໔. ປທຏ຺ຐານຫາຣວຓ຺ຓນາ

ກິສ຺ໂສປິ ມຎ຺ຎນາ ສກ຺ກາຍສ຺ສ ປທຏ຺ຐານໍ, ມຎ຺ຎນານໍ ອໂຍນິໂສມນສິກາໂຣ ປທຏ຺ຐານໍ, ສຸຕທ຺ວຍວິຣໂຫ ອນ຺ຘປຸຖຸຊ຺ຊນຠາວສ຺ສ ປທຏ຺ຐານໍ, ໂສ ອຣິຍານໍ ອທສ຺ສາວິຕາຍ ປທຏ຺ຐານໍ, ສາ ອຣິຍຘມ຺ມສ຺ສ ອໂກວິທຕາຍ ປທຏ຺ຐານໍ, ສາ ອຣິຍຘມ຺ເມ ອວິນີຕຕາຍ ປທຏ຺ຐານໍ. ‘‘ສປ຺ປຸຣິສານໍ ອທສ຺ສາວີ’’ຕິ ເອຕ຺ຖາປິ ເອເສວ ນໂຍ. ສຎ຺ຎາວິປລ຺ລາໂສ ມຎ຺ຎນານໍ ປທຏ຺ຐານໍ. ສຎ຺ຎານິທານາ ຫິ ປປຎ຺ຈສງ຺ຂາຕິ. ມຎ຺ຎນາສຸ ຈ ຕຓ຺ຫາມຎ຺ຎນາ ອິຕຣມຎ຺ຎນານໍ ປທຏ຺ຐານໍ ‘‘ຕຓ຺ຫາຄຕານໍ ປຣິຕສ຺ສິຕວິປ຺ຜນ຺ທິຕ’’ນ຺ຕິ, (ທີ. ນິ. ໑.໑໐໕-໑໐໙) ‘‘ຕຓ຺ຫາປຈ຺ຈຍາ ອຸປາທານ’’ນ຺ຕິ (ມ. ນິ. ໓.໑໒໖; ມຫາວ. ໑) ຈ ວຈນໂຕ, ຕຓ຺ຫາຄຕສ຺ເສວ ຈ ‘‘ເສຍ຺ໂຍຫມສ຺ມິ’’ນ຺ຕິອາທິນາ ມານຊປ຺ປນາສພ຺ຠາວຕາ. ສພ຺ພາປິ ວາ ມຎ຺ຎນາ ສພ຺ພາສໍ ມຎ຺ຎນານໍ ປທຏ຺ຐານໍ. ‘‘ອຸປາທານປຈ຺ຈຍາ ຕຓ຺ຫາ’’ຕິ ຫິ ວຈນໂຕ ທິຏ຺ຐິປິ ຕຓ຺ຫາຍ ປທຏ຺ຐານໍ. ‘‘ອຫມສ຺ມິ ພ຺ຣຫ຺ມາ ມຫາພ຺ຣຫ຺ມາ’’ຕິ (ທີ. ນິ. ໑.໔໒; ໓.໓໙) ອາທິວຈນໂຕ ມາໂນປິ ທິຏ຺ຐິຍາ ປທຏ຺ຐານໍ. ຕຖາ ‘‘ອສ຺ມີຕິ ສຕິ ອິຕ຺ຖໍສ຺ມີຕິ ໂຫຕິ, ເອວໍສ຺ມີຕິ ໂຫຕິ, ອຎ຺ຎຖາສ຺ມີຕິ ໂຫຕີ’’ຕິອາທິວຈນໂຕ ມານສ຺ສປິ ຕຓ຺ຫາຍ ປທຏ຺ຐານຕາ ລພ຺ຠເຕວ. ເສກ຺ຂາ ຘມ຺ມາ ສປ຺ປເທສໂຕ ມຎ຺ຎນາປຫານສ຺ສ ປທຏ຺ຐານໍ. ອເສກ຺ຂາ ນິປ຺ປເທສໂຕ ມຎ຺ຎນາປຫານສ຺ສ ປທຏ຺ຐານໍ. ກມ຺ມຠໂວ ຈ ຊາຕິຍາ ປທຏ຺ຐານໍ. ຊາຕິ ຊຣາມຣຓສ຺ສ ປທຏ຺ຐານໍ. ປຈ຺ຈຍາກາຣສ຺ສ ຍຖາຠູຕາວໂພໂຘ ສມ຺ມາສມ຺ໂພຘິຍາ ປທຏ຺ຐານນ຺ຕິ. ອຍໍ ປທຏ຺ຐາໂນ ຫາໂຣ.