໑໒. ໂອຕຣຓຫາຣວຓ຺ຓນາ

‘‘ສພ຺ພຘມ຺ມມູລປຣິຍາຍ’’ນ຺ຕິ ເອຕ຺ຖ ສພ຺ພຘມ຺ມາ ນາມ ໂລກິຍາ ປຎ຺ຈກ຺ຂນ຺ຘາ ທ຺ວາທສາຍຕນານິ ອຏ຺ຐາຣສ ຘາຕຸໂຍ ທ຺ເວ ສຈ຺ຈານິ ເອກູນວິສຕິ ອິນ຺ທ຺ຣິຍານິ ທ຺ວາທສປທິໂກ ປຈ຺ຈຍາກາໂຣຕິ, ອຍໍ ສພ຺ພຘມ຺ມຄ຺ຄຫເຓນ ຂນ຺ຘາທິມຸເຂນ ເທສນາຍ ໂອຕຣຓໍ. ‘‘ມູລ’’ນ຺ຕິ ວາ ‘‘ມູລປຣິຍາຍ’’ນ຺ຕິ ວາ ມຎ຺ຎນາ ວຸຕ຺ຕາ, ຕາ ອຕ຺ຖໂຕ ຕຓ຺ຫາ ມາໂນ ທິຏ຺ຐິ ຈາຕິ ເຕສໍ ສງ຺ຂາຣກ຺ຂນ຺ຘສງ຺ຄໂຫຕິ ອຍໍ ຂນ຺ຘມຸເຂນ ໂອຕຣຓໍ. ຕຖາ ‘‘ຘມ຺ມາຍຕນຘມ຺ມຘາຕູຫິ ສງ຺ຄໂຫ’’ຕິ ອຍໍ ອາຍຕນມຸເຂນ ຘາຕຸມຸເຂນ ຈ ໂອຕຣຓໍ. ‘‘ອສ຺ສຸຕວາ’’ຕິ ອິມິນາ ສຸຕສ຺ສ ວິພນ຺ຘຠູຕາ ອວິຊ຺ຊາທໂຍ ຄຫິຕາ, ‘‘ປຸຖຸຊ຺ຊໂນ’’ຕິ ອິມິນາ ເຍສໍ ກິເລສາຠິສງ຺ຂາຣານໍ ຊນນາທິນາ ປຸຖຸຊ຺ຊໂນຕິ ວຸຈ຺ຈຕິ, ເຕ ກິເລສາຠິສງ຺ຂາຣາທໂຍ ຄຫິຕາ, ‘‘ອຣິຍານໍ ອທສ຺ສາວີ’’ຕິອາທິນາ ເຍສໍ ກິເລສຘມ຺ມານໍ ວເສນ ອຣິຍານໍ ອທສ຺ສາວິອາທິຠາໂວ ໂຫຕິ, ເຕ ທິຏ຺ຐິມານາວິຊ຺ຊາທໂຍ ຄຫິຕາຕິ ສພ຺ເພຫິ ເຕຫິ ສງ຺ຂາຣກ຺ຂນ຺ຘສງ຺ຄໂຫຕິ ປຸພ຺ເພ ວຸຕ຺ຕນເຍເນວ ໂອຕຣຓໍ ເວທິຕພ຺ພໍ. ‘‘ສຎ຺ຊານາຕິ ມຎ຺ຎຕິ ອຠິຊານາຕິ ນ ມຎ຺ຎຕີ’’ຕິ ເອຕ຺ຖາປິ ສຎ຺ຊານນມຎ຺ຎນາອຠິຊານນານຸປສ຺ສນານໍ ສງ຺ຂາຣກ຺ຂນ຺ຘປຣິຍາປນ຺ນຕ຺ຕາ ວຸຕ຺ຕນເຍເນວ ໂອຕຣຓໍ ເວທິຕພ຺ພໍ. ຕຖາ ເສກ຺ຂຄ຺ຄຫເຓນ ເສກ຺ຂາ, ‘‘ອຣຫ’’ນ຺ຕິອາທິນາ ອເສກ຺ຂາ ສີລກ຺ຂນ຺ຘາທໂຍ ຄຫິຕາຕິ ເອວມ຺ປິ ຂນ຺ຘມຸເຂນ ໂອຕຣຓໍ, ອາຍຕນຘາຕາທິມຸເຂນ ຈ ໂອຕຣຓໍ ເວທິຕພ຺ພໍ. ຕຖາ ‘‘ນ ມຎ຺ຎຕີ’’ຕິ ຕຓ຺ຫາຄາຫາທິປຏິກ຺ເຂເປນ ທຸກ຺ຂານຸປສ຺ສນາທໂຍ ຄຫິຕາ, ເຕສໍ ວເສນ ອປ຺ປຓິຫິຕວິໂມກ຺ຂມຸຂາທີຫິ ໂອຕຣຓໍ ເວທິຕພ຺ພໍ. ‘‘ປຣິຎ຺ຎາຕ’’ນ຺ຕິ ອິມິນາ ປຣິຊານນກິຈ຺ເຈນ ປວຕ຺ຕມານາ ໂພຘິປກ຺ຂິຍຘມ຺ມາ ຄຍ຺ຫນ຺ຕີຕິ ສຕິປຏ຺ຐານາທິມຸເຂນ ໂອຕຣຓໍ ເວທິຕພ຺ພໍ. ນນ຺ທິຄ຺ຄຫເຓນ ຠວຄ຺ຄຫເຓນ ຕຓ຺ຫາຄຫເຓນ ຈ ສມຸທຍສຈ຺ຈໍ, ທຸກ຺ຂຄ຺ຄຫເຓນ ຊາຕິຊຣາມຣຓຄ຺ຄຫເຓນ ຈ ທຸກ຺ຂສຈ຺ຈໍ, ‘‘ຕຓ຺ຫານໍ ຂຍາ’’ຕິອາທິນາ ນິໂຣຘສຈ຺ຈໍ, ອຠິສມ຺ໂພຘິຍາ ຄຫເຓນ ມຄ຺ຄສຈ຺ຈໍ ຄຫິຕນ຺ຕິ ອຣິຍສຈ຺ເຈຫິ ໂອຕຣຓນ຺ຕິ. ອຍໍ ໂອຕຣໂຓ ຫາໂຣ.