໂກຏິສຕສຫສ຺ສສມາປຕ຺ຕິສຎ຺ຈາຣິ ຠຄວໂຕ ມຫາວຊິຣຎາຓໍ ອາວຕ຺ຕຕີຕິ. ອຍໍ ອາວຕ຺ໂຕ ຫາໂຣ.