໗. ປວາຣຓານິທ຺ເທສວຓ຺ຓນາ

໗໓. ເຍນ ອິຣິຍາປເຖນ ອຸປລກ຺ຂິໂຕ ປຎ຺ຈນ຺ນໍ ໂຠຊນານໍ ຍໍ ກິຎ຺ຈິ ໂຠຊນໍ ຠຸຎ຺ຊມາໂນ ອຍໍ ຠິກ຺ຂຸ ກປ຺ປິຍານໍ ປຎ຺ຈນ຺ນໍ ໂຠຊນານໍ ຫຕ຺ຖປາໂສປນີຕານໍ ປວາຣິໂຕ, ຕໂຕ ອິຣິຍາປຖໂຕ ອຎ຺ເຎນ ອິຣິຍາປເຖນ ອນຕິຣິຕ຺ຕກໍ ຍາວກາລິກໍ ຠຸຎ຺ເຊຍ຺ຍ ເຈ, ອິມສ຺ສ ປາຈິຕ຺ຕິ ໂຫຕີຕິ ປທຕ຺ຖໂຍຊນາ. ຠຸຎ຺ຊນຕ຺ຖາຍ ປຏິຄ຺ຄຫເຓ ປນ ທຸກ຺ກຏໍ. ຕຕ຺ຖ ອິຣິຍາຍ ກາຍິກກິຣິຍາຍ ປໂຖ ປວຕ຺ຕນູປາໂຍ ອິຣິຍາປໂຖ, ຐານຄມນນິສຊ຺ຊນສຍນານິ. ປວາເຣຕິ ປຏິກ຺ຂິປຕີຕິ ປວາຣິໂຕ, ອຖ ວາ ປວາຣຓໍ ປຏິກ຺ຂິປນໍ ປວາຣິຕໍ, ຕມສ຺ສ ອຕ຺ຖີຕິ ປວາຣິໂຕ, ກຕປ຺ປວາຣໂຓ ກຕປ຺ປຏິກ຺ເຂໂປຕິ ອຕ຺ໂຖ, ອຖ ວາ ປຣິເວສເກນ ວາຣີຍຕີຕິ ປວາຣິໂຕ ປຏິກ຺ເຂປິໂຕ. ອນຕິຣິຕ຺ຕກນ຺ຕິ ຍໍ ປວາເຣຕ຺ວາ ອາສນາ ວຸຏ຺ຐຫນ຺ຕສ຺ສ ‘‘ອລເມຕໍ ສພ຺ພ’’ນ຺ຕິ ເອວໍ ອຕິຣິຕ຺ຕກຣຓາທີຫິ ສຕ຺ຕຫິ ວິນຍກມ຺ມາກາເຣຫິ ກປ຺ປິຍໍ ກຕໍ, ຕຎ຺ຈ ‘‘ອຊ຺ຊ ວາ ຍທາ ວາ ອິຈ຺ຉຕິ, ຕທາ ຂາທິສ຺ສຕີ’’ຕິ ອາຫຏໍ, ຄິລານາຕິຣິຕ຺ຕຎ຺ຈ ອຕິຣິຕ຺ຕໍ ອຘິກນ຺ຕິ ວຸຈ຺ຈຕິ, ຕໂຕ ອຎ຺ຎໍ ອນຕິຣິຕ຺ຕກໍ ອນຘິກນ຺ຕິ ອຕ຺ໂຖ. ກຸສລໍ ຈິຕ຺ຕໍ ປາເຕຕີຕິ ປາຈິຕ຺ຕິ, ຕສ຺ມາ ອິຕ຺ຖິຍໍ ຕິມ຺ຫິ ຕ-ກາຣສ຺ສ ຈ-ກາເຣ, ທ຺ວິຕ຺ເຕ ຈ ປາຈິຕ຺ຕິ. ຍາມກາລິກໍ ສຕ຺ຕາຫກາລິກໍ ຍາວຊີວິກໍ ອາຫາຣຕ຺ຖາຍ ປຏິຄ຺ຄຓ຺ຫໂຕ ອາປຕ຺ຕິ ທຸກ຺ກຏສ຺ສ, ອຊ຺ໂຌຫາເຣ ອຊ຺ໂຌຫາເຣ ອາປຕ຺ຕິ ທຸກ຺ກຏສ຺ສ.

໗໔. ອິທານິ ຍາຍ ປວາຣິຕາ, ສາ ປຎ຺ຈງ຺ຄສມ຺ປນ຺ນາເຍວ ປວາຣຓາ ນາມ ໂຫຕີຕິ ທສ຺ເສຕຸໍ ‘‘ອສນ’’ນ຺ຕິອາທິມາຫ. ຕຕ຺ຖ ອສນນ຺ຕິ ຠຸຎ຺ຊມານສ຺ສ ຠຸຎ຺ຊນໍ. ອິມິນາ ຍໍ ວິປ຺ປກຕໍ ໂຠຊນໍ, ຕໍ ທສ຺ເສຕິ. ໂຠຊນຎ຺ເຈວາຕິ ປວາຣຓປ຺ປໂຫນກໍ ໂຠຊນຎ຺ເຈວ ໂຫຕີຕິ. ອຠິຫາໂຣຕິ ທາຍກສ຺ສ ກາເຍນ ປວາຣຓປ຺ປໂຫນກສ຺ສ ອຠິຫຣຓໍ, ນ ວາຈາຍ. ສມີປຕາຕິ ອຑ຺ຒເຕຍ຺ຍຫຕ຺ຖປ຺ປມາຓສງ຺ຂາຕາ ສມີປຕາ ຈ. ເອຕ຺ຖ ປນ ສເຈ ຠິກ຺ຂຸ ນິສິນ຺ໂນ ໂຫຕິ, ອາສນສ຺ສ ປຈ຺ຉິມນ຺ຕໂຕ ປຏ຺ຐາຍ, ສເຈ ຐິໂຕ, ປຓ຺ຫິອນ຺ຕໂຕ ປຏ຺ຐາຍ, ສເຈ ນິປນ຺ໂນ, ເຍນ ປສ຺ເສນ ນິປນ຺ໂນ, ຕສ຺ສ ປາຣິມນ຺ຕໂຕ ປຏ຺ຐາຍ ທາຍກສ຺ສ ຐິຕສ຺ສ ວາ ນິສິນ຺ນສ຺ສ ວາ ນິປນ຺ນສ຺ສ ວາ ຐເປຕ຺ວາ ປສາຣິຕຫຕ຺ຖໍ ຍໍ ອາສນ຺ນຕຣໍ ອງ຺ຄໍ, ຕສ຺ສ ໂອຣິມນ຺ເຕນ ປຣິຈ຺ຉິນ຺ທິຕ຺ວາ ອຑ຺ຒເຕຍ຺ຍຫຕ຺ຖປາໂສ ເວທິຕພ຺ໂພ. ກາຍວາຈາປຏິກ຺ເຂໂປຕິ ຕສ຺ສ ອຠິຫຏໂຠຊນສ຺ສ ອງ຺ຄຸລິຈລນາທິກາຍວິກາເຣນ ວາ ‘‘ອລ’’ນ຺ຕິອາທິນາ ວຈີວິກາເຣນ ວາ ປຏິກ຺ຂິປນໍ. ອິຕິ ອິເມຫິ ປຎ຺ຈຫງ຺ເຄຫິ ປວາຣຓາ ປກາຣຍຸຕ຺ຕວາຣຓາ ປຎ຺ຈອງ຺ຄາຕິ ສມ຺ພນ຺ໂຘ. ປຎ຺ຈ ອງ຺ຄານິ ຍສ຺ສາ ສາ ປຎ຺ຈອງ຺ຄາ.

໗໕. ອິທານິ ເອເຕສຸ ໂອທນາທິປຎ຺ຈວິຘໍ ໂຠຊນໍ ທສ຺ເສຕ຺ວາ ຕານິ ຈ ປຸນ ວິຠຊິຕ຺ວາ ທສ຺ເສຕຸໍ ‘‘ໂອທໂນ’’ຕິອາທິ ອາຣທ຺ຘໍ. ຕຕ຺ຖ ສາລີຕິ ຣຕ຺ຕສາລິອາທິກາ ສພ຺ພາປິ ສາລິຊາຕິ. ວີຫີຕິ ສພ຺ພາປິ ວີຫິນາມິກາ ວີຫິຊາຕິ. ກງ຺ຄູຕິ ເສຕຣຕ຺ຕກາຬເຠທາ ສພ຺ພາປິ ກງ຺ຄຸຊາຕິ. ກຸທ຺ຣູໂສ ນາມ ກາຬໂກທ຺ຣໂວ. ວຣໂກ ນາມ ເສຕວຓ຺ໂຓ ໂກທ຺ຣໂວ. ຍວໂຄຘຸເມສຸ ປນ ເຠໂທ ນຕ຺ຖິ. ເອວໍ ຍຖາວຸຕ຺ຕານໍ ສານຸໂລມານໍ ສຕ຺ຕນ຺ນໍ ຘຎ຺ຎານໍ ໂຠຊ຺ຊຍາຄຸ ຈາຕິ ສມ຺ພນ຺ໂຘ. ໂຠຊ຺ຊຍາຄຸ ຈາຕິ ອຸຓ຺ຫໍ ວາ ສີຕລໍ ວາ ຠຸຎ຺ຊນ຺ຕານໍ ໂຠຊນກາເລ ຄຫິຕຏ຺ຐາເນ ໂອຘິ ປຎ຺ຎາຍຕິ, ສາ ໂຠຊ຺ຊຍາຄຸ. ຈ-ສທ຺ເທນ ໂອທໂນ ຈາຕິ ສມ຺ພນ຺ໂຘ, ໂອທໂນ ນາມາຕິ ອຕ຺ໂຖ. ສເຈ ປນ ຠຕ຺ເຕ ອຸທກກຎ຺ຊິກຂີຣາທີນິ ອາກິຣິຕ຺ວາ ‘‘ຍາຄຸໍ ຄຓ຺ຫຖາ’’ຕິ ເທນ຺ຕິ, ກິຎ຺ຈາປິ ຕນຸກາ ໂຫຕິ, ປວາຣຓໍ ຊເນຕິ. ສເຈ ປນ ອຸທກາທີສຸ ປກ຺ຂິປິຕ຺ວາ ປຈິຕ຺ວາ ເທນ຺ຕິ, ຍາຄຸສງ຺ຄຫເມວ ຄຈ຺ຉຕິ. ສເຈ ປນ ຕນຸກາຍປິ ຍາຄຸຍາ ສາສປມຕ຺ຕມ຺ປິ ມຈ຺ຉມໍສຂຓ຺ຑໍ ວາ ນ຺ຫາຣຸ ວາ ປກ຺ຂິຕ຺ຕໍ ໂຫຕິ, ປວາຣຓໍ ຊເນຕິ.

໗໖. ສາມາກາທິຕິຓໍ ກຸທ຺ຣູສເກ ສງ຺ຄຫໍ ຄຕໍ, ວຣກໂຈຣໂກ ວຣເກ ສງ຺ຄຫໍ ຄໂຕ, ນີວາໂຣ ເຈວ ສາລິຍໍ ສງ຺ຄຫໍ ຄໂຕຕິ ໂຍຊນາ. ສາມາກາທິຕິຓນ຺ຕິ ສາມາໂກ ອາທິ ຍສ຺ສ, ຕເມວ ຕິຓໍ ຕິຓຘຎ຺ຎນ຺ຕິ ສມາໂສ.

໗໗. ຠຏ຺ຐຘຎ຺ຎມໂຍຕິ ຂຣປາກຠຊ຺ຊິເຕຫິ ສຕ຺ຕວິເຘຫິ ຘຎ຺ເຎຫິ ໂກຏ຺ເຏຕ຺ວາ ກໂຕ, ອນ຺ຕມໂສ ຈຸຓ຺ຓມ຺ປິ ກຸຓ຺ຑກມ຺ປິ ສຕ຺ຕຸ ນາມາຕິ ອຕ຺ໂຖ. ສມປາກຠຊ຺ຊິຕານໍ ປນ ອາຕປສຸກ຺ຂານໍ ວາ ຕຓ຺ຑຸລານໍ ສຕ຺ຕຸ ວາ ກຸຓ຺ຑການິ ເອວ ວາ ນ ປວາເຣນ຺ຕິ. ຍເວນ ສມ຺ຠໂວ ອຸປ຺ປຕ຺ຕິ ອສ຺ສາຕິ ຍວສມ຺ຠໂວ, ກຸມ຺ມາໂສ ກຸມ຺ມາໂສ ນາມ. ມຸຄ຺ຄາທີຫິ ກໂຕ ປນ ປວາຣຓໍ ນ ຊເນຕິ. ກປ຺ປິໂຍ ຈາຕິ ກປ຺ປິໂຍເຍວ ມໍໂສ ‘‘ມໍໂສ’’ຕິ ວຸຕ຺ໂຕຕິ ໂຍຊນາ. ຈາຕິ ອວຘາຣເຓ. ອກປ຺ປິໂຍ ປນ ປຏິກ຺ຂິປິຕພ຺ໂພວ. ປຏິກ຺ຂິຕ຺ໂຕປິ ນ ປວາເຣຕິ. ອຸທເກ ສມ຺ຠໂວ ຍສ຺ສ ໂສ ມຈ຺ໂຉ ນາມ. ທ຺ວີສຸ ປເນເຕສຸ ສເຈ ຍາຄຸໍ ປິວນ຺ຕສ຺ສ ຍາຄຸສິຕ຺ຖມຕ຺ເຕສຸປິ ມຈ຺ຉຂຓ຺ເຑສຸ ວາ ມໍສຂຓ຺ເຑສຸ ວາ ເອກໍ ຂາທິຕໍ ເອກໍ ຫຕ຺ເຖ ວາ ປຕ຺ເຕ ວາ ໂຫຕິ, ໂສ ເຈ ອຎ຺ຎໍ ປຏິກ຺ຂິປຕິ, ປວາເຣຕິ. ທ຺ເວປິ ຂາທິຕານິ ໂຫນ຺ຕິ, ມຸເຂ ສາສປມຕ຺ຕມ຺ປິ ອວສິຏ຺ຐໍ ນຕ຺ຖິ, ສເຈປິ ອຎ຺ຎໍ ປຏິກ຺ຂິປຕິ, ນ ປວາເຣຕິ.

໗໘. ອິທານິ ‘‘ກີທິສໍ ຠຸຎ຺ຊນ຺ໂຕ ກິນ຺ຕິ ວຕ຺ວາ ອຸປນີຕໍ ກິໍ ນາມ ນິເສເຘນ຺ໂຕ ປວາເຣຕິ ນາມາ’’ຕິ ໂຈທນໍ ມນສິ ນິຘາຍາຫ ‘‘ຠຸຎ຺ຊນ຺ໂຕ’’ຕິອາທິ. ຕຕ຺ຖ ກປ຺ປໍ ວາ ອກປ຺ປໍ ວາ ປຎ຺ຈສຸ ໂຠຊເນສຸ ຍໍ ກິຎ຺ຈິ ໂຠຊນໍ ຠຸຎ຺ຊນ຺ໂຕ ຠິກ຺ຂຸ ຕນ຺ນາເມນ ເຕສໍ ປວາຣຓາຊນກໂຠຊນານໍ ນາເມນ ວາ ‘‘ອິມ’’ນ຺ຕິ ສາມຎ຺ເຎນ ວາ ວຕ຺ວາ ອຠິຫຏໍ ຫຕ຺ຖປາໂສປນີຕໍ ກປ຺ປໍ ກປ຺ປິຍໍ ຍຖາວຸຕ຺ຕໂຠຊນໍ ນິເສຘຍໍ ນິເສຘຍນ຺ໂຕ ປວາເຣຍ຺ຍາຕິ ປທຕ຺ຖສມ຺ພນ຺ໂຘ. ອຍເມຕ຺ຖ ອຘິປ຺ປາໂຍ – ເຍນ ເຈ ອກປ຺ປິຍມໍສຎ຺ຈ ກຸລທູສນເວຊ຺ຊກມ຺ມອຸຕ຺ຕຣິມນຸສ຺ສຘມ຺ມາໂຣຈນສາທິຕຣູປິຍາທີຫິ ນິພ຺ພຕ຺ຕໍ ອກປ຺ປິຍໂຠຊນຎ຺ຈ ຕຖາ ອຎ຺ຎຎ຺ຈ ກປ຺ປິຍໍ ວາ ອກປ຺ປິຍໍ ວາ ເອກສິຕ຺ຖມຕ຺ຕມ຺ປິ ອຊ຺ໂຌຫຏໍ ໂຫຕິ, ໂສ ສເຈ ປຕ຺ຕມຸຂຫຕ຺ເຖສຸ ຍຕ຺ຖ ກຕ຺ຖຈິ ໂຠຊເນ ສຕິ ສາເປກ຺ໂຂວ ອຎ຺ຎໍ ຫຕ຺ຖປາເສ ຐິເຕນ ‘‘ໂອທນໍ ຄຓ຺ຫຖາ’’ຕິອາທິນາ ປວາຣຓປ຺ປໂຫນກສ຺ເສວ ນາເມນ ວາ ‘‘ອິມ’’ນ຺ຕິ ສາມຎ຺ຎວເສເນວ ວາ ກາເຍເນວ ອຠິຫຏໍ ວຸຕ຺ຕລກ຺ຂຓໍ ກປ຺ປິຍເມວ ໂຠຊນໍ ເກວລໍ ວາ ມິສ຺ສໍ ວາ ກາເຍນ ວາ ວາຈາຍ ວາ ປຏິກ຺ຂິປຕິ ປວາເຣຕີຕິ. ‘‘ອາກິຣ ອາກິຣ, ໂກຏ຺ເຏຕ຺ວາ ໂກຏ຺ເຏຕ຺ວາ ປູເຣຫີ’’ຕິ ປນ ວຕ຺ຕຸໍ ວຏ຺ຏຕິ.

໗໙-໘໐. ອິທານິ ເຍ ປວາຣຓໍ ນ ຊເນນ຺ຕິ, ເຕ ທສ຺ເສຕຸໍ ‘‘ລາຊາ’’ຕິອາທິມາຫ. ຕຕ຺ຖ ລາຊາ…ເປ… ຜລາທີນິ ປວາຣຓໍ ນ ຊເນນ຺ຕີຕິ ສມ຺ພນ຺ໂຘ. ລາຊາຕິ ສາລິອາທີຫິ ກຕາ ລາຊາ. ຕໍສຕ຺ຕຸຠຕ຺ຕານີຕິ ເຕຫິ ລາເຊຫິ ກຕາ ສຕ຺ຕຸ ເຈວ ຠຕ຺ຕານິ ຈ. ໂຄຣໂສຕິ ຄຸນ຺ນໍ ຣໂສ ຂີຣາທິ. ສຸທ຺ຘຂຊ຺ຊໂກຕິ ມຈ຺ຉມໍເສຫິ ອສມ຺ມິສ຺ສຕາຍ ສຸທ຺ຘຂຊ຺ຊໂກ. ສຕ຺ຕຸໂຍ ປິຓ຺ເຑຕ຺ວາ ກໂຕ ອປກ຺ໂກ ສຕ຺ຕຸຄຸໂຬ ປນ ສຕ຺ຕຸໂມທກສງ຺ຂາໂຕ ປວາເຣຕິ. ຕຓ຺ຑຸລາຕິ ສມປາກຠຊ຺ຊິຕານໍ ສາລິອາທີນໍ ຕຓ຺ຑຸລາ, ຠຊ຺ຊິຕຕຓ຺ຑຸລາ ເອວ ວາ. ຠຏ຺ຐປິຏ຺ຐນ຺ຕິ ສຸທ຺ຘໍ ຍໍ ກິຎ຺ຈິ ຠຊ຺ຊິຕໍ ປິຏ຺ຐໍ. ປຸຖຸກາຕິ ສາລິອາທີນໍ ປຸຖຸກາ. ປຸຖຸກາ ຫິ ຕນ຺ຕິອາຄມຍຸຕ຺ຕິຍາ ວິສຸມ຺ປິ ຄຍ຺ຫຕິ, ເອກໂຕປິ, ຕສ຺ມາ ວຸຕ຺ຕາວເສສານໍ ປຸຖຸກາເວຬຸອາທີນໍ ຠຕ຺ຕນ຺ຕິ ຈ ສມ຺ພນ຺ໂຘ. ເວຬູຕິ ເຕສໍ ຕຓ຺ຑຸລາ ວຸຈ຺ຈນ຺ຕິ. ປຸຖຸກາ ຈ ເວຬຸ ຈ, ເຕ ອາທໂຍ ເຍສນ຺ຕິ ສມາໂສ. ຈ-ສທ຺ໂທ ປເນຕ຺ຖ ສພ຺ພຕ຺ຖາປິ ໂຍເຊຕພ຺ໂພ. ອາທິ-ສທ຺ເທນ ກນ຺ທມູລຜລານິປິ ຄຍ຺ຫນ຺ຕິ. ວຸຕ຺ຕາວເສສານນ຺ຕິ ວຸຕ຺ເຕຫິ ສຕ຺ຕວິເຘຫິ ຘຎ຺ເຎຫິ ອວເສສານໍ. ຣສຍາຄູຕິ ຣເສຫິ ປກ຺ກມໍສາທີຫິ ສມ຺ມິສ຺ສາ ຍາຄຸ. ຣໂສປິ ຕາທິໂສວ. ສຸທ຺ຘຍາຄູຕິ ມໍສາທີຫິ ອມິສ຺ສາ ສຸທ຺ຘຍາຄຸ. ຜລາທີນີຕິ ອາທິ-ສທ຺ເທນ ກນ຺ທາທີນມ຺ປິ ຄຫຓໍ. ອປິ ຈາຕິ ນິປາໂຕ, ນິປາຕສມຸທາໂຍ ວາ ສມຸຈ຺ຈເຍ, ໂສ ປຈ຺ເຈກໍ ໂຍເຊຕພ຺ໂພ.

໘໑. ອິທານິ ຍສ຺ມາ ສຕ຺ຕຫິ ວິນຍກມ຺ມາກາເຣຫິ ຍໍ ອຕິຣິຕ຺ຕໍ ອກຕໍ, ຕຕ຺ຖ ປາຈິຕ຺ຕິຍໍ ວຸຕ຺ຕໍ, ພ຺ຍຕິເຣກໂຕ ອຕິຣິຕ຺ຕກເຕ ນຕ຺ຖິ, ຕສ຺ມາ ອຕິຣິຕ຺ຕໍ ກໂຣນ຺ເຕນ ເອວໍ ກາຕພ຺ພນ຺ຕິ ທສ຺ເສນ຺ໂຕ ‘‘ປວາຣິເຕນາ’’ຕິອາທິມາຫ. ຕຕ຺ຖ ປວາຣິເຕນ ວຸຏ຺ຐາຍ ອຕິຣິຕ຺ຕໍ ນ ກາຕພ຺ພໍ, ໂຠຊນໍ ອຠຸຕ຺ເຕນ ຈ ອຕິຣິຕ຺ຕໍ ນ ກາຕພ຺ພນ຺ຕິ ສມ຺ພນ຺ໂຘ. ໂຠຊນນ຺ຕິ ປວາຣຓປ຺ປໂຫນກໂຠຊນໍ. ອຠຸຕ຺ເຕນາຕິ ເອກສິຕ຺ຖມຕ຺ຕມ຺ປິ ອຠຸຕ຺ຕາວິນາ. ເຍນ ຍໍວາ ປຸເຣ ກຕນ຺ຕິ ເອຕ຺ຖ ຈ ເອວ-ສທ຺ໂທ ທີຆໍ ກຕ຺ວາ ນິທ຺ທິຏ຺ໂຐ, ໂສ ຈ ອຊ຺ຌາຫເຏນ ຕໍ-ສທ຺ເທນ ສມ຺ພນ຺ຘີຍຕິ, ຕສ຺ມາ ເຍນ ຠິກ຺ຂຸນາ ຍໍ ໂຠຊນໍ ປຸເຣ ປຸພ຺ເພ ອຕິຣິຕ຺ຕໍ ກຕໍ, ເຕເນວ ຕເມວ ອຕິຣິຕ຺ຕໍ ນ ກາຕພ຺ພນ຺ຕິ ໂຍເຊຕ຺ວາ ອຕ຺ໂຖ ເວທິຕພ຺ໂພ. ຕສ຺ມາ ກປ຺ປິຍໍ ກາເຣຕ຺ວາ ຠຸຎ຺ຊນ຺ຕສ຺ສ ອຎ຺ຎໍ ອາມິສໍ ອາກິຣນ຺ຕິ, ຕໍ ໂສ ປຸນ ກາຕຸໍ ນ ລຠຕິ, ຕສ຺ມິໍ ໂຠຊເນ ກຣິຍມາເນ ປຐມກເຕນ ສທ຺ຘິໍ ກຕໍ ໂຫຕີຕິ. ອຎ຺ຎສ຺ມິໍ ປນ ເຕນ ວາ ອຎ຺ເຎນ ວາ ກາຕຸໍ ວຏ຺ຏຕິ.

໘໒. ‘‘ກປ຺ປິຍ’’ນ຺ຕິອາທີນິ ‘‘ກໂຣນ຺ໂຕ’’ຕິ ເອຕສ຺ສ ກມ຺ມປທານິ. ກປ຺ປິຍຎ຺ເຈວ ຄຫິຕຎ຺ເຈວ ອຸຈ຺ຈາຣິຕຎ຺ເຈວ ຫຕ຺ຖປາສຄຎ຺ເຈວ ຍາວກາລິກໍ ອຕິຣິຕ຺ຕໍ ກໂຣນ຺ໂຕ ‘‘ອລເມຕໍ ສພ຺ພ’’ນ຺ຕິ ເອວໍ ຠາສຕູຕິ ໂຍຊນາ. ຕຕ຺ຖຍໍ ຜລໍ ວາ ກນ຺ທມູລາທິ ວາ ປຎ຺ຈຫິ ສມຓກປ຺ເປຫິ ກປ຺ປິຍໍ ກຕໍ, ຍຎ຺ຈ ກປ຺ປິຍມໍສໍ ວາ ກປ຺ປິຍໂຠຊນໍ ວາ, ເອຕໍ ກປ຺ປິຍໍ ນາມ. ຄຫິຕນ຺ຕິ ຠິກ຺ຂຸນາ ປຏິຄ຺ຄຫິຕໍ. ອຸຈ຺ຈາຣິຕນ຺ຕິ ກປ຺ປິຍໍ ກາເຣຕຸໍ ອາຄເຕນ ຠິກ຺ຂຸນາ ອີສກມ຺ປິ ອຸກ຺ຂິຕ຺ຕໍ ວາ ອປນາມິຕໍ ວາ, ຕໍ ປນ ອຕິຣິຕ຺ຕກາຣເກນ ‘‘ອລເມຕໍ ສພ຺ພ’’ນ຺ຕິ ວຸຕ຺ເຕນ ກາຕພ຺ພໍ. ຫຕ຺ຖປາສຄນ຺ຕິ ກປ຺ປິຍໍ ກາເຣຕຸໍ ອາຄເຕນ ຫຕ຺ຖປາສໍ ຄຕໍ. ອຕິຣິຕ຺ຕໍ ກໂຣນ຺ໂຕຕິ ອີທິສໍ ຈຕຸພ຺ພິຘາກາຣສມ຺ປນ຺ນໍ ໂຠຊນໍ ອຕິຣິຕ຺ຕໍ ກໂຣນ຺ໂຕ ປວາເຣຕ຺ວາ ອາສນາ ອວຸຏ຺ຐິໂຕ ວາ ອປ຺ປວາເຣຕ຺ວາປິ ສພ຺ພຖາ ຠຸຕ຺ໂຕ ວາຕິ ເອວໍ ທຸວິຘວິນຍກມ຺ມາກາຣສມ຺ປນ຺ໂນ ຠິກ຺ຂຸ. ອລເມຕໍ ສພ຺ພນ຺ຕິ ເອວໍ ຠາສຕູຕິ ອລເມຕໍ ສພ຺ພໍ ອິຕິ ເອວໍ ຠາສຕຸ. ເອວໍ ສຕ຺ຕວິຘໍ ວິນຍກມ຺ມາກາຣໍ ສມ຺ປາເທນ຺ໂຕ ວຈີເຠທໍ ກຕ຺ວາ ສກິມ຺ປິ ເອວໍ ວເທຍ຺ຍາຕິ ອຕ຺ໂຖ.

໘໓. ກປ຺ປິຍໍ ກໂຣນ຺ເຕນ ປນ ອນຸປສມ຺ປນ຺ນສ຺ສ ຫຕ຺ເຖ ຐິຕໍ ນ ກາຕພ຺ພໍ. ເຕນາຫ ‘‘ນ ກເຣ…ເປ… ຫຕ຺ຖຄ’’ນ຺ຕິ. ອຸປສມ຺ປນ຺ນໂຕ ອຎ຺ໂຎ ອນຸປສມ຺ປນ຺ໂນ, ຕສ຺ສ ຫຕ຺ເຖ ຄຕໍ ອນຸປສມ຺ປນ຺ນຫຕ຺ຖຄໍ. ເປສຍິຕ຺ວາປີຕິ ສເຈ ຕຕ຺ຖ ອຎ຺ໂຎ ພ຺ຍຕ຺ໂຕ ຠິກ຺ຂຸ ນຕ຺ຖິ, ຍຕ຺ຖ ອຕ຺ຖິ, ຕຕ຺ຖ ເປສຍິຕ຺ວາປິ. ຕໍ ອຕິຣິຕ຺ຕກຕໍ ອກາຣໂກ ອຕິຣິຕ຺ຕກາຣກໂຕ ອຎ຺ໂຎ ສພ຺ໂພ ປວາຣິໂຕປິ ອປ຺ປວາຣິໂຕປິ ຠຸຎ຺ຊິຕຸໍ ລພ຺ຠເຕຕິ ສມ຺ພນ຺ຘນີຍໍ. ປວາຣິເຕນ ປນ ມຸຂຎ຺ຈ ຫຕ຺ຖຎ຺ຈ ໂສເຘຕ຺ວາ ຠຸຎ຺ຊິຕພ຺ພໍ.

ປວາຣຓານິທ຺ເທສວຓ຺ຓນາ ນິຏ຺ຐິຕາ.