໕. ປຕ຺ຕນິທ຺ເທສວຓ຺ຓນາ

໖໐. ອໂຍປຕ຺ໂຕ ນາມ ອຍສາ ກາຬໂລເຫນ ນິພ຺ພຕ຺ໂຕ ປຕ຺ໂຕ. ຊາຕິຍາ ອຸກ຺ກຏ຺ຐາທີນໍ ສາມຎ຺ຎວເສນ. ປມາຓໂຕຕິ ປຣິຈ຺ເຉທໂຕ. ຕໂຍ ປຕ຺ຕາຕິ ປາຐເສໂສ.

໖໑. ‘‘ມຄເຘສູ’’ຕິ ວຕ຺ຕພ຺ເພ ມຄເຘຕິ ວຈນວິປລ຺ລາເສນ ວາ ‘‘ປຈ຺ຈາສາ ສຕີ’’ຕິອາທີສຸ ວິຍ ສຸ-ສທ຺ທໂລເປນ ວາ ວຸຕ຺ຕໍ. ນາຬິທ຺ວຍຕຓ຺ຑຸລສາຘິຕນ຺ຕິ ເອຕ຺ຖ ມຄຘາເປກ຺ໂຂປິ ນາຬິ-ສທ຺ໂທ ທ຺ວຍ-ສທ຺ເທນ ສມາໂສ ໂຫຕິ ຄມ຺ມກຕ຺ຕາຕິ ນາຬິຍາ ທ຺ວຍໍ ນາຬິທ຺ວຍໍ. ຕຕ຺ຖ ມຄຘນາຬິ ນາມ ອຑ຺ຒເຕຣສປລາ ໂຫຕິ. ເອຕ຺ຖ ຈ ອຑ຺ຒເຕຣສປລານິ ມາສານນ຺ຕິ ວທນ຺ຕິ. ນາຬິທ຺ວເຍນ ປມິຕາ ຕຓ຺ຑຸລາ ສຸໂກຏ຺ຏິຕປຣິສຸທ຺ຘາ ອນຸປຫຕປຸຣາຓສາລິຕຓ຺ຑຸລາ ນາຬິທ຺ວຍຕຓ຺ຑຸລາ, ເຕຫິ ສາຘິຕໍ ປຈິຕນ຺ຕິ ອຕ຺ໂຖ. ໂອທນນ຺ຕິ ສມ຺ມາ ສມ຺ປາທິຕໍ ອວສ຺ສາວິໂຕທນໍ. ສູປນ຺ຕິ ໂອທນສ຺ສ ຈຕຸຕ຺ຖຠາຄປ຺ປມາຓໍ ນາຕິຆນໍ ນາຕິຕນຸກໍ ຫຕ຺ຖຫາຣິຍໍ ສພ຺ພສມ຺ຠາຣສງ຺ຂຕໍ ມຸຄ຺ຄສຸປໍ. ພ຺ຍຎ຺ຊນຎ຺ຈ ຕທູປິຍນ຺ຕິ ຕສ຺ສ ໂອທນສ຺ສ ອຸປິຍໍ ອນຸຣູປໍ ຍາວ ຈຣິມາໂລປປ຺ປໂຫນກໍ ມຈ຺ຉມໍສາທິພ຺ຍຎ຺ຊນຎ຺ຈ ອຸກ຺ກຏ຺ໂຐ ຄຓ຺ຫາຕີຕິ ສມ຺ພນ຺ໂຘ.

໖໒. ຕສ຺ສາຕິ ຍຖາວຸຕ຺ຕໂອທນາທິໂນ. ອຸປຑ຺ໂຒຕິ ອຸປຑ຺ຒໍ ນາຬິໂກທນາທິ ອສ຺ສ ອຕ຺ຖີຕິ ອຸປຑ຺ໂຒ. ເອວ-ກາເຣນ ອຕິເຣກໍ ນິວຕ຺ເຕຕິ. ຕໂຕຕິ ຍຖາວຸຕ຺ຕນາຬິໂກທນາທິໂຕ. ອຸກ຺ກຏ຺ຐໂຕ ອຸກ຺ກຏ຺ໂຐ ຈ ໂອມໂກມໂກ ຈ ອປຕ຺ໂຕຕິ ໂຍຊນາ. ໂອມກໂຕ ໂອມໂກ ໂອມໂກມໂກ. ອິມິນາ ປຸນ ປຕ຺ຕທ຺ວຍທສ຺ສເນນ ປມາຓໂຕ ຕໂຍປິ ປຕ຺ຕາ ວິຠາຄໂຕ ນວ ໂຫນ຺ຕີຕິ ທີເປຕິ. ຕຕ຺ຖ ຍສ຺ມິໍ ມຄຘນາຬິທ຺ວຍຕຓ຺ຑຸໂລທນາທິກໍ ສພ຺ພມ຺ປິ ວຑ຺ຒນປກ຺ເຂ ຐິຕໍ ປກ຺ຂິຕ຺ຕໍ ສເຈ ປຕ຺ຕສ຺ສ ມຸຂວຏ຺ຏິຍາ ເຫຏ຺ຐິມຣາຊິສມໍ ຕິຏ຺ຐຕິ, ສຸຕ຺ເຕນ ວາ ຫີເຣນ ວາ ຉິນ຺ທນ຺ຕສ຺ສ ສຸຕ຺ຕສ຺ສ ວາ ຫີຣສ຺ສ ວາ ເຫຏ຺ຐິມນ຺ຕໍ ຜຸສຕິ, ອຍໍ ອຸກ຺ກຏ຺ໂຐ ນາມ ປຕ຺ໂຕ. ສເຈ ຕໍ ຣາຊິໍ ອຕິກ຺ກມ຺ມ ຖູປີກຕໍ ຕິຏ຺ຐຕິ, ອຍໍ ອຸກ຺ກຏ຺ໂຐມໂກ ນາມ ປຕ຺ໂຕ. ສເຈ ຕໍ ຣາຊິໍ ນ ສມ຺ປາປຸຓາຕິ ອນ຺ໂຕຄຕເມວ, ອຍໍ ອຸກ຺ກຏ຺ຐຸກ຺ກຏ຺ໂຐ ນາມ ປຕ຺ໂຕ. ‘‘ເອກໍ ນາຬິໂກທນາທິ ສພ຺ພມ຺ປິ ປກ຺ຂິຕ຺ຕໍ ວຸຕ຺ຕນເຍເນວ ເຫຏ຺ຐິມຣາຊິສມໍ ຕິຏ຺ຐຕິ, ອຍໍ ມຊ຺ຌິໂມ ນາມ ປຕ຺ໂຕ’’ຕິອາທິນາ ມຊ຺ຌິມມຊ຺ຌິໂມມກມຊ຺ຌິມຸກ຺ກຏ຺ຐາ ຈ ‘‘ຍຕ຺ຖ ອຸປຑ຺ຒນາຬິໂກທນາທິ ສພ຺ພມ຺ປິ ປກ຺ຂິຕ຺ຕໍ ເຫຏ຺ຐິມຣາຊິສມໍ ຕິຏ຺ຐຕິ, ອຍໍ ໂອມໂກ ນາມ ປຕ຺ໂຕ’’ຕິອາທິນາ ໂອມກໂອມໂກມກໂອມກຸກ຺ກຏ຺ຐາ ຈ ປຕ຺ຕາ ອຸກ຺ກຏ຺ເຐ ວຸຕ຺ຕນເຍເນວ ເວທິຕພ຺ພາ. ເຕສຸ ທ຺ເວ ອປຕ຺ຕາ ຠາຊນປຣິໂຠເຄນ ປຣິຠຸຎ຺ຊິຕພ຺ພາ, ນາຘິຏ຺ຐານູປຄາ, ນ ວິກປ຺ປນູປຄາ.

໖໓. ກປ຺ໂປ ສໂກ ອຕິເຣກປຕ຺ໂຕ ທສາຫປຣມໍ ຘາເຣຍ຺ຍາຕິ ໂຍຊນາ. ຕຕ຺ຖ ກປ຺ໂປຕິ ກປ຺ປິໂຍ. ສໂກຕິ ອຕ຺ຕໂນ ສນ຺ຕໂກ. ກປ຺ປິຍຕ຺ຕາ ປນ ອຕ຺ຕສນ຺ຕກຕ຺ຕາ ຈ ສຕ຺ຕນ຺ນມ຺ປິ ອຘິຏ຺ຐານວິກປ຺ປນູປຄຕາ ເວທິຕພ຺ພາ. ຕຕ຺ຖ ອໂຍປຕ຺ໂຕ ປຎ຺ຈຫິ ປາເກຫິ, ມຕ຺ຕິກາປຕ຺ໂຕ ທ຺ວີຫິ ປາເກຫິ ປກ຺ໂກ ອຘິຏ຺ຐານູປໂຄ ຈ ວິກປ຺ປນູປໂຄ ຈ, ຕຖາ ອຸໂຠປິ ກາກຓິກມຕ຺ຕສ຺ສາປິ ມູລສ຺ສ ອນວເສເສຕ຺ວາ ທິນ຺ເນ, ສພ຺ພໂສ ອຕ຺ຕສນ຺ຕກຕ຺ເຕ ວິຎ຺ຎາເຕ ຈ ອຘິຏ຺ຐານວິກປ຺ປນູປຄາຕິ ທຏ຺ຐພ຺ພໍ. ອຕິເຣກປຕ຺ໂຕຕິ ອນຘິຏ຺ຐິຕາວິກປ຺ປິຕຕາຍ ອຕິເຣກປຕ຺ໂຕ. ອຘິຏ຺ຐານປຈ຺ຈຸທ຺ຘາຣາ ປເນຕ຺ຖ ຈີວເຣ ວຸຕ຺ຕາວ. ວິກປ຺ເປນ຺ເຕນ ປນ ປຕ຺ຕານໍ ເອກພຫຸຠາວໍ, ສນ຺ນິຫິຕາສນ຺ນິຫິຕຠາວຎ຺ຈ ຎຕ຺ວາ ‘‘ອິມໍ ປຕ຺ຕ’’ນ຺ຕິ ວາ ‘‘ອິເມ ປຕ຺ເຕ’’ຕິ ວາ ‘‘ເອຕໍ ປຕ຺ຕ’’ນ຺ຕິ ວາ ‘‘ເອເຕ ປຕ຺ເຕ’’ຕິ ວາ ວຕ຺ວາ ‘‘ຕຸຍ຺ຫໍ ວິກປ຺ເປມີ’’ຕິ ວຕ຺ຕພ຺ພໍ. ສມ຺ມຸຂາທິເຠໂທ ປເນຕ຺ຖ ຈີວເຣ ວກ຺ຂມານນເຍນ ເວທິຕພ຺ໂພ. ທສາຫປຣມນ຺ຕິ ທສ ອຫານິ ປຣໂມ ປຣິຈ຺ເຉໂທ ອສ຺ສາຕິ ທຫາຫປຣໂມ, ກາໂລ, ຕໍ. ອຈ຺ຈນ຺ຕສໍໂຍເຄ ອຸປໂຍຄວຈນໍ. ຘາເຣຍ຺ໂຍຕິ ປຣິໂຠຄວເສນ ຘາເຣຕພ຺ໂພ. ຕສ຺ມິໍກາເລ ອຕິນາມິເຕ ປຕ຺ໂຕ ນິສ຺ສຄ຺ຄິໂຍ ໂຫຕີຕິ ໂຍຊນາ. ອຕິນາມິເຕຕິ ອຕິກ຺ກາມິເຕ ນິສ຺ສຄ຺ຄິໂຍ ໂຫຕິ, ເອກາທເສ ອຣຸຓຸຄ຺ຄມເນ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ ປທຠາຊນີເຍ (ປາຣາ. ໖໐໒) ວຸຕ຺ຕນເຍນ ປຕ຺ໂຕ ນິສ຺ສຊ຺ຊິຕພ຺ໂພ ໂຫຕິ, ຕຖາ ສຕິ ປາຈິຕ຺ຕິຍາປຕ຺ຕິ ຈສ຺ສ ໂຫຕີຕິ ອຘິປ຺ປາໂຍ.

໖໔. ‘‘ອຈ຺ເຉທາ’’ຕິອາທິ ຈີວເຣ ວຸຕ຺ຕນຍຕ຺ຕາ ອຸຕ຺ຕານເມວ. ອຍໍ ປນ ວິເສໂສ – ມຣຓຸທ຺ຘຏາຕິ ອຸທ຺ຘຣຓໍ ອຸທ຺ຘຬໍ, ປຈ຺ຈຸທ຺ຘາໂຣ. ມຣຓຎ຺ຈ ອຸທ຺ຘຏຎ຺ຈ ມຣຓຸທ຺ຘຏາ, ຕສ຺ມາ. ຉິທ຺ເທນາຕິ ເຍນ ກງ຺ຄຸສິຕ຺ຖໍ ນິກ຺ຂມຕິ ເຈວ ປວິສຕິ ຈ, ເຕນ ມຸຂວຏ຺ຏິໂຕ ເຫຏ຺ຐາ ທ຺ວງ຺ຄຸລຉິທ຺ເທນ. ປຕ຺ຕາຘິຏ຺ຐານມຸຊ຺ຌຕີຕິ ປຕ຺ໂຕ ອຘິຏ຺ຐານໍ ອຸຊ຺ຌຕິ ວິສ຺ສຊ຺ຊຕິ.

໖໕. ອິທານິ ‘‘ປຕ຺ຕ’’ນ຺ຕິອາທິນາ ອຎ຺ຎຖາ ປຣິຫຣເຓ ທຸກ຺ກຏໍ ທສ຺ເສຕິ. ຕຕ຺ຖ ໂສທກໍ ປຕ຺ຕໍ ນ ປຏິສາເມຍ຺ຍາຕິ ໂຍຊນາ. ນ ປຏິສາເມຍ຺ຍາຕິ ຄຸຕ຺ຕຏ຺ຐາເນ ນ ນິກ຺ຂິເປຍ຺ຍ, ‘‘ໂສທກໍ ປຕ຺ຕໍ ອຸຓ຺ເຫ ນ ຈ ໂອຕເປ’’ຕິອາທິນາ ຈ ໂຍຊນີຍໍ. ນ ຈ ໂອຕເປຕິ ເນວ ອີສກໍ ຕາເປຍ຺ຍ. ນ ນິທເຫຕິ ນິຣຸທກໍ ກຕ຺ວາປິ ຠຸສໍ ນ ນິທເຫຍ຺ຍ, ໂວທກໍ ກຕ຺ວາ ອີສກໍ ຕາເປຍ຺ຍາຕິປິ ພ຺ຍຕິເຣກຕ຺ໂຖ. ຠູມ຺ຍາ ນ ຐເປຕິ ຂຣາຍ ຠູມິຍາ ນ ຐເປຍ຺ຍ. ຍຕ຺ຖ ປນ ວຓ຺ໂຓ ນ ທຸສ຺ສຕິ, ເອວຣູປາຍ ມຕ຺ຕິກາຍ ປຣິຠຓ຺ຑກຕາຍ ຠູມິຍາ ວາ ຕຖາຣູປາຍ ເອວ ວາລິກາຍ ວາ ນິກ຺ກຸຊ຺ຊິຕ຺ວາ ອຸກ຺ກຸຊ຺ຊິຕ຺ວາ ຐເປຕຸໍ ວຏ຺ຏຕິ. ໂນ ຈ ລຄ຺ຄເຍຕິ ຠິຕ຺ຕິຂິລາທີສຸ ນ ໂອລມ຺ເພຍ຺ຍ.

໖໖. ‘‘ມິຑ຺ຒນ຺ເຕ ວາ’’ຕິອາທິນາ ວຕ຺ວາ ປຕ຺ຕໍ ຐເປຕຸໍ ນ ຈ ກປ຺ປຕີຕິ ໂຍເຊຕພ຺ພໍ. ມິຑ຺ຒນ຺ເຕຕິ ອາຬິນ຺ທກມິຑ຺ຒິກາທີນໍ ມິຑ຺ຒີນໍ ອນ຺ເຕ. ສເຈ ປນ ປຣິວຕ຺ເຕຕ຺ວາ ຕຕ຺ເຖວ ປຕິຏ຺ຐາຕິ, ເອວຣູປາຍ ວິຕ຺ຖິຓ຺ຓາຍ ມິຑ຺ຒິຍາ ຐເປຕຸໍ ວຏ຺ຏຕິ. ປຣິຠຓ຺ຑນ຺ເຕ ວາຕິ ພາຫິຣປສ຺ເສ ກຕາຍ ຕນຸກາຍ ມິຑ຺ຒິກາຍ ອນ຺ເຕ ວາ. ເອຕ຺ຖ ວາ-ສທ຺ໂທ ສມຸຈ຺ຈເຍ, ໂສ ຈ ປຈ຺ເຈກໍ ໂຍເຊຕພ຺ໂພ. ອງ຺ເກ ປນ ອໍສພທ຺ຘເກນ ອໍສກູເຏ ລຄ຺ເຄຕ຺ວາ ຐເປຕຸຎ຺ຈ ວຏ຺ຏຕິ. ຉຕ຺ເຕປິ ຠຓ຺ຑເກນ ສທ຺ຘິໍ ພນ຺ຘິຕ຺ວາ ວາ ອຏ຺ຏໍ ກຕ຺ວາ ວາ ຐເປຕຸໍ ວຏ຺ຏຕິ. ມຎ຺ເຈປິ ອຎ຺ເຎນ ສທ຺ຘິໍ ພນ຺ຘິຕ຺ວາ ຐເປຕຸໍ, ອຏນິຍໍ ພນ຺ຘິຕ຺ວາ ໂອລມ຺ເພຕຸໍ ວຏ຺ຏຕິ.

໖໗. ປຕ຺ເຕນ ອຸຈ຺ຉິຏ຺ໂຐທກຎ຺ຈ ຈລກຏ຺ຐິກຎ຺ຈ ນ ນີຫເຣຍ຺ຍາຕິ ສມ຺ພນ຺ໂຘ. ອຸຈ຺ຉິຏ຺ໂຐທກນ຺ຕິ ມຸຂວິກ຺ຂາລໂນທກໍ. ຈລການິ ຈ ຈພ຺ເພຕ຺ວາ ອປວິທ຺ຘາມິສານິ ອຏ຺ຐິການິ ມຈ຺ຉມໍສອຏ຺ຐິການິ ຈ ຈລກຏ຺ຐິກໍ. ປຕ຺ຕໍ ປຏິຄ຺ຄຫໍ ກຕ຺ວາ ຫຕ຺ຖໍ ໂຘວິຕຸມ຺ປິ ຫຕ຺ຖໂຘຕາທິ ອຸທກມ຺ປິ ປຕ຺ເຕ ອາກິຣິຕ຺ວາ ນີຫຣິຕຸມ຺ປິ ອນຸຈ຺ຉິຏ຺ຐໍ ສຸທ຺ຘປຕ຺ຕໍ ອຸຈ຺ຉິຏ຺ຐຫຕ຺ເຖນ ຄຓ຺ຫິຕຸມ຺ປິ ນ ວຏ຺ຏຕິ. ມຈ຺ຉມໍສຜລາຜລາທີນິ ຂາທນ຺ໂຕ ຍໍ ຕຕ຺ຖ ອຏ຺ຐິໍ ວາ ຈລກໍ ວາ ຉຑ຺ເຑຕຸກາໂມ ໂຫຕິ, ຕໍ ປຕ຺ເຕ ຐເປຕຸໍ ນ ລຠຕິ. ມຸຂໂຕ ນີຫຏໍ ປນ ຍໍ ກິຎ຺ຈິ ປຸນ ອຂາທິຕຸກາໂມ ປຕ຺ເຕ ຐເປຕຸໍ ນ ລຠຕິ. ສິງ຺ຄິເວຣາທີນິ ຑໍສິຕ຺ວາ ປຸນ ຐເປຕຸໍ ລຠຕິ. ປຕ຺ຕຫຕ຺ໂຖຕິ ປຕ຺ໂຕ ຫຕ຺ເຖ ຍສ຺ສາຕິ ວິຄ຺ຄໂຫ. ‘‘ປຕ຺ຕຫຕ຺ໂຖ, ກວາຏ’’ນ຺ຕິ ຈ ອຸປລກ຺ຂຓເມຕໍ. ຍຕ຺ຖ ກຕ຺ຖຈິ ສຣີຣາວຍເວ ປນ ປຕ຺ຕສ຺ມິໍ ສຕິ ເຍນ ເກນຈິ ສຣີຣາວຍເວນ ກວາຏໍ ປຓາເມຕຸໍ, ຆຏິກໍ ວາ ອຸກ຺ຂິປິຕຸໍ, ສູຈິໍ ວາ ກຸຎ຺ຈິກາຍ ອວາປຸຣິຕຸໍ ນ ລຠຕິ. ອໍສກູເຏ ປນ ປຕ຺ຕໍ ລຄ຺ເຄຕ຺ວາ ຍຖາສຸຂໍ ອວາປຸຣິຕຸໍ ລຠຕິ.

໖໘. ຠູມິຍາ ຠູມິສມ຺ພນ຺ຘີ ອາຘາຣໂກ, ຕສ຺ມິໍ ທນ຺ຕວລ຺ລິເວຕ຺ຕາທີຫິ ກເຕ ວລຍາຘາຣເກ ຈ ເອກທາຣຸນາ ກເຕ ທາຣຸອາຘາຣເກ ຈ ພຫູຫິ ທຓ຺ເຑຫິ ກເຕ ທຓ຺ຑາຘາຣເກ ຈ ຍຕ຺ຖ ຐປິໂຕ ປຕ຺ໂຕ ຍຖາ ປຣິວຕ຺ຕິຕ຺ວາ ນ ປຣິປຕຕິ, ຕຖາ ສຸຏ຺ຐຸ ສຊ຺ຊິເຕ ຕສ຺ມິໍ ປຕ຺ຕສ຺ສຸປຣິ ປຕ຺ໂຕຕິ ເອວຣູເປ ທຸເວ ປຕ຺ເຕ ຐເປຍ຺ຍາຕິ ປທຕ຺ຖໂຍຊນາ. ຠມໂກຏິສທິໂສ ປນ ທາຣຸອາຘາຣໂກ ຕີຫິ ທຓ຺ຑເກຫິ ພທ຺ໂຘ ທຓ຺ຑາຘາຣໂກ ຈ ເອກສ຺ສປິ ປຕ຺ຕສ຺ສ ອໂນກາໂສ, ຕຕ຺ຖ ຐເປຕ຺ວາປິ ຫຕ຺ເຖນ ຄເຫຕ຺ວາ ນິສີທິຕພ຺ພໍ. ຠູມິຍນ຺ຕິ ກຏສາຣກາທິນາ ອຕ຺ຖຕາຍ ຠູມິຍາ ປນ ນິກ຺ກຸຊ຺ຊິຕ຺ວາ ວາ ປຏິກຸຊ຺ຊິຕ຺ວາ ວາ ເອກໍ ປຕ຺ຕໍ ຐເປຍ຺ຍາຕິ ໂຍຊນາ.

໖໙. ອິທານິ ອກປ຺ປິຍປຕ຺ເຕ ທສ຺ເສຕິ ‘‘ທາຣູ’’ຕິອາທິນາ. ຕຕ຺ຖ ສຸວຓ຺ຓເມວ ໂສວຓ຺ຓໍ. ທາຣຸ ຈ ຣູປິຍຎ຺ຈ ໂສວຓ຺ຓຎ຺ຈ ມຓິ ຈ ເວຬຸຣິຍຎ຺ຈ ທາຣຸ…ເປ… ເວຬຸຣິຍານິ, ເຕຫິ ນິພ຺ພຕ຺ຕາ ທາຣຸ…ເປ… ມຍາ. ທີໂຆ ປນ ‘‘ເວຬຸຣິຍາມຍາ’’ຕິ ຄາຖາພນ຺ຘສຸຂຕ຺ຖໍ ກໂຕ. ເອວມຸປຣິປິ ຕາທິສໍ ວິຎ຺ເຎຍ຺ຍໍ. ຕຕ຺ຖ ອິນ຺ທນີລາທິ ມຓິ ນາມ. ກໍໂສ ຈ ກາໂຈ ຈ ຕິປຸ ຈ ສີສຎ຺ຈ ຜລິກາ ຈ ຕມ຺ພໂລໂຫ ຈາຕິ ທ຺ວນ຺ໂທ, ເຕຫິ ຊາຕາ ກໍສ…ເປ… ຊາ. ຕຕ຺ຖ ກໍສ-ສທ຺ເທນ ວຏ຺ຏໂລໂຫປິ ສງ຺ຄຫິໂຕ. ເສຕໍ ຕິປຸ, ກຓ຺ຫໍ ສີສໍ.

໗໐. ຉວສີສມໂຍຕິ ຉວສ຺ສ ມຕມນຸສ຺ສສ຺ສ ສີສໍ ສີສກປາລໍ, ເຕນ ນິພ຺ພຕ຺ໂຕ ຉວສີສມໂຍ. ຆຏິ ຈ ຕຸມ຺ພຎ຺ຈ, ເຕສໍ ກຏາໂຫ, ເຕຫິ ຊາຕາຕິ ຆຏິຕຸມ຺ພກຏາຫຊາ. ຕຕ຺ຖ ຆຏີຕິ ຆໂຏເຍວ. ຕຸມ຺ພໍ ອລາພຸ. ອິຕິ ອິເມ ສພ຺ເພ ປຕ຺ຕາ ອກປ຺ປິຍາ ວຸຕ຺ຕາ, ທຸກ຺ກຏວຕ຺ຖຸກາ ຈ ວຸຕ຺ຕາຕິ ໂຍຊນາ. ຕຕ຺ຖ ຣູປິຍາທີສຸ ຈຕູສຸ ສເຈ ຄິຫີ ຠຕ຺ຕຄ຺ເຄສຸ ສຸວຓ຺ຓຕຏ຺ຏກາທີສຸ ພ຺ຍຎ຺ຊນໍ ກຕ຺ວາ ອຸປນາເມນ຺ຕິ, ອາມສິຕຸໍ ນ ວຏ຺ຏຕິ. ກໍສກາຈຜລິກຊານິ ປນ ຕຏ຺ຏກາທີນິ ຠາຊນານິ ປຸຄ຺ຄລິກປຣິໂຠເຄເນວ ນ ວຏ຺ຏນ຺ຕິ, ສງ຺ຆິກປຣິໂຠເຄນ ວາ ຄິຫິວິກຏານິ ວາ ວຏ຺ຏນ຺ຕິ. ຆຏິຕຸມ຺ພກຏາຫຊາ ປນ ລຠິຕ຺ວາ ປຣິຫຣິຕຸໍ ນ ວຏ຺ຏນ຺ຕິ, ຕາວກາລິກໍ ປຣິຠຸຎ຺ຊິຕຸໍ ວຏ຺ຏນ຺ຕິ.

ປຕ຺ຕນິທ຺ເທສວຓ຺ຓນາ ນິຏ຺ຐິຕາ.