໑໑. ປຎ຺ຎຕ຺ຕິຫາຣວຓ຺ຓນາ

‘‘ສພ຺ພຘມ຺ມມູລປຣິຍາຍ’’ນ຺ຕິ ເອຕ຺ຖ ສພ຺ພຘມ຺ມາ ນາມ ສກ຺ກາຍຘມ຺ມາ, ເຕ ຂນ຺ຘວເສນ ປຎ຺ຈຘາ ປຎ຺ຎຕ຺ຕາ, ອາຍຕນວເສນ ທ຺ວາທສຘາ, ຘາຕຸວເສນ ອຏ຺ຐາຣສຘາ ປຎ຺ຎຕ຺ຕາ. ‘‘ມູລ’’ນ຺ຕິ ວາ ‘‘ມູລປຣິຍາຍ’’ນ຺ຕິ ວາ ມຎ຺ຎນາ ວຸຕ຺ຕາ, ຕາ ຕຓ຺ຫາມານທິຏ຺ຐິວເສນ ຕິຘາ ອນ຺ຕຣເຠເທນ ອເນກຘາ ຈ ປຎ຺ຎຕ຺ຕາ. ອຖ ວາ ‘‘ສພ຺ພຘມ຺ມາ’’ຕິ ເຕຠູມກຘມ຺ມານໍ ສງ຺ຄຫປຎ຺ຎຕ຺ຕິ, ‘‘ມູລປຣິຍາຍ’’ນ຺ຕິ ເຕສໍ ປຠວປຎ຺ຎຕ຺ຕິ, ‘‘ໂວ’’ຕິ ສມ຺ປທານປຎ຺ຎຕິ, ‘‘ເທເສສ຺ສາມິ ຠາສິສ຺ສາມີ’’ຕິ ປຏິຎ຺ຎາປຎ຺ຎຕ຺ຕິ, ‘‘ສຸຓາຖ ສາຘຸກໍ ມນສິ ກໂຣຖາ’’ຕິ ຈ ອາຓາປນປຎ຺ຎຕ຺ຕິ, ‘‘ອສ຺ສຸຕວາ’’ຕິ ປຏິເວຘວິມຸຂຕາປຎ຺ຎຕ຺ຕິ ເຈວ ປຣິຍຕ຺ຕິວິມຸຂຕາປຎ຺ຎຕ຺ຕິ ຈ, ‘‘ປຸຖຸຊ຺ຊໂນ’’ຕິ ອນຣິຍປຎ຺ຎຕ຺ຕິ, ສາ ອຣິຍຘມ຺ມປຏິກ຺ເຂປປຎ຺ຎຕ຺ຕິ ເຈວ ອຣິຍຘມ຺ມວິຣຫປຎ຺ຎຕ຺ຕິ ຈ, ‘‘ອຣິຍານ’’ນ຺ຕິ ອສມປຎ຺ຎຕ຺ຕິ ເຈວ ສມປຎ຺ຎຕ຺ຕິ ຈ. ຕຕ຺ຖ ອສມປຎ຺ຎຕ຺ຕິ ຕຖາຄຕປຎ຺ຎຕ຺ຕິ, ສມປຎ຺ຎຕ຺ຕິ ປຈ຺ເຈກພຸທ຺ຘານຎ຺ເຈວ ອຸຠໂຕຠາຄວິມຸຕ຺ຕາທີນຎ຺ຈ ວເສນ ອຏ຺ຐວິຘາ ເວທິຕພ຺ພາ. ‘‘ອຣິຍານໍ ອທສ຺ສາວີ’’ຕິອາທິ ທສ຺ສນຠາວນາປຏິກ຺ເຂປປຎ຺ຎຕ຺ຕິ, ‘‘ປຖວິໍ ມຎ຺ຎຕີ’’ຕິອາທິ ປຎ຺ຈນ຺ນໍ ອຸປາທານກ຺ຂນ຺ຘານໍ ທ຺ວາທສນ຺ນໍ ອາຍຕນານໍ ອຏ຺ຐາຣສນ຺ນໍ ຘາຕູນໍ ສມ຺ມສນຸປຄານໍ ອິນ຺ທ຺ຣິຍານໍ ນິກ຺ເຂປປຎ຺ຎຕ຺ຕິ ເຈວ ປຠວປຎ຺ຎຕ຺ຕິ ຈ, ຕຖາ ວິປລ຺ລາສານໍ ກິຈ຺ຈປຎ຺ຎຕ຺ຕິ ປຣິຍຸຏ຺ຐານໍ ທສ຺ສນປຎ຺ຎຕ຺ຕິ ກິເລສານໍ ຜລປຎ຺ຎຕ຺ຕິ ອຠິສງ຺ຂາຣານໍ ວິຣູຫນປຎ຺ຎຕ຺ຕິ ຕຓ຺ຫາຍ ອສ຺ສາທນປຎ຺ຎຕ຺ຕິ ທິຏ຺ຐິຍາ ວິປ຺ຜນ຺ທນປຎ຺ຎຕ຺ຕິ, ‘‘ເສກ຺ຂາ’’ຕິ ສທ຺ຘານຸສາຣີສທ຺ຘາວິມຸຕ຺ຕທິຏ຺ຐິປ຺ປຕ຺ຕກາຍສກ຺ຂີນໍ ທສ຺ສນປຎ຺ຎຕ຺ຕິ ເຈວ ຠາວນາປຎ຺ຎຕ຺ຕິ ຈ ‘‘ອປ຺ປຕ຺ຕມານໂສ’’ຕິ ເສກ຺ຂຘມ຺ມານໍ ຐິຕິປຎ຺ຎຕ຺ຕິ, ‘‘ອນຸຕ຺ຕຣໍ ໂຍຄກ຺ເຂມໍ ປຕ຺ຖຍມາໂນ’’ຕິ ປຎ຺ຎາຍ ອຠິນິພ຺ພິທາປຎ຺ຎຕ຺ຕິ, ‘‘ອຠິຊານາຕີ’’ຕິ ອຠິຎ຺ເຎຍ຺ຍຘມ຺ມານໍ ອຠິຎ຺ຎາປຎ຺ຎຕ຺ຕິ, ທຸກ຺ຂສ຺ສ ປຣິຎ຺ຎາປຎ຺ຎຕ຺ຕິ, ສມຸທຍສ຺ສ ປຫານປຎ຺ຎຕ຺ຕິ, ນິໂຣຘສ຺ສ ສຈ຺ຉິກິຣິຍາປຎ຺ຎຕ຺ຕິ, ມຄ຺ຄສ຺ສ ຠາວນາປຎ຺ຎຕ຺ຕິ, ‘‘ມາ ມຎ຺ຎີ’’ຕິ ມຎ຺ຎນານໍ ປຏິກ຺ເຂປປຎ຺ຎຕ຺ຕິ, ສມຸທຍສ຺ສ ປຫານປຎ຺ຎຕ຺ຕິ. ອິມິນາ ນເຍນ ເສສປເທສຸປິ ວິຕ຺ຖາເຣຕພ຺ພໍ. ອຍໍ ປຎ຺ຎຕ຺ຕິ ຫາໂຣ.