໖. ວຕ຺ຕາທິກຓ຺ຑນິທ຺ເທໂສ

໙໖. ອຸປຊ຺ຌາຈຣິຍວຕ຺ຕຎ຺ຈ, ຄມິກາຄນ຺ຕຸກມ຺ປິ ຈ;

ເສນາສນາທິວຕ຺ຕຎ຺ຈ, ກາຕພ຺ພໍ ປິຍສີລິນາ.

໙໗. ຫຕ຺ຖປາເສ ຐິໂຕ ກິຎ຺ຈິ, ຄຫິຕພ຺ພໍ ທເທ ຕິຘາ;

ຄເຫຕຸກາໂມ ຄຓ຺ເຫຍ຺ຍ, ທ຺ວິຘາຍໍ ສມ຺ປຏິຄ຺ຄໂຫ.

໙໘. ສງ຺ຆາຏິມຸຕ຺ຕຣາສງ຺ຄໍ, ຕຖາ ອນ຺ຕຣວາສກໍ;

‘‘ເອຕໍ ອິມໍ ອຘິຏ຺ຐາມິ’’, ຕຖາ ‘‘ປຈ຺ຈຸທ຺ຘຣາມິ’’ຕິ.

໙໙. ‘‘ອິມໍ ອິມານິ ເອຕານິ, ເອຕມ຺ປິ ຈີວຣ’’ນ຺ຕິ ວາ;

‘‘ປຣິກ຺ຂາຣໂຈຬານີ’’ຕິ, ຕຖາ ‘‘ປຈ຺ຈຸທ຺ຘຣາມິ’’ຕິ.

໑໐໐. ‘‘ເອຕໍ ອິມໍ ອຘິຏ຺ຐາມິ, ປຕ຺ຕໍ ປຈ຺ຈຸທ຺ຘຣາມິ’’ຕິ;

ເອວໍ ປຈ຺ຈຸທ຺ຘເຣຘິຏ຺ເຐ, ຈີວຣາທິໍ ຍຖາວິຘິ.

໑໐໑. ສຎ຺ຈຣິຕ຺ຕໍ ວິນາ ເສສາ, ສຈິຕ຺ຕາ ຄຣຸກນ຺ຕິມາ;

ອຈ຺ຉິນ຺ນໍ ປຣິຓຕໍ ຫິຕ຺ວາ, ນິສ຺ສຄ຺ຄິຍມຈິຕ຺ຕກໍ.

໑໐໒. ປທໂສຘມ຺ມໍ ທຸເວ ເສຍ຺ຍາ, ອິຕ຺ຖິຍາ ຘມ຺ມເທສນາ;

ທຸເວ ເສນາສນານີປິ, ສິພ຺ພນໍ ຈີວຣສ຺ສປິ.

໑໐໓. ປວາຣິຕໍ ສຸຣາປານໍ, ປຎ຺ຈສນ຺ນິຘິອາທິກໍ;

ໂຊຕິນຸຊ຺ຊາລນຎ຺ເຈວ, ກປ຺ປພິນ຺ທຸມນາທິກໍ;

ຄາມປ຺ປເວສນນ຺ເຕເຕ, ປາຈິຕ຺ຕີສຸ ອຈິຕ຺ຕກາ.

໑໐໔. ປກິຓ຺ຓເກສຸ ອຸທ຺ທິສ຺ສ-ກຕໍ ຫິຕ຺ວາຎ຺ຎມໍສກໍ;

ເອກຕ຺ຖຣຓປາວຸຣຓໍ, ເອກມຎ຺ເຈ ຕຸວຏ຺ຏນໍ;

ເອກໂຕ ຠຸຎ຺ຊນຎ຺ຈາປິ, ນຈ຺ຈຄີຕາທິສຕ຺ຕປິ.

໑໐໕. ອກາຍພນ຺ຘນຎ຺ຈາປິ, ປຕ຺ຕຫຕ຺ຖກວາຏກໍ;

ອຈິຕ຺ຕກມິທໍ ສພ຺ພໍ, ເສສເມຕ຺ຖ ສຈິຕ຺ຕກໍ.

໑໐໖. ວີຕິກ຺ກມນຈິຕ຺ເຕນ, ສຈິຕ຺ຕກມຈິຕ຺ຕກໍ;

ປຎ຺ຎຕ຺ຕິຊານເນນາປິ, ວທນ຺ຕາຈຣິຍາ ຕຖາ.

໑໐໗. ປຸພ຺ພກຣຓາທິກໍ ກຕ຺ວາ, ອຸໂປສຖປ຺ປວາຣຓໍ;

ນວຘາ ທີປິຕໍ ສພ຺ພໍ, ກາຕພ຺ພໍ ປິຍສີລິນາ.

໑໐໘. ສມ຺ມຊ຺ຊນີ ປທີໂປ ຈ, ອຸທກໍ ອາສເນນ ຈ;

ອຸໂປສຖສ຺ສ ເອຕານິ, ປຸພ຺ພກຣຓນ຺ຕິ ວຸຈ຺ຈຕິ.

໑໐໙. ຉນ຺ທປາຣິສຸທ຺ຘິອຸຕຸກ຺ຂານໍ, ຠິກ຺ຂຸຄຓນາ ຈ ໂອວາໂທ;

ອຸໂປສຖສ຺ສ ເອຕານິ, ປຸພ຺ພກິຈ຺ຈນ຺ຕິ ວຸຈ຺ຈຕິ.

໑໑໐. ອຸໂປສໂຖ ຍາວຕິກາ ຈ ຠິກ຺ຂູ ກມ຺ມປ຺ປຕ຺ຕາ,

ສຠາຄາປຕ຺ຕິໂຍ ຈ ນ ວິຊ຺ຊນ຺ຕິ;

ວຊ຺ຊນີຍາ ຈ ປຸຄ຺ຄລາ ຕສ຺ມິໍ ນ ໂຫນ຺ຕິ,

ປຕ຺ຕກລ຺ລນ຺ຕິ ວຸຈ຺ຈຕິ.

໑໑໑. ປຸພ຺ພກຣຓປຸພ຺ພກິຈ຺ຈານິ ສມາເປຕ຺ວາ ເທສິຕາປຕ຺ຕິກສ຺ສ ສມຄ຺ຄສ຺ສ ຠິກ຺ຂຸສງ຺ຆສ຺ສ ອນຸມຕິຍາ ປາຕິໂມກ຺ຂໍ ອຸທ຺ທິສິຕຸໍ ອາຣາຘນໍ ກໂຣມ.

໑໑໒. ປາຣິສຸທ຺ຘິອຘິຏ຺ຐານ-ສຸຕ຺ຕຸທ຺ເທສວສາ ຕິຘາ;

ຄຓປຸຄ຺ຄລສງ຺ຆາ ຈ, ຕໍ ກເຣຍ຺ຍຸໍ ຍຖາກ຺ກມໍ.

໑໑໓. ຈາຕຸທ຺ທໂສ ປນ຺ນຣໂສ, ສາມຄ຺ຄີ ທິນໂຕ ຕິຘາ;

ທິນປຸຄ຺ຄລກຕ຺ຕພ຺ພາ-ກາຣໂຕ ເຕ ນເວຣິຕາ.

໑໑໔. ຕໂຍ ຕໂຍຕິ ກຕ຺ວານ, ທິນປຸຄ຺ຄລເຠທໂຕ;

ເຕວາຈີທ຺ເວກວາຈີຕິ, ນວ ວຸຕ຺ຕາ ປວາຣຓາ.

໑໑໕. ກຕ຺ຕິກນ຺ຕິມປກ຺ຂມ຺ຫາ, ເຫມໍ ຜຄ຺ຄຸນປຸຓ຺ຓມາ;

ຕສ຺ສ ອນ຺ຕິມປກ຺ຂມ຺ຫາ, ຄິມ຺ຫໍ ອາສາຬ຺ຫິປຸຓ຺ຓມາ;

ວສ຺ສກາລໍ ຕໂຕ ເສສໍ, ຈຕຸວີສຕຸໂປສຖາ.

໑໑໖. ຈາຕຸທ຺ທສາ ຉ ເອເຕສຸ, ປກ຺ຂາ ຕຕິຍສຕ຺ຕມາ;

ເຎຍ຺ຍາ ປນ຺ນຣສາ ເສສາ, ອຏ຺ຐາຣສ ອຸໂປສຖາ.

໑໑໗. ‘‘ຉນ຺ທໍ ທມ຺ມິ, ຉນ຺ທໍ ເມ ຫຣ, ຉນ຺ທໍ ເມ ອາໂຣເຈຫີ’’ຕິ ຉນ຺ທໍ ທາຕພ຺ພໍ.

໑໑໘. ‘‘ປາຣິສຸທ຺ຘິໍ ທມ຺ມິ, ປາຣິສຸທ຺ຘິໍ ເມ ຫຣ, ປາຣິສຸທ຺ຘິໍ ເມ ອາໂຣເຈຫີ’’ຕິ ປາຣິສຸທ຺ຘິ ທາຕພ຺ພາ.

໑໑໙. ‘‘ປວາຣຓໍ ທມ຺ມິ, ປວາຣຓໍ ເມ ຫຣ, ປວາຣຓໍ ເມ ອາໂຣເຈຫິ, ມມຕ຺ຖາຍ ປວາເຣຫີ’’ຕິ ປວາຣຓາ ທາຕພ຺ພາ.

໑໒໐. ອາປຕ຺ຕິເທສເກນ ‘‘ອຫໍ, ຠນ຺ເຕ, ສມ຺ພຫຸລາ ນານາວຕ຺ຖຸກາ ອາປຕ຺ຕິໂຍ ອາປຊ຺ຊິໍ, ຕາ ຕຸມ຺ຫມູເລ ປຏິເທເສມີ’’ຕິ ວຕ຺ວາ ປຏິຄ຺ຄຓ຺ຫນ຺ເຕນ ‘‘ປສ຺ສສິ, ອາວຸໂສ, ຕາ ອາປຕ຺ຕິໂຍ’’ຕິ ວຸຕ຺ເຕ ‘‘ອາມ, ຠນ຺ເຕ, ປສ຺ສາມີ’’ຕິ ວຕ຺ວາ ປຸນ ປຏິຄ຺ຄຓ຺ຫນ຺ເຕນ ‘‘ອາຍຕິໍ, ອາວຸໂສ, ສໍວເຣຍ຺ຍາສີ’’ຕິ ວຸຕ຺ເຕ ‘‘ສາຘຸ, ສຸຏ຺ຐຸ, ຠນ຺ເຕ ສໍວຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ເທເສຕພ຺ພໍ.

໑໒໑. ເວມຕິໍ ອາໂຣເຈນ຺ເຕນ ‘‘ອຫໍ, ຠນ຺ເຕ, ສມ຺ພຫຸລາສຸ ນານາວຕ຺ຖຸກາສຸ ອາປຕ຺ຕີສຸ ເວມຕິໂກ, ຍທາ ນິພ຺ເພມຕິໂກ ຠວິສ຺ສາມິ, ຕທາ ຕາ ອາປຕ຺ຕິໂຍ ປຏິກຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ອາໂຣເຈຕພ຺ພໍ.

໑໒໒. ‘‘ອຊ຺ຊ ເມ ອຸໂປສໂຖ ‘ປນ຺ນຣໂສ, ຈາຕຸທ຺ທໂສ’ຕິ ວາ ອຘິຏ຺ຐາມີ’’ຕິ ຕິກ຺ຂຕ຺ຕຸໍ ວຕ຺ວາ ປຸຄ຺ຄເລນ ອຘິຏ຺ຐານຸໂປສໂຖ ກາຕພ຺ໂພ.

໑໒໓. ທ຺ວີສຸ ປນ ເຖເຣນ ‘‘ປຣິສຸທ຺ໂຘ ອຫໍ ອາວຸໂສ, ‘ປຣິສຸທ຺ໂຘ’ຕິ ມໍ ຘາເຣຫີ’’ຕິ ຕິກ຺ຂຕ຺ຕຸໍ ວຕ຺ຕພ຺ພໍ. ນວເກນປິ ຕເຖວ ວຕ຺ຕພ຺ພໍ. ‘‘ຠນ຺ເຕ, ຘາເຣຖາ’’ຕິ ວຈນໍ ວິເສໂສ.

໑໒໔. ຕີສຸ ປນ ‘‘ສຸຓນ຺ຕຸ ເມ ອາຍສ຺ມນ຺ຕາ, ອຊ຺ຊຸໂປສໂຖ ປນ຺ນຣໂສ, ຍທາຍສ຺ມນ຺ຕານໍ ປຕ຺ຕກລ຺ລໍ, ມຍໍ ອຎ຺ຎມຎ຺ຎໍ ປາຣິສຸທ຺ຘິອຸໂປສຖໍ ກເຣຍ຺ຍາມາ’’ຕິ ຎຕ຺ຕິໍ ຐເປຕ຺ວາ ປຏິປາຏິຍາ ວຸຕ຺ຕນເຍນ ປາຣິສຸທ຺ຘິອຸໂປສໂຖ ກາຕພ຺ໂພ.

໑໒໕. ‘‘ອຊ຺ຊ ເມ ປວາຣຓາ ‘ຈາຕຸທ຺ທສີ, ປນ຺ນຣສີ’ຕິ ວາ ອຘິຏ຺ຐາມີ’’ຕິ ຕິກ຺ຂຕ຺ຕຸໍ ວຕ຺ວາ ເອເກນ ປວາເຣຕພ຺ພໍ.

໑໒໖. ທ຺ວີສຸ ປນ ເຖເຣນ ‘‘ອຫໍ, ອາວຸໂສ, ອາຍສ຺ມນ຺ຕໍ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທຕຸ ມໍ ອາຍສ຺ມາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ປວາເຣຕພ຺ພໍ. ນວເກນາປິ ຕເຖວ ວຕ຺ຕພ຺ພໍ. ‘‘ຠນ຺ເຕ’’ຕິ ວຈນໍ ວິເສໂສ.

໑໒໗. ຕີສຸ ວາ ຈຕູສຸ ວາ ປນ ‘‘ສຸຓນ຺ຕຸ ເມ ອາຍສ຺ມນ຺ຕາ, ອຊ຺ຊ ປວາຣຓາ ປນ຺ນຣສີ, ຍທາຍສ຺ມນ຺ຕານໍ ປຕ຺ຕກລ຺ລໍ, ມຍໍ ອຎ຺ຎມຎ຺ຎໍ ປວາເຣຍ຺ຍາມາ’’ຕິ ຎຕ຺ຕິໍ ຐເປຕ຺ວາ ເຖເຣນ ‘‘ອຫໍ, ອາວຸໂສ, ອາຍສ຺ມນ຺ເຕ ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ຕາ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ປວາເຣຕພ຺ພໍ. ນວເກຫິປິ ຕເຖວ ປຏິປາຏິຍາ ປວາເຣຕພ຺ພໍ. ‘‘ຠນ຺ເຕ’’ຕິວຈນໍ ວິເສໂສ.

໑໒໘. ຈຕູຫິ ອຘິເກສຸ ປນ ‘‘ສຸຓາຕຸ ເມ ອາວຸໂສ ສງ຺ໂຆ, ອຊ຺ຊ ປວາຣຓາ ປນ຺ນຣສີ, ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ປວາເຣຍ຺ຍາ’’ຕິ ຎຕ຺ຕິໍ ຐເປຕ຺ວາ ວຸຑ຺ຒຕເຣນ ‘‘ສງ຺ຆໍ, ອາວຸໂສ, ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ປວາເຣຕພ຺ພໍ. ນວເກຫິປິ ຕເຖວ ປຏິປາຏິຍາ ‘‘ສງ຺ຆໍ, ຠນ຺ເຕ, ປວາເຣມິ ທິຏ຺ເຐນ ວາ ສຸເຕນ ວາ ປຣິສງ຺ກາຍ ວາ, ວທນ຺ຕຸ ມໍ ອາຍສ຺ມນ຺ໂຕ ອນຸກມ຺ປໍ ອຸປາທາຍ, ປສ຺ສນ຺ໂຕ ປຏິກຣິສ຺ສາມີ’’ຕິ ຕິກ຺ຂຕ຺ຕຸໍ ວຕ຺ວາ ປວາເຣຕພ຺ພໍ.

ມູລສິກ຺ຂາ ນິຏ຺ຐິຕາ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ