໓໘. ກຸລທູສນນິທ຺ເທສວຓ຺ຓນາ

໒໙໗. ‘‘ກຸລານິ ທູເສຕິ ປຸປ຺ເຜນ ວາ ຜເລນ ວາ ຈຸຓ຺ເຓນ ວາ ມຕ຺ຕິກາຍ ວາ ທນ຺ຕກຏ຺ເຐນ ວາ ເວຬຸຍາ ວາ ເວຊ຺ຊິກາຍ ວາ ຊງ຺ຆເປສນິເຍນ ວາ’’ຕິ (ປາຣາ. ໔໓໗) ວຸຕ຺ຕຕ຺ຕາ ຕານິ ອຏ຺ຐ ວຕ຺ຖູນິ ທສ຺ເສຕຸໍ ‘‘ປຸປ຺ຜ’’ນ຺ຕິອາທິມາຫ. ອິມາຍ ມິຈ຺ຉາປຏິປຕ຺ຕິຍາ ກຸລານໍ ອຎ຺ເຎສຸ ສີລວນ຺ເຕສຸ ປສາທໍ ທູເສຕິ ວິນາເສຕີຕິ ກຸລທູສນໍ ທຸກ຺ກຏໍ ອາປຊ຺ຊຕິ. ຕໍ ປນ ອຕ຺ຕໂນ ສນ຺ຕເກ ຈ ປຣສນ຺ຕເກ ຈ ເວທິຕພ຺ພໍ.

໒໙໘. ອິທານິ ອິເມສຸ ວຕ຺ຖູສຸ ນ ເກວລໍ ກຸລທູສນທຸກ຺ກຏເມວ ອາປຊ຺ຊຕິ, ຖຸລ຺ລຈ຺ຈຍາທີນິປິ ອາປຊ຺ຊຕີຕິ ທສ຺ເສຕຸໍ ‘‘ຖຸລ຺ລຈ຺ຈຍ’’ນ຺ຕິອາທິມາຫ. ສງ຺ຆິກໍ ຄຣຸຠຓ຺ຑໍ ອິສ຺ສເຣນ ເທນ຺ຕສ຺ສ ຖຸລ຺ລຈ຺ຈຍນ຺ຕິ ສມ຺ພນ຺ໂຘ. ເສນາສນຕ຺ຖາຍ ນິຍມິຕໍ ປນ ປຸປ຺ຜາທິ ຄຣຸຠຓ຺ຑໍ ໂຫຕິ. ສງ຺ຆສ຺ສ ວາ ອຎ຺ຎສ຺ສ ວາ ສນ຺ຕກໍ ເຖຍ຺ຍຈິຕ຺ເຕນ ເທນ຺ຕສ຺ສ ທຸກ຺ກຏາທີນິ ໂຫນ຺ຕີຕິ ປາຐເສໂສ, ຕສ຺ສ ຠຓ຺ຑສ຺ສ ອຄ຺ຆວເສນ ທຸກ຺ກຏຖຸລ຺ລຈ຺ຈຍປາຣາຊິການິ ໂຫນ຺ຕີຕິ ອຕ຺ໂຖ.

໒໙໙-໓໐໐. ສພ຺ພຖາຕິ (ປາຣາ. ອຏ຺ຐ. ໒.໔໓໑) ກປ຺ປິຍໂວຫາຣອກປ຺ປິຍໂວຫາຣປຣິຍາຍໂອຠາສນິມິຕ຺ຕກມ຺ມາທີຫິ ນ ວຏ຺ຏຕີຕິ ອຕ຺ໂຖ. ວຕິອາທີນິ ກຕ຺ວາ ຊຄ຺ຄິຕຸຎ຺ຈ. ອຕ຺ຕໂນ ປຣິໂຠຄຕ຺ຖນ຺ຕິ ຜລປຣິໂຠຄຕ຺ຖໍ. ໂຣປນາທີນີຕິ ໂຣປາປນາທີນິ. ອາທິ-ສທ຺ເທນ ສິຎ຺ຈາປນໂອຈິນາປນາທີນິ ຄຫິຕານິ. ກຸທ຺ທາລຂຓິຕ຺ຕິວາສິຜຣສຸອຸທກຠາຊນາທີນິ ອາຫຣິຕ຺ວາ ສມີເປ ຐປນວເສນ ນິມິຕ຺ຕໂຕ ຈ ກຸທ຺ທາລຂຓິຕ຺ຕາທີນິ ຈ ມາລາວຈ຺ເຉ ຈ ຄເຫຕ຺ວາ ຐິເຕ ‘‘ສາມເຓຣາທໂຍ ທິສ຺ວາ ‘ເຖໂຣ ກາຣາເປຕຸກາໂມ’ຕິ ອາຄນ຺ຕ຺ວາ ກໂຣນ຺ຕີ’’ຕິ ສຎ຺ຎາຍ ໂອຠາສໂຕ ຈ ‘‘ອິມໍ ຣຸກ຺ຂໍ ຊານ, ອິມໍ ອາວາຏໍ ຊານາ’’ຕິອາທິກປ຺ປິຍໂວຫາຣໂຕ ຈ ‘‘ປຓ຺ຑິເຕນ ມາລາວຈ຺ຉາທໂຍ ໂຣປາເປຕພ຺ພາ, ນ ຈິຣສ຺ເສວ ອຸປກາຣາຍ ສໍວຕ຺ຕນ຺ຕີ’’ຕິອາທິປຣິຍາຍໂຕ ຈ ໂຣປນາທີນິ ລພ຺ຠເຣຕິ ສມ຺ພນ຺ໂຘ.

໓໐໑-໒. ອິທານິ ອຏ຺ຐສຸ ວຕ຺ຖູສຸ ອວເສສານິ ທ຺ເວ ວຕ຺ຖູນິ ທສ຺ເສຕຸໍ ‘‘ວຸຕ຺ຕາວ ເວຊ຺ຊິກາ ຊງ຺ຆເປສເນ’’ຕິ ວຸຕ຺ຕໍ. ຕຕ຺ຖ ເວຊ຺ຊິກາ ປຸພ຺ເພ ວຸຕ຺ຕາວ, ອິທານິ ຊງ຺ຆເປສນາທິວິນິຈ຺ຉຍໍ ວກ຺ຂາມີຕິ ອຕ຺ໂຖ. ປິຕໂຣຕິ (ປາຣາ. ອຏ຺ຐ. ໒.໔໓໖-໔໓໗) ມາຕາປິຕໂຣ. ຠຓ຺ຑຸນ຺ຕິ ປພ຺ພຊ຺ຊາເປກ຺ຂໍ. ຠິກ຺ຂຸສ຺ສ ສກໍ ເວຍ຺ຍາວຈ຺ຈກຣຎ຺ຈາຕິ ເອເຕ ຐເປຕ຺ວາ ກສິວາຓິຊ຺ຊາທິຄິຫິກມ຺ເມສຸ ທູຕສາສນໍ ຫຣເຓ ທຸກ຺ກຏນ຺ຕິ ອຕ຺ໂຖ. ປຐມໍ ສາສນໍ ອຄ຺ຄເຫຕ຺ວາ ປຸນ ຕໍ ທິສ຺ວາ ວາ ຕສ຺ສ ສນ຺ຕິກໍ ຄນ຺ຕ຺ວາ ວາ ວທໂຕປິ ທຸກ຺ກຏເມວາຕິ ອຕ຺ໂຖ. ສາສນໍ ອຄ຺ຄເຫຕ຺ວາ ອາຄຕານໍ ປນ ‘‘ຠນ຺ເຕ, ຕສ຺ມິໍ ຄາເມ ອິຕ຺ຖນ຺ນາມສ຺ສ ກາ ປວຕ຺ຕີ’’ຕິ ປຸຈ຺ຉິຍມາເນ ກເຖຕຸໍ ວຏ຺ຏຕິ. ປຸຈ຺ຉິຕປຎ຺ເຫ ໂທໂສ ນຕ຺ຖິ.

໓໐໓. ເອວໍ ກຸລທູສເນນ ອຸປ຺ປນ຺ນປຈ຺ຈຍາ. ‘‘ປຎ຺ຈນ຺ນມ຺ປີ’’ຕິ ວຸຕ຺ຕຕ຺ຕາ ອນຸປສມ຺ປນ຺ເນນ ກຕມ຺ປິ ເອທິສໍ ນ ວຏ຺ຏຕິ ເອວ ມິຈ຺ຉາຊີວຕ຺ຕາ. ອາຕຸມາວຕ຺ຖຸ (ມຫາວ. ໓໐໓) ເຈຕ຺ຖ ນິທສ຺ສນໍ. ກິໍ ວິຍາຕິ ເຈ, ຕໍ ທສ຺ເສຕຸໍ ‘‘ອຠູຕາໂຣຈນາຣູປ-ສພ຺ໂຍຫາຣຸຄ຺ຄຫາທິສາ’’ຕິ ວຸຕ຺ຕໍ. ຕຕ຺ຖ ອຸຄ຺ຄຫາທິສາຕິ ເອເຕຫິ ອຸປ຺ປນ຺ນປຈ຺ຈຍສທິສາຕິ ອຕ຺ໂຖ.

໓໐໔. ອິທານິ ປຸປ຺ຜາທີນິ ເກສໍ ທາຕຸໍ ວຏ຺ຏນ຺ຕິ, ເກສໍ ທາຕຸໍ ນ ວຏ຺ຏນ຺ຕີຕິ ຕໍ ທສ຺ເສຕຸໍ ‘‘ຫຣາເປຕ຺ວາ’’ຕິອາທິມາຫ. ປິຕູນໍ (ປາຣາ. ອຏ຺ຐ. ໒.໔໓໖-໔໓໗) ທາຕຸໍ ລພ຺ຠຕີຕິ ສມ຺ພນ຺ໂຘ. ເສສຎາຕີນໍ ປຕ຺ຕານໍ ເອວ. ລິງ຺ຄນ຺ຕິ ສິວລິງ຺ຄໍ.

໓໐໕. ຕຖາ ຜລນ຺ຕິ ຜລມ຺ປິ ມາຕາປິຕູນໍ ຫຣິຕ຺ວາປິ ຫຣາເປຕ຺ວາປິ ທາຕຸໍ ລພ຺ຠຕີຕິ ອຕ຺ໂຖ. ນ ເກວລໍ ມາຕາປິຕູນໍເຍວ, ອຎ຺ເຎສມ຺ປິ ທາຕຸໍ ລພ຺ຠຕີຕິ ທສ຺ເສຕຸໍ ‘‘ຄິລານານ’’ນ຺ຕິອາທິມາຫ. ສປຣສນ຺ຕກນ຺ຕິ ເອຕ຺ຖ ປໂຣຕິ ອຕ຺ຕໂນ ວິສ຺ສາສຎ຺ຎາຕໂກ ເອວ ອຘິປ຺ເປໂຕ.

໓໐໖. ຠາເຊນ຺ເຕຕິ ສງ຺ຆສ຺ສ ຜລປຸປ຺ຜມ຺ຫິ ຠາຊິຍມາເນ ສມ຺ມເຕນ ເທຍ຺ຍນ຺ຕິ ສມ຺ພນ຺ໂຘ. ອິຕເຣນ ອສມ຺ມເຕນ ອປໂລເກຕ຺ວາ ທາຕພ຺ພນ຺ຕິ ອຕ຺ໂຖ.

໓໐໗. ປຣິຈ຺ຉິຊ຺ຊາຕິ ອາຄຕານໍ ທາຕພ຺ພນ຺ຕິ ຜລວເສນ ວາ ຣຸກ຺ຂວເສນ ວາ ປຣິຈ຺ຉິນ຺ທິຕ຺ວາຕິ ອຕ຺ໂຖ. ອິຕຣສ຺ສາຕິ ອິສ຺ສຣາທິກສ຺ສ. ກຕິກໍ ວຕ຺ວາຕິ ‘‘ອິມສ຺ມິໍ ຣຸກ຺ເຂ ເອຕ຺ຕການິ ຜລານິ ລພ຺ຠນ຺ຕີ’’ຕິ ເອວໍ ວຕ຺ວາ.

໓໐໘. ເສເສຕິ ມຕ຺ຕິກາທນ຺ຕກຏ຺ຐເວຬຸມ຺ຫິ (ປາຣາ. ອຏ຺ຐ. ໒.໔໓໖-໔໓໗). ຍຖາວຸຕ຺ຕນໂຍ ເອວາຕິ ເອຕ຺ຖ ອຕ຺ຕໂນ ຈ ປຣສ຺ສ ຈ ສນ຺ຕກໍ ກຸລສງ຺ຄຫຕ຺ຖາຍ ທທໂຕ ທຸກ຺ກຏນ຺ຕິອາທິນາ ເຫຏ຺ຐາ ວຸຕ຺ຕນເຍເນວ ວິນິຈ຺ຉໂຍ ເວທິຕພ຺ໂພຕິ ອຕ຺ໂຖ. ປຓ຺ຓມ຺ປີຕິ ກິຎ຺ຈາປິ ປາຬິຍໍ ປຓ຺ຓທານໍ ນ ວຸຕ຺ຕໍ, ຕຖາປິ ກຸລທູສເນ ປເວສເຍຕິ ອຕ຺ໂຖ. ກຸລທູສນວິນິຈ຺ຉໂຍ.

ກຸລທູສນນິທ຺ເທສວຓ຺ຓນາ ນິຏ຺ຐິຕາ.