໒໔. ອຎ຺ຊນີນິທ຺ເທສວຓ຺ຓນາ

໑໘໒. ວຏ຺ຏາ ວາ ອຏ຺ຐໂສຬສໍສາ ວາ ມຏ຺ຐາ ອຎ຺ຊນີ ວຏ຺ຏຕີຕິ ໂຍຊນາ. ອຏ຺ຐ ຈ ໂສຬສ ຈ ອໍສາ ໂກຓາ ຍສ຺ສາ ສາຕິ ວິຄ຺ຄໂຫ. ໂສຬສໍສປເທສວິຠຕ຺ຕາຍ ອຏ຺ຐໍສາສຸຕິຍາ ອຏ຺ຐໍສປເທສວິຠຕ຺ຕາ ຈຕຸຣໍສາປິ ສາມຕ຺ຖິຍາ ຄຍ຺ຫຕີຕິ ຎາຕພ຺ພໍ. ‘‘ອຸຊຸກເມວ ປນ ຈຕຸຣໍສາວາ’’ຕິ ຫິ ອຏ຺ຐກຖາຍໍ (ປາຣາ. ອຏ຺ຐ. ໑.໘໕) ວຸຕ຺ຕໍ. ອຎ຺ຊນີຕິ ອຎ຺ຊນນາຬິ. ມູເລ ຕິສ຺ໂສປິ ເລຂາ ວຏ຺ຏນ຺ຕີຕິ ໂຍຊນາ. ມູເລຕິ ພຸນ຺ເທ, ເຫຏ຺ຐໂຕຕິ ວຸຕ຺ຕໍ ໂຫຕິ. ເລຂາຕິ ວຏ຺ຏເລຂາ. ພນ຺ຘິຕຸໍ ຄີວາຍໍ ເອກາ ເອວ ເລຂາ ວຏ຺ຏຕີຕິ ສມ຺ພນ຺ໂຘ. ພນ຺ຘິຕຸນ຺ຕິ ປິຘານພນ຺ຘນຕ຺ຖໍ.

໑໘໓. ຍໍ ກິຎ຺ຈິ ຣູປນ຺ຕິ ອິຕ຺ຖິຣູປາທິ ຍໍ ກິຎ຺ຈິ ຣູປໍ. ມາລາທິກມ຺ມນ຺ຕິ ມາລາກມ຺ມໍ ລຕາກມ຺ມໍ. ອຑ຺ຒຈນ຺ທາທີຕິ ເອຕ຺ຖ ອາທິ-ສທ຺ເທນ ອຄ຺ຆິຍາທິກໍ ຄຫິຕໍ. ເອຕ຺ຖາຕິ ອຎ຺ຊນິຍໍ.

໑໘໔. ຖວິກາຕິ ອຎ຺ຊນິຖວິກາ. ສິປາຏີຕິ ຂຸຣສິປາຏິກາ. ສລາກາປິ ອຈິຕ຺ຕກາ ລພ຺ຠາຕິ ສມ຺ພນ຺ໂຘ. ສລາກາຕິ ອຎ຺ຊນິສລາກາ. ນຕ຺ຖິ ຈິຕ຺ຕເມຕິສ຺ສາຕິ ອຈິຕ຺ຕກາ. ຕາທິສໍ ປນ ລຠິຕ຺ວາ ອຸປາຫນາໂຍ ວິຍ ນາເສຕ຺ວາ ປຣິຠຸຎ຺ຊິຕພ຺ພໍ.

໑໘໕. ອຏ຺ຐິ-ສທ຺ເທນ ມນຸສ຺ສຏ຺ຐິໍ ຐເປຕ຺ວາ ຍໍ ກິຎ຺ຈິ ອຏ຺ຐິ ຄຫິຕໍ.

໑໘໖. ຘູມເນຕ຺ຕາຕິ ຘູມນາຬິກາ, ນິສ຺ສ ອາ-ກາຣາເທສວເສນ ວຸຕ຺ຕໍ. ສຕ຺ຖກທຓ຺ຑານີຕິ ສຕ຺ຖທຓ຺ຑາ. ນຕ຺ຖຸໍ ເທນ຺ຕິ ເອຕາຍາຕິ ນຕ຺ຖຸທານາ. ອນິຍເມນ ຫິ ນທາທິໂຕ ວາ ອີ. ເຕຫິ ສງ຺ຂນາຠິອາທີຫິ ນິພ຺ພຕ຺ຕາ ຕມ຺ມຍາ.

ອຎ຺ຊນີນິທ຺ເທສວຓ຺ຓນາ ນິຏ຺ຐິຕາ.