໑໓. ສມຓກປ຺ປນິທ຺ເທສວຓ຺ຓນາ

໑໒໕. ສມຓກປ຺ປາຕິ ສມຓໂວຫາຣາ. ຠວນ຺ຕິ, ອເຫສຸນ຺ຕິ ວາ ຠູຕາ, ວຕ຺ຕມາເນ, ຠູເຕ ວາ ຕປ຺ປຈ຺ຈໂຍ. ວິຣຸຬ຺ຫມູລາທິຠາວໍ ອາປຊ຺ຊິຕ຺ວາ ວຑ຺ຒມານການໍ, ວຑ຺ຒິຕ຺ວາ ມຫນ຺ຕຠາວໍ ປຕ຺ຕານຎ຺ຈ ຣຸກ຺ຂລຕາທິສງ຺ຂາຕານໍ ຠູຕານໍ ຄາໂມ, ຠູຕາ ເອວ ວາ ຄາໂມ ສມູໂຫ ຠູຕຄາໂມ. ຕສ຺ສ ສມາຣມ຺ໂຠ ເຉທນຜາລນາທິ, ຕສ຺ມິໍ. ນິມິຕ຺ຕຕ຺ເຖ ເຈຕໍ ຠຸມ຺ມໍ, ຕໍເຫຕຸ ປາຈິຕ຺ຕິຍໍ ໂຫຕີຕິ ອຕ຺ໂຖ. ກຕກປ຺ປິຍໍ ສມຓກປ຺ປິຍໍ ຠເວຕິ ສມ຺ພນ຺ໂຘ. ຕຕ຺ຖ ກຕໍ ກປ຺ປິຍໍ ຍສ຺ສາຕິ ພຫຸພ຺ພີຫິ. ເກນາຕິ ອາຫ ‘‘ນເຂນາ’’ຕິອາທິ.

໑໒໖. ອິທານິ ຍສ຺ສ ສມາຣມ຺ໂຠ, ຕໍ ຠູຕຄາມໍ ວິຠຊິຕ຺ວາ ທສ຺ເສຕຸໍ ‘‘ສ ມູລາ’’ຕິອາທິ ອາຣທ຺ຘໍ. ໂສຕິ ຠູຕຄາໂມ. ຠວິຕຸໍ ອຸປ຺ປຊ຺ຊິຕຸໍ ປໂຍເຊຕີຕິ ກາຣິຕນ຺ຕາ ຕປ຺ປຈ຺ຈໂຍ, ປຠາວິໂຕ ອຸປ຺ປາທິໂຕຕິ ອຕ຺ໂຖ. ອຖ ວາ ປຠວນໍ ປຠໂວ, ອຸປ຺ປຕ຺ຕິ, ໂສວ ປຠໂວ, ປຠາວໍ ກໂຣຕີຕິ ນາມຘາຕຸໂຕ ກຕ຺ຕຣິ ຕປ຺ປຈ຺ຈໂຍ, ປຠາວິໂຕ ອຸປ຺ປນ຺ໂນຕິ ອຕ຺ໂຖ. ມູລຎ຺ຈ ຂນ຺ໂຘ ຈ ພີຊຎ຺ຈ ອຄ຺ຄຎ຺ຈ ຜຬຸ ຈ ມູລ…ເປ… ຜຬູນິ. ຜຬຸ ນາມ ປພ຺ພໍ. ຕານິເຍວ ພີຊານິ, ເຕຫິ ປຠາວິໂຕ ອຸປ຺ປາທິໂຕ, ອຖ ວາ ເຕຫິ ອວຘິຠູເຕຫິ, ກາຣຓຠູເຕຫິ ວາ ປຠາວິໂຕ ອຸປ຺ປນ຺ໂນຕິ ກເມນ ວິກປ຺ປທ຺ວເຍ ສມາສທ຺ວຍໍ ເວທິຕພ຺ພໍ. ຕຕ຺ຖ ມູລພີຊໍ ນາມ ຫລິທ຺ທິສິງ຺ຄິເວຣາທິ.

ຂນ຺ຘພີຊໍ ນາມ ອສ຺ສຕ຺ຖນິຄ຺ໂຣຘາທິ. ພີຊພີຊໍ ນາມ ປຸພ຺ພຓ຺ຓາປຣຓ຺ຓາທິ. ອຄ຺ຄພີຊໍ ນາມ ຫິຣິເວຣາທິ. ຜຬຸພີຊໍ ນາມ ອຸຈ຺ຉຸນຬາທິ. ຕຕ຺ຖ ມູລພີຊາທີນິ ປຎ຺ຈ ພີຊຄາໂມ. ຕນ຺ນິພ຺ພຕ຺ໂຕ ຣຸກ຺ຂລຕາທິ ຠູຕຄາໂມ.

ອິທານິ ເຕສຸ ພີຊຄາມສມາຣມ຺ເຠ ທຸກ຺ກຏໍ ທສ຺ເສຕິ ອປຣທ຺ເຘນ. ຠູຕຄາມວິໂຍຊິຕໍ ພີຊໍ ອາຣມ຺ເຠ ທຸກ຺ກຏນ຺ຕິ ສມ຺ພນ຺ໂຘ. ຠູຕຄາມໂຕ ວິໂຍຊິຕນ຺ຕິ ຕປ຺ປຸຣິໂສ. ພີຊນ຺ຕິ ຠູມິຍໍ ໂຣປິຕມໂຣປິຕມ຺ປິ ນິຄ຺ຄຕວິທຕ຺ຖິມຕ຺ຕປຕ຺ຕວຏ຺ຏິປິ ມູລພີຊານິ. ‘‘ອາຣມ຺ເຠ’’ຕິ ກິຕກປຈ຺ຈຍສ຺ສ ໂຍເຄ ອວຸຕ຺ເຕ ກມ຺ມນິ ຉຏ຺ຐຸປ຺ປຕ຺ຕິຍໍ ວິກປ຺ເປນ ອຸຠຍຕ຺ຖ ທຸຕິຍາ. ອາຣມ຺ເຠຕິ ສມາຣມ຺ເຠ. ຕສ຺ມາ ‘‘ອິມໍ ປຸປ຺ຜໍ ຜລໍ ວາ ຊານ, ອິມໍ ກປ຺ປິຍໍ ກໂຣຫີ’’ຕິອາທິນາ ກປ຺ປິຍວຈເນນ ຠູຕຄາມໂຕ ວິໂຍຊິຕໍ ພີຊຊາຕໍ ພີຊຄາມປຣິໂມຈນຕ຺ຖໍ ປຸນ ກປ຺ປິຍໍ ກາຣາເປຕ຺ວາ ປຣິຠຸຎ຺ຊິຠພ຺ພໍ. ‘‘ອນຸຊານາມິ, ຠິກ຺ຂເວ, ປຎ຺ຈຫິ ສມຓກປ຺ເປຫິ ຜລໍ ປຣິຠຸຎ຺ຊິຕຸໍ ອຄ຺ຄິປຣິຊິຕໍ ສຕ຺ຖປຣິຊິຕໍ ນຂປຣິຊິຕໍ ອພີຊໍ ນິພ຺ພຕ຺ຕພີຊຎ຺ເຎວ ປຎ຺ຈມ’’ນ຺ຕິ (ຈູຬວ. ໒໕໐) ວຸຕ຺ເຕສຸ ປຎ຺ຈສຸ ນຂປຣິຊິຕາທີນິ ຕີຓິ ທສ຺ສິຕານິ.

໑໒໗. ອິທານິ ອວສິຏ຺ຐານິ ທ຺ເວ ທສ຺ເສຕຸໍ ‘‘ນິພ຺ພຕ຺ຕພີຊ’’ນ຺ຕິອາທິກໍ ປຐມທ຺ຘໍ ອາຫ. ຕຕ຺ຖ ນິພ຺ພຕ຺ຕພີຊນ຺ຕິ ນິພ຺ພຕ຺ຕນິຍນ຺ຕິ ນິພ຺ພຕ຺ຕໍ, ນິປຸພ຺ພ ວຕຸ ວຕ຺ຕເນຕິມສ຺ມາ ຕປ຺ປຈ຺ຈໂຍ, ນິພ຺ພຕ຺ຕໍ ພີຊໍ ຍສ຺ສ ຕໍ ນິພ຺ພຕ຺ຕພີຊໍ, ພີຊໍ ນິພ຺ພຕ຺ເຕຕ຺ວາ ວິສຸໍ ກຕ຺ວາ ປຣິຠຸຎ຺ຊິຕພ຺ພໍ ອມ຺ພປນສາທິ. ໂນພີຊໍ ນາມ ຕຣຸຓມ຺ພຜລາທິ. ອິທານິ ພີຊຄາມຠູຕຄາເມສຸ ກປ຺ປິຍກຣຓປ຺ປກາຣາທິວິເສສໍ ທສ຺ເສນ຺ໂຕ ‘‘ກຏາຫາ’’ຕິອາທິມາຫ. ຕຕ຺ຖ ກຏາເຫນ ພທ຺ຘໍ ພີຊໍ ເຍສນ຺ຕິ ພາຫິຣຕ຺ໂຖ.

໑໒໘. ຠາຊເນ ຠູມິຍມ຺ປິ ວາ ເອກາພທ຺ເຘສຸ ພີເຊສຸ ເອກສ຺ມິຎ຺ຈ ກປ຺ປິເຍ ກເຕຕິ ໂຍຊນາ. ພີເຊສູຕິ ພີຊຄາມຠູຕຄາເມສຸ. ຠູຕຄາໂມປິ ຫິ ອິຘ ‘‘ພີຊ’’ນ຺ຕິ ຣຸຬ຺ຫີວເສນ ວຸຈ຺ຈຕິ.

໑໒໙. ນິກ຺ຂິຕ຺ເຕຕິ ຐປິເຕ. ກປ຺ປິຍໍ ປຸນ ກເຣຍ຺ຍາຕິ ຊາຕມູລປຓ຺ຓຠາວໂຕ ຠູຕຄາມຕ຺ຕາ ຠູຕຄາມໂຕ ປຣິໂມຈິຕໍ ພີຊຄາມປຣິໂມຈນຕ຺ຖໍ ປຸນ ກປ຺ປິຍໍ ກາເຣຍ຺ຍາຕິ ອຕ຺ໂຖ. ເຕນາຫ ‘‘ຠູຕຄາໂມ ຫິ ໂສ ຕທາ’’ຕິ. ຫິ-ສທ຺ໂທ ເຫຕຸມ຺ຫິ. ຕທາຕິ ມູເລ ຈ ປຓ຺ເຓ ຈ ຊາຕກາເລ ສເຈ ມູລມຕ຺ຕໍ ສຎ຺ຊາຍຕິ, ອຸປຣິຠາເຄ ສເຈ ອງ຺ກຸໂຣ ຊາຍຕິ, ເຫຏ຺ຐາຠາເຄ ຉິນ຺ທິຕຸໍ ວຏ຺ຏຕິ. ມູລມຕ຺ເຕສຸ ວາ ປນ ປຓ຺ຓມຕ຺ເຕສຸ ວາ ນິຄ຺ຄເຕສຸ ສເຈປິ ຣຕນປ຺ປມາຓາປິ ສາຂາ ນິກ຺ຂມນ຺ຕິ, ພີຊຄາມສງ຺ຄຫິຕາ ໂຫນ຺ຕິ.

໑໓໐. ອຸທກສມ຺ຠໂວ ເສວາໂລ ຈ ເຈຕິຍາທີສຸ ເສວາໂລ ຈ ຠູຕຄາໂມວາຕິ ສມ຺ພນ຺ໂຘ. ອາທິ-ສທ຺ເທນ ປາກາຣາທິຄ຺ຄຫຓໍ. ຍທິ ທ຺ເວ ຕີຓິ ປຓ຺ຓານິ ນ ຊາຍນ຺ຕິ, ອຄ຺ຄພີຊສງ຺ຄຫໍ ຄຈ຺ຉຕິ. ສຸກ຺ໂຂ ປນ ສມ຺ມຊ຺ຊິຕພ຺ໂພ. ມູລປຓ຺ເຓ ວິນິຄ຺ຄເຕ ພີໂຊປິ ຠູຕຄາໂມວາຕິ ສມ຺ພນ຺ໂຘ. ປຓ຺ເຓຕິ ອິມິນາ ອງ຺ກຸຣມຕ຺ຕໍ ປຏິກ຺ຂິປຕິ.

໑໓໑. ຆຏາທິປິຏ຺ເຐ ເສວາໂລ ຈ ອຫິຉຕ຺ຕກມກຸຬຎ຺ຈ ທຸກ຺ກຏສ຺ເສວ ວຕ຺ຖູນີຕິ ສມ຺ພນ຺ໂຘ. ປິຏ຺ເຐຕິ ອິມິນາ ອນ຺ໂຕ ອພ຺ໂພຫາຣິໂກຕິ ທສ຺ເສຕິ. ຜຸລ຺ລນ຺ຕິ ຜຸລ຺ລິຕໍ ອຫິຉຕ຺ຕກໍ. ອພ຺ຍວຫາຣິກນ຺ຕິ ອາປຕ຺ຕິໂວຫາຣໂຍຄ຺ຄໍ ນ ໂຫຕີຕິ ອຕ຺ໂຖ.

໑໓໒. ອລ຺ລຣຸກ຺ເຂ ລາຂານິຍ຺ຍາສຉຕ຺ຕານິ ວິໂກປິຍ ຄຓ຺ຫໂຕ ຕຕ຺ຖ ອກ຺ຂຣໍ ຉິນ຺ທໂຕ ວາປິ ປາຈິຕ຺ຕີຕິ ສມ຺ພນ຺ໂຘ. ຕຕ຺ຖາຕິ ອລ຺ລຣຸກ຺ເຂ. ‘‘ວິໂກປຍ’’ນ຺ຕິ ໂປຕ຺ຖເກສຸ ປາໂຐ ທິສ຺ສຕິ, ໂສ ອປາໂຐ ປຐມນ຺ຕຕາຍ ກາຣຓາຠາວໂຕ. ‘‘ວິໂກປິຍາ’’ຕິ ປນ ປາໂຐ ຄເຫຕພ຺ໂພ. ວິໂກປິຍາຕິ ອິມິນາ ອວິໂກເປຕ຺ວາ ຄຫເຓ ອນາປຕ຺ຕີຕິ ທີເປຕິ.

໑໓໓. ທາຣຸມກ຺ກຏກາທິນາຕິ ອາຓິໍ ໂກຏ຺ເຏຕ຺ວາ ທາຣຸຍນ຺ຕໍ ກຕ຺ວາ ຕຕ຺ຖ ກຓ຺ຏກໍ ໂອລມ຺ເພນ຺ຕິ, ເອຕໍ ທາຣຸມກ຺ກຏກໍ ນາມ. ອາທິ-ສທ຺ເທນ ກຓ຺ຏກພນ຺ຘນາທີນໍ ຄຫຓໍ. ຕິຓາທິໍ ຉິນ຺ທິຕຸໍ, ຄຓ຺ຐິກໍ ກາຕຸຎ຺ຈ ນ ກປ຺ປຕີຕິ ໂຍຊນາ. ຉິນ຺ທິຕຸນ຺ຕິ ຉິນ຺ທນໍ.

໑໓໔. ຠູຕຄາມໍ ວາຕິ ຠູຕຄາມໍ ວາ. ພີຊໍ ວາຕິ ພີຊຄາມໍ ວາ. ‘‘ຉິນ຺ທ ວາ’’ຕິອາທິນາ ສພ຺ພຕ຺ຖ ວາ-ສທ຺ໂທ ໂຍເຊຕພ຺ໂພ. ປຈ ວາຕິ ປຈນໍ ກໂຣຫີຕິ ວາ. ‘‘ປຏ’’ ອິຕິ ວາ ປາໂຐ, ຕສ຺ສ ອຸປ຺ປາເທຫີຕິ ອຕ຺ໂຖ. ‘‘ອິມໍ ຣຸກ຺ຂໍ ຉິນ຺ທາຫີ’’ຕິອາທິນາ ປນ ອວຕ຺ວາ ‘‘ຣຸກ຺ຂໍ ຉິນ຺ທາ’’ຕິອາທິນາ ອນິຍເມຕ຺ວາ ວຕ຺ຕຸໍ ວຏ຺ຏຕິ.

໑໓໕. ອິມນ຺ຕິ ເອຕໍ ຣຸກ຺ຂາທິໍ. ອິມໍ ໂສເຘຫີຕິ ເອຕ຺ຖ ອິຕິ-ສທ຺ທໍ ກຕ຺ວາ ອຕ຺ໂຖ ວຕ຺ຕພ຺ໂພຕິ.

ສມຓກປ຺ປນິທ຺ເທສວຓ຺ຓນາ ນິຏ຺ຐິຕາ.