໘. ວິຠຕ຺ຕິຫາຣວຓ຺ຓນາ

‘‘ສພ຺ພຘມ຺ມມູລປຣິຍາຍ’’ນ຺ຕິ ເອຕ຺ຖ ສພ຺ພຘມ຺ມາ ນາມ ເຕຠູມກາ ຘມ຺ມາ ສກ຺ກາຍສ຺ສ ອຘິປ຺ເປຕຕ຺ຕາ. ເຕສໍ ມຎ຺ຎນາ ປທຏ຺ຐານໍ ປປຎ຺ຈສງ຺ຂານິມິຕ຺ຕຕ຺ຕາ ໂລກວິຈິຕ຺ຕສ຺ສ. ຕຍິເມ ກຸສລາ ອກຸສລາ ອພ຺ຍາກຕາຕິ ຕິວິຘາ. ເຕສຸ ກຸສລານໍ ໂຍນິໂສມນສິກາຣາທິ ປທຏ຺ຐານໍ, ອກຸສລານໍ ອໂຍນິໂສມນສິກາຣາທິ, ອພ຺ຍາກຕານໍ ກມ຺ມຠວອາວຊ຺ຊນຠູຕຣູປາທິ ປທຏ຺ຐານໍ. ຕຕ຺ຖ ກຸສລາ ກາມາວຈຣາທິວເສນ ຠູມິໂຕ ຕິວິຘາ, ຕຖາ ອພ຺ຍາກຕາ ຈິຕ຺ຕຸປ຺ປາທສຠາວາ, ອຈິຕ຺ຕຸປ຺ປາທສຠາວາ ປນ ກາມາວຈຣາວ ຕຖາ ອກຸສລາ. ປຣິຍຕ຺ຕິປຏິປຕ຺ຕິປຏິເວຘສຸຕກິຈ຺ຈາຠາເວນ ຕິວິໂຘ ອສ຺ສຸຕວາ. ອນ຺ຘກລ຺ຍາຓວິຠາເຄນ ທຸວິໂຘ ປຸຖຸຊ຺ຊໂນ. ສມ຺ມາສມ຺ພຸທ຺ຘປຈ຺ເຈກພຸທ຺ຘສາວກເຠເທນ ຕິວິຘາ ອຣິຍາ. ມໍສຈກ຺ຂຸທິພ຺ພຈກ຺ຂຸປຎ຺ຎາຈກ຺ຂູຫິ ທສ຺ສນາຠາເວນ ຕິວິໂຘ ອທສ຺ສາວີ. ມຄ຺ຄຜລນິພ຺ພານເຠເທນ ຕິວິໂຘ, ນວວິໂຘ ວາ ອຣິຍຘມ຺ໂມ. ສວນຘາຣຓປຣິຈຍມນສິກາຣປຏິເວຘວເສນ ປຎ຺ຈວິຘາ ອຣິຍຘມ຺ມສ຺ສ ໂກວິທຕາ. ຕທຠາວໂຕ ອໂກວິໂທ. ສໍວຣປຫານເຠເທນ ທຸວິໂຘ, ທສວິໂຘ ວາ ອຣິຍຘມ຺ມວິນໂຍ, ຕທຠາວໂຕ ອຣິຍຘມ຺ເມ ອວິນີໂຕ. ເອຕ຺ຖ ປທຏ຺ຐານວິຠາໂຄ ເຫຏ຺ຐາ ທສ຺ສິໂຕເຍວ. ‘‘ສປ຺ປຸຣິສານໍ ອທສ຺ສາວີ’’ຕິອາທີສຸປິ ເອເສວ ນໂຍ. ‘‘ປຖວິໍ ມຎ຺ຎຕີ’’ຕິອາທີສຸ ມຎ຺ຎນາວຕ຺ຖຸວິຠາໂຄ ປາຬິຍໍ ອາຄໂຕວ, ຕຖາ ອຊ຺ຌຕ຺ຕິກພາຫິຣາທິໂກ ຈ ອນ຺ຕຣວິຠາໂຄ.

ມຎ຺ຎນາ ປນ ຕຓ຺ຫາມານທິຏ຺ຐິວເສນ ສງ຺ເຂປໂຕ ຕິວິຘາ, ວິຕ຺ຖາຣໂຕ ປນ ຕຓ຺ຫາມຎ຺ຎນາ ຕາວ ກາມຕຓ຺ຫາທິວເສນ ອຏ຺ຐສຕວິຘາ, ຕຖາ ‘‘ອສ຺ມີຕິ ສຕິ ອິຕ຺ຖໍສ຺ມີຕິ ໂຫຕີ’’ຕິອາທິນາ. ເອວໍ ມານມຎ຺ຎນາປິ. ‘‘ອສ຺ມີຕິ ສຕິ ອິຕ຺ຖໍສ຺ມີຕິ ໂຫຕີ’’ຕິອາທິນາ ປປຎ຺ຈຕ຺ຕຍໍ ອຸທ຺ທິຏ຺ຐໍ ນິທ຺ທິຏ຺ຐຎ຺ຈາຕິ. ເອເຕນ ທິຏ຺ຐິມຎ຺ຎນາຍປິ ອຏ຺ຐສຕວິຘຕາ ວຸຕ຺ຕາຕິ ເວທິຕພ຺ພາ. ອປິຈ ເສຍ຺ຍສ຺ສ ‘‘ເສຍ຺ໂຍຫມສ຺ມີ’’ຕິອາທິນາ ມານມຎ຺ຎນາຍ ນວວິຘຕາ ຕທນ຺ຕຣເຠເທນ ອເນກວິຘຕາ ຈ ເວທິຕພ຺ພາ. ອຍຎ຺ຈ ອຕ຺ໂຖ ຫີນຕ຺ຕິກຕ຺ຖວຓ຺ຓນາຍ ວິຠາເວຕພ຺ໂພ. ທິຏ຺ຐິມຎ຺ຎນາຍ ປນ ພ຺ຣຫ຺ມຊາເລ ອາຄຕນເຍນ ທ຺ວາສຏ຺ຐິວິຘຕາ ຕທນ຺ຕຣເຠເທນ ອເນກວິຘຕາ ຈ ເວທິຕພ຺ພາ. ‘‘ອປຣິຎ຺ຎາຕ’’ນ຺ຕິ ເອຕ຺ຖ ຎາຕປຣິຎ຺ຎາທິວເສນ ເຈວ ຣູປມຸຂາທິອຠິນິເວສເຠທາທິວເສນ ຈ ປຣິຎ຺ຎານໍ ອເນກວິຘຕາ ເວທິຕພ຺ພາ. ຕຖາ ອຏ຺ຐມກາທິວເສນ ເສກ຺ຂວິຠາໂຄ ປຎ຺ຎາວິມຸຕ຺ຕາທິວເສນ ອເສກ຺ຂວິຠາໂຄ ຈ. ອຍເມຕ຺ຖ ຘມ຺ມວິຠາໂຄ. ປທຏ຺ຐານວິຠາໂຄ ຈ ຠູມິວິຠາໂຄ ຈ ວຸຕ຺ຕນຍານຸສາເຣນ ເວທິຕພ຺ພາຕິ. ອຍໍ ວິຠຕ຺ຕິຫາໂຣ.