໓໕. ປຣິກ຺ຂາຣນິທ຺ເທສວຓ຺ຓນາ

໒໕໙-໒໖໐. ຄິຣິກູຏນ຺ຕິ ມກຣທນ຺ຕກໍ. ສິພ຺ພິຕຸຎ຺ຈ ຉິນ຺ທິຕຸຎ຺ຈ ນ ວຏ຺ຏຕີຕິ ສພ຺ພຕ຺ຖ ໂຍຊນາ. ທຓ຺ເຑຕິ ຉຕ຺ຕທຓ຺ເຑ.

໒໖໑. ສິພ຺ພິຕຸໍ ວາ ປຎ຺ຊຣໍ ວິນນ຺ຘິຕຸໍ ວາ ຖິຣຕ຺ຖໍ ຉຕ຺ເຕ ພນ຺ຘິຕຸໍ ທຓ຺ເຑ ເລຂາ ວຏ຺ຏຕີຕິ ສມ຺ພນ຺ໂຘ. ສເຈ ວຸຕ຺ຕປ຺ປກາຣໍ ອກປ຺ປິຍຉຕ຺ຕໍ ລຠຕິ, ຆຏກມ຺ປິ ວາຬຣູປມ຺ປິ ຉິນ຺ທິຕ຺ວາ ຘາເຣຕພ຺ພໍ, ເລຂາປິ ຆໍເສຕ຺ວາ ອປເນຕພ຺ພາ, ສຸຕ຺ຕເກນ ວາ ທຓ຺ໂຑ ເວເຐຕພ຺ໂພ.

໒໖໒. ອນຸວາຕໍ ສນ຺ຘາຍ ‘‘ອນ຺ເຕ ວາ’’ຕິ ວຸຕ຺ຕໍ. ທ຺ວິນ຺ນໍ ປຏ຺ຏານໍ ສງ຺ຆຏິຕຏ຺ຐານໍ ສນ຺ຘາຍ ‘‘ປຏ຺ຏມຸເຂ ວາປີ’’ຕິ ວຸຕ຺ຕໍ. ວຣກສີສາກາເຣນ ສິພ຺ພນໍ ສນ຺ຘາຍ ‘‘ເວຓິກາ’’ຕິ ຈ ສຕປທາກາເຣນ ສິພ຺ພນໍ ສນ຺ຘາຍ ‘‘ສງ຺ຂລິກາປິ ວາ’’ຕິ ຈ ວຸຕ຺ຕໍ. ສຕປທິສທິສໍ ອຎ຺ຎໍ ວາ ສູຈິວິກາຣໍ ນ ກປ຺ປຕິ, ປກຕິສູຈິກມ຺ມເມວ ວຏ຺ຏຕີຕິ ອຕ຺ໂຖ. ປາຬິກຓ຺ຓິກອາທິກໍ ຈີວເຣ ນ ຈ ກປ຺ປຕີຕິ ສມ຺ພນ຺ໂຘ.

໒໖໓-໔. ຈຕຸໂກຓາວ (ປາຣາ. ອຏ຺ຐ. ໑.໘໕) ກປ຺ປເຣຕິ ສມ຺ພນ຺ໂຘ. ອຄ຺ຆິກນ຺ຕິ ອຄ຺ຆິຍໍ ເຈຕິຍສທິສໍ. ເອຕ຺ຖາຕິ ຄຓ຺ຐິປາສກປຏ຺ເຏ. ໂກຓສຸຕ຺ຕາ ຈ ປີຬກາຕິ ນ ເກວລໍ ຈຕຸໂກຓາ ຄຓ຺ຐິກປາສກປຏ຺ຏາວ ກປ຺ປນ຺ຕິ, ອຖ ໂຂ ທຸວິຎ຺ເຎຍ຺ຍາ ໂກຓສຸຕ຺ຕປີຬກາ ຈ ກປ຺ປເຣຕິ ອຕ຺ໂຖ. ຄນ຺ຘໍ ເຕລໍ ວາຕິ ຄນ຺ຘໍ ວາ ເຕລໍ ວາ.

໒໖໕. ຣຕ຺ຕນ຺ຕິ (ປາຣາ. ອຏ຺ຐ. ໑.໘໕) ຣຊິຕໍ. ອຎ຺ເຎນ ວາຕິ ມຸຄ຺ຄຣາທິນາ ວາ. ກຕ຺ວາຕິ ຐເປຕ຺ວາ. ປຫາເຣ ນ ຈ ມຸຏ຺ຐິນາຕິ ມຸຏ຺ຐິນາ ນ ປຫາເຣຍ຺ຍາຕິ ອຕ຺ໂຖ.

໒໖໖-໗. ຉຕ຺ຕວຏ຺ຏິຍໍ (ປາຣາ. ອຏ຺ຐ. ໑.໘໕) ເລຂໍ ຐເປຕ຺ວາ ຘມ຺ມກຣເຓ ເລຂາ ນ ວຏ຺ຏຕີຕິ ສມ຺ພນ຺ໂຘ. ກຸຎ຺ຈິກາຍ ຈ ປິປ຺ຜເລ ຈ ມຓິກາ ຈ ປີຬກາ ຈ ນ ວຏ຺ຏຕີຕິ ສມ຺ພນ຺ໂຘ. ຕຕ຺ຖ ມຓິກາຕິ ເອກາ ເອວ ວຏ຺ຏມຓິກາ. ປີຬກາ ມຸຕ຺ຕຣາຊິສທິສາ ພຫູ.

໒໖໘-໙. ມາລາທ຺ຍຣຓິຍນ຺ຕິ (ປາຣາ. ອຏ຺ຐ. ໑.໘໕) ອຣຓິຍໍ ມາລາທິ ວຓ຺ຓມຏ຺ຐໍ ນ ວຏ຺ຏຕີຕິ ສມ຺ພນ຺ໂຘ. ເອວໍ ສພ຺ພຕ຺ຖ. ຕິປຸສີສມເຍ ປຕ຺ຕມຓ຺ຑເລ ຠິຕ຺ຕິກມ຺ມຎ຺ຈ ນ ວຏ຺ຏຕີຕິ ອຕ຺ໂຖ. ຫິຕ຺ວາຕິ ຐເປຕ຺ວາ. ສູຈິສຓ຺ຑາສໂກ (ປາຣາ. ອຏ຺ຐ. ໑.໘໕) ນາມ ສູຈິໍ ຑໍສາເປຕ຺ວາ ຆໍສິຕຸໍ ກໂຕ ທາຣຸມໂຍ. ‘‘ອນຸຊານາມິ, ຠິກ຺ຂເວ, ມກຣທນ຺ຕກໍ ຉິນ຺ທິຕຸ’’ນ຺ຕິ (ຈູຬວ. ໒໕໓) ວຸຕ຺ຕຕ຺ຕາ ປຕ຺ຕມຓ຺ຑເລ ມກຣທນ຺ຕກໍ ວຏ຺ຏຕິ, ອຎ຺ຎໍ ຠິຕ຺ຕິກມ຺ມາທິວິກາຣເມວ ນ ວຏ຺ຏຕິ, ຕສ຺ມາ ຄິຣິກູຏໍ ປຕ຺ຕມຓ຺ຑເລ ຐເປຕ຺ວາ ອວເສເສ ນ ວຏ຺ຏຕີຕິ ເວທິຕພ຺ພໍ.

໒໗໒. ເສນາສເນຕິ (ປາຣາ. ອຏ຺ຐ. ໑.໘໕) ປາສາທາທິເສນາສເນຕິ ອຕ຺ໂຖ.

໒໗໓. ປຸມິຕ຺ຖິຣູປຣຫິຕນ຺ຕິ ປຸຣິສຣູປອິຕ຺ຖິຣູປຣຫິຕນ຺ຕິ ອຕ຺ໂຖ. ປຣິກ຺ຂາຣວິນິຈ຺ຉໂຍ.

ປຣິກ຺ຂາຣນິທ຺ເທສວຓ຺ຓນາ ນິຏ຺ຐິຕາ.