໑໐. ອກປ຺ປິຍມໍສນິທ຺ເທສວຓ຺ຓນາ

໑໑໓-໔. ມນຸສ຺ສຫຕ຺ຖິອສ຺ສານຎ຺ຈ …ເປ… ອຸຣຄສ຺ສ ຈ ຍໍ ມໍສຎ຺ຈ, ຍໍ ອຸທ຺ທິສ຺ສກຕມໍສຎ຺ຈ, ອປ຺ປຏິເວກ຺ຂິຕໍ ຍຎ຺ຈ ມໍສໍ, ເຕສຸ ມໍເສສູຕິ ເອວໍ ໂຍເຊຕ຺ວາ ອຕ຺ໂຖ ເວທິຕພ຺ໂພ. ຕຕ຺ຖ ສີສຄີວາຕຣງ຺ເຄນ ຈຣນ຺ຕາ ອຈ຺ຉວິເສສາວ ຕຣຈ຺ຉາ. ອຸຣຄສ຺ສາຕິ ອິມິນາ ສພ຺ພາປິ ທີຆຊາຕິ ສງ຺ຄຫິຕາ. ອຸທ຺ທິສ຺ສກຕມໍສນ຺ຕິ ຠິກ຺ຂຸໍ ອຸທ຺ທິສິຕ຺ວາ ກຕໍ ອຸທ຺ທິສ຺ສກຕໍ, ຕຎ຺ຈ ຕໍ ມໍສຎ຺ຈ. ເອຕ຺ຖ ຈ ມໍສ-ຄ຺ຄຫເຓນ ມຈ຺ຉານມ຺ປິ ຄຫຓໍ ເວທິຕພ຺ພໍ ອຸປລກ຺ຂຓວເສນ, ຈ-ສທ຺ເທນ ວາ. ປຎ຺ຈສຸປິ ສຫຘມ຺ມິເກສຸ ຍໍ ກິຎ຺ຈິ ອຸທ຺ທິສ຺ສກຕໍ ສພ຺ເພສມ຺ປິ ນ ກປ຺ປຕິ, ຕມ຺ປິ ອທິຏ຺ຐອສຸຕອປຣິສງ຺ກິຕຕາຍ ຕິໂກຏິປຣິສຸທ຺ຘໍ ວຏ຺ຏຕິ. ອປ຺ປຏິເວກ຺ຂິຕນ຺ຕິ ອນຸປປຣິກ຺ຂິຕໍ, ອນາປຸຈ຺ຉິຕນ຺ຕິ ອຕ຺ໂຖ. ອາປຕ຺ຕິຠີຣຸເກນ ຫິ ຣູປໍ ສລ຺ລກ຺ເຂນ຺ເຕນາປິ ປຸຈ຺ຉິຕ຺ວາ ປຏິຄ຺ຄເຫຕພ຺ພໍ ປຣິຠຸຎ຺ຊິຕພ຺ພຎ຺ຈ. ມນຸສ຺ສານໍ ມໍເສສຸ ຖຸລ຺ລຈ຺ຈຍນ຺ຕິ ໂຍຊນາ. ຖູໂລ ອຈ຺ຈໂຍ ເອຕ຺ຖາຕິ ຣສ຺ເສ, ທ຺ວິຕ຺ເຕ ຈ ຖຸລ຺ລຈ຺ຈຍໍ. ປາຣາຊິກສງ຺ຆາທິເສເສຫິ ຐເປຕ຺ວາ ອິໂຕ ອຘິກໍ ວຊ຺ຊໍ ນຕ຺ຖິ. ເສເສສູຕິ ອວເສເສສຸ ເອກາທສສຸ.

໑໑໕. ອິທານິ ມນຸສ຺ສາທີນໍ ອຏ຺ຐິອາທີນິປິ ອກປ຺ປິຍານີຕິ ທສ຺ເສຕຸໍ ‘‘ອຏ຺ຐິປີ’’ຕິອາທິມາຫ. ປິ-ສທ຺ໂທ ‘‘ໂລຫິຕ’’ນ຺ຕິອາທີສຸປິ ອນຸວຕ຺ເຕຕພ຺ໂພ. ເອສນ຺ຕິ ມນຸສ຺ສາທີນໍ ທສນ຺ນໍ. ວສາສຸ ປນ ເອກາ ມນຸສ຺ສວສາ ນ ວຏ຺ຏຕິ. ຂີຣາທີສຸ ອກປ຺ປິຍໍ ນາມ ນຕ຺ຖິ. ອຸທ຺ທິສ຺ສກຕໍເຍວ ສຈິຕ຺ຕກນ຺ຕິ ໂຍຊນາ. ສຈິຕ຺ຕກນ຺ຕິ ອຸທ຺ທິສ຺ສກຕຠາວຊານນຈິຕ຺ເຕນ ສຫ ວຕ຺ຕຕີຕິ ສຈິຕ຺ຕກໍ. ວຕ຺ຖຸວີຕິກ຺ກມວິຊານນຈິຕ຺ເຕນ ຫິ ສຈິຕ຺ຕກຕ຺ຕໍ. ເອຕ຺ຖ ຈ ສຈິຕ຺ຕກຕ຺ຕໍ ອາປຕ຺ຕິຍາ ເອວ, ນ ຈ ມໍສສ຺ສ, ຕຖາປິ ມໍສສີເສນ ອາປຕ຺ຕິ ເອວ ວຸຕ຺ຕາຕິ ວິຎ຺ຎາຕພ຺ພນ຺ຕິ.

ອກປ຺ປິຍມໍສນິທ຺ເທສວຓ຺ຓນາ ນິຏ຺ຐິຕາ.