໙. ປຏິຄ຺ຄາຫນິທ຺ເທສວຓ຺ຓນາ

໑໐໖. ອິທານິ ‘‘ປຏິຄ຺ຄາໂຫ’’ຕິ ປທໍ ວິຕ຺ຖາເຣຕຸໍ ‘‘ທາຕຸກາມາຠິຫາໂຣ ຈາ’’ຕິອາທິ ອາຣທ຺ຘໍ. ຕຕ຺ຖ ທາຕຸກາມສ຺ສ ອຠິຫາໂຣ ທາຕຸກາມາຠິຫາໂຣ. ເອເຕນ ອຎ຺ຎສ຺ສ ປຕ຺ເຕ ປກ຺ຂິປິຕຸໍ ອາລຸເລນ຺ຕສ຺ສ ຜຸສິຕານິ ອຸຏ຺ຐຫິຕ຺ວາ ອຎ຺ຎສ຺ສ ປຕ຺ເຕ ສເຈ ປຕນ຺ຕິ, ປຏິຄ຺ຄຫຓໍ ນ ຣຸຫຕີຕິ ທີປິຕໍ ໂຫຕິ. ເອຣຓກ຺ຂມນ຺ຕິ ຖາມມຊ຺ຌິເມນ ປຸຣິເສນ ອຸກ຺ຂິປນກ຺ຂມໍ, ຕໂຕ ມຫນ຺ເຕ ປຏິຄ຺ຄຫຓໍ ນ ຣຸຫຕິ. ຕິຘາ ເທນ຺ເຕຕິ ກາຍກາຍປ຺ປຏິພທ຺ຘນິສ຺ສຄ຺ຄິຍານໍ ວເສນ ຕິຘາ ເທນ຺ເຕ. ຕສ຺ສ ຠິກ຺ຂຸໂນ ກາຍກາຍປ຺ປຏິພທ຺ເຘຫິ ທ຺ວິຘາ ຄາໂຫຕິ ອຕ຺ໂຖ. ປຎ຺ຈງ຺ໂຄ ເອວໍ ປຎ຺ຈງ຺ເຄວໍ. ທາຕຸກາມາຠິຫາໂຣ ເອກໍ, ຫຕ຺ຖປາໂສ ເອກໍ, ເອຣຓກ຺ຂມຕາ ເອກໍ, ເທວມນຸສ຺ສຕິຣຈ຺ຉານຄເຕສຸ ເອເກນ ຕິຘາ ທານເມກໍ, ທ຺ວິຘາ ຄາໂຫ ເອກນ຺ຕິ ເອວໍ ປຎ຺ຈງ຺ຄານິ ໂຫນ຺ຕິ.

໑໐໗. ອິທານິ ເຍນ ກາຍປ຺ປຏິພທ຺ເຘນ ປຏິຄ຺ຄຫຓໍ ນ ຣຸຫຕິ, ຕໍ ທສ຺ເສຕຸໍ ‘‘ອສໍຫາຣິເຍ’’ຕິອາທິມາຫ. ຂາຓຸເກ (ປາຈິ. ອຏ຺ຐ. ໒໖໕) ພນ຺ຘິຕ຺ວາ ຐປິຕມຎ຺ຈາທິມ຺ຫິ ວາ ຜລເກ ວາ ປາສາເຓ ວາ ອສໍຫາຣິເຍ ນ ຣຸຫຕີຕິ ອຕ຺ໂຖ. ຕຕ຺ຖຊາເຕ ປທຸມິນິປຓ຺ເຓ ວາ ກິໍສຸກປຓ຺ຓາທິມ຺ຫິ ວາ ນ ວຏ຺ຏຕິ, ສຸຂຸເມ ຈິຎ຺ຈອາທີນໍ ປຓ຺ເຓ ວາ ນ ຣຸຫຕິ, ຍຎ຺ຈ ມຊ຺ຌິມປຸຣິໂສ ສນ຺ຘາເຣຕຸໍ ນ ສກ຺ໂກຕິ, ຕສ຺ມິໍ ອສຍ຺ຫຠາເຣ ຈ ປຏິຄ຺ຄໂຫ ນ ຣຸຫຕີຕິ ອຕ຺ໂຖ.

໑໐໘. ອິທານິ ປຏິຄ຺ຄຫຓວິຊຫນໍ ທສ຺ເສຕຸໍ ‘‘ສິກ຺ຂາມຣຓລິງ຺ເຄຫີ’’ຕິອາທິ ອາຣທ຺ຘໍ. ຕຕ຺ຖາຍໍ ປິຓ຺ຑຕ຺ໂຖ – ສິກ຺ຂາປຈ຺ຈກ຺ຂາເນນ ຈ ມຣເຓນ ຈ ລິງ຺ຄປຣິວຕ຺ຕເນນ ຈ ‘‘ນ ຕໍ ທານິ ປຣິຠຸຎ຺ຊິສ຺ສາມີ’’ຕິ ວາ ‘‘ນ ປຸນ ປຏິຄ຺ຄເຫຕ຺ວາ ປຣິຠຸຎ຺ຊິສ຺ສາມີ’’ຕິ ວາ ເອວໍ ອນເປກ຺ຂວິສ຺ສຊ຺ຊເນນ ຈ ໂຈຣາທີຫິ ວາ ອຈ຺ເຉທາ ຈ ອນຸປສມ຺ປນ຺ນສ຺ສ ທານາ ຈ ຄາໂຫ ປຏິຄ຺ຄາໂຫ ອຸປສມ຺ມຕິ ວິຊຫຕີຕິ. ຠິກ຺ຂຸນິຍາ ປນ ສິກ຺ຂາປຈ຺ຈກ຺ຂານສ຺ສ ອຠາວາ ວິພ຺ຠມເນນ ຈ ວິຊຫຕີຕິ ຄເຫຕພ຺ພໍ.

໑໐໙-໑໑໐.

.ອິທານິ ປຏິຄ຺ຄເຫຕ຺ວາ ປຣິຠຸຎ຺ຊິຕພ຺ພໍ ທສ຺ເສຕຸໍ ‘‘ອປ຺ປຏິຄ຺ຄຫິຕໍ ສພ຺ພ’’ນ຺ຕິອາທິ ວຸຕ຺ຕໍ. ຕສ຺ສຕ຺ໂຖ (ກງ຺ຂາ. ອຏ຺ຐ. ທນ຺ຕໂປນສິກ຺ຂາປທ) – ຈຕຸກາລິກປຣິຍາປນ຺ນໍ ອນ຺ຕມໂສ ຣຊເຣຓຸມ຺ປິ ອປ຺ປຏິຄ຺ຄເຫຕ຺ວາ ສພ຺ພໍ ປຣິຠຸຎ຺ຊໂຕ ປາຈິຕ຺ຕິ. ອິທານິ ອປ຺ປຏິຄ຺ຄເຫຕ຺ວາ ປຣິຠຸຎ຺ຊິຕພ຺ພໍ ທສ຺ເສຕຸໍ ‘‘ສຸທ຺ຘຎ຺ຈ ນາຕິພຫລ’’ນ຺ຕິອາທິ ວຸຕ຺ຕໍ. ຕຕ຺ຖ ສຸທ຺ຘຎ຺ຈາຕິ ອຎ຺ເຎສໍ ຣເສນ ອສມ຺ມິສ຺ສໍ. ຫິໂມທກສມຸທ຺ໂທທກາທີສຸ ປຏິຄ຺ຄຫຓກິຈ຺ຈໍ ນຕ຺ຖິ. ໂລຓຎ຺ຈ ອສ຺ສຸ ຈ ໂລຓສ຺ສຸ. ເອຕ຺ຖ ໂລຓໍ ນາມ ສຣີເຣ ອຸຏ຺ຐິຕໍ. ເອຕານິ ປນ ສພ຺ພານິ ອວິຈ຺ຉິນ຺ນາເນວ ກປ຺ປນ຺ຕິ, ເນຕຣານິ.

໑໑໑. ອິທານິ ອນງ຺ຄລຄ຺ຄານິປິ ທສ຺ເສຕຸໍ ‘‘ຄູຖມຕ຺ຕິກມຸຕ຺ຕານີ’’ຕິອາທິມາຫ. ຕຖາວິເຘຕິ ຕຖາວິເຘ ກາເລ, ສປ຺ປທຏ຺ຐກາເລຕິ ອຕ຺ໂຖ. ອຎ຺ເຎສໍ ປນ ອປ຺ປຏິຄ຺ຄຫິຕໍ ອນງ຺ຄລຄ຺ຄໍ ນ ວຏ຺ຏຕິ. ກສ຺ມາ? ‘‘ອນຸຊານາມິ, ຠິກ຺ຂເວ, ຍໍ ກໂຣນ຺ໂຕ ປຏິຄ຺ຄຓ຺ຫາຕິ, ສ຺ເວວ ປຏິຄ຺ຄໂຫ ກໂຕ, ນ ປຸນ ປຏິຄ຺ຄເຫຕພ຺ໂພ’’ຕິ (ມຫາວ. ໒໖໘) ວຸຕ຺ຕຕ຺ຕາ.

໑໑໒. ທຸຣູປຈິຓ຺ເຓຕິ ທຸປ຺ປຣາມຏ຺ເຐ ຜລິກຣຸກ຺ຂວລ຺ລິອາທິໍ ຈາເລນ຺ຕສ຺ສ ວາ ອາມິສຠຣິຕຠາຊນໍ ອປ຺ປຏິຄ຺ຄຫິຕໍ ປຣາມສນ຺ຕສ຺ສ ວາ ທຸຣູປຈິຓ຺ຓທຸກ຺ກຏໍ ໂຫຕີຕິ ອຕ຺ໂຖ. ຣໂຊກິຓ຺ເຓຕິ ຠິກ຺ຂາຍ ຈຣນ຺ຕສ຺ສ ປຕ຺ເຕ ປຕິຕຣຊໍ ອປ຺ປຏິຄ຺ຄເຫຕ຺ວາ ປຸນ ຠິກ຺ຂໍ ຄຓ຺ຫໂຕ ວິນຍທຸກ຺ກຏໍ ໂຫຕີຕິ ອຕ຺ໂຖ. ອຖຸຄ຺ຄຫປ຺ປຏິຄ຺ຄເຫຕິ ອຖ ອຸຄ຺ຄຫປ຺ປຏິຄ຺ຄເຫ, ອຕ຺ຕນາ ເອວ ອຸຄ຺ຄເຫຕ຺ວາ ຄຫິເຕຕິ ອຕ຺ໂຖ. ອກປ຺ປິຍກຸຏິຍໍ ອນ຺ໂຕວຸຕ຺ເຖ ຈ ຍຕ຺ຖ ກຕ຺ຖຈິ ຠິກ຺ຂຸນາ ສຍໍປກ຺ເກ ຈ ອຕ຺ຕນາ ວາ ປເຣນ ວາ ອກປ຺ປິຍກຸຏິຍໍ ອນ຺ໂຕປກ຺ເກ ຈາຕິ ສພ຺ພຕ຺ຖ ທຸກ຺ກຏນ຺ຕິ ອຘິປ຺ປາໂຍ. ປຏິຄ຺ຄາຫວິນິຈ຺ຉໂຍ.

ປຏິຄ຺ຄາຫນິທ຺ເທສວຓ຺ຓນາ ນິຏ຺ຐິຕາ.