໔໐. ອເວຠງ຺ຄິຍນິທ຺ເທສວຓ຺ຓນາ

໓໒໒-໕. ອາຣາມາ…ເປ… ມຕ຺ຕິກຠຓ຺ຑານີຕິ ເອເຕ ປຎ຺ຈ ອວິຠາຊິຍາຕິ ສມ຺ພນ຺ຘິຕພ຺ພໍ. ປຎ຺ຈາຕິ ‘‘ອາຣາມາຣາມວຕ຺ຖູນິ ເອກ’’ນ຺ຕິອາທິນາ ຣາສິວເສນ ປຎ຺ຈ, ສຣູປວເສນ ປເນຕານິ ປຓ຺ຓໍ ຕິເຓ ປກ຺ຂິປິຕ຺ວາ ປຎ຺ຈວີສຕິວິຘານິ ໂຫນ຺ຕິ. ຕຖາ ຈາຫ –

‘‘ທ຺ວິສງ຺ຄຫານິ ທ຺ເວ ໂຫນ຺ຕິ, ຕຕິຍໍ ຈຕຸສງ຺ຄຫໍ;

ຈຕຸຕ຺ຖໍ ນວໂກຏ຺ຐາສໍ, ປຎ຺ຈມໍ ອຏ຺ຐເຠທນໍ.

‘‘ອິຕິ ປຎ຺ຈຫິ ຣາສີຫິ, ປຎ຺ຈນິມ຺ມລໂລຈໂນ;

ປຎ຺ຈວີສວິຘໍ ນາໂຖ, ຄຣຸຠຓ຺ຑໍ ປກາສຍີ’’ຕິ. (ຈູຬວ. ອຏ຺ຐ. ໓໒໑);

ຕຕ຺ຖ ອາຣາໂມ ນາມ ປຸປ຺ຜາຣາໂມ ວາ ຜລາຣາໂມ ວາ. ອາຣາມວຕ຺ຖຸ ນາມ ເຕສໍເຍວ ປຕິຏ຺ຐາໂນກາໂສ, ວິນຏ຺ເຐສຸ ວາ ເຕສຸ ໂປຣາຓກຠູມິຠາໂຄ. ວິຫາໂຣ ນາມ ປາສາທາທິ ຍໍ ກິຎ຺ຈິ ເສນາສນໍ. ໂລຫກຸມ຺ຠີ ນາມ ກາຬໂລເຫນ ວາ ຕມ຺ພໂລເຫນ ວາ ກຕກຸມ຺ຠີ. ກຏາຫາທີສຸປິ ເອເສວ ນໂຍ. ເອຕ຺ຖ ຠາຓກນ຺ຕິ ອຣຎ຺ຊໂຣ ວຸຈ຺ຈຕິ. ວາຣໂກຕິ ຆໂຏ. ຣາສິໍ ອເປກ຺ຂິຕ຺ວາ ເອເຕຕິ ປຸລ຺ລິງ຺ຄນິທ຺ເທໂສ. ອວິຠາຊິຍາຕິ ມູລຈ຺ເຉຊ຺ຊວເສນ ອເວຠງ຺ຄິຍາ. ປຣິວຕ຺ຕນວເສນ ປນ ປຣິຠຸຎ຺ຊນ຺ຕສ຺ສ ວິສ຺ສຊ຺ເຊນ຺ຕສ຺ສ ຈ ອນາປຕ຺ຕິ. ອວິສ຺ສຊ຺ຊິຍານິ ຈາຕິ ຈ-ສທ຺ເທນ ອເວຠງ຺ຄິຍານິ ຈາຕິ ອວຸຕ຺ຕໍ ສມ຺ປິຓ຺ເຑຕິ.

໓໒໖-໘. ເອກນ຺ຕຄຣຸຠຓ຺ຑຕ຺ຕາ ອາທິໂຕ ຕໂຍ ຣາສີ ຐເປຕ຺ວາ ຈຕຸຕ຺ຖຣາສິໂຕ ປຏ຺ຐາຍ ຄຣຸຠຓ຺ຑາຄຣຸຠຓ຺ເຑ ວິຠຊິຕຸໍ ‘‘ວລ຺ລີ’’ຕິອາທິ ອາຣທ຺ຘໍ. ອຑ຺ຒພາຫຸມຕ຺ຕາປິ ວລ຺ລິ ຈ ອຏ຺ຐງ຺ຄຸລາຍໂຕ ເວຬຸ ຈ ມຸຏ຺ຐິມຕ຺ຕມ຺ປິ ຕິຓາທິ ຈ ເອກມ຺ປິ ປຓ຺ຓຎ຺ຈ ປາກຕາ ວາ ປຎ຺ຈວຓ຺ຓາ ວາ ຕາລປກ຺ກປ຺ປມາຓາປິ ມຕ຺ຕິກາ ຈ ຕາລປກ຺ກປ຺ປມາຓາປິ ສຸຘາ ຈ ຕາລປກ຺ກປ຺ປມາຓາປິ ກງ຺ຄຸຏ຺ຐອາທິກາ ຈ ທິນ຺ນາ ວາ ຕຕ຺ຖຊາຕກາ ວາ ສງ຺ຆິກາ ຣກ຺ຂິຕາ ອຠາຊິຍາ, ຣຊ຺ຊຸໂຍຕ຺ຕາທິ ຈ ທິນ຺ນາ ສງ຺ຆິກາ ອຠາຊິຍາຕິ ໂຍຊນາ. ເວຬຸ ປຣິຓາຫໂຕ ປຓ຺ຓສູຈິທຓ຺ຑມຕ຺ໂຕ ຄເຫຕພ຺ໂພ. ຕິຓໍ ມຸຎ຺ຊໍ ປພ຺ພຊຎ຺ຈ ອາທິສທ຺ທສງ຺ຄຫິຕໍ ຐເປຕ຺ວາ ອວເສສໍ ຍໍ ກິຎ຺ຈິ ຕິຓໍ. ປຓ຺ໂຓ ອຏ຺ຐງ຺ຄຸລປ຺ປມາໂຓ ຣິຕ຺ຕໂປຕ຺ຖໂກ ຄຣຸຠຓ຺ຑເມວ. ປາກຕາຕິ ປກຕິຍາ ຊາຕາ. ປຎ຺ຈວຓ຺ຓາຕິ ຣຕ຺ຕເສຕາທິປຎ຺ຈວຓ຺ຓາ. ສຸຘາກງ຺ຄຸຏ຺ຐາທໂຍ ມຕ຺ຕິກຄ຺ຄຫເຓນ ຄຫິຕາ. ກງ຺ຄຸຏ຺ຐອາທິກາຕິ ອາທິ-ສທ຺ເທນ ສຊ຺ຊຸຣສຊາຕິຫິງ຺ຄຸລກາທີນໍ ຄຫຓໍ. ທິນ຺ນາຕິ ສງ຺ຆສ຺ສ ທິນ຺ນາ. ຕຕ຺ຖຊາຕາຕິ ສງ຺ຆິກຠູມິຍໍ ຊາຕາ. ຣຊ຺ຊຸໂຍຕ຺ຕາທີຕິ ສຸຕ຺ຕມກຈິວາກນາຬິເກຣຫີຣຈມ຺ມມຍາ ຣຊ຺ຊຸ ຈ ໂຍຕ຺ຕາທິ ຈ. ອາທິ-ສທ຺ເທນ ມກຈິວາກາທິເກ ວຏ຺ເຏຕ຺ວາ ກຕາ ເອກວຏ຺ຏາ ຄຫິຕາ. ພ຺ຍຕິເຣກວເສນ ປເນຕ຺ຖ ຈຕຸຕ຺ຖຣາສິມ຺ຫິ ອິຕເຣ ຠາຊິຍາຕິ ເວທິຕພ຺ພາ. ສງ຺ຆິເກ ກມ຺ເມ, ເຈຕິຍສ຺ສ ວາ ກມ຺ເມ ນິຏ຺ຐິເຕ ຠາຊິຍາຕິ ໂຍຊນີຍໍ.

໓໒໙. ໂລຫຠຓ຺ເຑສຸ ຠິກ຺ຂຸສາຣຸປ຺ປໍ ປຕ຺ຕາທິ ວາ ຕຖາ ວິປ຺ປກຕາກຕໍ ໂລຫຠຓ຺ຑໍ ຕຖາ ປາທຄຓ຺ຫກໍ ວາຣກໍ ຠາຊິຍນ຺ຕິ ໂຍຊນາ. ປຕ຺ຕາທີຕິ ອໂຍປຕ຺ໂຕ ອຍຖາລກໍ ຕມ຺ພໂລຫຖາລກໍ ອຎ຺ຊນິສລາກາ ກຓ຺ຓມລຫຣຓີ ສູຈິ ປຓ຺ຓສູຈິ ຂຸທ຺ທໂກ ປິປ຺ຜລໂກ ຂຸທ຺ທກໍ ອາຣກຓ຺ຑກໍ ກຸຎ຺ຈິກາ ຕາຬາທິ. ວິປ຺ປກຕນ຺ຕິ ອປຣິນິຏ຺ຐິຕໍ. ອກຕນ຺ຕິ ສພ຺ພໂສ ອກຕໍ. ປາທຄຓ຺ຫກນ຺ຕິ ສີຫຬທີເປ ປາທຄຓ຺ຫນກໍ. ປາໂທ ນາມ ຈຕຸຕ຺ຖໍໂສ, ມຄຘນາຬິຍາ ປຎ຺ຈນາຬິມຕ຺ຕາ. ມຄຘນາຬິ ຈ ນາເມສາ ອູນປຎ຺ຈປສຕາ ເວທິຕພ຺ພາ. ຕຖາ ຆຏໂກ ເຕລຠາຊນຎ຺ຈ. ຍາຍ ວາສິຍາ ຐເປຕ຺ວາ ທນ຺ຕກຏ຺ຐຈ຺ເຉທນໍ ວາ ອຸຈ຺ຉຸຕຈ຺ຉນໍ ວາ ອຎ຺ຎໍ ມຫາກມ຺ມໍ ກາຕຸໍ ນ ສກ຺ກາ, ອຍໍ ຠາຊິຍາ. ສມ຺ມຸຎ຺ຊນິທຓ຺ຑຂຓນກໍ ປນ ອທຓ຺ຑກໍ ຜລມຕ຺ຕເມວ, ຍໍ ສກ຺ກາ ສິປາຏິກາຍ ປກ຺ຂິປິຕ຺ວາ ປຣິຫຣິຕຸໍ, ອຍໍ ຠາຊນີຍາ. ຕິປຸໂກຏ຺ຏກອຸປກຣເຓສຸ ຕິປຸຈ຺ເຉທນກສຕ຺ຖກໍ ສຸວຓ຺ຓກາຣູປກຣເຓສຸ ສຸວຓ຺ຓຈ຺ເຉທນກສຕ຺ຖກໍ ຈມ຺ມກາຣອຸປກຣເຓສຸ ຈມ຺ມຉິນ຺ທນກໍ ຂຸທ຺ທກສຕ຺ຖໍ ນຫາປິຕຕຸຓ຺ຓກາຣອຸປກຣເຓສຸ ຐເປຕ຺ວາ ມຫາກຕ຺ຕຣິໍ ມຫາສຓ຺ຑາສຎ຺ຈ ມຫາປິປ຺ຜລກຎ຺ຈ ສພ຺ພານິ ຠາຊນີຍຠຓ຺ຑານິ. ຕຖາ ກຸຎ຺ຈິກາ. ວຸຕ຺ຕວິປລ຺ລາເສນ ປນ ໂລຫຠຓ຺ເຑ ອຠາຊິຍາຕິ ເວທິຕພ຺ພາ.

໓໓໐. ‘‘ເວຬຸມ຺ຫີ’’ຕິອາທິນາ ທາຣຸຠຓ຺ຑານິ ທສ຺ເສຕິ. ທາຣຸຠຓ຺ເຑນ ປນ ສງ຺ຄເຫຕ຺ວາ ສພ຺ພາປິ ທາຣຸເວຬຸຈມ຺ມຸປາຫນາທິວິກຕິ ເວທິຕພ຺ພາ. ຉຕ຺ຕທຓ຺ໂຑ ຈ ສລາກາ ຈາຕິ ທ຺ວນ຺ໂທ. ອຸປາຫນາຍ ທຓ຺ຑໂກ ອຸປາຫນທຓ຺ຑໂກ.

໓໓໑. ອນຸຎ຺ຎາຕວາສິທຓ຺ໂຑຕິ ອນຸຎ຺ຎາຕວາສິຍາ ທຓ຺ໂຑ. ອຣຓຎ຺ຊນິສິງ຺ຄາທີຕິ ອາທິ-ສທ຺ເທນ ອຎ຺ຊນິສລາກາ ຉຕ຺ຕໍ ມຸຏ຺ຐິປຓ຺ຓໍ ອຸປາຫນາ ຘມ຺ມກຣໂຓ ປາທຄຓ຺ຫນກໂຕ ອນຕິຣິຕ຺ຕໍ ອາມລກຕຸມ຺ພໍ ອາມລກຆໂຏ ລາພຸກຕຸມ຺ພໍ ລາພຸກຆໂຏ ວິສາຓຕຸມ຺ພນ຺ຕິ ອິທໍ ສງ຺ຄຓ຺ຫາຕິ.

໓໓໒. ຍຖາວຸຕ຺ຕໂຕ ອຎ຺ຎໍ ທາຣຸຠຓ຺ເຑສຸ ຄຣຸຠຓ຺ຑໍ. ມຕ຺ຕິກາມໂຍ ປາທຆຏໂກ ຠາຊິໂຍຕິ ໂຍຊນາ. ປາທຆຏໂກຕິ ປາທສ຺ສ ປໂຫນໂກ ຆຏໂກ. ອິມິນາ ມຕ຺ຕິກາຠຓ຺ຑໍ ອຸປລກ຺ເຂຕິ, ຕສ຺ມາ ປຕ຺ໂຕ ຖາລກໍ ກຸຓ຺ຑິກາຕິ ອິມານິ ຠາຊນີຍານິ, ວຸຕ຺ຕາວເສສາ ອຠາຊິຍາ.

໓໓໓-໔. ຄຣຸນາ ຄຣຸຠຓ຺ຑຎ຺ຈ ຖາວຣຎ຺ຈ ປຣິວຕ຺ເຕຍ຺ຍ, ຖາວເຣນ ຈ ຖາວຣມ຺ປິ ປຣິວຕ຺ເຕຍ຺ຍາຕິ ໂຍເຊຕພ຺ພໍ. ຄຣຸນາ ມຎ຺ຈປີຐາທິນາ. ຖາວຣນ຺ຕິ ອາຣາມາທິ ປຐມຣາສິທ຺ວຍໍ. ຕຖາ ກຕ຺ວາ ຈ ຠຸຎ຺ຊິຕຸນ຺ຕິ ເອວຎ຺ຈ ປຣິວຕ຺ເຕຕ຺ວາ ຕໂຕ ອາຠຕໍ ກປ຺ປິຍຠຓ຺ຑໍ ປຣິຠຸຎ຺ເຊຍ຺ຍາຕິ ອຕ຺ໂຖ, ວິຘິມ຺ຫິ ອຍໍ ຕຸໍປຈ຺ຈໂຍ. ຜາຕິກມ຺ເມນ ວລ຺ລາທິໍ ຄຓ຺ເຫຕິ ສມ຺ພນ຺ຘນີຍໍ. ຜາຕິກມ຺ມໍ ນາມ ສມກໍ ວາ ອຕິເຣກໍ ວາ ຕທຄ຺ຆນກໍ ວາ ວຑ຺ຒິກມ຺ມໍ. ເສສນ຺ຕິ ປຐມຣາສິຕ຺ຕິກນ຺ຕິ.

ອເວຠງ຺ຄິຍນິທ຺ເທສວຓ຺ຓນາ ນິຏ຺ຐິຕາ.