໑໗. ອາປຸຈ຺ຉກຣຓນິທ຺ເທສວຓ຺ຓນາ

໑໖໑. ອາປຸຈ຺ຉກຣຓນ຺ຕິ ອາປຸຈ຺ຉາຍ ກຣຓໍ. ອນຊ຺ຌິຏ຺ໂຐວາຕິ ອນາຓຕ຺ໂຕວ, ອຍາຈິໂຕ ເອວ ວາ. ນ ຈ ວິສ຺ສເຊຕິ ປຸຈ຺ຉິຕປຎ຺ຫໍ ນ ວິສ຺ສຊ຺ເຊຍ຺ຍ ຈ, ອາປຸຈ຺ຉິຕ຺ວາ ວາ ຍາຈິໂຕ ວາ ຍຖາວຸຕ຺ຕເມຕໍ ກາຕຸໍ ລຠຕີຕິ ອຘິປ຺ປາໂຍ.

໑໖໒. ອາປຸຈ຺ຉິຕ຺ວາ ກເຖນ຺ຕສ຺ສາຕິ ອຕ຺ຕໂນ ວຸຑ຺ຒໍ ອາປຸຈ຺ຉິຕ຺ວາ ຘມ຺ມາທິກໍ ຠາສນ຺ຕສ຺ສ. ປຸນ ວຸຑ຺ຒຕຣາຄເມຕິ ປຸນ ອຎ຺ຎສ຺ສ ວຸຑ຺ຒຕຣສ຺ສ ອາຄມເນ ສຕີຕິ ອຕ຺ໂຖ. ປຸນອາປຸຈ຺ຉນໍ ນຕ຺ຖີຕິ ຠາສິຕພ຺ພໍ ຐເປຕ຺ວາ ປຸນ ອາປຸຈ຺ຉນກິຈ຺ຈໍ ນຕ຺ຖີຕິ ອຕ຺ໂຖ. ສງ຺ຆຕ຺ເຖເຣ ອສຕິ ອາຣທ຺ຘມ຺ປິ ອຏ຺ຐເປຕ຺ວາ ກເຖນ຺ຕສ຺ສາປິ ເອເສວ ນໂຍ. ຠຕ຺ຕຄ຺ເຄ ອນຸໂມທໂຕ ຈ ອາປຸຈ຺ຉນໍ ນຕ຺ຖີຕິ ສມ຺ພນ຺ໂຘ. ອນຸໂມທໂຕຕິ ທາຍເກຫິ ຍາຈິຕສ຺ສ ຕໍຕໍປຸຎ຺ຎານຸໂມທນວເສນ ຘມ຺ມກຖໍ ກໂຣໂຕ ຈ. ອນຸໂມທນຎ຺ຈ ເຖຣາເຘຍ຺ຍໍ. ‘‘ອນຸຊານາມິ, ຠິກ຺ຂເວ ເຖເຣນ ຠິກ຺ຂຸນາ ຠຕ຺ຕຄ຺ເຄ ອນຸໂມທິຕຸ’’ນ຺ຕິ (ຈູຬວ. ໓໖໒) ຫິ ວຸຕ຺ຕໍ. ‘‘ສເຈ ມນຸສ຺ສາ ອຕ຺ຕໂນ ອຠິຣຸຈິເກນ ເອເກນ ອນຸໂມທນໍ ກາເຣນ຺ຕິ, ເນວ ຕສ຺ສ ອນຸໂມທໂຕ ອາປຕ຺ຕິ, ນ ມຫາເຖຣສ຺ສ ຠາໂຣ ໂຫຕິ. ອຸປນິສິນ຺ນກຖາຍເມວ ຫິ ມນຸສ຺ເສສຸ ກຖາເປນ຺ເຕສຸ ມຫາເຖໂຣ ອາປຸຈ຺ຉິຕພ຺ໂພ’’ຕິ ອຏ຺ຐກຖາຍໍ (ຈຸຬວ. ອຏ຺ຐ. ໓໖໒) ວຸຕ຺ຕໍ.

໑໖໓. ວຸຑ຺ເຒນ ເອກວິຫາຣເກ ວສນ຺ໂຕ ຈາຕິ ສມ຺ພນ຺ໂຘ. ວຸຑ຺ເຒນາຕິ ວຸຑ຺ເຒນ ສທ຺ຘິໍ. ເອກວິຫາຣເກຕິ ສວນູປຈາເຣ ຂຸທ຺ທກວິຫາເຣ, ນ ມຫາວິຫາເຣ. ກຸຈ຺ຉິຕຕ຺ເຖ ຫິ ກປ຺ປຈ຺ຈໂຍ. ນ ສຊ຺ຌາເຍຍ຺ຍາຕິ ສຊ຺ຌາຍນໍ ນ ກເຣຍ຺ຍ.

໑໖໔. ‘‘ຘມ຺ມໍ ນ ຠາສເຍ’’ຕິອາທີສຸ ອນາປຸຈ຺ຉາຕິ ສມ຺ພນ຺ຘິຕພ຺ພໍ. ນ ຈ ວິຊ຺ຌເປຕິ ນ ຈ ນິພ຺ພາເຍຍ຺ຍ. ວາຕປານຎ຺ຈ ອາໂລກສນ຺ຘິຜລກໍ ກວາຏຎ຺ຈ ທ຺ວາຣຜລກໍ ວາຕປານກວາຏໍ ວາ ນ ວິວເຣຍ຺ຍ ນ ຖເກຍ຺ຍ ຈາຕິ ນ-ກາໂຣ ສພ຺ພຕ຺ຖ ໂຍເຊຕພ຺ໂພ.

໑໖໕. ເອກຈງ຺ກເມ ວຸຑ຺ເຒນ ຈງ຺ກມນ຺ໂຕປິ ເຍນ ວຸຑ຺ໂຒ, ເຕນ ປຣິວຕ຺ຕເຍຕິ ໂຍຊນາ. ເຍນ ເຕນາຕິ ຠຸມ຺ມຕ຺ເຖ ກຣຓວຈນໍ, ຍຕ຺ຖ ວຸຑ຺ໂຒ, ຕຕ຺ຖາຕິ ອຕ຺ໂຖ, ວຸຑ຺ຒໍ ໂອຫາຍ ອຎ຺ຎໂຕ ນ ຄນ຺ຕພ຺ພນ຺ຕິ ອຘິປ຺ປາໂຍ. ໂສຕິ ນວໂກ. ເອນນ຺ຕິ ວຸຑ຺ຒໍ. ສພ຺ພຕ຺ຖ ທຸກ຺ກຏໍ. ອຍຎ຺ຫິ ຂນ຺ຘກຘມ຺ມຕາ ຍຕ຺ຖ ນ-ກາເຣນ ປຏິເສໂຘ, ຕຕ຺ຖ ທຸກ຺ກຏນ຺ຕິ.

ອາປຸຈ຺ຉກຣຓນິທ຺ເທສວຓ຺ຓນາ ນິຏ຺ຐິຕາ.