໑໐. ອກປ຺ປິຍມໍສນິທ຺ເທສວຓ຺ຓນາ

໑໑໓. ອິທານິ ມໍເສສຸ ປຏິປຊ຺ຊິຕພ຺ພາກາຣໍ ທສ຺ເສຕຸໍ ‘‘ມໍເສສຸ ຈ ອກປ຺ປິຍ’’ນ຺ຕິ ອຸທ຺ຘຏໍ. ອກປ຺ປິຍມໍສມ຺ຫິ ທສ຺ສິເຕ ກປ຺ປິຍມໍສໍ ທສ຺ສິຕເມວ ໂຫຕິ ປາຣິເສສນເຍນ. ອຸຣຄສ຺ສ ຈາຕິ ເອຕ຺ຖ ສພ຺ໂພປິ ອຸຣໂຄ ນ ກປ຺ປຕິ.

໑໑໔. ເອຕ຺ຕາວຕາ ຊາຕິວເສນ ທສວິຘມ຺ປິ ອກປ຺ປິຍມໍສໍ ທສ຺ເສຕ຺ວາ ອິທານິ ກປ຺ປິຍມໍເສສຸປິ ອກປ຺ປິຍວິຘິໍ ທສ຺ເສຕຸໍ ‘‘ອຸທ຺ທິສ຺ສກຕມໍສຎ຺ຈ, ຍຎ຺ຈ ອປ຺ປຏິເວກ຺ຂິຕ’’ນ຺ຕິ ວຸຕ຺ຕໍ. ຕຕ຺ຖ ປຎ຺ຈສຸ ສຫຘມ຺ມິເກສຸ ຍສ຺ສ ກສ຺ສຈິ ຍໍ ກິຎ຺ຈິ ອຸທ຺ທິສ຺ສ ກຕໍ ອຸທ຺ທິສ຺ສກຕໍ ນາມ, ຕໍ ປນ ຊານິຕ຺ວາ ປຣິຠຸຎ຺ຊິຕຸໍ ສພ຺ເພສມ຺ປິ ນ ວຏ຺ຏຕິ, ອຊານນ຺ຕານໍ ອນາປຕ຺ຕິ. ມຈ຺ເຉສຸປິ ເອເສວ ນໂຍ. ອປ຺ປຏິເວກ຺ຂິຕນ຺ຕິ ອນຸປປຣິກ຺ຂິຕໍ, ອນາປຸຈ຺ຉິຕນ຺ຕິ ອຕ຺ໂຖ. ‘‘ນ ຠິກ຺ຂເວ ອປ຺ປຏິເວກ຺ຂິຕ຺ວາ ມໍສໍ ປຣິຠຸຎ຺ຊິຕພ຺ພໍ, ໂຍ ປຣິຠຸຎ຺ເຊຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ (ມຫາວ. ໒໘໑) ວຸຕ຺ຕໍ. ມຈ຺ເຉສຸ ປນ ອາປຸຈ຺ຉນກິຈ຺ຈໍ ນຕ຺ຖິ ອກປ຺ປິຍມຈ຺ຉານໍ ນຕ຺ຖິຕາຍາຕິ ວທນ຺ຕິ. ອິທານິ ເອເຕສຸ ອາປຕ຺ຕິເຠທໍ ທສ຺ເສຕຸໍ ‘‘ຖຸລ຺ລຈ຺ຈຍ’’ນ຺ຕິອາທິມາຫ. ຕໍ ສພ຺ພໍ (ກງ຺ຂາ. ອຏ຺ຐ. ສນ຺ນິຘິກາຣກສິກ຺ຂາປທວຓ຺ຓນາ) ອຸຕ຺ຕານເມວ.

໑໑໕. ອິທານິ ນ ເກວລໍ ອິເມສໍ ມນຸສ຺ສາທີນໍ ມໍສເມວ ອກປ຺ປິຍໍ, ອຏ຺ຐິອາທີນິປິ ອກປ຺ປິຍານີຕິ ທສ຺ເສຕຸໍ ‘‘ອຏ຺ຐີປີ’’ຕິອາທິ ວຸຕ຺ຕໍ. ຕຕ຺ຖ (ມຫາວ. ອຏ຺ຐ ໒໘໑) ໂລມມ຺ເປສນ຺ຕິ ໂລມມ຺ປິ ເອສໍ ອກປ຺ປິຍມໍສວຕ຺ຖູນນ຺ຕິ ອຕ຺ໂຖ. ສຈິຕ຺ຕກໍ ວາຕິ ເອເຕສຸ ປນ ອຸທ຺ທິສ຺ສກຕເມວ ສຈິຕ຺ຕກໍ, ເສສາ ອຈິຕ຺ຕກາຕິ. ອກປ຺ປິຍມໍສວິນິຈ຺ຉໂຍ.

ອກປ຺ປິຍມໍສນິທ຺ເທສວຓ຺ຓນາ ນິຏ຺ຐິຕາ.