໑໑. ນິສ຺ສຄ຺ຄິຍນິທ຺ເທສວຓ຺ຓນາ

໑໑໖-໗. ຣູປິເຍນ ອຣູປິຍໍ ຣູປິຍຎ຺ຈ ອິຕເຣນ ຣູປິຍຎ຺ຈ ປຣິວຕ຺ເຕຍ຺ຍາຕິ ສມ຺ພນ຺ໂຘ. ຕຕ຺ຖ ຣູປິເຍນາຕິ ຣູປິຍສງ຺ຂາເຕນ ນິສ຺ສຄ຺ຄິຍວຕ຺ຖຸນາ. ອຣູປິຍນ຺ຕິ ອຣູປິຍສງ຺ຂາຕໍ ທຸກ຺ກຏວຕ຺ຖຸໍ ກປ຺ປິຍວຕ຺ຖຸຎ຺ຈ. ອິຕເຣນາຕິ ອຣູປິເຍນ. ນິສ຺ສຄ຺ຄີຕິ ນິສ຺ສຊ຺ຊນໍ ນິສ຺ສຄ຺ໂຄ, ປຸພ຺ພຠາເຄ ກຕ຺ຕພ຺ພສ຺ສ ວິນຍກມ຺ມສ຺ເສຕໍ ນາມໍ. ນິສ຺ສຄ຺ໂຄ ອສ຺ສ ອຕ຺ຖີຕິ ນິສ຺ສຄ຺ຄິ, ກິໍ ຕໍ? ປາຈິຕ຺ຕິຍໍ. ຣູປິຍສ຺ສ ມູລຄ຺ຄຫເຓ ປນ ຣູປິຍປ຺ປຏິຄ຺ຄຫຓສິກ຺ຂາປເທນ ນິສ຺ສຄ຺ຄິຍໍ ປາຈິຕ຺ຕິຍໍ.

ອິທານິ ຣູປິຍາທິໍ ທສ຺ເສຕຸໍ ‘‘ອິຘາ’’ຕິອາທິ ອາຣທ຺ຘໍ. ຕຕ຺ຖ ກຫາ…ເປ… ມາສກໍ ອິຘ ຣູປິຍນ຺ຕິ ສມ຺ພນ຺ໂຘ. ຕຕ຺ຖ ກຫາປໂຓ ນາມ ສຸວຓ຺ຓມໂຍ ວາ ຣຊຕມໂຍ ວາ ເອຕຣຫິ ປກຕິກຫາປໂຓ ວາ. ສຊ຺ຌູຕິ ຣຊຕໍ. ສິງ຺ຄີຕິ ສຸວຓ຺ຓເຠໂທ, ຕຖາປິ ເຈຕ຺ຖ ສາມຎ຺ເຎນ ສຸວຓ຺ຓມຘິປ຺ເປຕໍ. ໂວຫາຣູປຄມາສກນ຺ຕິ ໂວຫາຣໍ ກຍວິກ຺ກຍໍ ອຸປຄຈ຺ຉຕີຕິ ໂວຫາຣູປຄໍ, ຕຎ຺ຈ ຕໍ ມາສກຎ຺ຈ. ຕໍ ປນ ສມຸຏ຺ຐາປິຕຣູປຎ຺ຈ ອສມຸຏ຺ຐາປິຕຣູປຎ຺ຈ ໂລຫທາຣຸອາທິມຍໍ ວຸຈ຺ຈຕິ. ອິຘ ຣູປິຍນ຺ຕິ ອິມສ຺ມິໍ ສິກ຺ຂາປເທ ຣູປິຍໍ ນາມາຕິ ອຕ຺ໂຖ. ວຕ຺ຖມຸຕ຺ຕາທິ ກປ຺ປໍ ທຸກ຺ກຏວຕ຺ຖຸຎ຺ຈ ອິຕຣນ຺ຕິ ໂຍຊນາ. ຕຕ຺ຖ ວຕ຺ຖຎ຺ຈ ມຸຕ຺ຕາ ຈ ອາທິ ຍສ຺ສາຕິ ສມາໂສ. ອາທິ-ສທ຺ໂທ ປຈ຺ເຈກໍ ໂຍເຊຕພ຺ໂພ ‘‘ວຕ຺ຖາທິ ມຸຕ຺ຕາທີ’’ຕິ. ຕຕ຺ຖ ປຐເມນ ອາທິ-ສທ຺ເທນ ກປ຺ປາສສຸຕ຺ຕາປຣຓ຺ຓາທິກໍ ຍໍ ກິຎ຺ຈິ ກປ຺ປິຍວຕ຺ຖຸໍ, ທຸຕິເຍນ ມຓິ ສງ຺ໂຂ ສິລາ ປວາຬໍ ໂລຫິຕງ຺ໂກ ມສາຣຄລ຺ລໍ ສຕ຺ຕຘຎ຺ຎານິ ທາສິທາສເຂຕ຺ຕວຕ຺ຖຸປຸປ຺ຜາຣາມຜລາຣາມາທໂຍຕິ ອິທໍ ທຸກ຺ກຏວຕ຺ຖຸໍ ສງ຺ຄຓ຺ຫາຕິ. ວຕ຺ຖາທິກປ຺ປິຍວຕ຺ຖຸໍ, ມຸຕ຺ຕາທິທຸກ຺ກຏວຕ຺ຖຸຎ຺ຈ ອິຕຣໍ ອຎ຺ຎໍ ອຣູປິຍໍ ນາມາຕິ ອຕ຺ໂຖ.

໑໑໘. ເອຕ຺ຕາວຕາ ຣູປິຍສໍໂວຫາຣໍ ທສ຺ເສຕ຺ວາ ອິທານິ ກປ຺ປິຍຠຓ຺ເຑ ກຍວິກ຺ກຍໍ ທສ຺ເສຕຸມາຫ ‘‘ອິມ’’ນ຺ຕິອາທິ. ຕຕ຺ຖ ‘‘ອິມໍ ຄເຫຕ຺ວາ ອິມໍ ເທຫິ, ອິມໍ ກຣ, ອິມໍ ອານຍາ’’ຕິ ວາ ‘‘ອິມໍ ຠຸຕ຺ວາ ອິມໍ ເທຫິ, ອິມໍ ກຣ, ອິມໍ ອານຍາ’’ຕິ ວາ ‘‘ອິມໍ ເທມິ, ອິມໍ ເທຫິ, ອິມໍ ກຣ, ອິມໍ ອານຍາ’’ຕິ ວາ ກຍວິກ຺ກເຍ ສມາປນ຺ເນ ນິສ຺ສຄ຺ຄີຕິ ໂຍຊນາ. ຕຕ຺ຖ ອິມນ຺ຕິ ຕຓ຺ຑຸລາທິໍ. ຠຸຕ຺ວາຕິ ໂອທນາທິໍ ຠຸຎ຺ຊິຕ຺ວາ. ອິມໍ ເທຫີຕິ ເອຕໍ ວຕ຺ຖາທິກໍ ເທຫິ. ອິມໍ ກຣາຕິ ເອຕໍ ຣຊນປຈນາທິໍ ກໂຣຫິ. ອິມໍ ອານຍາຕິ ເອຕໍ ຣຊນກຏ຺ຐາທິໍ ອາເນຫິ. ອິມໍ ເທມີຕິ ເອຕໍ ວຕ຺ຖາທິກໍ ຕວ ເທມິ. ສມາປນ຺ເນຕິ ກເຕ. ຕສ຺ມາ ກປ຺ປິຍໍ ຠຓ຺ຑໍ ປຣິວຕ຺ເຕນ຺ເຕນ ອຎ຺ຎາຕເກຫິ ສທ຺ຘິໍ ‘‘ອິມໍ ເທຫີ’’ຕິ ວທໂຕ ວິຎ຺ຎຕ຺ຕິ, ‘‘ອິມໍ ຄຓ຺ຫາຫີ’’ຕິ ວທໂຕ ສທ຺ຘາເທຍ຺ຍວິນິປາຕນໍ, ‘‘ອິມິນາ ອິມໍ ເທຫີ’’ຕິ ວທໂຕ ກຍວິກ຺ກຍນ຺ຕິ ວຸຕ຺ຕາ ຕິສ຺ໂສ ອາປຕ຺ຕິໂຍ. ມາຕາປິຕູຫິ ປນ ສທ຺ຘິໍ ກຍວິກ຺ກຍມຕ຺ຕໍ ໂມເຈນ຺ເຕນ ປຣິວຕ຺ເຕຕພ຺ພໍ. ອຍຎ຺ຫິ ກຍວິກ຺ກໂຍ ຐເປຕ຺ວາ ປຎ຺ຈສຫຘມ຺ມິເກ ອວເສເສຫິ ຄິຫິປພ຺ພຊິເຕຫິ ນ ວຏ຺ຏຕິ. ສເຈ ປນ ນວກມ຺ມານິ ກາເຣຕິ, ອຏ຺ຐກຖາປມາເຓນ ປາຈິຕ຺ຕິຍມຕ຺ຕໍ ເທເສຕພ຺ພໍ.

໑໑໙-໑໒໐. ອິທານິ ປຣິຓາມນວເສນ ອາປຕ຺ຕິເຠທໍ ທສ຺ເສຕຸໍ ‘‘ອຕ຺ຕໂນ’’ຕິອາທິ ອາຣທ຺ຘໍ. ຕຕ຺ຖາຍໍ ປິຓ຺ຑຕ຺ໂຖ – ສງ຺ຆສ຺ສ ນຕໍ ລາຠໍ ອຕ຺ຕໂນ ປຣິຓາເມຍ຺ຍ, ນິສ຺ສຄ຺ຄິ. ອຎ຺ຎໂຕ ປຸຄ຺ຄລສ຺ສ ປຣິຓາເມຍ຺ຍ, ປາຈິຕ຺ຕິ. ອຎ຺ຎສ຺ສ ສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຍ຺ຍ, ທຸກ຺ກຏໍ. ອຎ຺ຎສ຺ສ ປຸຄ຺ຄລສ຺ສ ວາ ເຈຕິຍສ຺ສ ວາ ນຕໍ ລາຠໍ ອຕ຺ຕໂນ ວາ ສງ຺ຆສ຺ສ ວາ ອຎ຺ຎປຸຄ຺ຄລສ຺ສ ວາ ອຎ຺ຎເຈຕິຍສ຺ສ ວາ ປຣິຓາເມຍ຺ຍ, ທຸກ຺ກຏນ຺ຕິ ໂຍຊນາ. ຕຕ຺ຖ ນຕນ຺ຕິ ກາເຍນ ວາ ວຈສາ ວາ ນິນ຺ນໍ ກຕໍ. ລາຠນ຺ຕິ ລຠິຕພ຺ພໍ ຈີວຣາທິ. ອຎ຺ຎໂຕ ອຎ຺ຎສ຺ມິໍ ປຸຄ຺ຄເລ ວາ ເຈຕິເຍ ວາ, ເຈຕິເຍ ປນ ທຸກ຺ກຏໍ. ອຎ຺ຎສ຺ສາຕິ ເຈຕິຍາທິໂນ ອນ຺ຕມໂສ ສຸນຂສ຺ສ. ອຎ຺ຎໂຕ ວາຕິ ເຈຕິຍາທິມ຺ຫິ ວາ. ສງ຺ຆສ຺ສາຕິ ປນ ອິທໍ ກາກກ຺ຂິໂຄຬກຎາເຍນ ‘‘ນຕໍ ປຣິຓາເມຍ຺ຍາ’’ຕິ ອຸຠຍຕ຺ຖ ປຣິວຕ຺ຕຕິ. ນິສ຺ສຏ຺ຐໍ ສກສຎ຺ຎາຍ ນ ທເທຍ຺ຍ ວາ, ທຸກ຺ກຏນ຺ຕິ ສມ຺ພນ຺ໂຘ. ອຎ຺ຎຖາ ອຎ຺ເຎນ ປກາເຣນ, ເຖຍ຺ຍສຎ຺ຎາຍ ນ ທເທຍ຺ຍ ເຈຕິ ວຸຕ຺ຕໍ ໂຫຕິ. ອິຕຣນ຺ຕິ ວຕ຺ຖຸວເສນ ອຎ຺ຎໍ ປາຣາຊິກໍ ຖຸລ຺ລຈ຺ຈຍໍ ທຸກ຺ກຏຎ຺ຈ ໂຫຕີຕິ ອຕ຺ໂຖ.

ນິສ຺ສຄ຺ຄິຍນິທ຺ເທສວຓ຺ຓນາ ນິຏ຺ຐິຕາ.