໑໖. ສມາໂຣປນຫາຣວຓ຺ຓນາ

‘‘ສພ຺ພຘມ຺ມມູລປຣິຍາຍ’’ນ຺ຕິອາທີສຸ ມູລປຣິຍາຍຄ຺ຄຫເຓນ ອສ຺ສຸຕວາຄຫເຓນ ສຎ຺ຊານນມຎ຺ຎນາປຣິຎ຺ຎາຄຫເຓຫິ ຈ ສໍກິເລສຘມ຺ມາ ທສ຺ສິຕາ, ເຕ ຈ ສງ຺ເຂປໂຕ ຕິວິຘາ ຕຓ຺ຫາສໍກິເລໂສ ທິຏ຺ຐິສໍກິເລໂສ ທຸຈ຺ຈຣິຕສໍກິເລໂສຕິ. ຕຕ຺ຖ ຕຓ຺ຫາສໍກິເລໂສ ຕຓ຺ຫາສໍກິເລສສ຺ສ, ທິຏ຺ຐິສໍກິເລສສ຺ສ, ທຸຈ຺ຈຣິຕສໍກິເລສສ຺ສ ຈ ປທຏ຺ຐານໍ, ຕຖາ ທິຏ຺ຐິສໍກິເລໂສ ທິຏ຺ຐິສໍກິເລສສ຺ສ, ຕຓ຺ຫາສໍກິເລສສ຺ສ, ທຸຈ຺ຈຣິຕສໍກິເລສສ຺ສ ຈ ປທຏ຺ຐານໍ, ທຸຈ຺ຈຣິຕສໍກິເລໂສປິ ທຸຈ຺ຈຣິຕສໍກິເລສສ຺ສ, ຕຓ຺ຫາສໍກິເລສສ຺ສ, ທິຏ຺ຐິສໍກິເລສສ຺ສ ຈ ປທຏ຺ຐານໍ. ເຕສຸ ຕຓ຺ຫາສໍກິເລໂສ ອຕ຺ຖໂຕ ໂລໂຠວ, ໂຍ ‘‘ໂລໂຠ ລຸພ຺ຠນາ ລຸພ຺ຠິຕຕ຺ຕໍ ສາຣາໂຄ ສາຣຊ຺ຊນາ ສາຣຊ຺ຊິຕຕ຺ຕ’’ນ຺ຕິອາທິນາ (ຘ. ສ. ໓໘໙) ອເນເກຫິ ປຣິຍາເຍຫິ ວິຠຕ຺ໂຕ. ຕຖາ ທິຏ຺ຐິເຍວ ທິຏ຺ຐິສໍກິເລໂສ, ໂຍ ‘‘ທິຏ຺ຐິຄຕໍ ທິຏ຺ຐິຄຫນໍ ທິຏ຺ຐິກນ຺ຕາໂຣ ທິຏ຺ຐິວິສູກໍ ທິຏ຺ຐິວິປ຺ຜນ຺ທິຕ’’ນ຺ຕິອາທິນາ (ຘ. ສ. ໑໑໐໕) ອເນເກຫິ ປຣິຍາເຍຫິ, ‘‘ສນ຺ຕິ, ຠິກ຺ຂເວ, ເອເກ ສມຓພ຺ຣາຫ຺ມຓາ’’ຕິອາທິນາ (ທີ. ນິ. ໑.໓໐) ທ຺ວາສຏ຺ຐິຍາ ປເຠເທຫິ ຈ ວິຠຕ຺ໂຕ. ທຸຈ຺ຈຣິຕສໍກິເລໂສ ປນ ອຕ຺ຖໂຕ ທຸສ຺ສີລ຺ຍເຈຕນາ ເຈວ ເຈຕນາສມ຺ປຍຸຕ຺ຕຘມ຺ມາ ຈ, ຍາ ‘‘ກາຍທຸຈ຺ຈຣິຕໍ ວຈີທຸຈ຺ຈຣິຕໍ ກາຍວິສມໍ ວຈີວິສມ’’ນ຺ຕິ (ວິຠ. ໙໑໓, ໙໒໔), ‘‘ປາຓາຕິປາໂຕ ອທິນ຺ນາທານ’’ນ຺ຕິ (ວິຠ. ໙໑໓) ຈ ອາທິນາ ອເນເກຫິ ປຣິຍາເຍຫິ, ອເນເກຫິ ປເຠເທຫິ ຈ ວິຠຕ຺ຕາ.

ເຕສຸ ຕຓ຺ຫາສໍກິເລສສ຺ສ ສມໂຖ ປຏິປກ຺ໂຂ, ທິຏ຺ຐິສໍກິເລສສ຺ສ ວິປສ຺ສນາ, ທຸຈ຺ຈຣິຕສໍກິເລສສ຺ສ ສີລໍ ປຏິປກ຺ໂຂ. ເຕ ປນ ສີລາທໂຍ ຘມ຺ມາ ອິຘ ປຣິຎ຺ຎາຄຫເຓນ ເສກ຺ຂຄ຺ຄຫເຓນ ‘‘ອຣຫ’’ນ຺ຕິອາທິນາ ອຣິຍຕາທິຄ຺ຄຫເຓນ ຈ ຄຫິຕາ. ຕຕ຺ຖ ສີເລນ ທຸຈ຺ຈຣິຕສໍກິເລສປ຺ປຫານໍ ສິຊ຺ຌຕິ, ຕຖາ ຕທງ຺ຄປ຺ປຫານໍ ວີຕິກ຺ກມປ຺ປຫານຎ຺ຈ, ສມເຖນ ຕຓ຺ຫາສໍກິເລສປ຺ປຫານໍ ສິຊ຺ຌຕິ, ຕຖາ ວິກ຺ຂມ຺ຠນປ຺ປຫານໍ ປຣິຍຸຏ຺ຐານປ຺ປຫານຎ຺ຈ. ວິປສ຺ສນາຍ ທິຏ຺ຐິສໍກິເລສປ຺ປຫານໍ ສິຊ຺ຌຕິ, ຕຖາ ສມຸຈ຺ເຉທປ຺ປຫານໍ ອນຸສຍປ຺ປຫານຎ຺ຈ. ຕຕ຺ຖ ປຸພ຺ພຠາເຄ ສີເລ ປຕິຏ຺ຐິຕສ຺ສ ສມໂຖ, ສມເຖ ປຕິຏ຺ຐິຕສ຺ສ ວິປສ຺ສນາ, ມຄ຺ຄກ຺ຂເຓ ປນ ສມກາລເມວ ຠວນ຺ຕິ. ປຸພ຺ເພເຍວ ຫິ ສຸປຣິສຸທ຺ຘກາຍວຈີກມ຺ມສ຺ສ ສຸປຣິສຸທ຺ຘາຊີວສ຺ສ ຈ ສມຖວິປສ຺ສນາ ອາຣທ຺ຘາ ຄພ຺ຠໍ ຄຓ຺ຫນ຺ຕິໂຍ ປຣິປາກໍ ຄຈ຺ຉນ຺ຕິໂຍ ວຸຏ຺ຐານຄາມິນິວິປສ຺ສນໍ ປຣິພ຺ຣູເຫນ຺ຕິ, ວຸຏ຺ຐານຄາມິນິວິປສ຺ສນາ ຠາວນາປາຣິປູຣິໍ ຄຈ຺ຉນ຺ຕີ ມຄ຺ເຄນ ຆເຏນ຺ຕິ ມຄ຺ຄກ຺ຂເຓ ສມຖວິປສ຺ສນາ ປຣິປູເຣຕິ. ອຖ ມຄ຺ຄກ຺ຂເຓ ສມຖວິປສ຺ສນາຠາວນາປາຣິປູຣິຍາ ອນວເສສສໍກິເລສຘມ຺ມໍ ສມຸຈ຺ຉິນ຺ທນ຺ຕິໂຍ ນິໂຣຘໍ ນິພ຺ພານໍ ສຈ຺ຉິກໂຣນ຺ຕີຕິ. ອຍໍ ສມາໂຣປໂນ ຫາໂຣ.

ໂສຬສຫາຣວຓ຺ຓນາ ນິຏ຺ຐິຕາ.