໙. ປຏິຄ຺ຄາຫນິທ຺ເທສວຓ຺ຓນາ

໑໐໖. ທາຕຸໍ ກາເມຕີຕິ ທາຕຸກາໂມ, ຕສ຺ສ ອຠິຫາໂຣ ອີສກມ຺ປິ ໂອຓມນາທິນາຠິຫຣຓນ຺ຕິ ຕປ຺ປຸຣິໂສ, ຫຕ຺ຖສ຺ສ ປາໂສ ຫຕ຺ຖປາໂສ. ຣຸຬ຺ຫີວເສນ ຕຸ ອຑ຺ຒເຕຍ຺ຍຫຕ຺ໂຖ ຫຕ຺ຖປາໂສ ນາມ. ໂສ ຈ ສເຈ ຠິກ຺ຂຸ ນິສິນ຺ໂນ ໂຫຕິ, ອາສນສ຺ສ ປຈ຺ຉິມນ຺ຕໂຕ ປຏ຺ຐາຍ, ສເຈ ຐິໂຕ, ປຓ຺ຫິອນ຺ຕໂຕ ປຏ຺ຐາຍ, ສເຈ ນິປນ຺ໂນ, ເຍນ ປສ຺ເສນ ນິປນ຺ໂນ, ຕສ຺ສ ປາຣິມນ຺ຕໂຕ ປຏ຺ຐາຍ ທາຍກສ຺ສ ນິສິນ຺ນສ຺ສ ຐິຕສ຺ສ ວາ ຐເປຕ຺ວາ ປສາຣິຕຫຕ຺ຖໍ ຍໍ ອາສນ຺ນຕຣໍ ອງ຺ຄໍ, ຕສ຺ສ ໂອຣິມນ຺ເຕນ ປຣິຈ຺ຉິນ຺ທິຕ຺ວາ ເວທິຕພ຺ໂພ. ເອຣຓກ຺ຂມນ຺ຕິ ຖາມມຊ຺ຌິເມນ ປຸຣິເສນ ເອຣຓສ຺ສ ອຸກ຺ຂິປນສ຺ສ ຂມໍ ໂຍຄ຺ຄໍ. ວຕ຺ຖຸສທ຺ທາເປກ຺ຂໍ ນປຸໍສກຕ຺ຕໍ. ຕິຘາ ເທນ຺ເຕຕິ ກາຍກາຍປ຺ປຏິພທ຺ຘນິສ຺ສຄ຺ຄິຍານໍ ວເສນ ຕີຫິ ປກາເຣຫິ ທາຍເກ ທທມາເນ. ຕຕ຺ຖ ເຍນ ເກນຈິ ສຣີຣາວຍເວນ ອນ຺ຕມໂສ ປາທງ຺ຄຸລິຍາປິ ທີຍມານໍ ກາເຍນ ທິນ຺ນໍ ນາມ ໂຫຕິ, ກຏຈ຺ຉຸອາທີສຸ ເຍນ ເກນຈິ ທີຍມານໍ ກາຍປ຺ປຏິພທ຺ເຘນ, ກາຍໂຕ ປນ ກາຍປ຺ປຏິພທ຺ຘໂຕ ວາ ໂມເຈຕ຺ວາ ຫຕ຺ຖປາເສ ຐິຕສ຺ສ ກາເຍນ ວາ ກາຍປ຺ປຏິພທ຺ເຘນ ວາ ປາຕິຍມານໍ ນິສ຺ສຄ຺ຄິເຍນ ປໂຍເຄນ ທິນ຺ນໍ ນາມ. ທ຺ວິຘາ ຄາໂຫຕິ ກາຍກາຍປ຺ປຏິພທ຺ຘານໍ ວເສນ ທ຺ວີຫິ ປກາເຣຫິ ເຍຫິ ເກຫິຈິ ທີຍມານສ຺ສ ຄຫຓໍ. ເອວໍ ປຏິຄ຺ຄໂຫ ປຎ຺ຈງ຺ໂຄຕິ ໂຍຊນາ. ປຎ຺ຈງ຺ໂຄຕິ ປຎ຺ຈ ອງ຺ຄານິ ຍສ຺ສາຕິ ພຫຸພ຺ພີຫິ.

໑໐໗. ອິທານິ ອເນຣຓກ຺ຂເມ ຈ ກິສ຺ມິຎ຺ຈິ ກາຍປ຺ປຏິພທ຺ເຘ ຈ ປຏິຄ຺ຄຫຓາໂຣຫນໍ ທສ຺ເສຕຸໍ ‘‘ອສໍຫາຣິເຍ’’ຕິອາທິມາຫ. ຕຕ຺ຖ ອສໍຫາຣິເຍຕິ ອາເນຕຸມສກ຺ກຸເຓຍ຺ເຍ ຜລກປາສາຓາທິມ຺ຫິ. ຕຕ຺ຖຊາເຕຕິ ເຕສຸເຍວ ຣຸກ຺ຂາທີສຸ ຊາເຕ ກິໍສຸກປທຸມິນິປຓ຺ຓາທິເກ. ຈິຎ຺ຈອາທີນໍ ສຸຂຸເມ ປຓ຺ເຓຕິ ສມ຺ພນ຺ໂຘ. ຕານິ ຫິ ສນ຺ຘາເຣຕຸໍ ນ ສກ຺ໂກນ຺ຕິ. ເຕສໍ ປນ ສາຂາສຸ ວຏ຺ຏຕິ. ອາທິ-ສທ຺ເທນ ‘‘ອງ຺ຄ’’ນ຺ຕິອາທິກໍ ສງ຺ຄຓ຺ຫາຕິ. ວາ-ສທ຺ໂທ ສມຸຈ຺ຈເຍ. ອສຍ຺ຫຠາເຣຕິ ຖາມມຊ຺ຌິມປຸຣິເສນ ສຫິຕຸໍ ສນ຺ຘາເຣຕຸໍ ອສກ຺ກຸເຓຍ຺ເຍ ຠາເຣ. ສພ຺ເພສໍ ປຏິຄ຺ຄໂຫ ‘‘ນ ຣູຫຕີ’’ຕິ ອິມິນາ ສມ຺ພນ຺ໂຘ.

໑໐໘. ອິທານິ ປຏິຄ຺ຄຫຓວິຊຫນໍ ທສ຺ເສຕິ ‘‘ສິກ຺ຂາ’’ຕິອາທິນາ. ຕຕ຺ຖ ສິກ຺ຂາມຣຓລິງ຺ເຄຫີຕິ ສິກ຺ຂາປຈ຺ຈກ຺ຂາເນນ ຈ ມຣເຓນ ຈ ລິງ຺ຄປຣິວຕ຺ຕເນນ ຈ. ອນເປກ຺ຂວິສຄ຺ຄໂຕຕິ ນຕ຺ຖິ ອເປກ຺ໂຂ ເອຕສ຺ສາຕິ ອນເປກ຺ໂຂ, ໂສວ ວິສຄ຺ໂຄ, ຕໂຕ ຈ. ອຈ຺ເຉທາຕິ ໂຈຣາທີຫິ ອຈ຺ຉິນ຺ທິຕ຺ວາ ຄຫເຓນ. ອນຸປສມ຺ປນ຺ນທານາຕິ ອນຸປສມ຺ປນ຺ນສ຺ສ ທາເນນ. ຈ-ສທ຺ໂທ ສພ຺ພຕ຺ຖ ອາເນຕພ຺ໂພ. ຄາໂຫຕິ ປຏິຄ຺ຄຫຓໍ. ອຸປສມ຺ມຕີຕິ ວິຊຫຕິ.

໑໐໙-໑໐. ອິທານິ ອປ຺ປຏິຄ຺ຄຫິຕໍ ປຣິໂຠເຄ ໂທສໍ ທສ຺ເສຕຸໍ ‘‘ອປ຺ປຏິຄ຺ຄຫິຕ’’ນ຺ຕິອາທິມາຫ. ຕຕ຺ຖ ສພ຺ພນ຺ຕິ ຈຕຸກາລິກປຣິຍາປນ຺ນໍ ສກລມ຺ປິ. ອິທານິ ອປ຺ປຏິຄ຺ຄເຫຕ຺ວາ ປຣິຠຸຎ຺ຊິຕພ຺ພໍ ທສ຺ເສຕຸໍ ‘‘ສຸທ຺ຘ’’ນ຺ຕິອາທິມາຫ. ຕຕ຺ຖ ສຸທ຺ຘໍ ນາຕິພຫລໍ ອຸທກຎ຺ຈ ຕຖາ ອງ຺ຄລຄ຺ຄໍ ອວິຈ຺ຉິນ຺ນໍ ທນ຺ຕ…ເປ… ຄູຖກຎ຺ຈ ໂລຓ…ເປ… ກຣີສກຎ຺ຈ ກປ຺ປເຕຕິ ສມ຺ພນ຺ໂຘ. ຕຕ຺ຖ ສຸທ຺ຘນ຺ຕິ ຣຊເຣຓູຫິ ອຎ຺ຎຣເສນ ຈ ອສມ຺ມິສ຺ສຕາຍ ປຣິສຸທ຺ຘໍ. ນາຕິພຫລນ຺ຕິ ຍໍ ກສິຕຏ຺ຐາເນ ພຫລມຸທກໍ ວິຍ ມຸເຂ ວາ ຫຕ຺ເຖ ວາ ນ ລຄ຺ຄໍ, ຕໍ. ອວິຈ຺ຉິນ຺ນນ຺ຕິ ອງ຺ຄໂຕ ວິຈ຺ຉິນ຺ທິຕ຺ວາ ນ ຄຕໍ. ທນ຺ຕານິ ຈ ອກ຺ຂີນິ ຈ ກຓ຺ຓຎ຺ຈ ທນ຺ຕກ຺ຂິກຓ຺ຓໍ ປາຓ຺ຍງ຺ຄຕ຺ຕາ, ຕສ຺ສ ຄູຖກນ຺ຕິ ຕປ຺ປຸຣິໂສ. ໂລຓໍ ສຣີຣຸຏ຺ຐິຕໍ. ສິງ຺ຆາຓີຕິ ສິງ຺ຆາຓິກາ. ວິຈ຺ຉິນ຺ນໍ ນ ປຏິຄ຺ຄເຫຕພ຺ພໍ.

໑໑໑. ອິທານິ ‘‘ຄູຖາ’’ຕິອາທິນາ ກາໂລທິສ຺ສໍ ທສ຺ເສຕິ. ຕຖາວິເຘຕິ ສປ຺ປທຏ຺ຐກ຺ຂຓາທິເກ ຕຖາວິເຘ ກາເລ. ຕຖາ ຕາທິໂສ ວິໂຘ ກາໂລ ເອຕສ຺ສາຕິ ພຫຸພ຺ພີຫິ. ເສເວຍ຺ຍາຕິ ເສວນໍ ກເຣຍ຺ຍ, ປຣິຠຸຎ຺ເຊຍ຺ຍາຕິ ວຸຕ຺ຕໍ ໂຫຕິ. ອສນ຺ເຕ ກປ຺ປກາຣເກຕິ ເອຕ຺ຖ ທຸພ຺ພໂຈປິ ອສມຕ຺ໂຖປິ ກປ຺ປິຍກາຣໂກ ອສນ຺ຕປກ຺ເຂເຍວ ຕິຏ຺ຐຕີຕິ ເວທິຕພ຺ໂພ. ກາໂລທິສ຺ສຕ຺ຕາ ປນ ຉາຣິກາຍ ອສຕິ ອລ຺ລທາຣຸໍ ຣຸກ຺ຂໂຕ ຉິນ຺ທິຕ຺ວາ ກາຕຸໍ, ມຕ຺ຕິກາຍ ອສຕິ ຠູມິໍ ຂຓິຕ຺ວາປິ ມຕ຺ຕິກໍ ຄເຫຕຸໍ ວຏ຺ຏຕິ.

໑໑໒. ທຸຣູປຈິຓ຺ເຓຕິ ທຸຏ຺ຐຸໍ ອຸປຈິຓ຺ຓໍ ອາມຏ຺ຐໍ ທຸຣູປຈິຓ຺ຓໍ. ສເຈ ຠິກ຺ຂຸ ອປ຺ປຏິຄ຺ຄຫິຕໍ ສາມິສໍ ຠາຊນໍ ຐິຕຏ຺ຐານໂຕ ອປເນຕ຺ວາ ອາມສຕິ, ປິຘານໍ ອາມສຕິ, ອຸປຣິ ຐິຕກຈວຣາທິໍ ຉຑ຺ເຑຕິ, ຕຕ຺ຖຊາຕກຜລິນິຍາ ສາຂາຍ ວາ ວລ຺ລິຍາ ວາ ຄເຫຕ຺ວາ ວາ ຈາເລຕິ, ທຸຣູປຈິຓ຺ຓໍ ນາມ ໂຫຕິ. ຕສ຺ມິໍ ທຸກ຺ກຏນ຺ຕິ ສມ຺ພນ຺ໂຘ. ຜລຣຸກ຺ຂໍ ປນ ອປສ຺ສຍິຕຸໍ ວາ ຕຕ຺ຖ ກຓ຺ຏກໍ ວາ ພນ຺ຘິຕຸໍ ວຏ຺ຏຕິ. ອຣຎ຺ເຎ ປຕິຕອມ຺ພຜລາທິໍ ‘‘ສາມເຓຣສ຺ສ ທສ຺ສາມີ’’ຕິ ອາຫຣິຕ຺ວາ ທາຕຸໍ ວຏ຺ຏຕິ. ຣໂຊກິຓ຺ເຓຕິ ຣຊສາ ໂອກິຓ຺ເຓ, ຕສ຺ມິໍ ປຕ຺ຕາທິເກ ຍໍ ກິຎ຺ຈິ ປຏິຄ຺ຄຓ຺ຫໂຕ ວິນຍທຸກ຺ກຏໍ ໂຫຕີຕິ ອຕ຺ໂຖ. ສເຈ ປິຓ຺ຑາຍ ຈຣນ຺ຕສ຺ສ ປຕ຺ເຕ ຣຊໍ ປຕຕິ, ປຏິຄ຺ຄເຫຕ຺ວາ ຠິກ຺ຂາ ຄຓ຺ຫິຕພ຺ພາ. ‘‘ປຏິຄ຺ຄເຫຕ຺ວາ ເທຖາ’’ຕິ ວຸຕ຺ເຕປິ ອາກິຣນ຺ຕິ, ຫຕ຺ຖໂຕ ອໂມເຈນ຺ເຕເນວ ປຏິຄ຺ຄາຫາປກສ຺ສ ສນ຺ຕິກໍ ເນຕ຺ວາ ປຏິຄ຺ຄເຫຕພ຺ພໍ. ສເຈ ມຫາວາໂຕ ຕໂຕ ຕໂຕ ຣຊໍ ປາເຕຕິ, ນ ສກ຺ກາ ໂຫຕິ ຠິກ຺ຂໍ ຄເຫຕຸໍ, ‘‘ອນຸປສມ຺ປນ຺ນສ຺ສ ທສ຺ສາມີ’’ຕິ ສຸທ຺ຘຈິຕ຺ເຕນ ອາໂຠຄໍ ກຕ຺ວາ ຄຓ຺ຫິຕຸໍ ວຏ຺ຏຕິ. ຕໍ ປນ ເຕນ ທິນ຺ນໍ ວາ ວິສ຺ສາເສນ ວາ ປຏິຄ຺ຄເຫຕ຺ວາ ປຣິຠຸຎ຺ຊິຕຸໍ ວຏ຺ຏຕິ.

ອຖາຕິ ວກ຺ຂມານາຣມ຺ເຠ. ອຸຄ຺ຄຫປ຺ປຏິຄ຺ຄເຫຕິ ອຸຄ຺ຄຫິຕ຺ຖາຕິ ອຸຄ຺ຄໂຫ, ອຸຄ຺ຄຫິຕໍ, ຕສ຺ສ ປຏິຄ຺ຄໂຫ, ຕສ຺ມິໍ. ອປ຺ປຏິຄ຺ຄຫິຕຠາວໍ ຊານໂຕ ອຕ຺ຕນາ ເອວ ອຸຄ຺ຄເຫຕ຺ວາ ຄຫເຓຕິ ອຘິປ຺ປາໂຍ. ມາຕາປິຕູນໍ ອຕ຺ຖາຍ ປນ ອປ຺ປຏິຄ຺ຄເຫຕ຺ວາ ເຕລາທີນິ, ຉາຍຕ຺ຖາຍ ສາຂາທີນິ ວາ ຄເຫຕ຺ວາ ປຈ຺ຉໂຕ ຠຸຎ຺ຊິຕຸກາມຕາຍ ປຏິຄ຺ຄເຫຕ຺ວາ ປຣິຠຸຎ຺ຊິຕຸໍ ວຏ຺ຏຕິ. ອຸຈ຺ຉຸອາທີສຸ ຜາລິເຕສຸ ມລໍ ນ ປຎ຺ຎາຍຕິ, ມູລເຠສຊ຺ຊາທີນິ ປິສນ຺ຕານໍ ວາ ໂກຏ຺ເຏນ຺ຕານໍ ວາ ນິສທນິສທໂປຕກອຸທຸກ຺ຂລມຸສລານິ ຂີຍນ຺ຕິ, ທນ຺ຕນ຺ຕເຣ ລຄ຺ຄໍ ສຸຂຸມອາມິສໍ ໂຫຕິ, ຣໂສ ນ ປຎ຺ຎາຍຕິ, ອພ຺ໂພຫາຣິກໍ. ອນ຺ໂຕວຸຕ຺ເຖຕິ ອກປ຺ປິຍກຸຏິຍາ ຉທນພ຺ຠນ຺ຕເຣ ວຸຕ຺ເຖຕິ ອຕ຺ໂຖ. ສຍໍປກ຺ເກຕິ ອຕ຺ຕນາ ຍຕ຺ຖ ກຕ຺ຖຈິ ປກ຺ເກ. ສເຈ ວາສິອາທິໍ ຕາເປຕ຺ວາ ຕກ຺ກາທີສຸ ປກ຺ຂິປຕິ, ເອຕ຺ຕາວຕາປິ ສາມປາກໂຕ ນ ມຸຈ຺ຈຕິ. ປຸຣິມກາລິກທ຺ວເຍ ປຸນປາກຎ຺ຫິ ຐເປຕ຺ວາ ຍໍ ກິຎ຺ຈິ ອາມິສໍ ຠິກ຺ຂຸໂນ ປຈິຕຸໍ ນ ວຏ຺ຏຕິ. ສເຈປິສ຺ສ ອຸຓ຺ຫຍາຄຸຍາ ສຸລສິປຓ຺ຓາທີນິ ວາ ສິງ຺ຄິເວຣໍ ວາ ປກ຺ຂິປນ຺ຕິ, ຈາເລຕຸໍ ນ ວຏ຺ຏຕິ. ອຸຕ຺ຕຓ຺ຑຸລໍ ຠຕ຺ຕໍ ລຠິຕ຺ວາ ປິທຫິຕຸໍ ນ ວຏ຺ຏຕິ. ອນ຺ໂຕປກ຺ເກຕິ ອກປ຺ປິຍກຸຏິຍາ ອນ຺ໂຕ ປກ຺ເກ. ສພ຺ພຕ຺ຖ ທຸກ຺ກຏນ຺ຕິ ສມ຺ພນ຺ໂຘ.

ປຏິຄ຺ຄາຫນິທ຺ເທສວຓ຺ຓນາ ນິຏ຺ຐິຕາ.