໓໑. ວິກປ຺ປນານິທ຺ເທສວຓ຺ຓນາ

໒໒໑. ສມ຺ມຸຂາ ປຣມ຺ມຸຂາຕິ ສສ຺ສ ມຸຂໍ, ປຣສ຺ສ ມຸຂນ຺ຕິ ວິຄ຺ຄໂຫ, ສມ຺ມຸເຂນ ປຣມ຺ມຸເຂນາຕິ ອຕ຺ໂຖ. ສມ຺ມຸຂາວິກປ຺ປນາ ປຣມ຺ມຸຂາວິກປ຺ປນາຕິ ເຠທາ ທຸເວ ວິກປ຺ປນາ ວຸຕ຺ຕາຕິ ໂຍຊນາ. ເຠທາຕິ ວິເສສໂຕ. ອຖ ວາ ສສ຺ສ ມຸຂໍ ມຸຂສມ຺ພນ຺ຘິວຈນໍ ອສ຺ສາ ວິກປ຺ປນາຍາຕິ ສມາໂສ. ຕຖາ ປຣມ຺ມຸຂາ. ສມ຺ມຸຂາ ຈ ປຣມ຺ມຸຂາ ຈ, ຕສ຺ສາ ເຠໂທ, ຕໂຕ. ສມ຺ມຸຂາຍ ສມ຺ມຸຂວິກປ຺ປນາຍ. ພ຺ຍຕ຺ຕສ຺ສາຕິ ວິກປ຺ປນວິຘານໍ ປຈ຺ຈຸທ຺ຘາຣວິຘານຎ຺ຈ ຊານນ຺ຕສ຺ສ.

໒໒໒. ເຕນາຕິ ຍສ຺ສ ສນ຺ຕິເກ ວິກປ຺ເປຕິ, ເຕນ ຠິກ຺ຂຸນາ. ປຣິໂຠຄາທິກນ຺ຕິ ປຣິໂຠຄໍ ວິສ຺ສຊ຺ຊນໍ ອຘິຏ຺ຐານຎ຺ຈ.

໒໒໔-໕. ອປຣາ ສມ຺ມຸຂາເວກາຕິ ເອຕ຺ຖ ວາ-ສທ຺ໂທ ປກ຺ຂນ຺ຕເຣ, ອຖ ວາຕິ ອຕ຺ໂຖ, ອປິ-ສທ຺ທຕ຺ໂຖ ວາ ວາ-ສທ຺ໂທ, ໂສ ອປຣາ-ສທ຺ທໂຕ ປຣໍ ທຏ຺ຐພ຺ໂພ, ອປຣາປິ ເອກາ ສມ຺ມຸຂາວິກປ຺ປນາ ອຕ຺ຖີຕິ ອຕ຺ໂຖ. ກຖນ຺ຕິ ອາຫ ‘‘ຠິກ຺ຂຸສ຺ສາ’’ຕິອາທິ. ‘‘ປຎ຺ຈນ຺ນໍ ສຫຘມ຺ມີນ’’ນ຺ຕິ ວຸຕ຺ຕຕ຺ຕາ ‘‘ຕິສ຺ສສ຺ສ ຠິກ຺ຂຸໂນ’’ຕິອາທີສຸ ຕິສ຺ສາຍ ຠິກ຺ຂຸນິຍາ ຕິສ຺ສາຍ ສິກ຺ຂມານາຍ ຕິສ຺ສາຍ ສາມເຓຣິຍາ ຕິສ຺ສສ຺ສ ສາມເຓຣສ຺ສາຕິປິ ວິຎ຺ຎາຕພ຺ພໍ.

໒໒໖. ປຣມ຺ມຸຂາວິກປ຺ປນາຕິ ປຣມ຺ມຸເຂນ ວິກປ຺ປເນນ, ປຣມ຺ມຸຂາວິກປ຺ປນາຕິ ວາ ຄເຫຕພ຺ພໍ, ປຣມ຺ມຸຂາວິກປ຺ປນາ ກຖນ຺ຕິ ອຕ຺ໂຖ.

໒໒໗. ມິຕ຺ໂຕຕິ ທຬ຺ຫມິຕ຺ໂຕ. ສນ຺ທິຏ຺ໂຐຕິ ທິຏ຺ຐມຕ຺ຕມິຕ຺ໂຕ. ເອຕ຺ຖ ປນ ທ຺ວິນ຺ນໍ ວິກປ຺ປນານໍ ກິໍ ນານາກຣຓນ຺ຕິ? ສມ຺ມຸຂາວິກປ຺ປນາຍ ຕາວ ສຍໍ ວິກປ຺ເປຕ຺ວາ ປເຣນ ປຈ຺ຈຸທ຺ຘຣາເປຕິ, ເຕເນວ ສາ ສມ຺ມຸຂາວິກປ຺ປນາ ນາມ ຊາຕາ. ປຣມ຺ມຸຂາວິກປ຺ປນາຍ ປເຣເນວ ວິກປ຺ປາເປຕ຺ວາ ປເຣເນວ ປຈ຺ຈຸທ຺ຘຣາເປຕິ, ເຕເນວ ສາ ປຣມ຺ມຸຂາວິກປ຺ປນາ ນາມ ຊາຕາຕິ ອິທເມຕ຺ຖ ນານາກຣຓນ຺ຕິ.

໒໒໘. ທູຣສນ຺ຕິກຕ຺ເຕກຕ຺ຕນ຺ຕິ ເອຕ຺ຖ ອາສນ຺ນທູຣຠາໂວ ອຘິຏ຺ຐາເນ ວຸຕ຺ຕນເຍເນວ ເວທິຕພ຺ໂພ.

໒໒໙. ທສາຫໍ…ເປ… ປຈ຺ຈາສາຍ ສຕິ ມາສກໍ ນາຘິຏ຺ຐິຕວິກປ຺ປິຕໍ ນິສ຺ສຄ຺ຄິໍ ນຸປ຺ປາທຍຕີຕິ ສມ຺ພນ຺ໂຘ. ທສ ອຫານິ ສມາຫຏານິ ທສາຫໍ. ສພ຺ພຕ຺ຖ ອຈ຺ຈນ຺ຕສໍໂຍເຄ ທຸຕິຍາ. ຕຕ຺ຖ ຍໍ ທິວສໍ ຈີວຣໍ ອຸປ຺ປນ຺ນໍ, ຕສ຺ສ ໂຍ ອຣຸໂຓ, ໂສ ອຸປ຺ປນ຺ນທິວສນິສ຺ສິໂຕ, ຕສ຺ມາ ຈີວຣຸປ຺ປາທທິວເສນ ສທ຺ຘິໍ ເອກາທເສ ອຣຸຓຸຄ຺ຄມເນ ນິສ຺ສຄ຺ຄິຍໍ ໂຫຕີຕິ ອາຫ ‘‘ທສາຫ’’ນ຺ຕິ. ມາສເມກໍ ວາຕິ ‘‘ອນຕ຺ຖເຕ ກຖິເນ ເອກໍ ປຈ຺ຉິມກຕ຺ຕິກມາສ’’ນ຺ຕິ (ປາຣາ. ໖໔໙ ອຕ຺ຖໂຕ ສມານໍ) ວຸຕ຺ຕຕ຺ຕາ ກຖິນຕ຺ຖເຕ ປຎ຺ຈ ມາເສຕິ ລພ຺ຠຕິ. ກຖິນໍ ອຕ຺ຖຕໍ ຍສ຺ມິໍ ວິຫາເຣຕິ ສມາໂສ. ປາຣິປູຣຕ຺ຖນ຺ຕິ ປາຣິປູຣິ ອຕ຺ໂຖ ຍສ຺ສາຕິ ວິຄ຺ຄໂຫ. ກິຣິຍາວິເສສນໍ, ປາຣິປູຣິປ຺ປໂຍຊນໍ ກຕ຺ວາຕິ ອຕ຺ໂຖ. ອູນສ຺ສາຕິ ຍຕ຺ຕເກນ ກຍິຣມານໍ ອຘິຏ຺ຐານໍ ຈີວຣໍ ປໂຫຕິ, ຕຕ຺ຕກຕາຠາວໂຕ ອູນສ຺ສ ເອກາທສມາສສຕ຺ຕມາສສງ຺ຂາເຕ ປິຏ຺ຐິສມເຍ ອຸປ຺ປນ຺ນສ຺ສ ມູລຈີວຣສ຺ສ. ປຈ຺ຈາສາ ສຕີຕິ ‘‘ສງ຺ຆາທິໂຕ ຍໂຕ ກຸໂຕຈິ ລຈ຺ຉາມີ’’ຕິ ເອວໍ ສຕິຍາ ປຈ຺ຈາສາຍາຕິ ອຕ຺ໂຖ. ອຸຠຍມ຺ປິ ຍ-ກາຣໂລເປນ ນິທ຺ທິຏ຺ຐໍ. ສຕີຕິ ວາ ນິປາໂຕ, ລິງ຺ຄວິປລ຺ລາເສນ ວາຫ. ເອຕ຺ຖ ປນ ພ຺ຍຕິເຣກວເສນ ທສາຫາຕິກ຺ກມນາທີສຸ ນິສ຺ສຄ຺ຄິຍໍ ປາຈິຕ຺ຕິຍໍ ເວທິຕພ຺ພນ຺ຕິ.

ວິກປ຺ປນານິທ຺ເທສວຓ຺ຓນາ ນິຏ຺ຐິຕາ.