໑໔. ຠູມິນິທ຺ເທສວຓ຺ຓນາ

໑໓໖. ຍາສຸ ວຸຕ຺ຖໍ ປກ຺ກຎ຺ຈ ກປ຺ປຕິ, ຕາ ກປ຺ປິຍາ ຠູມິໂຍ ສມ຺ມຸຕິ ຈ ສມ຺ມຸຕິກຸຏິ ຈ…ເປ… ຄຫປຕິ ຈ ຄຫປຕິກຸຏິ ຈາຕິ ອິມາ ຈຕສ຺ໂສ ໂຫນ຺ຕີຕິ ໂຍເຊຕ຺ວາ ອຕ຺ໂຖ ເວທິຕພ຺ໂພ. ຕຕ຺ຖ ເຠສຊ຺ຊກ຺ຂນ຺ຘເກ (ມຫາວ. ໒໙໕) ວຸຕ຺ຕາຍ ອຸຕ຺ຕິທຸຕິຍກມ຺ມວາຈາຍ, ອປໂລກນກມ຺ມວເສນ ວາ ສາເວຕ຺ວາ ສມ຺ມາ ອຸຕ຺ຕິສມ຺ປນ຺ນໍ ກຣີຍຕີຕິ ສມ຺ມຸຕິ, ຖມ຺ຠານໍ ຠິຕ຺ຕິປາທານໍ ວາ ອຸຄ຺ຄມນໍ ອຸທ຺ຘໍ ກຕ຺ວາ ຐປນໍ, ‘‘ກປ຺ປິຍກຸຏິໍ ກໂຣມາ’’ຕິ ວາຈາຍ ສາວນຎ຺ຈ ອນ຺ຕໍ ຍສ຺ສາ ສາ ອຸສ຺ສາວນນ຺ຕາ. ຕຖາ ຈ ວຸຕ຺ຕໍ ‘‘ຖມ຺ຠປ຺ປຕິຏ຺ຐານຎ຺ຈ ວຈນປຣິໂຍສານຎ຺ຈ ສມກາລໍ ວຏ຺ຏຕີ’’ຕິ (ມຫາວ. ອຏ຺ຐ. ໒໙໕). ນິສາທນໍ ປວິສນໍ ສນ຺ນິເວສນໍ ນິສາໂທ, ຄຸນ຺ນໍ ວິຍ ນິສາໂທ ເອຕິສ຺ສາຕິ ໂຄນິສາທິ. ຠິກ຺ຂຸໍ ຐເປຕ຺ວາ ເສສສຫຘມ຺ມິກາ ສພ຺ເພ ຈ ເທວມນຸສ຺ສາ ອິຘ ຄຫປຕີຕິ ສາມຎ຺ເຎນ ອຘິປ຺ເປຕາ. ເອຕ຺ຖ ປນ ຄຫປຕິສມ຺ພນ຺ຘິນີ ກຸຏິ ທີເຆນ ຄຫປຕີ.

‘‘ຍໍ ປນ ອກປ຺ປິຍຠູມິຍໍ ສຫເສຍ຺ຍປ຺ປໂຫນເກ ເຄເຫ ວຸຕ຺ຖ’’ນ຺ຕິ (ມຫາວ. ອຏ຺ຐ. ໒໙໕) ອຏ຺ຐກຖາວຈນໂຕ ຍໍ ສງ຺ໂຆ ອາກງ຺ຂຕິ ວິຫາຣໍ ວາ ອຑ຺ຒໂຍຄໍ ວາ ປາສາທໍ ວາ ຫມ຺ມິຍໍ ວາ ຄຸຫໍ ວາ ເລຓາທິໍ ວາ, ເຕສມ຺ປິ ສາມຎ຺ຎວຈນໍ ວິຎ຺ຎາຍຕີຕິ ຕໍຕໍລກ຺ຂຓປ຺ປຕ຺ຕາ ສຫເສຍ຺ຍປ຺ປໂຫນກາ ເລຓາທໂຍ ຈຕູສ຺ເວວ ກຸຏີສຸ ອນ຺ໂຕຄຘາຕິ ເວທິຕພ຺ພໍ. ອິມາສຸ ຈຕູສຸ ສຫເສຍ຺ຍປ຺ປໂຫນເກ ປເທເສ ຍໍ ສງ຺ຆິກໍ ປຸຄ຺ຄລິກໍ ວາ ຠິກ຺ຂຸສນ຺ຕກໍ ເອກຣຕ຺ຕມ຺ປິ ອນ຺ໂຕວຸຕ຺ຖໍ ອນຸປສມ຺ປນ຺ເນນ ປກ຺ກຎ຺ຈ ຍາວກາລິກໍ ຍາມກາລິກຎ຺ຈ ອນ຺ໂຕວຸຕ຺ຖອນ຺ໂຕປກ຺ກສງ຺ຂໍ ນ ຄຈ຺ຉຕິ, ໂກ ປນ ວາໂທ ອິຕຣທ຺ວເຍ. ຕໍ ປນ ອກປ຺ປິຍຠູມິຍມ຺ປິ ວຸຕ຺ຖໍ ປກ຺ກຎ຺ຈ ວຏ຺ຏຕິ. ເຕນ ວຸຕ຺ຕໍ ‘‘ຍາສຸ ວຸຕ຺ຖໍ ປກ຺ກຎ຺ຈ ກປ຺ປຕີ’’ຕິ.

໑໓໗. ວາສຕ຺ຖາຍ ກເຕ ສງ຺ຆິເກ ວາ ເອກສນ຺ຕເກ ວາ ສຫເສຍ຺ຍປ຺ປໂຫນເກ ເຄເຫ ກປ຺ປິຍາກຸຏິ ລທ຺ຘພ຺ພາຕິ ສມ຺ພນ຺ໂຘ. ຕຕ຺ຖ ວາສຕ຺ຖາຍາຕິ ອິມິນາ ອວາສຕ຺ຖາຍ ກຕໍ ນິວຕ຺ເຕຕິ. ເອກສນ຺ຕເກຕິ ເອກສ຺ສ ຠິກ຺ຂຸໂນ ສນ຺ຕເກ. ກປ຺ປິຍາກຸຏີຕິ ຠາວປ຺ປຘາໂນຍໍ ນິທ຺ເທໂສ, ນ ຫິ ເຄເຫ ເຄຫໍ ລທ຺ຘຸໍ ຍຸຊ຺ຊຕີຕິ ກປ຺ປິຍກຸຏິຕາຕິ ອຕ຺ໂຖ. ທີໂຆ ປນ ຄາຖາວເສນ, ກປ຺ປິຍາ ກຸຏິຕາຕິ ວາ ວິເສສນວເສນ ທຏ຺ຐພ຺ພໍ. ສຫເສຍ຺ຍປ຺ປໂຫນເກຕິ ເອຕ຺ຖ ສຫເສຍ຺ຍປ຺ປໂຫນກໍ ວາສາຄາຣລກ຺ຂເຓ ວຸຕ຺ຕລກ຺ຂຓໍ ເສນາສນໍ.

໑໓໘. ອິທານິ ຕາ ກຸຏິໂຍ ກເມນ ທສ຺ເສຕ຺ວາ ຕຕ຺ຖ ປຏິປຊ຺ຊິຕພ຺ພວິຘິໍ, ຕາສໍ ສພ຺ພຖາປຄມຎ຺ຈ ທສ຺ເສຕຸໍ ‘‘ເຄເຫ’’ຕິອາທິມາຫ. ຕຕ຺ຖ ‘‘ກປ຺ປິຍກຸຏິໍ ກໂຣມ, ກປ຺ປິຍກຸຏິໍ ກໂຣມາ’’ຕິ ເອວມີຣຍນ຺ຕິ ສມ຺ພນ຺ໂຘ. ອິຏ຺ຐກາ ຈ ຖມ຺ຠາ ຈ ‘‘ອິຏ຺ຐກາຖມ຺ຠາ’’ຕິ ວຕ຺ຕພ຺ເພ ຣສ຺ໂສ. ອິຏ຺ຐກຖມ຺ຠາ ອາທິ ຍສ຺ສ ຠິຕ຺ຕິປາສາທສ຺ສາຕິ ພຫຸພ຺ພີຫິ. ປຈ຺ຉາ ປຐມສທ຺ເທນ ກມ຺ມຘາຣໂຍ. ‘‘ຐເປຍ຺ຍ ເຈ, ສາ ອຸສ຺ສາວນນ຺ຕິກາ’’ຕິ ເອວໍ ເຈ-ສາ-ສທ຺ເທ ໂຍເຊຕ຺ວາ ອຕ຺ໂຖ ເວທິຕພ຺ໂພ.

໑໓໙. ສກໂລ ອປຣິກ຺ຂິຕ຺ໂຕ ອາຣາໂມປິ ວາຕິ ສມ຺ພນ຺ໂຘ. ເສນາສນໍ ປຣິກ຺ຂິຕ຺ຕໍ ວາ ໂຫຕຸ, ອປຣິກ຺ຂິຕ຺ຕໍ ວາ, ນ ຕໍ ປມາຓໍ.

໑໔໐. ອຎ຺ເຎຫິ ກປ຺ປິຍກຸຏິຍາ ອຕ຺ຖາຍ ທິນ຺ໂນ ວາ ເຕສໍ ສນ຺ຕໂກ ວາຕິ ໂຍຊນາ.

໑໔໑. ອວິໂຣຘຠາເວນ ກປ຺ປນີຍາ ກປ຺ປາ, ກປ຺ປ ສາມຕ຺ຖິຍມິຈ຺ເຈຕສ຺ມາ ອິຕ຺ຖິຍໍ ອາປຈ຺ຈເຍ ຣູປໍ, ນ ກປ຺ປາ ອກປ຺ປາ, ອກປ຺ປາ ຈ ສາ ກຸຏິ ເຈຕິ ອກປ຺ປກຸຏິ, ຕາຍ. ສປ຺ປິອາທີຕິ ອິມິນາ ສຕ຺ຕາຫກາລິກໍ ຍາວຊີວິກຎ຺ຈ ຄຫິຕໍ.

໑໔໒. ເຕເຫວາຕິ ອກປ຺ປກຸຏິຍໍ ວຸຕ຺ຖສປ຺ປິອາທີຫິ ເອວ ສທ຺ຘິໍ ສຕ຺ຕາຫກາລິກສໍສຏ຺ຐຕາຍ ‘‘ສຕ຺ຕາຫໍ ກປ຺ປເຕ’’ຕິ ວຸຕ຺ຕໍ. ສາມິເສຕິ ອາມິສສງ຺ຂາເຕນ ປຸຣິມທ຺ວເຍນ ສຫິເຕ. ສາມປາກຕາຕິ ສາມໍ ອຕ຺ຕນາ ປາໂກ ເອຕສ຺ສາຕິ ສາມປາກໍ, ສຕ຺ຕາຫກາລິເກນ ສຫ ປກ຺ກໍ ສາມິສໍ ຍາວຊີວິກໍ, ຕສ຺ສ ຠາໂວ ສາມປາກຕາ. ສຍໍ ປກ຺ກໍ ຕໍ ອຕ຺ຕນາ ສໍສຏ຺ຐຕາຍ ຕມ຺ປິ ອາມິສໍ ສາມປາກຄຕິກໍ ກໂຣຕີຕິ ຕສ຺ສ ສາມປາກຕາ ໂຫຕີຕິ ອຘິປ຺ປາໂຍ.

໑໔໓. ອຘິຏ຺ຐິຕາຕິ ປຕິຏ຺ຐິຕາ. ເອວ-ສທ຺ໂທ ຕິຏ຺ຐຕິສທ຺ທສ຺ສ ອນ຺ເຕ ທຏ຺ຐພ຺ໂພ.

໑໔໔. ສພ຺ເພສູຕິ ຖມ຺ຠາທີສຸ ສກເລສຸ. ຊຫິຕໍ ວຕ຺ຖຸ ກຸຏິຠູມິ ຍສ຺ສາ ຊຫິຕວຕ຺ຖຸກາ. ປຣິກ຺ຂິຕ຺ເຕ ຊຫິຕວຕ຺ຖຸກາຕິ ສມ຺ພນ຺ໂຘ. ເສສາຕິ ອິຕຣາ ທ຺ເວ ກຸຏິໂຍ. ຉທນວິພ຺ຠມາຕິ ຉທນສ຺ສ ວິນາສາ. ເອຕ຺ຖາປິ ‘‘ຊຫິຕວຕ຺ຖຸກາ’’ຕິ ອາເນຕພ຺ພນ຺ຕິ.

ຠູມິນິທ຺ເທສວຓ຺ຓນາ ນິຏ຺ຐິຕາ.