໒໗. ອສໍວາສນິທ຺ເທສວຓ຺ຓນາ

໑໙໘. ອຸກ຺ຂິຕ຺ໂຕຕິ ກມ຺ມນານາສໍວາສກສງ຺ຂາໂຕ ອາປຕ຺ຕິຍາ ອທສ຺ສເນ, ອປ຺ປຏິກມ຺ເມ, ປາປິກາຍ ທິຏ຺ຐິຍາ ອປ຺ປຏິນິສ຺ສຄ຺ເຄ ອຸກ຺ຂິຕ຺ຕໂກ. ອນຸປສມ຺ປນ຺ໂນຕິ ສິກ຺ຂມານສາມເຓຣສາມເຓຣິສິກ຺ຂາປຈ຺ຈກ຺ຂາຕສງ຺ຂາໂຕ ອນຸປສມ຺ປນ຺ໂນ. ຉິນ຺ນມູລໂກຕິ ອນ຺ຕິມວຕ຺ຖຸອຊ຺ຌາປນ຺ໂນ. ອຸກ຺ຂິຕ຺ຕເກສຸ ‘‘ຘມ຺ມວາທິໂນ ເອເຕ’’ຕິ ອຸປ຺ປນ຺ນາຍ ລທ຺ຘິຍາ ນານາຠູໂຕ ສໍວາໂສ ເອຕສ຺ສາຕິ ນານາສໍວາໂສ, ອຸກ຺ຂິຕ຺ຕານຸວຕ຺ຕກສງ຺ຂາໂຕ ລທ຺ຘິນານາສໍວາສໂກ. ສີມໂຕ ນິຄ຺ຄຕາ ນິສ຺ສີມາ, ສີມນ຺ຕຣິກາ ພຫິສີມາ ຈ, ຕຕ຺ຖ ຫຕ຺ຖປາເສ ເຈປິ ຐິໂຕ, ສີມານານາສໍວາສໂກ ນິສ຺ສີມຏ຺ຐິໂຕ. ເວຫາຍເສ ອາກາເສ ຐິໂຕ ເວຫາຍສຓ຺ຐິໂຕ ພິນ຺ທາຄເມນ. ຕຕ຺ຖ ‘‘ນານາສໍວາໂສ ຈາ’’ຕິອາທິນາ ສມາຫາຣທ຺ວນ຺ເທປິ ກ຺ວຈິ ນປຸໍສກລິງ຺ຄໍ ພ຺ຍຠິຈຣຕີຕິ ນປຸໍສກຕ຺ຕາຠາໂວ ຍຖາ ‘‘ມຄ຺ຄາມຄ຺ໂຄ’’ຕິ. ເອກກມ຺ມໍ ເອກຸທ຺ເທໂສ ສມສິກ຺ຂຕາຕິ ອຍໍ ຕິວິໂຘປິ ສໍວາໂສ ນາມ. ໂສ ເຍສໍ ນຕ຺ຖິ, ເຕ ອສໍວາສາ. ເອເຕ ຫຕ຺ຖປາສໂຕ ພຫິກຣຓວເສນ ວຊ຺ເຊຕພ຺ພາ. ເອເຕສຸ ຫິ ຕິວິເຘ ອຸກ຺ຂິຕ຺ຕເກ ສຕິ ອຸໂປສຖາທິກໍ ກມ຺ມໍ ກໂຣນ຺ຕສ຺ສ ປາຈິຕ຺ຕິຍໍ, ອິຕເຣສຸ ທຸກ຺ກຏນ຺ຕິ.

ອສໍວາສນິທ຺ເທສວຓ຺ຓນາ ນິຏ຺ຐິຕາ.