໑໕. ອຸປຊ຺ຌາຈຣິຍວຕ຺ຕນິທ຺ເທສວຓ຺ຓນາ

໑໔໕. ‘‘ອິທໍ ຕຍາ ທຸກ຺ກຕໍ, ທຸພ຺ຠາສິຕ’’ນ຺ຕິອາທີນິ ວຕ຺ວາ ໂຈທນໂຕ, ອຕ຺ຕໂນ ວຊ຺ຊໍ ອສ຺ສຣນ຺ຕສ຺ສ ສຕຸປ຺ປາທວເສນ ສາຣຓໂຕ, ສມ຺ມາ ປຏິປຕ຺ຕິຍໍ ສາຣຓໂຕ ປວຕ຺ຕາປນໂຕ ວາ ວຊ຺ຊາວຊ຺ຊໍ ອຸປນິຊ຺ຌາຍຕິ ຠຸສໍ ຈິນ຺ເຕຕີຕິ ອຸປຊ຺ຌາ. ອຸປຊ຺ຌາ ເອວ ອຸປຊ຺ຌາໂຍ. ‘‘ເອວໍ ຕຍາ ພຸທ຺ຘວຈນໍ ສຊ຺ຌາຍິຕພ຺ພໍ, ເອວໍ ອຕິກ຺ກມິຕພ຺ພໍ, ເອວໍ ປຏິກ຺ກມິຕພ຺ພ’’ນ຺ຕິອາທິນາ ອາຈາຣສິກ຺ຂາປເນ ອາຈຣຕິ ປວຕ຺ຕຕີຕິ ອາຈຣິໂຍ. ໂສ ຈ ນິສ຺ສຍປພ຺ພຊ຺ຊາອຸປສມ຺ປທາຘມ຺ມາຈຣິຍວເສນ ຈຕຸພ຺ພິໂຘ. ອຸປຊ຺ຌາ ຈ ອາຈຣິໂຍ ຈ ອຸປຊ຺ຌາຈຣິຍາ, ເຕ. ນິສ຺ສາຍ ວສມາໂນຕິ ອິມິນາ ນິສ຺ສຍປພ຺ພຊ຺ຊາອຸປສມ຺ປທາຘມ຺ມນ຺ເຕວາສິເກສຸ ໂຍ ນິສ຺ສາຍ ວສຕິ, ຕໍ ທສ຺ເສຕິ. ຈຕູສຸ ຫິ ເຕສຸ ນິສ຺ສຍນ຺ເຕວາສິເກນ ຍາວ ອາຈຣິຍໍ ນິສ຺ສາຍ ວສຕິ, ຕາວສພ຺ພໍ ອາຈຣິຍວຕ຺ຕໍ ກາຕພ຺ພໍ, ເນຕເຣຫິ. ອິຕເຣຫິ, ນິສ຺ສຍມຸຕ຺ຕເກຫິປິ ຍາວ ຈີວຣຣຊນໍ, ຕາວ ຈ ອຣຕິວິໂນທນາທິກຎ຺ຈ ວຕ຺ຕໍ ກາຕພ຺ພໍ. ອນາປຸຈ຺ຉິຕ຺ວາ ປຕ຺ຕຈີວຣທານາທິມ຺ຫິ ປນ ເອເຕສໍ ອນາປຕ຺ຕິ. ສທ຺ຘິວິຫາຣິກສ຺ສ ປນ ອຸປຊ຺ຌາຍານໍ ຍາວ ຈີວຣຣຊນໍ, ຕາວ ຈ ອຣຕິວິໂນທນາທິກຎ຺ຈ ອກໂຣນ຺ຕສ຺ສ ນິສ຺ສຍມຸຕ຺ຕກສ຺ສາປິ ອມຸຕ຺ຕກສ຺ສາປິ ອາປຕ຺ຕິເຍວ. ເອກຈ຺ຈສ຺ສ ປຕ຺ຕທານາທິໂຕ ປຏ຺ຐາຍ ອມຸຕ຺ຕນິສ຺ສຍສ຺ເສວ ອາປຕ຺ຕິ. ເຕສຸ ມຊ຺ເຌ ທ຺ເວ ອາຈຣິຍສ຺ສ ຍາວຊີວໍ ຠາຣາ. ອິຕເຣ ປນ ຍາວ ສມີເປ ວສນ຺ຕິ, ຕາວເທວ, ຕສ຺ມາ ອາຈຣິເຍນາປິ ເຕສຸ ສມ຺ມາ ວຕ຺ຕິຕພ຺ພໍ, ອຸປຊ຺ຌາເຍນ ສທ຺ຘິວິຫາຣິເກສຸ ວຕ຺ຕພ຺ພເມວ ນຕ຺ຖິ. ສຸເປສໂລຕິ ປິຍໍ ສີລມສ຺ສາຕິ ເປສໂລ, ວຸທ຺ຘິ, ຍ-ໂລເປນ ອີ-ກາຣສ຺ສ ອຕ຺ຕກຣເຓນ, ສຸຏ຺ຐຸ ເປສໂລ ສຸເປສໂລ, ສິກ຺ຂາກາໂມຕິ ອຕ຺ໂຖ. ‘‘ທນ຺ຕກຏ຺ຐ’’ນ຺ຕິອາທິ ‘‘ທເທ’’ຕິມສ຺ສ ກມ຺ມໍ. ທເທຕິ ສມ຺ມາ ອາທເຣນ ຍຖາຘິປ຺ປາຍໍ ທເທຍ຺ຍາຕິ ອຕ຺ໂຖ. ກາເລຕິ ຕທນຸຣູເປ ກາເລ.

໑໔໖. ປຕ຺ເຕ ຈ…ເປ… ຈີວເຣ ຈ ວຕ຺ຕໍ ຈເຣຕິ ສມ຺ພນ຺ໂຘ. ຈເຣຕິ ກເຣຍ຺ຍ. ຕຕ຺ຖ ນີຈໍ ກຕ຺ວາ ສາຘຸກໍ ອປຣິຆໍສນ຺ເຕນ ໂຘວນໍ, ມຸຫຸຕ຺ຕໍ ອຸຓ຺ເຫ ໂອຕາປນໍ, ຐປນຏ຺ຐານໍ ອຸປປຣິກ຺ຂິຕ຺ວາ ຈມ຺ມາທິນາ ເກນຈິ ອນ຺ຕຣຫິຕາຍ ນິກ຺ຂິປນໍ ປຕ຺ເຕ ວຕ຺ຕໍ. ຄາມໍ ປວິສນ຺ຕານໍ ນິວາສນກາຍພນ຺ຘນສງ຺ຆາຏິທານໍ, ໂຘວິຕ຺ວາ ໂສທກປຕ຺ຕສ຺ສ ທານໍ ຄາມປ຺ປເວເສ ວຕ຺ຕໍ. ຍທິ ອາກງ຺ຂນ຺ຕິ, ປຣິມຓ຺ຑລໍ ນິວາເສຕ຺ວາ ຈ ປາຣຸປິຕ຺ວາ ຈ ນາຕິທູຣນຈ຺ຈາສນ຺ເນ ຄມນໍ, ປຕ຺ຕປຣິຍາປນ຺ນຄ຺ຄຫຓຎ຺ຈ ຄມເນ ວຕ຺ຕໍ. ນິວຕ຺ເຕນ຺ເຕ ປນ ປຐມຕຣໍ ອາຄນ຺ຕ຺ວາ ອາສນປຎ຺ຎາປນໍ, ປາໂທທກາທິອຸປນິກ຺ຂິປນໍ, ປຕ຺ຕຈີວຣປ຺ປຏິຄ຺ຄຫຓໍ ອາຄເມ ອາຄມເນ ວຕ຺ຕໍ. ຠຓນ຺ຕານໍ ອນ຺ຕຣາ ກຖາອໂນປາຕນໍ ສພ຺ພຕ຺ຖ ວຕ຺ຕໍ. ອາສນປຎ຺ຎາປນໍ, ອຸຏ຺ຐິເຕສຸ ອາສນອຸທ຺ຘຣຓໍ, ປາທປີຐກຖລານໍ ອຸປນິກ຺ຂິປນໍ, ປຏິສາມນຎ຺ຈ ອາສເນ ປາທປີເຐ ປາທກຖເລ ຈ ວຕ຺ຕໍ. ໂຘຕປາທຏ຺ຐປນກໍ ປາທປີຐໍ. ອຎ຺ຎໍ ກຖລໍ. ອຸປາຫນາ ຈ ຈີວຣຎ຺ຈາຕິ ທ຺ວນ຺ໂທ, ຕສ຺ມິໍ. ສຸກ຺ຂອລ຺ລໂຈເຬຫິ ປຸຎ຺ຉນໍ ອຸປາຫນາຍ ວຕ຺ຕໍ. ສິນ຺ນຈີວຣສ຺ສ ມຸຫຸຕ຺ຕໍ ໂອຕາປນໍ, ຈຕຸຣງ຺ຄຸລໍ ກຓ຺ຓໍ ອຸສ຺ສາເຣຕ຺ວາ ຈີວຣສໍຫຣຓຎ຺ຈ ຈີວເຣ ວຕ຺ຕໍ.

໑໔໗. ປຣິໂຠຊນີຍ…ເປ… ປສ຺ສາວຏ຺ຐານິສຸ ຈ ວິຫາຣໂສຘເນ ຈ ປຸນ ປຎ຺ຎາປເນ ຈ ວຕ຺ຕໍ ຕຖາຕິ ສມ຺ພນ຺ໂຘ. ວຈ຺ຈຎ຺ຈ ປສ຺ສາໂວ ຈ ວຈ຺ຈປສ຺ສາວາ. ຕິຏ຺ຐຕິ ເອຕ຺ຖາຕິ ຐານີ, ກຸຏິ. ວຈ຺ຈປສ຺ສາວານໍ ຐານີຕິ ຕປ຺ປຸຣິໂສ. ອຖ ວາ ຕິຏ຺ຐຕິ ເອຕ຺ຖາຕິ ຐານໍ, ໂສເຍວ ສມາໂສ, ວຈ຺ຈປສ຺ສາວສ຺ສ ຈ ປຕນຏ຺ຐານໍ, ຕໍ ອສ຺ສ ອຕ຺ຖີຕິ ອິຏ຺ຐເຄຫາທິ. ປຣິໂຠຊນີຍຎ຺ຈ ປານີຍຎ຺ຈ ວຈ຺ຈປສ຺ສາວຏ຺ຐານີ ຈ ປຣິ…ເປ… ຏ຺ຐານີ. ຕາສຸ ເຕສຸ ວາ. ປາໂທທກອຸຓ຺ຫສີຕນຫາໂນທກປ຺ປຏິຍາທາປນໍ ປຣິໂຠຊນີເຍ ວຕ຺ຕໍ. ປາຕພ຺ພປານີເຍນ ປຸຈ຺ຉນໍ ອຸປຏ຺ຐາປນຎ຺ຈ ປານີເຍ ວຕ຺ຕໍ. ສມ຺ມຊ຺ຊນປານີຍອຸປຏ຺ຐາປນໍ ວຈ຺ຈປສ຺ສາວຏ຺ຐານີສຸ ວຕ຺ຕໍ. ປຐມໍ ປຕ຺ຕຈີວຣາທີນິ ຫຣາເປຕ຺ວາ ເອກມນ຺ເຕ ນິກ຺ຂິປນາທິ, ອຸລ຺ໂລກໂຕ ປຏ຺ຐາຍ ມກ຺ກຏສນ຺ຕານໍ ໂອຫາເຣຕ຺ວາ ສມ຺ມຊ຺ຊນຎ຺ຈ ວິຫາຣໂສຘເນ ວຕ຺ຕໍ. ໂອຕາເປຕ຺ວາ ໂສເຘຕ຺ວາ ປປ຺ໂຜເຏຕ຺ວາ ອຕິຫຣິຕ຺ວາ ຍຖາຐາເນ ຠູມຕ຺ຖຣຓາທິປຎ຺ຎາປນໍ ປຸນ ປຎ຺ຎາປເນ ວຕ຺ຕໍ. ຕຖາຕິ ອິມິນາ ‘‘ຈເຣ’’ຕິ ອິທໍ ອຕິທິສຕິ.

໑໔໘. ວິຫາຣໍ ໂສເຘນ຺ໂຕ ຠິກ຺ຂຸ ປຏິວາເຕ ວາ ສງ຺ຄເຓ ວາ ປານີຍສາມນ຺ຕາ ວາ ສຍນາສນໍ ນ ປປ຺ໂຜເຏຍ຺ຍາຕິ ສມ຺ພນ຺ໂຘ. ປານີຍ-ສທ຺ເທນ ປຣິໂຠຊນີຍຎ຺ຈ ສງ຺ຄຫິຕໍ. ປຏິວາເຕຕິ ອຸປຣິວາເຕ. ສງ຺ຄເຓຕິ ພຫູນໍ ສໂມສຣເຓ ວິວຏປ຺ປເທເສ. ສຍນາສນໍ ນາມ ຠູມຕ຺ຖຣຓມຎ຺ຈາທິ.

໑໔໙. ນ຺ຫາເນ ວຕ຺ຕໍ ຈເຣ, ນ຺ຫາຕສ຺ສ ກາຕພ຺ເພ ຈເຣຕິ ສມ຺ພນ຺ຘສ຺ສ ປຸຣິສາຘີນຕາຍ ສມ຺ພນ຺ໂຘ ເວທິຕພ຺ໂພ. ຈີວຣປ຺ປຏິຄ຺ຄຫຓຄຕ຺ຕປຣິກມ຺ມກຣຓໍ ນຫາເນ ວຕ຺ຕໍ. ກາຕພ຺ເພ ຈເຣຕິ ຄຕ຺ຕໂຕ ອຸທກສມ຺ມຊ຺ຊນນິວາສນທານາທິກິຈ຺ເຈ ປວຕ຺ເຕຍ຺ຍາຕິ ອຕ຺ໂຖ. ‘‘ວນປ຺ປຄຸມ຺ເພ’’ຕິອາທີສຸ ວິຍ ສິສ຺ສ ເອ-ກາຣາເທສໍ ຣູປໍ, ຕສ຺ມາ ກາຕພ຺ພໍ ວຕ຺ຕໍ ຈເຣຍ຺ຍາຕິ ໂຍເຊຕ຺ວາ ເວທິຕພ຺ພໍ. ພຸຘາ ປນ ‘‘ນ຺ຫາເນ ນ຺ຫາຕສ຺ສ ກາຕພ຺ເພ ວຕ຺ຕໍ ຈເຣ’’ຕິ ໂຍເຊຕ຺ວາ ອຕ຺ຖໍ ວທນ຺ຕິ. ເອວໍ ສຕິ ກາຕພ຺ພ-ສທ຺ທສ຺ສ ກມ຺ມສາຘນຕ຺ຕາ ວຕ຺ຕເມວ ກາຕພ຺ພໍ ນາມາຕິ ‘‘ວຕ຺ເຕ ວຕ຺ຕໍ ຈເຣ’’ຕິ ວຸຕ຺ຕໍ ວິຍ ໂຫຕີຕິ ວິຣຸຊ຺ຌຕິ. ‘‘ນຫາເຕນ ນຫາຕສ຺ສາ’’ຕິ ວາ ປາໂຐ, ອຸທເກ ຄຕ຺ຕປຣິກມ຺ເມນ ເຖຣໍ ປຐມໍ ນຫາເປຕ຺ວາ ສຍມ຺ປິ ນຫາເຕນາຕິ ອຕ຺ໂຖ. ປາຬິຍມ຺ປິ ‘‘ນຫາເຕນ ປຐມຕຣໍ ອຸຕ຺ຕຣິຕ຺ວາ’’ຕິ (ມຫາວ. ໖໗) ອຕ຺ຖິ. ອຖ ຣງ຺ຄປາເກ ໂຘວເນ ສິພ຺ພເນ ຈ ວຕ຺ຕໍ ຈເຣຕິ ສມ຺ພນ຺ໂຘ, ຣຊນປາເກ ຈີວຣໂຘວເນ ຈີວຣສິພ຺ພເນ ຈາຕິ ອຕ຺ໂຖ. ຣຊນ຺ໂຕ ຈີວເຣ ເຖເວ ຐິເຕ ນ ວເຊຕິ ສມ຺ພນ຺ໂຘ. ຣຊນ຺ໂຕຕິ ຈີວຣໍ ຣຊນ຺ໂຕ. ເຖເວຕິ ຣຊນພິນ຺ທຸມ຺ຫິ.

໑໕໐. ເອກຈ຺ຈສ຺ສາຕິ ອາຈຣິຍຸປຊ຺ຌາຍານໍ ເວຣິໂນ ປຸຄ຺ຄລສ຺ສ ປຕ຺ຕໍ ວາ ຈີວຣານິ ວາ ກິຎ຺ຈນໍ ປຣິກ຺ຂາຣໍ ວາ ນ ທເທຍ຺ຍ ນ ຄຓ຺ເຫຍ຺ຍ ວາຕິ ສມ຺ພນ຺ໂຘ. ຕຕ຺ຖ ນ ທເທຍ຺ຍ ນ ຄຓ຺ເຫຍ຺ຍາຕິ ປຏິສາມນຕ຺ຖາຍປິ ນ ທເທຍ຺ຍ, ນ ຄຓ຺ເຫຍ຺ຍ ວາຕິ ອຕ຺ໂຖ. ‘‘ອາກິຎ຺ຈນ’’ນ຺ຕິອາທີສຸ ວິຍ ກິຎ຺ຈນ-ສທ຺ໂທ ທຏ຺ຐພ຺ໂພ, ຕສ຺ສ ກິຎ຺ຈີຕິ ອຕ຺ໂຖ. ກິຎ຺ຈິນນ຺ຕິ ວາ ປາໂຐ, ກິຎ຺ຈິ ນໍ ປຣິກ຺ຂາຣນ຺ຕິ ໂຍຊນາ. ປທສິທ຺ຘິວເສເນຕ຺ຖ ນນ຺ຕິ ຕ-ສທ຺ທປ຺ປໂຍໂຄ ກໂຕ.

໑໕໑-໒. ປຈ຺ຉໂຕ ກາຕຸນ຺ຕິ ປຈ຺ຉາສມຓໍ ກາຕຸໍ. ຕສ຺ສາຕິ ເອກຈ຺ຈສ຺ສ. ປຈ຺ຉໂຕຕິ ປຈ຺ຉາສມໂຓ ຫຸຕ຺ວາ. ນິນ຺ເນຕຸນ຺ຕິ ເອກຈ຺ຈສ຺ສ ນີຫຣິຕຸໍ. ສພ຺ພຕ຺ຖ ອນາປຸຈ຺ຉາ ນ ວຏ຺ຏຕີຕິ ໂຍເຊຕພ຺ພໍ. ກິຈ຺ຈຍໍ ວາຕິ ເວຍ຺ຍາວຈ຺ຈາທິ ຍໍ ກິຎ຺ຈິ ກິຈ຺ຈໍ ວາ. ກິຈ຺ຈເມວ ກິຈ຺ຈຍໍ, ກສ຺ສ ໂຍ ‘‘ເສນິໂຍ’’ຕິອາທີສຸ ວິຍ. ປຣິກມ຺ມໍ ວາຕິ ປິຏ຺ຐິປຣິກມ຺ມາທິປຣິກມ຺ມໍ. ອຕ຺ຕໂນ ກາຣາເປຕຸໍ ວາຕິ ເອກຈ຺ເຈນ ອຕ຺ຕໂນ ກາຣາເປຕຸໍ ວາ. ກາຕຸໍ ວາຕິ ຕສ຺ສ ອຕ຺ຕນາ ກາຕຸໍ ວາ.

໑໕໓. ສີມໂຕ ນິຄ຺ຄຕາ ພຫິຠູຕາ ນິສ຺ສີມາ, ຕໍ. ອາຈຣິຍຸປຊ຺ຌາເຍສຸ ອວຕ຺ວາ ທູຣໍ ຠິກ຺ຂາຈາຣໍ ຄເຕສຸປິ ອປສ຺ສນ຺ເຕນ ຄາໂມ ປວິສິຕພ຺ໂພ. ທິຏ຺ຐຏ຺ຐານໂຕ ປຏ຺ຐາຍ ປນ ອາປຸຈ຺ຉິຕຸໍເຍວ ວຏ຺ຏຕິ. ອຕ຺ຕໂນ ກິຈ຺ຈຍໍ ວາປີຕິ ອຕ຺ຕໂນ ສີມາຍປິ ປຕ຺ຕປຈນຈີວຣຣຊນາທິກໍ ສກໍ ກຣຓີຍໍ ວາປິ ກາຕຸໍ.

໑໕໔. ອຣຕິນ຺ຕິ ສາສເນ ອນຠິຣຕິໍ. ສງ຺ຆາຍຕ຺ເຕສຸ ກມ຺ເມສູຕິ ປຣິວາສາທິຕຊ຺ຊນີຍາທີສຸ ສງ຺ຆປ຺ປຏິພທ຺ເຘສຸ ກມ຺ເມສຸ. ອຸສ຺ສຸກ຺ກໍ ວາປີຕິ ອາຈຣິຍຸປຊ຺ຌາເຍສຸ ຄຣຸຘມ຺ມໍ ອຊ຺ຌາປນ຺ເນສຸ, ກມ຺ມາຣເຫສຸ ຈ ‘‘ກິນ຺ຕິ ນຸ ໂຂ ສງ຺ໂຆ ປຣິວາສໍ ທເທຍ຺ຍາ’’ຕິອາທິນາ ອຸສ຺ສາຫໍ ວາປິ.

໑໕໕. ຄິລາເນສຸ ອຸປຏ຺ເຐຍ຺ຍາຕິ ‘‘ປຎ຺ຈຫິ, ຠິກ຺ຂເວ, ອງ຺ເຄຫິ ສມນ຺ນາຄໂຕ ຄິລານຸປຏ຺ຐາໂກ ອລໍ ຄິລານໍ ອຸປຏ຺ຐາຕຸໍ, ປຏິພໂລ ໂຫຕິ ເຠສຊ຺ຊໍ ສໍວິຘາຕຸໍ, ສປ຺ປາຍາສປ຺ປາຍໍ ຊານາຕິ, ອສປ຺ປາຍໍ ອປນາເມຕິ, ສປ຺ປາຍໍ ອຸປນາເມຕິ, ເມຕ຺ຕຈິຕ຺ໂຕ ຄິລານໍ ອຸປຏ຺ຐາຕິ ໂນ ອາມິສນ຺ຕໂຣ, ອເຊຄຸຈ຺ຉີ ໂຫຕິ ອຸຈ຺ຈາຣໍ ວາ ປສ຺ສາວໍ ວາ ເຂຬໍ ວາ ວນ຺ຕໍ ວາ ນີຫາຕຸໍ, ປຏິພໂລ ໂຫຕິ ຄິລານໍ ກາເລນ ກາລໍ ຘມ຺ມິຍາ ກຖາຍ ສນ຺ທສ຺ເສຕຸໍ ສມາທເປຕຸໍ ສມຸຕ຺ເຕເຊຕຸໍ ສມ຺ປຫໍເສຕຸ’’ນ຺ຕິ (ມຫາວ. ໓໖໖) ເອວໍ ວຸຕ຺ຕປຎ຺ຈງ຺ຄສມນ຺ນາຄເຕນ ຫຸຕ຺ວາ ຄິລາເນສຸ ອຸປຏ຺ຐເຫຍ຺ຍາຕິ ອຕ຺ໂຖ. ອິມິນາ ສພ຺ເພຫິປິ ອາຈຣິຕພ຺ພໍ ຄິລານວຕ຺ຕໍ ອຸປທິສຕິ. ວຸຏ຺ຐານນ຺ຕິ ເຄລຎ຺ຎາ ວຸຏ຺ຐິຕໍ. ອາຄເມຕິ ອາຄເມຍ຺ຍ, ໂອໂລເກຍ຺ຍາຕິ ອຕ຺ໂຖ. ອຸປຊ຺ຌາຈຣິເຍຫິ ຈ ສທ຺ຘິວິຫາຣິກອນ຺ເຕວາສິເກສຸ ຍທິ ເຕ ຄິລານາ ໂຫນ຺ຕິ, ອາທິໂຕ ປຏ຺ຐາຍ ຈີວເຣ ຣຊນປຣິໂຍສານຎ຺ຈ ອຣຕິວິໂນທນາທິກຎ຺ຈ ວຕ຺ຕໍ, ອຄິລາເນສຸ ປນ ອຸທ຺ເທສປຣິປຸຈ຺ຉາ ໂອວາທານຸສາສນິຍາ ອນຸຄ຺ຄໂຫປຕ຺ຕຈີວຣາທິທານຎ຺ຈາຕິ ສພ຺ພໍ ກາຕພ຺ພໍ. ເຕເນວ ເຫຏ຺ຐາ ວຸຕ຺ຕໍ ‘‘ຕສ຺ມາ ອາຈຣິເຍນາປິ ເຕສຸ ສມ຺ມາ ວຕ຺ຕິຕພ຺ພໍ, ອຸປຊ຺ຌາເຍນ ສທ຺ຘິວິຫາຣິເກສຸ ວຕ຺ຕພ຺ພເມວ ນຕ຺ຖີ’’ຕິ.

ອຸປຊ຺ຌາຈຣິຍວຕ຺ຕນິທ຺ເທສວຓ຺ຓນາ ນິຏ຺ຐິຕາ.