໓໖. ເຠສຊ຺ຊນິທ຺ເທສວຓ຺ຓນາ

໒໗໔-໕. ສຫຘມ຺ມິນໍ ລພ຺ຠໍ ເຠສຊ຺ຊກຣຓນ຺ຕິ ສມ຺ພນ຺ໂຘ. ນ ເກວລໍ ປຎ຺ຈນ຺ນໍ ສຫຘມ຺ມິການໍເຍວ ຠິກ຺ຂາຈຣິຍວິຎ຺ຎຕ຺ຕິສເກຫິ ເຠສຊ຺ຊກຣຓໍ ລພ຺ຠຕິ, ອຖ ໂຂ ອປເຣສມ຺ປິ ປຎ຺ຈນ຺ນໍ ລພ຺ຠຕິ, ເຕ ທສ຺ເສນ຺ໂຕ ‘‘ປິຕູນ’’ນ຺ຕິອາທິມາຫ. ປິຕູນນ຺ຕິ ມາຕາປິຕູນນ຺ຕິ ອຕ຺ໂຖ. ເຍ ມາຕາປິຕໂຣ ຊຄ຺ຄນ຺ຕິ ອຸປຏ຺ຐຫນ຺ຕິ, ເຕ ຕທຸປຏ຺ຐາກາ ນາມ. ຠິກ຺ຂຸໍ ເອວ ນິສ຺ສາຍ ຊີວນ຺ໂຕ ຠິກ຺ຂຸນິສ຺ສິຕໂກ ນາມ. ປພ຺ພຊ຺ຊາເປກ຺ໂຂ ‘‘ຠຓ຺ຑູ’’ຕິ ວຸຈ຺ຈຕິ.

໒໗໖. ອປເຣສມ຺ປິ ທສນ຺ນໍ ກາຕຸໍ ວຏ຺ຏຕິ, ເຕ ທສ຺ເສຕຸໍ ‘‘ມຫາຈູຬປິຕາ’’ຕິອາທິມາຫ. ເອຕ຺ຖ (ປາຣາ. ອຏ຺ຐ. ໒.໑໘໕-໑໘໗) ປນ ມຫາປິຕາ ຈູຬປິຕາ ມຫາມາຕາ ຈູຬມາຕາ ມຫາຠາຕາ ຈູຬຠາຕາ ມຫາຠຄິນີ ຈູຬຠຄິນີຕິ ອິເມຫິ ອຏ຺ຐຫິ ອາທິ-ສທ຺ເທນ ປິຕຸຠຄິນິຎ຺ຈ ມາຕຸຠາຕິກຎ຺ຈ ຄເຫຕ຺ວາ ທສ. ເອເຕສໍ ປນ ສເກນ ເຠສຊ຺ເຊນ ກາຕພ຺ພໍ. ອຕ຺ຕນິເຍ ຈ ອສຕີຕິ ປາຐເສໂສ.

໒໗໗. ນ ເກວລຎ຺ຈ ເອເຕສໍ ທສນ຺ນໍ, ອິເມຫິ ສມ຺ພນ຺ຘານໍ ປຸຕ຺ຕນຕ຺ຕາທີນໍ ຍາວສຕ຺ຕມາ ກຸລປຣິວຏ຺ຏາ ກາຕຸໍ ວຏ຺ຏຕີຕິ ທສ຺ສນຕ຺ຖໍ ‘‘ກຸລທູສນາ’’ຕິອາທິມາຫ. ອຎ຺ໂຎປິ (ປາຣາ. ອຏ຺ຐ. ໒.໒໘໕-໒໘໗) ໂຍ ອາຄນ຺ຕຸໂກ ວາ ໂຈໂຣ ວາ ຍຸທ຺ຘປຣາຊິໂຕ ວາ ອິສ຺ສໂຣ ຎາຕເກຫິ ປຣິຈ຺ຈຕ຺ໂຕ ວາ ຄມິຍມນຸສ຺ໂສ ວາ ຄິລາໂນ ຫຸຕ຺ວາ ວິຫາຣໍ ປວິສຕິ, ສພ຺ເພສມ຺ປິ ອປຈ຺ຈາສີສນ຺ເຕນ ເຠສຊ຺ຊໍ ກາຕພ຺ພໍ.

໒໗໘. ມາຕາ (ປາຣາ. ອຏ຺ຐ. ໒.໑໘໕-໑໘໗) ປິຕາ ຕທຸປຏ຺ຐາໂກ ຠິກ຺ຂຸນິສ຺ສິຕໂກ ປຓ຺ຑຸປລາໂສ ເວຍ຺ຍາວຈ຺ຈກໂຣຕິ ອິເມສໍ ຉນ຺ນໍ ອນາມຏ຺ຐປິຓ຺ຑປາໂຕ ອວາຣິໂຕຕິ ອຕ຺ໂຖ. ກິຎ຺ຈ ຠິຍ຺ໂຍ – ທາມຣິກໂຈຣສ຺ສ ຈ ອິສ຺ສຣິຍສ຺ສ ຈ ທາຕຸມວາຣິໂຕຕິ ອຕ຺ໂຖ.

໒໗໙. ເຕສນ຺ຕິ (ປາຣາ. ອຏ຺ຐ. ໒.໑໘໕-໑໘໗) ຄຫຏ຺ຐານໍ. ສາສໂນຄຘນ຺ຕິ ຣຕນປຣິຕ຺ຕອາຏານາຏິຍປຣິຕ຺ຕາທິປຣິຕ຺ຕໍ ຠຓິຕພ຺ພນ຺ຕິ ອຕ຺ໂຖ.

໒໘໐. ‘‘ອາຄນ຺ຕ຺ວາ (ປາຣາ. ອຏ຺ຐ. ໒.໑໘໕-໑໘໗) ສີລໍ ເທຕຸ, ຘມ຺ມຎ຺ຈ ປຣິຕ຺ຕຎ຺ຈ ຠາສຕູ’’ຕິ ເກນຈິ ເປສິໂຕຕິ ສມ຺ພນ຺ໂຘ. ທາຕຸໍ ວຕ຺ຕຸນ຺ຕິ ສີລໍ ທາຕຸໍ, ຘມ຺ມຎ຺ຈ ປຣິຕ຺ຕຎ຺ຈ ວຕ຺ຕຸໍ ລພ຺ຠຕີຕິ ອຕ຺ໂຖ. ເຠສຊ຺ຊວິນິຈ຺ຉໂຍ.

ເຠສຊ຺ຊນິທ຺ເທສວຓ຺ຓນາ ນິຏ຺ຐິຕາ.