໓. ຍຸຕ຺ຕິຫາຣວຓ຺ຓນາ

ສກ຺ກາຍສ຺ສ ສພ຺ພມຎ຺ຎນານໍ ມູລຠາໂວ ຍຸຊ຺ຊຕິ ປຣິກປ຺ປມຕ຺ຕກຕ຺ຕາ ໂລກວິຈິຕ຺ຕສ຺ສ. ພ຺ຍາຫຸສຈ຺ຈທ຺ວຍຣຫິຕສ຺ສ ອນ຺ຘປຸຖຸຊ຺ຊນຠາໂວ ຍຸຊ຺ຊຕິ ປຸຖຸກິເລສາຠິສງ຺ຂາຣຊນນາທິສຠາວຕ຺ຕາ. ຍຖາວຸຕ຺ຕປຸຖຸຊ຺ຊນສ຺ສ ວາ ວຸຕ຺ຕປ຺ປກາຣພາຫຸສຈ຺ຈາຠາໂວ ຍຸຊ຺ຊຕິ ຕສ຺ມິໍ ສຕິ ສພ຺ຠາວໂຕ. ຕຕ຺ຖ ອສ຺ສຸຕວໂຕ ປຸຖຸຊ຺ຊນສ຺ສ ອຣິຍານໍ ສປ຺ປຸຣິສານຎ຺ຈ ອທສ຺ສາວິຕາທິ ຍຸຊ຺ຊຕິ ອຣິຍກຣຘມ຺ມານໍ ອຣິຍຠາວສ຺ສ ຈ ເຕນ ອທິຏ຺ຐຕ຺ຕາ ອປ຺ປຏິປນ຺ນຕ຺ຕາ ຈ ຕຖາ ຕສ຺ສ ປຖວິຍາ ‘‘ອຫໍ ປຖວີ, ມມ ປຖວີ, ປໂຣ ປຖວີ’’ຕິ ສຎ຺ຊານນໍ ຍຸຊ຺ຊຕິ ອຫໍກາຣມມໍກາຣານໍ ສພ຺ເພນ ສພ຺ພໍ ອປ຺ປຫີນຕ຺ຕາ. ຕຖາ ສຎ຺ຊານໂຕ ຈສ຺ສ ປຖວິໍ ກມ຺ມາທິກຣຓາທິວເສນ ຄເຫຕ຺ວາ ນານປ຺ປກາຣໂຕ ມຎ຺ຎນາປວຕ຺ຕິ ຍຸຊ຺ຊຕິ ສຎ຺ຎານິທານຕ຺ຕາ ປປຎ຺ຈສງ຺ຂານໍ. ໂຍ ມຎ຺ຎຕິ, ຕສ຺ສ ອປຣິຎ຺ຎາຕວຕ຺ຖຸກຕາ ຍຸຊ຺ຊຕິ ປຣິຎ຺ຎາຍ ວິນາ ມຎ຺ຎນາປຫານາຠາວໂຕ. ‘‘ອາປໍ ອາປໂຕ ສຎ຺ຊານາຕີ’’ຕິອາທີສຸປິ ເອເສວ ນໂຍ. ອປຣິໂຍສິຕສິກ຺ຂສ຺ສ ອປ຺ປຕ຺ຕມານສຕາ ຍຸຊ຺ຊຕິ ກຕກິຈ຺ຈຕາຠາວໂຕ. ເສກ຺ຂສ຺ສ ສໂຕ ໂຍຄກ຺ເຂມປຕ຺ຖນາ ຍຸຊ຺ຊຕິ ຕທຘິມຸຕ຺ຕຠາວໂຕ. ຕຖາ ຕສ຺ສ ປຖວິຍາ ອຠິຊານນາ ຍຸຊ຺ຊຕິ ປຣິຎ຺ຎາປຫາເນສຸ ມຕ຺ຕໂສ ກາຣິຠາວໂຕ. ຕໂຕ ເອວ ຈສ຺ສ ‘‘ມາ ມຎ຺ຎີ’’ຕິ ວຕ຺ຕພ຺ພຕາ ຍຸຊ຺ຊຕິ ວຕ຺ຖຸປຣິຎ຺ຎາຍ ວິຍ ມຎ຺ຎນາປຫານສ຺ສປິ ວິປ຺ປກຕຠາວໂຕ. ເສກ຺ຂສ຺ສ ປຖວິຍາ ປຣິຎ຺ເຎຍ຺ຍຕາ ຍຸຊ຺ຊຕິ ປຣິຎ຺ຎາຕຸໍ ສກ຺ກຸເຓຍ຺ຍຕ຺ຕາ ສພ຺ພໂສ ອປຣິຎ຺ຎາຕຕ຺ຕາ ຈ. ‘‘ອາປໍ ອາປໂຕ’’ຕິອາທີສຸປິ ເອເສວ ນໂຍ. ອຣຫຕ຺ຕາທິຍຸຕ຺ຕສ຺ສ ປຖວິຍາທີນໍ ອຠິຊານນາ ມຎ຺ຎນາຠາໂວ ຈ ຍຸຊ຺ຊຕິ ສງ຺ຂາຕຘມ຺ມຕ຺ຕາ, ສພ຺ພໂສ ກິເລສານໍ ປຫີນຕ຺ຕາ, ຕໂຕ ເອວ ຈສ຺ສ ວີຕຣາຄາທິຠາໂວ ຕໂຕ ສມ຺ມເທວ ຈ ປຏິຈ຺ຈສມຸປ຺ປາທສ຺ສ ປຏິວິທ຺ຘຕາຕິ. ອຍໍ ຍຸຕ຺ຕິຫາໂຣ.