໗. ປວາຣຓານິທ຺ເທສວຓ຺ຓນາ

໗໓. ອິທານິ ປວາຣຓາວິຘິໍ ທສ຺ເສຕຸໍ ‘‘ປວາຣຓາ’’ຕິ (ປາຈິ. ໒໓໘-໒໓໙; ປາຈິ. ອຏ຺ຐ. ໒໓໘-໒໓໙; ກງ຺ຂາ. ອຏ຺ຐ. ປຐມປວາຣຓາສິກ຺ຂາປທວຓ຺ຓນາ) ປທໍ ອຸທ຺ຘຏໍ. ຕຕ຺ຖ ອິຣິຍາປເຖນາຕິ ຐານຄມນສຍນນິສຊ຺ຊານໍ ອຎ຺ຎຕເຣນ ອິຣິຍາປເຖນາຕິ ອຕ຺ໂຖ. ຕໂຕ ອິຣິຍາປຖໂຕ ອຎ຺ເຎນ ອິຣິຍາປເຖນ ອນຕິຣິຕ຺ຕກໍ ປຣິຠຸຎ຺ເຊຍ຺ຍ ເຈ, ປາຈິຕ຺ຕິຍນ຺ຕິ ອຕ຺ໂຖ. ປາຈິຕ຺ຕິນຕິຣິຕ຺ຕກນ຺ຕິ ປາຈິຕ຺ຕິ ອນຕິຣິຕ຺ຕກໍ.

໗໔. ອິທານິ ເຍຫິ ອງ຺ເຄຫິ ປວາຣຓາ ໂຫຕິ, ຕານິ ອງ຺ຄານິ ທສ຺ເສຕຸໍ ‘‘ອສນ’’ນ຺ຕິອາທິມາຫ. ຕຕ຺ຖ ອສນນ຺ຕິ ເອເຕນ ອວິປ຺ປກຕໂຠຊນຕາ ວຸຕ຺ຕາ, ຠຸຎ຺ຊມາໂນ ຈ ໂສ ປຸຄ຺ຄໂລ ໂຫຕີຕິ ອຕ຺ໂຖ. ໂຠຊນຎ຺ເຈວາຕິ ຍໍ ຠຸຎ຺ຊນ຺ໂຕ ປວາເຣຕິ, ຕໍ ໂອທໂນ ກຸມ຺ມາໂສ ສຕ຺ຕຸ ມຈ຺ໂຉ ມໍສນ຺ຕິ ອິເມສຸ ອຎ຺ຎຕຣໍ ໂຫຕີຕິ ອຕ຺ໂຖ. ອຠິຫາໂຣຕິ ທາຍໂກ ຕສ຺ສ ຕໍ ຠຕ຺ຕໍ ກາເຍນ ອຠິຫຣຕີຕິ ອຕ຺ໂຖ, ວາຈາຠິຫາໂຣ ປນ ນ ຄເຫຕພ຺ໂພ. ສມີປຕາຕິ ທາຍໂກ ປວາຣຓປ຺ປໂຫນກໂຠຊນໍ ຄເຫຕ຺ວາ ອຑ຺ຒເຕຍ຺ຍຫຕ຺ຖປ຺ປມາເຓ ໂອກາເສ ໂຫຕີຕິ ອຕ຺ໂຖ. ກາຍວາຈາປຏິກ຺ເຂໂປຕິ ຫຕ຺ຖປາເສ ຐິເຕນ ອຠິຫຏໍ ຠິກ຺ຂໍ ກາເຍນ ວາ ວາຈາຍ ວາ ປຏິກ຺ຂິເປຍ຺ຍາຕິ ອຕ຺ໂຖ. ເອຕ຺ຖ ປນ ສເຈ ຠິກ຺ຂຸ ນິສິນ຺ໂນ ໂຫຕິ, ອານິສທສ຺ສ ປາຣິມນ຺ຕໂຕ ປຏ຺ຐາຍ, ສເຈ ຐິໂຕ, ປຓ຺ຫິອນ຺ຕໂຕ ປຏ຺ຐາຍ, ສເຈ ນິປນ຺ໂນ, ເຍນ ປສ຺ເສນ ນິປນ຺ໂນ, ຕສ຺ສ ປາຣິມນ຺ຕໂຕ ປຏ຺ຐາຍ ທາຍກສ຺ສາປິ ຕຖາວິຘສ຺ສ ຐເປຕ຺ວາ ປສາຣິຕຫຕ຺ຖໍ ຍໍ ຕສ຺ສ ອາສນ຺ນຕຣໍ ອງ຺ຄໍ, ຕສ຺ສ ວເສນ ປຣິຈ຺ເຉໂທ ກາຕພ຺ໂພ. ປຎ຺ຈ ອງ຺ຄາ ປວາຣຓາຕິ ‘‘ອສນໍ ປຎ຺ຎາຍຕິ, ໂຠຊນໍ ປຎ຺ຎາຍຕິ, ຫຕ຺ຖປາເສ ຐິໂຕ ອຠິຫຣຕິ, ປຏິກ຺ເຂໂປ ປຎ຺ຎາຍຕີ’’ຕິ (ປາຈິ. ໒໓໙; ປຣິ. ໔໒໘) ປາຬິຍໍ ວຸຕ຺ເຕຫິ ອິເມຫິ ປຎ຺ຈຫິ ອງ຺ເຄຫິ ປວາຣຓາ ໂຫຕີຕິ ອຕ຺ໂຖ.

໗໕. ອິທານິ ເອເຕສຸ ປຎ຺ຈສຸ ໂຠຊນໍ ທສ຺ເສຕຸໍ ‘‘ໂອທໂນ’’ຕິອາທິ ວຸຕ຺ຕໍ. ອິທານິ ໂອທນາທໂຍ ອິເມຫິ ນິພ຺ພຕ຺ຕາຕິ ທສ຺ເສຕຸໍ ‘‘ສາລີ’’ຕິອາທິມາຫ. ຕຕ຺ຖ ເສຕຣຕ຺ຕກາຬເຠທາ ສພ຺ພາປິ ກງ຺ຄຸຊາຕິໂຍ ກງ຺ຄູຕິ ຄເຫຕພ຺ພາ. ກາຬເສຕາ ກຸທ຺ຣູສວຣກາ. ອິເມສໍ ສຕ຺ຕນ຺ນໍ ຘຎ຺ຎານໍ ໂອທໂນ ຈ ໂຠຊ຺ຊຍາຄຸ ຈ ໂອທໂນ ນາມາຕິ ອຕ຺ໂຖ.

໗໖. ສາມາກາທິຕິຓໍ (ປາຈິ. ອຏ຺ຐ. ໒໓໘-໒໓໙) ກຸທ຺ຣູສເກ ສງ຺ຄຫໍ ຄຕນ຺ຕິ ອຕ຺ໂຖ. ວຣກໂຈຣໂກ ວຣເກ ສງ຺ຄຫໍ ຄໂຕ, ສາລິຍຎ຺ເຈວ ນີວາໂຣ ສງ຺ຄຫໍ ຄໂຕ ເສຕຕ຺ຕາຕິ ວທນ຺ຕິ. ອິເມສໍ ວຸຕ຺ຕປ຺ປກາຣານໍ ສານຸໂລມານໍ ສຕ຺ຕນ຺ນໍ ຘຎ຺ຎານໍ ຕຓ຺ຑຸເລ ຄເຫຕ຺ວາ ‘‘ຍາຄຸໍ ປຈິສ຺ສາມາ’’ຕິ ວາ ‘‘ຠຕ຺ຕໍ ປຈິສ຺ສາມາ’’ຕິ ວາ ຍໍ ກິຎ຺ຈິ ສນ຺ຘາຍ ປຈນ຺ຕິ, ສເຈ ອຸຓ຺ຫໍ ວາ ສີຕລໍ ວາ ຠຸຎ຺ຊນ຺ຕານໍ ໂຠຊນກາເລ ຄຫິຕຄຫິຕຏ຺ຐາເນ ໂອຘິ ປຎ຺ຎາຍຕິ, ອຍໍ ໂອທໂນ ນາມ, ປວາຣຓໍ ຊເນຕິ. ໂຍປິ ປາຍາໂສ ວາ ອມ຺ພິລຍາຄຸ ວາ ອຸທ຺ຘນໂຕ ໂອຕາຣິຕມຕ຺ຕາ ອພ຺ຠຸຓ຺ຫາ ອາວິຊ຺ຌິຕ຺ວາ ປິວິຕຸໍ ສກ຺ກາ, ຄຫິໂຕກາເສປິ ໂອຘິໍ ນ ທສ຺ເສຕິ, ອຍໍ ປວາຣຓໍ ນ ຊເນຕິ. ອຸສຸມາຍ ປນ ວິຄຕາຍ ຆນຠາວໍ ຄຈ຺ຉຕິ, ໂອຘິ ປຎ຺ຎາຍຕິ, ປຸນ ປວາຣຓໍ ຊເນຕິ, ປຸພ຺ເພ ຕນຸກຠາໂວ ນ ຣກ຺ຂຕິ. ຠຕ຺ເຕ ປນ ອຸທກກຎ຺ຊິກຂີຣາທີນິ ອາກິຣິຕ຺ວາ ‘‘ຍາຄຸໍ ຄຓ຺ຫຖາ’’ຕິ ວທນ຺ຕິ, ກິຎ຺ຈາປິ ຕນຸກາ ໂຫຕິ, ປວາຣຓໍ ຊເນຕິເຍວ ຕສ຺ມິໍ ຍາຄຸຍາ ນຕ຺ຖິຠາວໂຕ. ສເຈ ປນ ປກ຺ກຸຖິເຕສຸ ອຸທກາທີສຸ ປກ຺ຂິປິຕ຺ວາ ປຈິຕ຺ວາ ເທນ຺ຕິ, ຍາຄຸສງ຺ຄຫເມວ ຄຈ຺ຉຕິ.

໗໗. ຠຏ຺ຐຘຎ຺ຎມໂຍຕິ ສຕ຺ຕວິຘານິປິ ຘຎ຺ຎານິ ຄເຫຕ຺ວາ ຂຣປາກຠຊ຺ຊິຕານໍ ເຕສໍ ຕຓ຺ຑຸເລ ໂກຏ຺ເຏຕ຺ວາ ກຕຈຸຓ຺ຓກຸຓ຺ຑການິ ສຕ຺ຕຸ ນາມ. ສມປາກຠຊ຺ຊິຕານໍ ປນ ອາຕປສຸກ຺ຂານໍ ວາ ຕຓ຺ຑຸລານໍ ຈຸຓ຺ຓກຸຓ຺ຑການິ ສຕ຺ຕຸສງ຺ຂ຺ຍໍ ນ ຄຈ຺ຉນ຺ຕິ. ຍວສມ຺ຠໂວຕິ ອຎ຺ເຎຫິ ປນ ມຸຄ຺ຄາທີຫິ ກຕກຸມ຺ມາໂສ ນ ປວາເຣຕີຕິ ອຘິປ຺ປາໂຍ. ອຸທກສມ຺ຠໂວຕິ ອິມິນາ ກກ຺ກຏກສິປ຺ປິກສມ຺ພຸກາທໂຍປິ ສງ຺ຄຫໍ ຄຈ຺ຉນ຺ຕິ. ສເຈ ຍາຄຸປານກາເລ ເອກສ຺ມິໍ ຠາຊເນ ຐເປຕ຺ວາ ມຈ຺ຉມໍສໍ ວາ ຂາທນ຺ຕິ, ເຕ ເຈ ອຂາທນ຺ໂຕ ອຎ຺ຎໍ ປວາຣຓປ຺ປໂຫນກໍ ປຏິກ຺ຂິປຕິ, ນ ປວາເຣຕິ. ຂາທິເຕປິ ສເຈ ມຸເຂ ອວສິຏ຺ຐໍ ນຕ຺ຖິ, ຕທາ ປຏິກ຺ຂິປນ຺ໂຕປິ ນ ປວາເຣຕິເຍວ. ສເຈ ປຕ຺ເຕ ອວສິຏ຺ຐໍ ອຕ຺ຖິ, ມຸເຂ ນຕ຺ຖິ, ຕຎ຺ເຈ ອຂາທິຕຸກາໂມ ໂຫຕິ, ອຎ຺ຎຕ຺ຖ ວາ ຄນ຺ຕ຺ວາ ຂາທິຕຸກາໂມ, ຕສ຺ມິໍ ຂເຓ ປຏິກ຺ຂິປນ຺ໂຕປິ ນ ປວາເຣຕິເຍວ.

໗໘. ໂຠຊນນ຺ຕິ (ປາຈິ. ອຏ຺ຐ. ໒໓໘-໒໓໙) ປຎ຺ຈສຸ ໂຠຊເນສຸ ຍໍ ກິຎ຺ຈິ ໂຠຊນໍ. ກປ຺ປິຍໍ ວາ ອກປ຺ປິຍໍ ວາ ຠຸຎ຺ຊນ຺ໂຕຕິ ສມ຺ພນ຺ໂຘ. ນິເສຘຍນ຺ຕິ ກາເຍນາຠິຫຏໍ ອງ຺ຄຸລິຈລນາທິນາ ວາ ຠມຸກວິກາເຣນ ວາ ກຸທ຺ຘຠາເວນ ໂອໂລເກນ ວາ ປຏິກ຺ຂິປນ຺ໂຕ ກາເຍນ ວາ ‘‘ອລ’’ນ຺ຕິ ວາ ‘‘ນ ຄຓ຺ຫາມີ’’ຕິ ວາ ‘‘ມາ ອາກິຣາ’’ຕິ ວາ ‘‘ອປຄຈ຺ຉາ’’ຕິ ວາ ອາທິນາ ນເຍນ ປຏິກ຺ຂິປນ຺ໂຕ ວາຈາຍ ວາ ນິເສຘຍນ຺ໂຕຕິ ອຕ຺ໂຖ. ກປ຺ປນ຺ຕິ ກປ຺ປິຍໂຠຊນເມວ ປຏິກ຺ຂິປນ຺ໂຕ ໂສ ປວາເຣຕິ, ອກປ຺ປິຍມໍສໍ ວາ ໂຠຊນໍ ວາ ປຏິກ຺ຂິປນ຺ໂຕ ນ ປວາເຣຕິ. ກສ຺ມາ? ຕສ຺ສ ປຏິກ຺ຂິປິຕພ຺ພຏ຺ຐາເນ ຐິຕຕ຺ຕາ. ສເຈ ກປ຺ປິຍໂຠຊນໍ ຠຸຎ຺ຊມາໂນ ອກປ຺ປິຍໍ ປຏິກ຺ຂິປຕິ, ນ ປວາເຣຕິ. ກສ຺ມາ? ຕສ຺ສ ປຏິກ຺ຂິປິຕພ຺ພໂຕ. ອິທານິ ມິສ຺ສກນຍໍ ທສ຺ເສຕຸໍ ‘‘ຕນ຺ນາເມນາ’’ຕິອາທິ ວຸຕ຺ຕໍ. ຕຕ຺ຣາຍໍ ປິຓ຺ຑຕ຺ໂຖ – ຕນ຺ນາເມນ ວາ ອິມນ຺ຕິ ວາ ອຠິຫຏໍ ກປ຺ປິຍໍ ນິເສຘຍໍ ປວາເຣຍ຺ຍາຕິ. ກິໍ ວຸຕ຺ຕໍ ໂຫຕິ? ໂຍ ປນ ມຈ຺ຉມໍສມິສ຺ສໍ (ກງ຺ຂາ. ອຏ຺ຐ. ປຐມປວາຣຓາສິກ຺ຂາປທວຓ຺ຓນາ; ປາຈິ. ອຏ຺ຐ. ໒໓໘-໒໓໙) ຍາຄຸໍ ພ຺ຍຎ຺ຊນໍ ວາ ອາຫຣິຕ຺ວາ ‘‘ມຈ຺ຉໍ ຄຓ຺ຫຖ, ມໍສໍ ຄຓ຺ຫຖາ’’ຕິ ວທຕິ, ຕໍ ປຏິກ຺ຂິປໂຕ ປວາຣຓາ ໂຫຕິ. ສເຈ ‘‘ຍາຄຸໍ ຄຓ຺ຫຖ, ຣສພ຺ຍຎ຺ຊນໍ ຄຓ຺ຫຖາ’’ຕິ ວທຕິ, ຕໍ ປຏິກ຺ຂິປໂຕ ປວາຣຓາ ນ ໂຫຕິ. ກສ຺ມາ? ຕສ຺ສາປິ ອຕ຺ຖິຕາຍ. ສເຈ ‘‘ອິມໍ ຄຓ຺ຫຖາ’’ຕິ ສວຕ຺ຖຸກໍ ກຕ຺ວາ ເທຕິ, ຕໍ ປຏິກ຺ຂິປໂຕ ປວາຣຓາ ໂຫຕິ. ຠຕ຺ຕມິສ຺ສເກປິ ເອເສວ ນໂຍ. ສເຈ ອຎ຺ຎສ຺ສ ອຠິຫຏໍ ປຏິກ຺ຂິປຕິ, ປວາຣຓາ ນຕ຺ຖິເຍວ.

໗໙-໘໐. ອິທານິ ປວາຣຓໍ ອຊເນນ຺ເຕ ທສ຺ເສຕຸໍ ‘‘ລາຊາ’’ຕິອາທິ ວຸຕ຺ຕໍ. ເອຕ຺ຖ ລາຊາ ຕໍສຕ຺ຕຸຠຕ຺ຕານີຕິ (ກງ຺ຂາ. ອຏ຺ຐ. ປຐມປວາຣຓາສິກ຺ຂາປທວຓ຺ຓນາ) ລາຊາ ຈ ລາເຊຫິ ກຕສຕ຺ຕຸຠຕ຺ຕານິ ຈາຕິ ອຕ຺ໂຖ. ມຈ຺ຉມໍສປູເວສຸ ປນ ປວາຣຓາ ໂຫຕິ, ຕສ຺ມາ ‘‘ສຸທ຺ຘຂຊ຺ຊໂກ’’ຕິ ວຸຕ຺ຕໍ. ຠຏ຺ຐປິຏ຺ຐນ຺ຕິ ປຸພ຺ເພ ອາມກໍ ປຈ຺ຉາ ຠຊ຺ຊິຕພ຺ພນ຺ຕິ ວຸຕ຺ຕໍ ໂຫຕິ. ເວຬຸອາທີນໍ ວຸຕ຺ຕາວເສສານໍ ຠຕ຺ຕນ຺ຕິ ສມ຺ພນ຺ໂຘ. ຣສຍາຄຸ ຣໂສ ປກ຺ກຍາຄຸ. ມໍສາທີຫິ ອມິສ຺ສິຕາ ສຸທ຺ຘຍາຄຸ. ປຸຖຸກາມຍໍ ປນ ຍໍ ກິຎ຺ຈິ ປວາຣຓໍ ນ ຊເນຕິ.

໘໑. ວຸຏ຺ຐາຍາຕິ (ປາຈິ. ອຏ຺ຐ. ໒໓໘-໒໓໙) ອາສນາ ອຸຏ຺ຐາຍ ອຕິຣິຕ຺ຕໍ ນ ກາຕພ຺ພນ຺ຕິ ສມ຺ພນ຺ໂຘ. ສເຈ ປວາເຣຕ຺ວາ ອາສນາ ນ ວຸຏ຺ຐາຕິ ຠິກ຺ຂຸ, ຕສ຺ສາປິ ອຕິຣິຕ຺ຕໍ ກາຕຸໍ ລຠຕິ. ອຠຸຕ຺ເຕນ ຈ ໂຠຊນນ຺ຕິ ເຍນ ປຎ຺ຈນ຺ນໍ ໂຠຊນານໍ ອຎ຺ຎຕຣໍ ໂຠຊນໍ ອນ຺ຕມໂສ ກຸສຄ຺ເຄນາປິ ນ ຠຸຕ຺ຕໍ, ເຕນາປິ ອຕິຣິຕ຺ຕໍ ນ ກາຕພ຺ພນ຺ຕິ ອຕ຺ໂຖ. ເຍນ ປນ ອຣຸຓຸຄ຺ຄເມປິ ຠຸຕ຺ຕໍ ໂຫຕິ, ໂສ ເຈ ອປວາຣິໂຕ ອາສນາ ວຸຏ຺ຐິໂຕປິ ມຊ຺ຌນ຺ຫິກສມເຍປິ ປຸນ ກິຎ຺ຈິ ອຠຸຕ຺ວາປິ ກາຕຸໍ ລຠຕິ. ເຍນ ຍໍ ວາ ປຸເຣ ກຕນ຺ຕິ ເຍນ ຍໍ ວາ ປຸພ຺ເພ ກຕໍ, ເຕນ ຕມ຺ປິ ປຈ຺ຉາ ນ ກາຕພ຺ພໍ. ອຎ຺ເຎນ ປນ ຕໍ ກາຕຸໍ ວຏ຺ຏຕີຕິ ວທນ຺ຕິ.

໘໒. ຍໍ ຜລໍ ວາ ກນ຺ທມູລໍ ວາ ປຎ຺ຈຫິ ສມຓກປ຺ເປຫິ ກຕກປ຺ປິຍໍ ອຎ຺ຎມ຺ປິ ກປ຺ປິຍໂຠຊນໍ ວາ ກປ຺ປິຍມໍສໍ ວາ, ອິທໍ ກປ຺ປິຍໍ ນາມ, ວຸຕ຺ຕປ຺ປກາຣວິປຣີຕໍ ອກປ຺ປິຍໍ ນາມ, ຕສ຺ມິໍ ອຕິຣິຕ຺ຕກຣຓໍ ນ ຣຸຫຕິ, ຍຎ຺ຈ ປຏິຄ຺ຄເຫຕ຺ວາ ນ ຄຫິຕໍ, ຕສ຺ມິມ຺ປິ ນ ຣຸຫຕິ, ເຕນ ວຸຕ຺ຕໍ ‘‘ກປ຺ປິຍໍ ຄຫິຕຎ຺ເຈວາ’’ຕິ. ອຸຈ຺ຈາຣິຕນ຺ຕິ ກປ຺ປິຍໍ ກາເຣຕຸໍ ອາຄເຕນ ຠິກ຺ຂຸນາ ອີສກມ຺ປິ ອຸກ຺ຂິຕ຺ຕໍ ວາ ອປນມິຕໍ ວາຕິ ອຕ຺ໂຖ. ຫຕ຺ຖປາສໂຕ ພຫິ ຐິຕໍ ກາຕຸໍ ນ ວຏ຺ຏຕິ, ເຕນ ວຸຕ຺ຕໍ ‘‘ຫຕ຺ຖປາສຄ’’ນ຺ຕິ. ອຕິຣິຕ຺ຕໍ ກໂຣນ຺ເຕວນ຺ຕິ ອຕິຣິຕ຺ຕໍ ກໂຣນ຺ໂຕ ‘‘ອລເມຕໍ ສພ຺ພ’’ນ຺ຕິ ວຈີເຠທໍ ກຕ຺ວາ ເອວໍ ຠາສຕູຕິ ອຕ຺ໂຖ. ‘‘ອລເມຕໍ ສພ຺ພ’’ນ຺ຕິ ຕິກ຺ຂຕ຺ຕຸໍ ວຕ຺ຕພ຺ພໍ, ອຍໍ ກິຣ ອາຈິຓ຺ໂຓ. ວິນຍຘຣາ ກິຣ ປນ ‘‘ສກິໍ ເອວ ວຕ຺ຕພ຺ພ’’ນ຺ຕິ ວທນ຺ຕິ. ອລເມຕໍ ສພ຺ພນ຺ຕິ ອິທມ຺ປິ ໂວ ອຘິກໍ, ອິໂຕ ອຎ຺ຎໍ ນ ລຈ຺ຉສີຕິ ອຕ຺ໂຖ.

໘໓. ອນຸປສມ຺ປນ຺ນຫຕ຺ຖຄນ຺ຕິ ກປ຺ປິຍໍ ກໂຣນ຺ເຕນ ປນ ອນຸປສມ຺ປນ຺ນສ຺ສ ຫຕ຺ເຖ ຐິຕໍເຍວ ນ ກາຕພ຺ພໍ, ຕໍ ປນ ອຎ຺ເຎນ ຠິກ຺ຂຸນາ ປຏິຄ຺ຄຫາເປຕ຺ວາ ຕສ຺ສ ຫຕ຺ເຖ ຐິຕໍ ອຕິຣິຕ຺ຕໍ ກຕ຺ວາ ອນຸປສມ຺ປນ຺ນສ຺ສ ທາຕຸໍ ວຏ຺ຏຕິ. ອຕ຺ຕນາ ອາຄນ຺ຕ຺ວາ ອຎ຺ຎສ຺ສ ຫຕ຺ເຖ ຈ ເປສຍິຕ຺ວາປິ ກາເຣຕຸໍ ລພ຺ຠເຕຕິ ອຕ຺ໂຖ. ຕໍ ປນ ອຕິຣິຕ຺ຕກາຣກໍ ຐເປຕ຺ວາ ອຎ຺ໂຎ ສພ຺ໂພ ປວາຣິໂຕປິ ອປ຺ປວາຣິໂຕປິ ຠຸຎ຺ຊິຕຸໍ ລຠຕີຕິ ອຕ຺ໂຖ. ສເຈ ປວາຣິໂຕ ປຣິຠຸຎ຺ຊຕິ, ຍຖາ ອກເຕນ ມິສ຺ສໍ ນ ໂຫຕິ, ຕຖາ ມຸຂຎ຺ຈ ຫຕ຺ຖຎ຺ຈ ສຸທ຺ຘໍ ກຕ຺ວາ ຠຸຎ຺ຊິຕພ຺ພໍ. ຄິລານສ຺ສ ຠຸຕ຺ຕາວເສສມ຺ປິ ຕສ຺ສ ‘‘ອຊ຺ຊ ວາ ສ຺ເວ ວາ ຂາທິສ຺ສຕີ’’ຕິ ອາຫຏມ຺ປິ ອນຕິຣິຕ຺ຕກຕໍ ຠຸຎ຺ຊິຕຸໍ ວຏ຺ຏຕີຕິ. ປວາຣຓາວິນິຈ຺ຉໂຍ.

ປວາຣຓານິທ຺ເທສວຓ຺ຓນາ ນິຏ຺ຐິຕາ.