ມູລສິກ຺ຂາ

ຄນ຺ຖາຣມ຺ຠກຖາ

ນຕ຺ວາ ນາຖໍ ປວກ຺ຂາມິ, ມູລສິກ຺ຂໍ ສມາສໂຕ;

ຠິກ຺ຂຸນາ ນວເກນາໂທ, ມູລຠາສາຍ ສິກ຺ຂິຕຸໍ.

໑. ປາຣາຊິກນິທ຺ເທໂສ

໑. ສໍ ນິມິຕ຺ຕໍ ປເວສນ຺ໂຕ, ຠິກ຺ຂຸ ມຄ຺ຄຕ຺ຕເຍ ຈຸໂຕ;

ປເວສນຏ຺ຐິຕຸທ຺ຘາຣ-ປວິຏ຺ເຐ ເຈປິ ສາທິຍໍ.

໒. ອທິນ຺ນໍ ມານຸສໍ ຠຓ຺ຑໍ, ເຖຍ຺ຍາເຍເກນ ອາທິຍໍ;

ປຎ຺ຈວີສາວຫາເຣສຸ, ຄຣຸກໍ ເຈ ຈຸໂຕ ຠເວ.

໓. ອາທິຍນ຺ໂຕ ຫຣນ຺ໂຕວ-ຫຣນ຺ໂຕປິຣິຍາປຖໍ;

ວິໂກເປນ຺ໂຕ ຕຖາ ຐານາ, ຈາເວນ຺ໂຕປິ ປຣາຊິໂກ.

໔. ຕຕ຺ຖ ນາເນກຠຓ຺ຑານໍ, ປຎ຺ຈການໍ ວສາ ປນ;

ອວຫາຣາ ທສຎ຺ເຈຕິ, ວິຎ຺ຎາຕພ຺ພາ ວິຠາວິນາ.

໕. ສາຫຕ຺ຖາຓຕ຺ຕິໂກ ເຈວ, ນິສ຺ສຄ຺ໂຄ ຈາຕ຺ຖສາຘໂກ;

ຘຸຣນິກ຺ເຂປນຎ຺ເຈວ, ອິທໍ ສາຫຕ຺ຖປຎ຺ຈກໍ.

໖. ປຸພ຺ພສຫປ຺ປໂຍໂຄ ຈ, ສໍວິຘາຫຣຓມ຺ປິ ຈ;

ສງ຺ເກຕກມ຺ມໍ ນິມິຕ຺ຕໍ, ປຸພ຺ພປ຺ປໂຍຄປຎ຺ຈກໍ.

໗. ເຖຍ຺ຍາປສຍ຺ຫປຣິກປ຺ປ-ປ຺ປຏິຈ຺ຉນ຺ນກຸສາທິກາ;

ອວຫາຣາ ອິເມ ປຎ຺ຈ, ວິຎ຺ຎາຕພ຺ພາ ວິຠາວິນາ.

໘. ມນຸສ຺ສປາຓໍ ປາໂຓຕິ, ຊານໍ ວຘກເຈຕສາ;

ຊີວິຕາ ໂຍ ວິໂຍເຊຕິ, ສາສນາ ໂສ ປຣາຊິໂຕ.

໙. ຌານາທິເຠທໍ ຫທເຍ ອສນ຺ຕໍ,

ອຎ຺ຎປເທສຎ຺ຈ ວິນາຘິມານໍ;

ມນຸສ຺ສຊາຕິສ຺ສ ວເທຍ຺ຍ ຠິກ຺ຂຸ,

ຎາຕກ຺ຂເຓ ເຕນ ປຣາຊິໂກ ຠເວຕິ.

໒. ຄຣຸກາປຕ຺ຕິນິທ຺ເທໂສ

໑໐. ໂມເຈຕຸກາມຈິຕ຺ເຕນ, ອຸປກ຺ກມ຺ມ ວິໂມຈຍໍ;

ສຸກ຺ກມຎ຺ຎຕ຺ຣ ສຸປິນາ, ສມໂຓ ຄຣຸກໍ ຜຸເສ.

໑໑. ກາຍສໍສຄ຺ຄຣາເຄນ, ມນຸສ຺ສິຕ຺ຖິໍ ປຣາມສໍ;

ອິຕ຺ຖິສຎ຺ຎີ ອຸປກ຺ກມ຺ມ, ສມໂຓ ຄຣຸກໍ ຜຸເສ.

໑໒. ທຸຏ຺ຐຸລ຺ລວາຈສ຺ສາເທນ, ມຄ຺ຄໍ ວາຣພ຺ຠ ເມຖຸນໍ;

ໂອຠາສນ຺ໂຕ ມນຸສ຺ສິຕ຺ຖິໍ, ສຸຓມານໍ ຄຣຸໍ ຜຸເສ.

໑໓. ວຓ຺ຓໍ ວຕ຺ວາຕ຺ຕໂນກາມ-ປາຣິຈຣິຍາຍ ເມຖຸນໍ;

ອິຕ຺ຖິໍ ເມຖຸນຣາເຄນ, ຍາຈມາໂນ ຄຣຸໍ ຜຸເສ.

໑໔. ສນ຺ເທສໍ ປຏິຄ຺ຄຓ຺ຫິຕ຺ວາ, ປຸຣິສສ຺ສິຕ຺ຖິຍາປິ ວາ;

ວີມໍສິຕ຺ວາ ຫຣໍປຈ຺ຈາ, ສມໂຓ ຄຣຸກໍ ຜຸເສ.

໑໕. ຈາເວຕຸກາໂມ ໂຈເທນ຺ໂຕ, ອມູລນ຺ຕິມວຕ຺ຖຸນາ;

ໂຈທາປຍໍ ວາ ສມໂຓ, ສຸຓມານໍ ຄຣຸໍ ຜຸເສ.

໑໖. ເລສມຕ຺ຕໍ ອຸປາທາຍ, ອມູລນ຺ຕິມວຕ຺ຖຸນາ;

ຈາເວຕຸກາໂມ ໂຈເທນ຺ໂຕ, ສຸຓມານໍ ຄຣຸໍ ຜຸເສຕິ.

໓. ນິສ຺ສຄ຺ຄິຍນິທ຺ເທໂສ

໑໗. ວິກປ຺ປນມຘິຏ຺ຐານ-ມກຕ຺ວາ ກາລຈີວຣໍ;

ທສາຫມຕິມາເປຕິ, ຕສ຺ສ ນິສ຺ສຄ຺ຄິຍໍ ສິຍາ.

໑໘. ຠິກ຺ຂຸສມ຺ມຸຕິຍາຎ຺ຎຕ຺ຣ, ຕິຈີວຣມຘິຏ຺ຐິຕໍ;

ເອກາຫມຕິມາເປຕິ, ນິສ຺ສຄ຺ຄິ ສມຍໍ ວິນາ.

໑໙. ອຎ຺ຎາຕິກາ ຠິກ຺ຂຸນິຍາ, ປຸຣາຓຈີວຣໍ ປນ;

ໂຘວາເປຕິ ຣຊາເປຕິ, ອາໂກຏາເປຕິ ຕໍ ສິຍາ.

໒໐. ອຎ຺ຎາຕິກາ ຠິກ຺ຂຸນິຍາ, ຫຕ຺ຖໂຕ ກິຎ຺ຈິ ມູລກໍ;

ອທຕ຺ວາ ຈີວຣາທາເນ, ນິສ຺ສຄ຺ຄິຍມຸທີຣິຕໍ.

໒໑. ອປ຺ປວາຣິຕມຎ຺ຎາຕິໍ, ວິຎ຺ຎາເປນ຺ຕສ຺ສ ຈີວຣໍ;

ອຎ຺ຎຕ຺ຣ ສມຍາ ຕສ຺ສ, ນິສ຺ສຄ຺ຄິຍມຸທີຣິຕໍ.

໒໒. ຣຊຕໍ ຊາຕຣູປໍ ວາ, ມາສກໍ ວາ ກຫາປຓໍ;

ຄຓ຺ເຫຍ຺ຍ ວາ ຄຓ຺ຫາເປຍ຺ຍ, ນິສ຺ສຄ຺ຄິ ສາທິເຍຍ຺ຍ ວາ.

໒໓. ປຣິວຕ຺ເຕຍ຺ຍ ນິສ຺ສຄ຺ຄິ, ຣຊຕາທິ ຈຕຸພ຺ພິຘໍ;

ກປ຺ປິຍໍ ກປ຺ປິເຍນາປິ, ຐເປຕ຺ວາ ສຫຘມ຺ມິເກ.

໒໔. ວິກປ຺ປນມຘິຏ຺ຐານ-ມກຕ຺ວານ ປມາຓິກໍ;

ທສາຫມຕິມາເປຕິ, ປຕ຺ຕໍ ນິສ຺ສຄ຺ຄິຍໍ ສິຍາ.

໒໕. ປຎ຺ຈພນ຺ຘນໂຕ ອູນ-ປຕ຺ເຕ ສຕິ ປຣໍ ປນ;

ວິຎ຺ຎາເປຕິ ນວໍ ປຕ຺ຕໍ, ຕສ຺ສ ນິສ຺ສຄ຺ຄິຍໍ ສິຍາ.

໒໖. ປຏິຄ຺ຄເຫຕ຺ວາ ຠຸຎ຺ຊນ຺ໂຕ, ສປ຺ປິເຕລາທິກໍ ປນ;

ສຕ຺ຕາຫມຕິມາເປຕິ, ຕສ຺ສ ນິສ຺ສຄ຺ຄິຍໍ ສິຍາ.

໒໗. ຠິກ຺ຂຸສ຺ສ ຈີວຣໍ ທຕ຺ວາ, ອຈ຺ຉິນ຺ທນ຺ຕສ຺ສ ຕໍ ປຸນ;

ສກສຎ຺ຎາຍ ນິສ຺ສຄ຺ຄິ, ອຈ຺ຉິນ຺ທາປຍໂຕປິ ວາ.

໒໘. ອປ຺ປວາຣິຕມຎ຺ຎາຕິໍ, ສຸຕ຺ຕໍ ຍາຈິຍ ຈີວຣໍ;

ວາຍາເປນ຺ຕສ຺ສ ນິສ຺ສຄ຺ຄິ, ວິນາ ຎາຕິປ຺ປວາຣິເຕ.

໒໙. ຊານນ຺ໂຕ ຠິກ຺ຂຸ ສງ຺ຆສ຺ສ, ລາຠໍ ປຣິຓຕໍ ປນ;

ອຕ຺ຕໂນ ປຣິຓາເມຕິ, ຕສ຺ສ ນິສ຺ສຄ຺ຄິຍໍ ສິຍາຕິ.

໔. ປາຈິຕ຺ຕິຍນິທ຺ເທໂສ

໓໐. ສມ຺ປຊານມຸສາວາເທ, ປາຈິຕ຺ຕິຍມຸທີຣິຕໍ;

ຠິກ຺ຂຸຎ຺ຈ ໂອມສນ຺ຕສ຺ສ, ເປສຸຎ຺ຎຫຣເຓປິ ຈ.

໓໑. ຐເປຕ຺ວາ ຠິກ຺ຂຸນິໍ ຠິກ຺ຂຸໍ, ອຎ຺ເຎນ ປິຏກຕ຺ຕຍໍ;

ປທໂສຘມ຺ມໍ ຠຓນ຺ຕສ຺ສ, ປາຈິຕ຺ຕິຍມຸທີຣິຕໍ.

໓໒. ອນຸປສມ຺ປນ຺ເນເນວ, ສຍິຕ຺ວານ ຕິຣຕ຺ຕິຍໍ;

ປາຈິຕ຺ຕິ ສຫເສຍ຺ຍາຍ, ຈຕຸຕ຺ຖຕ຺ຖງ຺ຄເຕ ປຸນ.

໓໓. ອິຕ຺ຖິຍາ ເອກຣຕ຺ຕມ຺ປິ, ເສຍ຺ຍໍ ກປ຺ປຍໂຕປິ ວາ;

ເທເສນ຺ຕສ຺ສ ວິນາ ວິຎ຺ຎຸໍ, ຘມ຺ມຎ຺ຈ ຉປ຺ປທຸຕ຺ຕຣິໍ.

໓໔. ທຸຏ຺ຐຸລ຺ລໍ ຠິກ຺ຂຸໂນ ວຊ຺ຊໍ, ຠິກ຺ຂຸສມ຺ມຸຕິຍາ ວິນາ;

ອຠິກ຺ຂຸໂນ ວທນ຺ຕສ຺ສ, ປາຈິຕ຺ຕິຍມຸທີຣິຕໍ.

໓໕. ຂເຓຍ຺ຍ ວາ ຂຓາເປຍ຺ຍ, ປຖວິຎ຺ຈ ອກປ຺ປິຍໍ;

ຠູຕຄາມໍ ວິໂກເປຍ຺ຍ, ຕສ຺ສ ປາຈິຕ຺ຕິຍໍ ສິຍາ.

໓໖. ອຊ຺ໂຌກາເສ ຕຸ ມຎ຺ຈາທິໍ, ກຕ຺ວາ ສນ຺ຖຣຓາທິກໍ;

ສງ຺ຆິກໍ ຍາຕິ ປາຈິຕ຺ຕິ, ອກຕ຺ວາປຸຈ຺ຉນາທິກໍ.

໓໗. ສງ຺ຆິກາວສເຖ ເສຍ຺ຍໍ, ກຕ຺ວາ ສນ຺ຖຣຓາທິກໍ;

ອກຕ຺ວາປຸຈ຺ຉນາທິໍ ໂຍ, ຍາຕິ ປາຈິຕ຺ຕິ ຕສ຺ສປິ.

໓໘. ຊານໍ ສປ຺ປາຓກໍ ໂຕຍໍ, ປາຈິຕ຺ຕິ ປຣິຠຸຎ຺ຊໂຕ;

ອຎ຺ຎາຕິກາ ຠິກ຺ຂຸນິຍາ, ຐເປຕ຺ວາ ປາຣິວຕ຺ຕກໍ.

໓໙. ຈີວຣໍ ເທຕິ ປາຈິຕ຺ຕິ, ຈີວຣໍ ສິພ຺ພໂຕປິ ຈ;

ອຕິຣິຕ຺ຕໍ ອກາເຣຕ຺ວາ, ປວາເຣຕ຺ວານ ຠຸຎ຺ຊໂຕ.

໔໐. ຠິກ຺ຂຸໍ ອາສາທນາເປກ຺ໂຂ, ປວາເຣຕິ ປວາຣິຕໍ;

ອນຕິຣິຕ຺ເຕນ ຠຸຕ຺ເຕ ຕຸ, ປາຈິຕ຺ຕິຍມຸທີຣິຕໍ.

໔໑. ສນ຺ນິຘິໂຠຊນໍ ຠຸຎ຺ເຊ, ວິກາເລ ຍາວກາລິກໍ;

ຠຸຎ຺ຊໂຕ ວາປິ ປາຈິຕ຺ຕິ, ອຄິລາໂນ ປຓີຕກໍ.

໔໒. ວິຎ຺ຎາເປຕ຺ວານ ຠຸຎ຺ເຊຍ຺ຍ, ສປ຺ປິຠຕ຺ຕາທິກມ຺ປິ ຈ;

ອປ຺ປຏິຄ຺ຄຫິຕໍ ຠຸຎ຺ເຊ, ທນ຺ຕກຏ຺ໂຐທກໍ ວິນາ.

໔໓. ຕິຕ຺ຖິຍສ຺ສ ທເທ ກິຎ຺ຈິ, ຠຸຎ຺ຊິຕພ຺ພໍ ສຫຕ຺ຖໂຕ;

ນິສຊ຺ຊໍ ວາຣໂຫ ກປ຺ເປ, ມາຕຸຄາເມນ ເຈກໂຕ.

໔໔. ສຸຣາເມຣຍປາເນປິ, ປາຈິຕ຺ຕິຍມຸທີຣິຕໍ;

ອງ຺ຄຸລິປໂຕທເກ ຈາປິ, ຫສຘມ຺ເມປິ ໂຈທເກ.

໔໕. ອນາທເຣປິ ປາຈິຕ຺ຕິ, ຠິກ຺ຂຸໍ ຠີສຍໂຕປິ ວາ;

ຠຍານກໍ ກຖໍ ກຕ຺ວາ, ທສ຺ເສຕ຺ວາ ວາ ຠຍານກໍ.

໔໖. ຐເປຕ຺ວາ ປຈ຺ຈຍໍ ກິຎ຺ຈິ, ອຄິລາໂນ ຊເລຍ຺ຍ ວາ;

ໂຊຕິໍ ຊລາປເຍຍ຺ຍາປິ, ຕສ຺ສ ປາຈິຕ຺ຕິຍໍ ສິຍາ.

໔໗. ກປ຺ປພິນ຺ທຸມນາທາຍ, ນວຈີວຣໂຠຄິໂນ;

ຫສາເປກ຺ຂສ຺ສ ປາຈິຕ຺ຕິ, ຠິກ຺ຂຸໂນ ຈີວຣາທິກໍ.

໔໘. ອປເນຕ຺ວາ ນິເຘນ຺ຕສ຺ສ, ນິຘາເປນ຺ຕສ຺ສ ວາ ປນ;

ຊານໍ ປາຓໍ ມາເຣນ຺ຕສ຺ສ, ຕິຣຈ຺ຉານຄຕມ຺ປິ ຈ.

໔໙. ຉາເທຕຸກາໂມ ຉາເທຕິ, ທຸຏ຺ຐຸລ຺ລໍ ຠິກ຺ຂຸໂນປິ ຈ;

ຄາມນ຺ຕຣຄຕສ຺ສາປິ, ສໍວິຘາຍິຕ຺ຖິຍາ ສຫ.

໕໐. ຠິກ຺ຂຸໍ ປຫຣໂຕ ວາປິ, ຕລສຕ຺ຕິກມຸຄ຺ຄິເຣ;

ໂຈເທຕິ ວາ ໂຈທາເປຕິ, ຄຣຸກາມູລເກນປິ.

໕໑. ກຸກ຺ກຸຈ຺ຈຸປ຺ປາທເນ ຈາປິ, ຠຓ຺ຑນຕ຺ຖາຍຸປສ຺ສຸຕິໍ;

ໂສຕຸໍ ຠຓ຺ຑນຊາຕານໍ, ຍາຕິ ປາຈິຕ຺ຕິຍໍ ສິຍາ.

໕໒. ສງ຺ຆສ຺ສ ລາຠໍ ປຣິຓາມິຕໍ ຕຸ,

ນາເມຕິ ໂຍ ຕໍ ປຣປຸຄ຺ຄລສ຺ສ;

ປຸຈ຺ຉໍ ອກຕ຺ວາປິ ຈ ສນ຺ຕຠິກ຺ຂຸໍ,

ປາຈິຕ຺ຕິ ຄາມສ຺ສ ຄເຕ ວິກາເລຕິ.

໕. ປກິຓ຺ຓກນິທ຺ເທໂສ

໕໓. ສງ຺ຆິກໍ ຄຣຸຠຓ຺ຑໍ ໂຍ, ເທຕິ ອຎ຺ຎສ຺ສ ອິສ຺ສໂຣ;

ຖຸລ຺ລຈ຺ຈຍໍ ຍຖາວຕ຺ຖຸໍ, ເຖຍ຺ຍາ ປາຣາຊິກາທິປິ.

໕໔. ກຸສາທິມຍຈີຣານິ, ກມ຺ພລໍ ເກສວາລຊໍ;

ສມຍໍ ວິນາ ຘາຣຍໂຕ, ລູກປກ຺ຂາຊິນກ຺ຂິປໍ.

໕໕. ສຕ຺ຖກມ຺ເມ ວຕ຺ຖິກມ຺ເມ, ສໍ ນິມິຕ຺ຕຎ຺ຈ ຉິນ຺ທໂຕ;

ຖຸລ຺ລຈ຺ຈຍໍ ມນຸສ຺ສານໍ, ມໍສາທິໂຠຊເນປິ ວາ.

໕໖. ກທເລຣກກ຺ກທຸສ຺ສານິ, ໂປຕ຺ຖກໍ ສພ຺ພນີລກໍ;

ສພ຺ພປີຕາທິກຎ຺ຈາປິ, ຘາຣຍນ຺ຕສ຺ສ ທຸກ຺ກຏໍ.

໕໗. ຫຕ຺ຖິສ຺ສຸຣຄໂສຓານໍ, ສີຫພ຺ຍຄ຺ຆຈ຺ຉທີປິນໍ;

ຕຣຈ຺ຉສ຺ສ ຈ ມໍສາທິໍ, ອຸທ຺ທິສ຺ສກຕກມ຺ປິ ຈ.

໕໘. ອນາປຸຈ຺ຉິຕມໍສຎ຺ຈ, ຠຸຎ຺ຊໂຕ ທຸກ຺ກຏໍ ສິຍາ;

ຍາຕານຸປຸພ຺ພໍ ຫິຕ຺ວານ, ທກຕິຕ຺ຖາທິກໍ ວເຊ.

໕໙. ສຫສາ ວຸພ຺ຠຊິຕ຺ວານ, ປວິເສ ນິກ຺ຂເມຍ຺ຍ ວາ;

ວຈ຺ຈປສ຺ສາວກຸຏິກໍ, ວິນາ ອຸກ຺ກາສິກໍ ວິເສ.

໖໐. ນິຕ຺ຖຸນນ຺ໂຕ ກເຣ ວຈ຺ຈໍ, ທນ຺ຕກຏ຺ຐຎ຺ຈ ຂາທຍໍ;

ວຈ຺ຈປສ຺ສາວໂທຓີນໍ, ພຫິ ວຈ຺ຈາທິກໍ ກເຣ.

໖໑. ຂເຣນ ຈາວເລເຂຍ຺ຍ, ກຏ຺ຐໍ ປາເຕຍ຺ຍ ກູປເກ;

ອູຫຕຎ຺ຈ ນ ໂຘເວຍ຺ຍ, ອຸກ຺ລາປຎ຺ຈ ນ ໂສຘເຍ.

໖໒. ທກກິຈ຺ຈໍ ກໂຣນ຺ຕສ຺ສ, ກຕ຺ວາ ‘‘ຈປຸຈປູ’’ຕິ ຈ;

ອນຊ຺ຌິຏ຺ໂຐວ ເຖເຣນ, ປາຕິໂມກ຺ຂມ຺ປິ ອຸທ຺ທິເສ.

໖໓. ອນາປຸຈ຺ຉາຍ ປຎ຺ຫສ຺ສ, ກຖເນ ວິສ຺ສຊ຺ຊເນປິ ຈ;

ສຊ຺ຌາຍກຣເຓ ທີປ-ຊາລເນ ວິຊ຺ຌາປເນປິ ຈ.

໖໔. ວາຕປານກວາຏານິ, ວິວເຣຍ຺ຍ ຖເກຍ຺ຍ ວາ;

ວນ຺ທນາທິໍ ກເຣ ນຄ຺ໂຄ, ຄມນໍ ໂຠຊນາທິກໍ.

໖໕. ປຣິກມ຺ມໍ ກເຣ ກາເຣ, ຕິປຏິຈ຺ຉນ຺ນກໍ ວິນາ;

ກາຍໍ ນຫາຍໍ ຆໍເສຍ຺ຍ, ກຸຏ຺ເຏ ຖມ຺ເຠ ຕຣຸມ຺ຫິ ວາ.

໖໖. ກຸຣຸວິນ຺ທກສຸຕ຺ເຕນ, ອຎ຺ຎມຎ຺ຎສ຺ສ ກາຍໂຕ;

ອຄິລາໂນ ພຫາຣາເມ, ຈເຣຍ຺ຍ ສອຸປາຫໂນ.

໖໗. ອຸປາຫນໍ ໂຍ ຘາເຣຕິ, ສພ຺ພນີລາທິກມ຺ປິ ຈ;

ນິມິຕ຺ຕໍ ອິຕ຺ຖິຍາ ຣຕ຺ໂຕ, ມຸຂໍ ວາ ຠິກ຺ຂທາຍິຍາ.

໖໘. ອຸຊ຺ຌານສຎ຺ຎີ ອຎ຺ຎສ຺ສ, ປຕ຺ຕໍ ວາ ອຕ຺ຕໂນ ມຸຂໍ;

ອາທາສາທິມ຺ຫິ ປສ຺ເສຍ຺ຍ, ອຸຈ຺ຈາສນມຫາສເນ.

໖໙. ນິສຊ຺ຊາທິໍ ກໂຣນ຺ຕສ຺ສ, ທຸກ຺ກຏໍ ວນ຺ທເນປິ ຈ;