໓໐. ວຕ຺ຕນິທ຺ເທສວຓ຺ຓນາ

໒໑໓. ສອຸປາຫໂນ…ເປ… ຈີວຣໍ ສີເສ ກຣິຕ຺ວາ ວາ ອາຄນ຺ຕຸໂກ ອາຣາມໍ ນ ປວິເສຕິ ສມ຺ພນ຺ໂຘ. ສຉຕ຺ໂຕຕິ ສີເສ ກຕຉຕ຺ເຕນ ສຉຕ຺ໂຕ. ໂອຄຸຓ຺ຐິໂຕຕິ ສສີສໍ ປາຣຸປິໂຕ. ‘‘ປຣິກ຺ຂິຕ຺ຕສ຺ສ ວິຫາຣສ຺ສ ປຣິກ຺ເຂໂປ, ອປຣິກ຺ຂິຕ຺ຕສ຺ສ ປຣິກ຺ເຂປາຣຫຏ຺ຐານ’’ນ຺ຕິ ວຸຕ຺ຕໍ ອຸປຈາຣສີມາສມີປໍ ປຕ຺ວາ ອຸປາຫນາໂອມຸຎ຺ຈນາທິສພ຺ພໍ ກຕ຺ວາ ອາຣາໂມ ປວິສິຕພ຺ໂພຕິ ອຍເມຕ຺ຖ ພ຺ຍຕິເຣກລທ຺ໂຘ ອຕ຺ໂຖ.

໒໑໔. ປານີເຍນ ປາເທ ນ ໂຘເວຍ຺ຍາຕິ ສມ຺ພນ຺ໂຘ. ປຏິກ຺ກມນໍ ປຕ຺ວາ ເອກມນ຺ເຕ ປຕ຺ຕຈີວຣໍ ນິກ຺ຂິປິຕ຺ວາ ປຕິຣູເປ ນິສຊ຺ຊ ປຸຈ຺ຉິຕ຺ວາ ປານີຍໍ ປາຕພ຺ພໍ, ປຣິໂຠຊນີເຍນ ຍຖາວຸຕ຺ຕໍ ປາທາ ໂຘວິຕພ຺ພາຕິ ອຘິປ຺ປາໂຍ. ວຸຑ຺ຒຕເຣ ອາວາສິເກປິ ຈ ອຠິວາເທຍ຺ຍາຕິ ອິມິນາ ວສ຺ສໍ ປຸຈ຺ຉິຕ຺ວາ ນວເກນ ອາວາສິເກນ ອຠິວາທາເປຕພ຺ພນ຺ຕິ ທີເປຕິ. ປຸຈ຺ເຉຍ຺ຍ ສຍນາສນນ຺ຕິ ‘‘ກຕມໍ ເສນາສນໍ ປາປຸຓາຕິ, ອຊ຺ຌາວຸຕ຺ຖໍ ອນຊ຺ຌາວຸຕ຺ຖໍ ວາ’’ຕິ ເສນາສນໍ ປຸຈ຺ເຉຍ຺ຍ. ອິທຎ຺ຈ ປຸຈ຺ຉາຍ ລກ຺ຂຓວຈນໍ. ຕສ຺ມາ ອາວາສິກວຕ຺ເຕ ວຸຕ຺ຕມຊ຺ຌາວຸຕ຺ຖາທິກຎ຺ຈ ປຸຈ຺ຉິຕພ຺ພໍ. ສເຈ ‘‘ອນຊ຺ຌາວຸຕ຺ຖ’’ນ຺ຕິ ວທນ຺ຕິ, ກວາຏໍ ອາໂກເຏຕ຺ວາ ມຸຫຸຕ຺ຕໍ ອາຄເມຕ຺ວາ ຆຏິກໍ ອຸຄ຺ຆາເຏຕ຺ວາ ກວາຏໍ ປຓາເມຕ຺ວາ ພຫິ ຐິເຕນ ອຸລ຺ໂລເກຕ຺ວາ ປວິສິຕ຺ວາ ສພ຺ພໍ ເສນາສນວຕ຺ຕໍ ກາຕພ຺ພໍ. ອາຄນ຺ຕຸກວຕ຺ຕໍ.

໒໑໕-໖. ຄມິໂກ ປກ຺ກເມຍ຺ຍາຕິ ສມ຺ພນ຺ໂຘ. ‘‘ປຏິສາເມຕ຺ວາ’’ຕິອາທີນິມສ຺ສ ປຸພ຺ພກິຣິຍາປທານິ. ທາຣຸມຕ຺ຕິກຠຓ຺ຑກນ຺ຕິ ເອຕ຺ຖ ມຎ຺ຈປີຐາທິທາຣຸຠຓ຺ຑໍ ຣຊນຠາຊນາທິມຕ຺ຕິກາຠຓ຺ຑໍ. ປຏິສາເມຕ຺ວາຕິ ອຕ຺ຖິ ເຈ ອໂນວສ຺ສເກ ສຓ຺ຐເປຕ຺ວາ. ຖເກຕ຺ວານາຕິ ທ຺ວາຣວາຕປາເນຫິ ປິຘາຍ. ສາຘຸກໍ ສງ຺ໂຄເປຕ຺ວານາຕິ ຈຕູສຸ ປາສາເຓສຸ ມຎ຺ຈໍ ປຎ຺ຎເປຕ຺ວາ ມຎ຺ເຈ ມຎ຺ຈສ຺ສ, ປີເຐ ປີຐສ຺ສ ອາໂຣປເນນ ເສນາສນສ຺ສ ອຸປຣູປຣິ ປຸຎ຺ຊກຣເຓນ ສາຘຸກໍ ສງ຺ໂຄປນໍ ກຕ຺ວາ. ນ ຈາຕິ ເນວ. ຄມິກວຕ຺ຕໍ.

໒໑໗-໘. ອາວາສິໂກຕິ ອິທໍ ‘‘ປຎ຺ຎເປຍ຺ຍາ’’ຕິອາທີນໍ ກຕ຺ຕຸປທໍ. ນວກມ຺ມກຣຓາທິຠາຣນິຕ຺ຖຣຓຕາຍ ອາວາໂສ ວິຫາໂຣ ອສ຺ສ ອຕ຺ຖີຕິ ອາວາສິໂກ. ຍສ຺ສ ປນ ເກວລໍ ວິຫາເຣ ນິວາສນມຕ຺ຕໍ ອຕ຺ຖິ, ໂສ ເນວາສິໂກ. ອຸໂຠປິ ເຕ ອິຘ ອາວາສິກ-ສທ຺ເທນ ສງ຺ຄຫິຕາ. ປາໂທທປ຺ປຠຸຕິນ຺ຕິ ເອຕ຺ຖ ປຠຸຕິ-ສທ຺ເທນ ປາທປີຐປາທກຖລິການໍ ຄຫຓໍ. ປຈ຺ຈຸຄ຺ຄນ຺ຕ຺ວານ ປຕ຺ຕຈີວຣໍ ຄຓ຺ເຫຍ຺ຍາຕິ ໂຍຊນາ. ປຎ຺ຎເປ ສຍນາສນນ຺ຕິ ‘‘ເອຕໍ ຕຸມ຺ຫາກໍ ເສນາສນໍ ປາປຸຓາຕີ’’ຕິ ເອວໍ ສຍນາສນໍ ປຎ຺ຎເປຍ຺ຍ, ປກາເສຍ຺ຍາຕິ ວຸຕ຺ຕໍ ໂຫຕິ.

໒໑໙. ອຊ຺ຌາວຸຕ຺ຖນ຺ຕິ ປຸພ຺ເພ ຠິກ຺ຂູຫິ ນິວຸຕ຺ຖໍ. ໂຄຈຣາໂຄຈຣໍ ວເທຕິ ‘‘ຠິກ຺ຂາຈາຣຄາໂມ ທູໂຣ, ອາສນ຺ໂນ’’ຕິ ວາ, ‘‘ກາລສ຺ເສວ ປິຓ຺ຑາຍ ຈຣິຕພ຺ພໍ, ທິວາ ວາ’’ຕິ ເອວໍ ໂຄຈຣຎ຺ຈ, ‘‘ມິຈ຺ຉາທິຏ຺ຐິການໍ ວາ ຄາໂມ, ປຣິຈ຺ຉິນ຺ນຠິກ຺ໂຂ ວາ’’ຕິອາທິນາ ອໂຄຈຣຎ຺ຈ ວເທຍ຺ຍາຕິ ອຕ຺ໂຖ. ວຈ຺ຈປສ຺ສາວຏ຺ຐານານີຕິອາທີນິປິ ‘‘ວເທ’’ຕິ ອິມສ຺ເສວ ກມ຺ມວຈນານິ. ເສຂສມ຺ມຸຕິນ຺ຕິ ຍສ຺ສ ສທ຺ຘສ຺ສ ກຸລສ຺ສ ສງ຺ໂຆ ເສຂສມ຺ມຸຕິໍ ເທຕິ, ຕໍ ກຸລຎ຺ຈ.

໒໒໐. ປເວສນິກ຺ຂເມ ກາລນ຺ຕິ ‘‘ເກສຸຈິ ຐາເນສຸ ວາຬມິຄາ ວາ ອມນຸສ຺ສາ ວາ ໂຫນ຺ຕິ, ອິມໍ ກາລໍ ປວິສິຕພ຺ພໍ ນິກ຺ຂມິຕພ຺ພຎ຺ຈາ’’ຕິ ເອວໍ ປເວສນິກ຺ຂເມ ຈ ກາລໍ. ເອຕໍ ປນ ອາສນປຎ຺ຎປນາທິກໍ ສພ຺ພໍ ວຕ຺ຕໍ ວຸຑ຺ຒຕເຣ ອາຄເຕ ຈີວຣກມ຺ມາທິໍ ວາ ນາຕິຄິລານສ຺ສ ເຠສຊ຺ຊໍ ວາ ຐເປຕ຺ວາປິ ກາຕພ຺ພໍ. ມຫາຄິລານສ຺ສ ປນ ເຠສຊ຺ຊເມວ ກາຕພ຺ພໍ. ເຈຕິຍງ຺ຄຓວຕ຺ຕໍ ກໂຣນ຺ເຕນາປິ ຕສ຺ສ ວຕ຺ຕໍ ກາຕຸໍ ອາຣຠິຕພ຺ພໍ. ປຓ຺ຑິໂຕ ຫິ ອາຄນ຺ຕຸໂກ ‘‘ກໂຣຫິ ຕາວ ເຠສຊ຺ຊໍ, ເຈຕິຍງ຺ຄຓໍ ສມ຺ມຊ຺ຊາຫີ’’ຕິ ຈ ວເທຍ຺ຍ. ອປິຈ ພີຊເນນ ພີຊິຕພ຺ໂພ, ປາທາປິສ຺ສ ໂຘວິຕພ຺ພາ, ເຕເລນ ມກ຺ຂິຕພ຺ພາ. ປິຏ຺ຐິ ເຈ ອາຄິລາຍຕິ, ສມ຺ພາເຘຕພ຺ພາ. ນວກສ຺ສ ປນ ອາຄນ຺ຕຸກສ຺ສ ‘‘ອິທມາສນໍ, ເອຕ຺ຖ ນິສີທາ’’ຕິອາທິນາ ອາຈິກ຺ຂິຕພ຺ພນ຺ຕິ ທສ຺ເສນ຺ໂຕ ‘‘ນິສິນ຺ໂນເຍວາ’’ຕິອາທິມາຫ. ນິສິນ຺ໂນເຍວາຕິ ອິມິນາ ‘‘ຐິໂຕເຍວາ’’ຕິອາທິໍ ອຸປລກ຺ເຂຕິ. ສມຸທ຺ທິເສຕິ ອາທເຣນ ວເທຍ຺ຍ. ອາວາສິກວຕ຺ຕໍ.

‘‘ວຕ຺ຕ’’ນ຺ຕິ ປນ ສາມຎ຺ເຎນ ນິທ຺ທິຏ຺ຐຕ຺ຕາ ນ ເຖເຣ ຠິກ຺ຂູ ອຕິອລ຺ລີຍິຕ຺ວາ ນິສີທິຕພ຺ພໍ, ມຫາເຖຣສ຺ສ ນິສິນ຺ນາສນໂຕ ເອກໍ ທ຺ເວ ອາສນານິ ຐເປຕ຺ວາ ‘‘ນິສີທາ’’ຕິ ວຸຕ຺ເຕ ນິສີທິຕພ຺ພໍ, ນ ນວາປິ ຠິກ຺ຂູ ອາສເນນ ປຏິພາຫິຕພ຺ພາ, ນ ສງ຺ຆາຏິໍ ໂອຕ຺ຖຣິຕ຺ວາ ນິສີທິຕພ຺ພໍ, ສທ຺ທໍ ອກຕ຺ວາ ອຸທກກິຈ຺ຈໍ ກາຕພ຺ພໍ, ຍຖາ ສູປສ຺ສ ໂອກາໂສ ໂຫຕິ, ເອວມຕ຺ຕາຍ ໂອທໂນ ຄຓ຺ຫິຕພ຺ໂພ, ເຖເຣນ ຠິກ຺ຂຸນາ ‘‘ຐເປຕ຺ວາ ອປ຺ປກໍ ໂອທນາທິກໍ ສພ຺ພໍ ສພ຺ເພສໍ ສມກໍ ສມ຺ປາເທຫີ’’ຕິ ວຕ຺ຕພ຺ພໍ, ນ ຕາວ ເຖເຣນ ຠຸຎ຺ຊິຕພ຺ພໍ, ຠຸຕ຺ຕາວິນາ ນ ຕາວ ອຸທກໍ ປຏິຄ຺ຄເຫຕພ຺ພໍ, ຠຕ຺ຕຄ຺ຄໂຕ ນິວຕ຺ຕນ຺ເຕຫິ ຍຖານຸຣູປໍ ນິກ຺ຂມິຕ຺ວາ ວິຣຬາຍ ປາຬິຍາ ຄນ຺ຕພ຺ພນ຺ຕິ ເອວມາທິກຎ຺ຈ ຕທນຸຣູປໍ ເສຂິຍວຕ຺ຕຎ຺ຈ ສມ຺ປາເທຕພ຺ພນ຺ຕິ ອິທໍ ຠຕ຺ຕຄ຺ຄວຕ຺ຕຎ຺ຈ ສາຘຸກໍ ອຕຣມາເນນ ຄາໂມ ປວິສິຕພ຺ໂພ, ‘‘ອິມິນາ ປວິສິສ຺ສາມິ, ອິມິນາ ນິກ຺ຂມິສ຺ສາມີ’’ຕິ ນິເວສນໍ ປວິສນ຺ເຕນ ສລ຺ລກ຺ເຂຕພ຺ພໍ, ນາຕິສຫສາ ປວິສິຕພ຺ພໍ, ນາຕິສຫສາ ນິກ຺ຂມິຕພ຺ພໍ, ນາຕິທູເຣ ນຈ຺ຈາສນ຺ເນ ຐາຕພ຺ພໍ, ນາຕິຈິຣໍ ຐາຕພ຺ພໍ, ນາຕິລຫຸກໍ ນິວຕ຺ຕິຕພ຺ພໍ, ທາຕຸກາມຕາກາຣໍ ຎຕ຺ວາ ຐາຕພ຺ພໍ, ໂຍ ປຐມໍ ຄາມໂຕ ປຏິກ຺ກມຕິ, ເຕນ ອາສນປຎ຺ຎປນາທິ ສພ຺ພໍ ກາຕພ຺ພໍ, ໂຍ ປຈ຺ຉາ, ເຕນ ອາສນຸທ຺ຘຣຓາທິ ສພ຺ພໍ ກາຕພ຺ພນ຺ຕິ ເອວມາທິກຎ຺ຈ ຕທນຸຣູປໍ ເສຂິຍວຕ຺ຕຎ຺ຈ ສມ຺ປາເທຕພ຺ພນ຺ຕິ ອິທໍ ປິຓ຺ຑຈາຣິກວຕ຺ຕຎ຺ຈ ກາຕພ຺ພໍ.

ເສນາສນຏ຺ຐາເນ ສພ຺ພໍ ວຕ຺ຕຎ຺ຈ ສມ຺ປາເທຕ຺ວາ ຕໂຕ ນິກ຺ຂມິຕ຺ວາ ສາຘຸກໍ ນິວາເສຕ຺ວາ ປາຣຸປິຕ຺ວາ ຈ ອຕຣມາເນນ ຄາໂມ ປວິສິຕພ຺ໂພຕິອາທິ ສພ຺ພໍ ປິຓ຺ຑຈາຣິກວຕ຺ຕໍ ກາຕພ຺ພໍ. ປານີຍປຣິໂຠຊນີຍອຄ຺ຄິອຣຓິສຫິຕກຕ຺ຕຣທຓ຺ຑາ ອຸປຏ຺ຐເປຕພ຺ພາ, ນກ຺ຂຕ຺ຕປທານິ ສກລານິ ວາ ເອກເທສານິ ວາ ອຸຄ຺ຄເຫຕພ຺ພານິ, ທິສາກຸສເລນ ຠວິຕພ຺ພນ຺ຕິ ອິທໍ ອາຣຎ຺ຎິກວຕ຺ຕຎ຺ຈ ອຸທ຺ທິຏ຺ຐໍເຍວ ໂຫຕີຕິ ອວຄນ຺ຕພ຺ພນ຺ຕິ.

ວຕ຺ຕນິທ຺ເທສວຓ຺ຓນາ ນິຏ຺ຐິຕາ.