໓໔. ປຖວີນິທ຺ເທສວຓ຺ຓນາ

໒໔໒. ຊາຕາ (ປາຈິ. ໘໖; ປາຈິ. ອຏ຺ຐ. ໘໖-໘໘; ກງ຺ຂາ. ອຏ຺ຐ. ປຖວີຂຓນສິກ຺ຂາປທວຓ຺ຓນາ) ອຊາຕາຕິ ທຸວິຘາ ປຖວີຕິ ອຕ຺ໂຖ. ອິທານິ ຕທຸຠຍໍ ທສ຺ເສຕຸໍ ‘‘ສຸທ຺ຘມຕ຺ຕິກປໍສຸກາ’’ຕິອາທິມາຫ. ຕຕ຺ຖ ສຸທ຺ຘມຕ຺ຕິກປໍສຸກາ ຈ ອທຑ຺ຒາ ຈ ພຫຸມຕ຺ຕິກປໍສຸກາ ຈ ຈາຕຸມາສາຘິໂກວຏ຺ຐປໍສຸມຕ຺ຕິກຣາສິ ຈ ຊາຕປຖວີຕິ ສມ຺ພນ຺ໂຘ. ເອຕ຺ຖ ປນ ອທຑ຺ຒາຕິ ອຸທ຺ຘນປຈນກຸມ຺ຠກາຣາວາປຠາຊນປຈນາທິວເສນ ຕຖາ ຕຖາ ອທຑ຺ຒາ. ອຍໍ ປນ ວິສຸໍ ນຕ຺ຖິ, ສຸທ຺ຘປໍສຸອາທີສຸ ອຎ຺ຎຕຣາວ ເວທິຕພ຺ພາ. ສຸທ຺ຘປໍສຸ ສຸທ຺ຘມຕ຺ຕິກາ ເຍຠຸຍ຺ເຍນປໍສຸ ເຍຠຸຍ຺ເຍນມຕ຺ຕິກາ ອຕິເຣກຈາຕຸມາສາຘິໂກວຏ຺ຐມຕ຺ຕິກາປໍສຸປຸຎ຺ຊາ ຈ ອທຑ຺ຒາ ຈາຕິ ອຍໍ ສພ຺ພາປິ ຊາຕປຖວີຕິ ເວທິຕພ຺ພາ.

໒໔໓. ທຸຕິຍາຕິ ອຊາຕປຖວີຕິ ອຕ຺ໂຖ. ວຸຕ຺ຕຣາສີຕິ ມຕ຺ຕິກຣາສິ ຈ ປໍສຸຣາສິ ຈ ຈາຕຸມາໂສມວຏ຺ຐໂກ ອຊາຕປຖວີຕິ ອຕ຺ໂຖ.

໒໔໔. ອິທານິ ເຍຠຸຍ຺ເຍນມຕ຺ຕິກາ ເຍຠຸຍ຺ເຍນປໍສຸກາ ເຍຠຸຍ຺ເຍນສກ຺ຂຣາຕິ ເອວໍ ວຸຕ຺ຕາສຸ ກິຕ຺ຕາວຕາ ເຍຠຸຍ຺ຍຕາ ໂຫຕີຕິ ຕໍ ທສ຺ເສຕຸໍ ‘‘ທ຺ເວ ຠາຄາ’’ຕິອາທິມາຫ. ຕຕ຺ຖ ຕີສຸ ຠາເຄສຸ ທ຺ເວ ຠາຄາ ມຕ຺ຕິກາ ຍສ຺ສາ ຠູມິຍາ, ເອສາ ເຍຠຸຍ຺ຍມຕ຺ຕິກາຕິ ສມ຺ພນ຺ໂຘ. ອຸປຑ຺ຒປໍສຸອາທໂຍປິ ກປ຺ປິຍາ ເອວ ອກປ຺ປິຍຠາຄສ຺ສ ອນຕິເຣກໂຕ. ‘‘ເຍຠຸຍ຺ເຍນມຕ຺ຕິກາ ເຍຠຸຍ຺ເຍນປໍສຸກາ’’ຕິ (ປາຈິ. ໘໖) ຫິ ວຸຕ຺ຕໍ, ນ ‘‘ອຸປຑ຺ຒມຕ຺ຕິກາ, ອຸປຑ຺ຒປໍສຸກາ’’ຕິ. ເສເສສຸປີຕິ ເຍຠຸຍ຺ຍປໍສຸກາທີສຸປິ.

໒໔໕. ຊາຕສຎ຺ຎິສ຺ສ ປາຈິຕ຺ຕີຕິ ສມ຺ພນ຺ໂຘ. ທ຺ເວຬ຺ຫສ຺ສ ວິມຕິສ຺ສ ທຸກ຺ກຏໍ. ຊາເຕ ອຊາຕສຎ຺ຎິສ຺ສ ອນາປຕ຺ຕິ.

໒໔໖. ເອກາຍາຓຕ຺ຕິຍາ ເອກາຕິ ສເຈ ສກິໍ ອາຓຕ຺ໂຕ ທິວສມ຺ປິ ຂຓຕິ, ອາຓາປກສ຺ສ ເອກາ ເອວາຕິ ອຕ຺ໂຖ. ວາຈໂສຕິ ວາຈາຍ ວາຈາຍາຕິ ອຕ຺ໂຖ.

໒໔໗. ເອຕ຺ຖ ‘‘ຊາເລຫິ ອຄ຺ຄິ’’ນ຺ຕິ ວາ ວຕ຺ຕຸໍ ນ ວຏ຺ຏຕິ. ອນິຍເມຕ຺ວາ ປນ ‘‘ໂປກ຺ຂຣຓິໍ ຂຓ, ປຖວິໍ ຂຓ, ວາປິໍ ຂຓ, ອາວາຏໍ ຂຓ, ກນ຺ທໍ ຂຓາ’’ຕິ ວຕ຺ຕຸໍ ວຏ຺ຏຕິ.

໒໔໘. ເອທິສນ຺ຕິ ເອຕ຺ຖ ອຎ຺ຎມ຺ປິ ເອວຣູປໍ ກປ຺ປິຍໂວຫາຣວຈນໍ ວຏ຺ຏຕີຕິ ອຘິປ຺ປາໂຍ.

໒໔໙. ໂກເປຕຸໍ ລພ຺ຠນ຺ຕິ ສມ຺ພນ຺ໂຘ, ຆຏາທີຫິ ຄເຫຕຸໍ ສກ຺ກຸເຓຍ຺ຍກໍ ອຸສ຺ສິຎ຺ຈນີຍກທ຺ທມໍ.

໒໕໑-໒. ອຸທກສນ຺ຕິເກ ປຕິເຕຕິ ສມ຺ພນ຺ໂຘ. ອຸທເກ ປຕິຕໍ ປນ ສພ຺ພກາລໍ ກປ຺ປິຍເມວ, ຕສ຺ມາ ອກປ຺ປິຍໍ ທສ຺ເສຕຸໍ ‘‘ອຸທກສນ຺ຕິເກ’’ຕິ ວຸຕ຺ຕໍ. ປາສາເຓ ລຄ຺ເຄ ຣເຊ ຈ ນວໂສຓ຺ຑິຍາ ປຕິເຕ ຣເຊ ຈາຕິ ສມ຺ພນ຺ໂຘ. ອພ຺ໂຠກາສຸຏ຺ຐິເຕ ວມ຺ມິເກ ຈ ມຕ຺ຕິກາກຸຏ຺ເຏ ຈາຕິ ອຕ຺ໂຖ, ຕຖາ ເອເຕປິ ສພ຺ເພ ຈາຕຸມາສາຘິໂກວຏ຺ຐາ ນ ໂກເປຕພ຺ພາຕິ ອຕ຺ໂຖ.

໒໕໓-໕. ຠູມິໍ ວິໂກປຍໍ ຖມ຺ຠາທິໍ ຄຓ຺ຫິຕຸໍ ນ ຈ ກປ຺ປຕີຕິ ສມ຺ພນ຺ໂຘ. ຘາຣາຍາຕິ ປສ຺ສາວຘາຣາຍ. ປທໍ ທສ຺ເສສ຺ສາມີຕິ ສມ຺ພນ຺ໂຘ.

໒໕໗. ເສໂກຕິ ສິຎ຺ຈນໍ. ຠູມິຍາ ອລ຺ລຫຕ຺ຖໍ ຐເປຕ຺ວາຕິ ສມ຺ພນ຺ໂຘ.

໒໕໘. ອວເສ ສຕີຕິ ຫຕ຺ຖທາຫາທີສຸ ອາປທາສູຕິ ອຕ຺ໂຖ. ປຖວີວິນິຈ຺ຉໂຍ.

ປຖວີນິທ຺ເທສວຓ຺ຓນາ ນິຏ຺ຐິຕາ.