໔. ຣຊນນິທ຺ເທສວຓ຺ຓນາ

໕໘. ມູລຎ຺ຈ ຂນ຺ໂຘ ຈ ຕໂຈ ຈ ປຕ຺ຕຎ຺ຈ ຜລຎ຺ຈ ປຸປ຺ຜຎ຺ຈ, ເຕສໍ ປເຠໂທຕິ ຉຏ຺ຐີຕປ຺ປຸຣິໂສ. ອຖ ວາ ປເຠທ-ສທ຺ທສ຺ສ ກມ຺ມສາຘນຕ຺ເຕ ຕານິເຍວ ປເຠໂທຕິ ກມ຺ມຘາຣໂຍ, ຕໂຕ. ຣຊນ຺ຕິ ເອເຕຫີຕິ ຣຊນານິ, ມູລາທີນິ. ‘‘ອນຸຊານາມິ, ຠິກ຺ຂເວ, ຉ ຣຊນານິ ມູລຣຊນ’’ນ຺ຕິອາທິນາ (ມຫາວ. ໓໔໔) ຠຄວຕາ ອນຸຎ຺ຎາຕຕ຺ຕາ ວຸຕ຺ຕໍ ‘‘ຣຊນາ ຉປ຺ປກາຣານິ, ອນຸຎ຺ຎາຕານິ ສຕ຺ຖຸນາ’’ຕິ.

໕໙. ມູເລຕິ ມູລຣຊເນ ຫລິທ຺ທິໍ ວິວຊ຺ຊິຍ ສພ຺ພໍ ລພ຺ຠນ຺ຕິ ສມ຺ພນ຺ໂຘ. ເອວໍ ສພ຺ພຕ຺ຖ. ມຎ຺ເຊຏ຺ຐິ ຈ ຕຸງ຺ຄຫາຣໂກ ຈາຕິ ທ຺ວນ຺ໂທ. ອລ຺ລິ-ສທ຺ເທນ ນີລິ-ສທ຺ເທນ ຈ ເຕສໍ ຄຈ຺ຉຊາຕີນໍ ປຕ຺ຕານິ ຄຫິຕານິ ອຸປຈາເຣນ, ຕຖາ ໂລທ຺ທ-ສທ຺ເທນ ກຓ຺ຑຸລ-ສທ຺ເທນ ຈ ຕໂຈ, ກຸສຸມ຺ຠ-ສທ຺ເທນ ກິໍ ສຸກ-ສທ຺ເທນ ຈ ປຸປ຺ຜານິ. ເຕເນວ ຈ ຕານິ ນປຸໍສການິ. ຕຸງ຺ຄຫາຣໂກ ນາມ ເອໂກ ກຓ຺ຏກຣຸກ຺ໂຂ, ຕສ຺ສ ຫຣິຕາລວຓ຺ຓໍ ຂນ຺ຘຣຊນໍ ໂຫຕິ. ອລ຺ລິປຕ຺ເຕນ ເອກວາຣໍ ຄິຫິປຣິຠຸຕ຺ຕໍ ຣຊິຕຸໍ ວຏ຺ຏຕິ. ຜລຣຊເນ ສພ຺ພມ຺ປິ ວຏ຺ຏຕິ.

ຣຊນນິທ຺ເທສວຓ຺ຓນາ ນິຏ຺ຐິຕາ.