໑໖. ວຈ຺ຈປສ຺ສາວຏ຺ຐານິກນິທ຺ເທສວຓ຺ຓນາ

໑໕໖. ວຈ຺ຈປສ຺ສາວຏ຺ຐານິກນ຺ຕິ ຐານມ຺ຫິ ຐາເນ ວາ ຠວໍ ວຈ຺ຈປສ຺ສາວຏ຺ຐານິກໍ. ຍຖາວຸຑ຺ຒໍ ວຈ຺ຈໍ ນ ກເຣຍ຺ຍາຕິ ສມ຺ພນ຺ໂຘ. ເຍ ເຍ ວຸຑ຺ຒາ ຍຖາວຸຑ຺ຒໍ, ອາຄຕປ຺ປຏິປາຏິໍ ຫິຕ຺ວາ ວຸຑ຺ຒປ຺ປຏິປາຏິຍາຕິ ອຕ຺ໂຖ. ວຈ຺ຈນ຺ຕິ ອຸປລກ຺ຂຓມຕ຺ຕໍ, ປສ຺ສາວຎ຺ຈ ນຫານຎ຺ຈ ນ ກເຣຍ຺ຍາຕິ ອຘິປ຺ປາໂຍ. ຕເທວ ສມຕ຺ເຖຕິ ‘‘ຍາຕານຸປຸພ຺ພິຍາ’’ຕິອາທິນາ. ຍາຕານຸປຸພ຺ພິຍາຕິ ຍາຕານໍ ຄຕານໍ ອນຸປຸພ຺ພິ ອນຸກ຺ກໂມ ຍາຕານຸປຸພ຺ພິ, ຕາຍ. ວຈ຺ຈ…ເປ… ຕິຕ຺ຖຎ຺ຈາຕິ ເອຕໍ ຕຍໍ ລພ຺ຠຕີຕິ ອຕ຺ໂຖ, ຠິກ຺ຂຸນາຕິ ວິຎ຺ຎາຍຕິ.

໑໕໗. ອຸພ຺ຠຊິຕ຺ວາ ຈ ສຫສາ ຈ ໂນ ປວິເສຍ຺ຍາຕິ ສມ຺ພນ຺ໂຘ. ອຸພ຺ຠຊິຕ຺ວາຕິ ຈີວຣໍ ທູຣໂຕວ ອຸກ຺ຂິປິຕ຺ວາ. ສຫສາຕິ ສີຆໍ. ອຸກ຺ກາສິຕ຺ວາ ປວິເສຍ຺ຍາຕິ ໂຍຊນາ.

໑໕໘. ວຈ຺ຈປສ຺ສາວໂທຓີນໍ ພຫີຕິ ສມ຺ພນ຺ໂຘ. ອຸຠຍນ຺ຕິ ວຈ຺ຈມ຺ປິ ປສ຺ສາວມ຺ປິ.

໑໕໙. ກູເປຕິ ວຈ຺ຈາວາເຏ. ກຏ຺ຐນ຺ຕິ ອວເລຂນກຏ຺ຐໍ. ຜຣຸເສນາຕິ ຂເຣນ ອວເລຂນກຏ຺ເຐນ. ອຸຫຕຎ຺ຈາປີຕິ ອຕ຺ຕນາ ວາ ປເຣນ ວາ ອຸຫຕຎ຺ຈາປິ ວຈ຺ຈມກ຺ຂິຕຎ຺ຈາປີຕິ ອຕ຺ໂຖ. ໂຘວເຍຕິ ສຕິ ອຸທເກ, ອຸທເກ ອສຕິ ກຏ຺ເຐນປິ ໂສເຘຍ຺ຍ.

໑໖໐. ນ ນິກ຺ຂເມຕິ ນ ນິກ຺ຂເມຍ຺ຍ. ຈປຸ ຈປູຕິ ອນຸກຣຓໍ, ວິຈ຺ຉາຍໍ ທ຺ວິຕ຺ເຕ ຈປຸ ຈປຸ ກຕ຺ວາຕິ ກິຣິຍາວິເສສນໍ. ນາຈເມຍ຺ຍາຕິ ນ ໂຘເວຍ຺ຍ. ສຕິ ປນ ອຸທເກ ອາຈມິຕພ຺ພໍ, ອສຕິ ເຍນ ເກນຈິ ປຸຎ຺ຉິຕ຺ວາ ຄນ຺ຕພ຺ພໍ, ສພ຺ພສາຘາຣຓຏ຺ຐາເນ ຈ ອາຈມນກຸມ຺ຠິຍາ ອຸທກໍ ນ ເສເສຕພ຺ພໍ. ອຸກ຺ລາປນ຺ຕິ ກຈວຣໍ. ວິໂສຘເຍຕິ ວິຫາຣໂສຘເນ ວິຍ ວຈ຺ຈປສ຺ສາວກຸຏິໂຍ, ປຣິເວຓໂກຏ຺ຐເກ ຈ ສມ຺ມຊ຺ເຊຍ຺ຍ. ສພ຺ພຕ຺ເຖວ ຈ ປນ ວຕ຺ຕເຠເທ ທຸກ຺ກຏໍ.

ວຈ຺ຈປສ຺ສາວຏ຺ຐານິກນິທ຺ເທສວຓ຺ຓນາ ນິຏ຺ຐິຕາ.