໑໑. ນິສ຺ສຄ຺ຄິຍນິທ຺ເທສວຓ຺ຓນາ

໑໑໖-໗. ອິທານິ ອຈ຺ໂຈຬາຣິການໍ ວເສນ ທສ຺ເສຕຸໍ ‘‘ອຣູປິຍ’’ນ຺ຕິອາທິ ອາຣທ຺ຘໍ. ອຎ຺ຎຖາປິ ຍຸຕ຺ຕິ ປຣິເຍສິຕພ຺ພາ. ຕຕ຺ຖາຍໍ ສງ຺ເຂປຕ຺ໂຖ (ປາຣາ. ໕໙໑; ປາຣາ. ອຏ຺ຐ. ໒.໕໘໙; ກງ຺ຂາ. ອຏ຺ຐ. ຊາຕຣຸປສິກ຺ຂາປທວຓ຺ຓນາ) – ໂຍ ຣູປິເຍນ ອຣູປິຍຎ຺ຈ ປຣິວຕ຺ເຕຍ຺ຍ, ໂຍ ຈ ອິຕເຣນ ຈ ອຣູປິເຍນ ຣູປິຍໍ ປຣິວຕ຺ເຕຍ຺ຍ, ຕສ຺ສ ນິສ຺ສຄ຺ຄິຍໍ ໂຫຕີຕິ.

ອິທານິ ຣູປິຍຎ຺ຈ ອຣູປິຍຎ຺ຈ ທສ຺ເສຕຸໍ ‘‘ອິຘ ຣູປິຍ’’ນ຺ຕິອາທິ ອາຣທ຺ຘໍ. ເອຕ຺ຖ (ປາຣາ. ໕໘໙; ກງ຺ຂາ. ອຏ຺ຐ. ຊາຕຣຸປສິກ຺ຂາປທວຓ຺ຓນາ) ສຊ຺ຌຸ ສິງ຺ຄີຕິ ສຊ຺ຌູຕິ ຣຊຕໍ. ສິງ຺ຄີຕິ ສຸວຓ຺ຓໍ. ຕມ຺ພໂລຫາທີຫິ ວາ ທາຣູຫິ ວາ ປຓ຺ເຓຫິ ວາ ລາຂາຍ ວາ ຣູປໍ ສມຸຏ຺ຐາເປຕ຺ວາ ວາ ອສມຸຏ຺ຐາເປຕ຺ວາ ວາ ກຕໍ ຈມ຺ມພີຊມຍມ຺ປິຍໍ ຍໍ ເທເສ ໂວຫາຣໍ ຄຈ຺ຉຕິ, ອິທໍ ໂວຫາຣູປຄມາສກໍ ນາມ. ອິທມິຘ ຣູປິຍນ຺ຕິ ອຘິປ຺ເປຕໍ. ວຕ຺ຖາທິ ຈ ມຸຕ຺ຕາທິ ຈ ວຕ຺ຖມຸຕ຺ຕາທິ. ອິຕຣນ຺ຕິ ອຣູປິຍໍ ກປ຺ປິຍວຕ຺ຖຸຎ຺ຈ ທຸກ຺ກຏວຕ຺ຖຸຎ຺ຈ. ກິໍ ວຸຕ຺ຕໍ ໂຫຕິ? ວຕ຺ຖໍ ສຸຕ຺ຕໍ ຜາໂລ ປຏໂກ ກປ຺ປາໂສ ອເນກປ຺ປກາຣໍ ອປຣຓ຺ຓໍ ສປ຺ປິ ນວນີຕໍ ເຕລໍ ມຘຸ ຜາຓິຕາທິເຠສຊ຺ຊຎ຺ຈາຕິ ອິທໍ ກປ຺ປິຍວຕ຺ຖຸ ນາມ. ມຸຕ຺ຕາ ມຓິ ເວຬຸຣິໂຍ ສງ຺ໂຂສິລາ ປວາຬໍ ໂລຫິຕງ຺ໂຄ ມສາຣຄລ຺ລໍ ສຕ຺ຕ ຘຎ຺ຎານິ ທາສີ ທາໂສ ເຂຕ຺ຕໍ ວຕ຺ຖຸ ປຸປ຺ຜາຣາມຜລາຣາມາທໂຍຕິ ອິທໍ ທຸກ຺ກຏວຕ຺ຖຸ ນາມ, ຕທຸຠຍໍ ອຣູປິຍໍ ນາມາຕິ ວຸຕ຺ຕໍ ໂຫຕິ.

໑໑໘. ເອຕ຺ຕາວຕາ ຣູປິຍສໍໂວຫາຣໍ ທສ຺ເສຕ຺ວາ ອິທານິ ກຍວິກ຺ກຍໍ ທສ຺ເສຕຸໍ ‘‘ອິມໍ ຄເຫຕ຺ວາ’’ຕິອາທິມາຫ. ຕຕ຺ຖ ອິມນ຺ຕິ ຕຓ຺ຑຸລາທິກໍ ກປ຺ປິຍຠຓ຺ຑໍ ຄເຫຕ຺ວາ ວາ ໂອທນາທິໍ ຠຸຕ຺ວາ ວາ ‘‘ອິມໍ ວຕ຺ຖາທິກໍ ກປ຺ປິຍຠຓ຺ຑໍ ເທຫິ, ອິມໍ ຣຊນປຈນາທິກໍ ກຣ, ຣຊນກຏ຺ຐາທິມາ ນຍ, ອິມໍ ວາ ຕວ ເທມິ, ຕ຺ວໍ ປນ ອິມຎ຺ຈ ອິມຎ຺ຈ ອາຫຣ, ກຣ, ເທຫີ’’ຕິ ເອວໍ ກຍວິກ຺ກເຍ ສມາປນ຺ເນ ນິສ຺ສຄ຺ຄີຕິ ສມ຺ພນ຺ໂຘ.

໑໑໙. ອິທານິ ປຣິຓາມວເສນ ອາປຕ຺ຕິເຠທໍ ທສ຺ເສຕຸໍ ‘‘ອຕ຺ຕໂນ’’ຕິອາທິ ອາຣທ຺ຘໍ. ຕຕ຺ຣາຍໍ ປິຓ຺ຑຕ຺ໂຖ (ປາຣາ. ໖໕໙; ປາຣາ. ອຏ຺ຐ. ໒.໖໕໘; ກງ຺ຂາ. ອຏ຺ຐ. ປຣິຓຕສິກ຺ຂາປທວຓ຺ຓນາ) – ສງ຺ຆສ຺ສ ວາ ອຎ຺ຎສ຺ສ ວາ ນຕໍ ປຣິຓຕໍ ລາຠໍ ລຠິຕພ຺ພໍ ຈີວຣາທິປຈ຺ຈຍໍ ອຕ຺ຕໂນ ວາ ອຎ຺ຎສ຺ສ ວາ ປຣິຓາເມຍ຺ຍ, ນິສ຺ສຄ຺ຄິຍອາທີນິ ໂຫນ຺ຕີຕິ. ກຖໍ? ໂຍ ປນ ມາຕຸສນ຺ຕກມ຺ປິ ສງ຺ຆສ຺ສ ປຣິຓຕໍ ອຕ຺ຕໂນ ປຣິຓາເມຕິ, ນິສ຺ສຄ຺ຄິຍໍ. ອຎ຺ຎສ຺ສ ປຸຄ຺ຄລສ຺ສ ປຣິຓາເມຕິ, ສຸທ຺ຘິກປາຈິຕ຺ຕິຍໍ. ອຎ຺ຎສ຺ສ ສງ຺ຆສ຺ສ ວາ ເຈຕິຍສ຺ສ ວາ ປຣິຓາເມຕິ, ທຸກ຺ກຏໍ. ໂຍ ປນ ອຎ຺ຎປຸຄ຺ຄລສ຺ສ ວາ ເຈຕິຍສ຺ສ ວາ ປຣິຓຕໍ ອຕ຺ຕໂນ ວາ ອຎ຺ຎປຸຄ຺ຄລສ຺ສ ວາ ສງ຺ຆສ຺ສ ວາ ອຎ຺ຎເຈຕິຍສ຺ສ ວາ ປຣິຓາເມຕິ, ຕສ຺ສາປິ ທຸກ຺ກຏເມວາຕິ.

໑໒໐. ໂຍ ປນ ນິສ຺ສຄ຺ຄິໍ ນິສ຺ສຊ຺ຊິຕພ຺ພໍ ອນິສ຺ສຊ຺ຊິຕ຺ວາ ວິນຍກມ຺ມໍ ອກຕ຺ວາ ປຣິຠຸຎ຺ເຊຍ຺ຍ, ຕສ຺ສ ທຸກ຺ກຏໍ. ໂຍ ວາ ປເຣນ ວິນຍກມ຺ມຕ຺ຖາຍ ນິສ຺ສຏ຺ຐໍ ສກສຎ຺ຎາຍ ນ ທເທຍ຺ຍ, ຕສ຺ສາປິ ທຸກ຺ກຏໍ. ອຎ຺ຎເຖຕຣນ຺ຕິ ເອຕ຺ຖ ອຎ຺ຎຖາຕິ ເຖຍ຺ຍສຎ຺ຎາຍ ສເຈ ນ ທເທຍ຺ຍ, ອິຕຣໍ ຕສ຺ສ ອຄ຺ຆວເສນ ປາຣາຊິກຎ຺ຈ ຖຸລ຺ລຈ຺ຈຍຎ຺ຈ ທຸກ຺ກຏຎ຺ຈ ໂຫຕີຕິ ອຕ຺ໂຖ. ນິສ຺ສຄ຺ຄິຍວິນິຈ຺ຉໂຍ.

ນິສ຺ສຄ຺ຄິຍນິທ຺ເທສວຓ຺ຓນາ ນິຏ຺ຐິຕາ.