໓໓. ກາຍພນ຺ຘນນິທ຺ເທສວຓ຺ຓນາ

໒໓໕. ອກາຍພນ຺ຘໂນຕິ ກາຍພນ຺ຘນໍ ອພນ຺ຘິຕ຺ວາຕິ ອຕ຺ໂຖ. ຕໂຕ ປຏ຺ຐາຍ ຈີວຣໍ ປາຣຸປິຕພ຺ພໍ, ຕໂຕ ປຏ຺ຐາຍ ເອວ ກາຍພນ຺ຘນໍ ພນ຺ຘິຕພ຺ພໍ. ‘‘ນ ຠິກ຺ຂເວ ອກາຍພນ຺ຘເນນ ຄາໂມ ປວິສິຕພ຺ໂພ. ໂຍ ປວິເສຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ (ຈູຬວ. ໒໗໘) ຫິ ວຸຕ຺ຕໍ. ຕຕ຺ເຖວາສຕິຍາ ຄໂຕຕິ ອສຕິຍາ ຄໂຕ ຍຕ຺ຖ ສຣຕິ, ຕຕ຺ເຖວ ພນ຺ຘິຕພ຺ພໍ. ສຣິຕ຺ວາ ປນ ຍາວ ນ ພນ຺ຘຕິ, ຕາວ ປິຓ຺ຑາຍ ຈຣິຕຸໍ ນ ວຏ຺ຏຕິ. ຍທິ ອນ຺ໂຕຄາເມ ສຣຕິ, ກາຍພນ຺ຘເນ ສຕິ ເອກມນ຺ເຕ ຐຕ຺ວາ ພນ຺ຘິຕພ຺ພໍ, ອສຕິ ເຈ ນິກ຺ຂມິຕ຺ວາ ພນ຺ຘິຕ຺ວາ ປຸນ ປິຓ຺ຑາຍ ປວິສິຕພ຺ພນ຺ຕິ ວທນ຺ຕິ.

໒໓໖. ‘‘ອນຸຊານາມິ, ຠິກ຺ຂເວ, ທ຺ເວ ກາຍພນ຺ຘນານິ ປຏ຺ຏິກໍ ສູກຣນ຺ຕກ’’ນ຺ຕິ (ຈູຬວ. ໒໗໘) ວຸຕ຺ຕຕ຺ຕາ ‘‘ທຸວິຘ’’ນ຺ຕິ ວຸຕ຺ຕໍ. ຕຕ຺ຖ ສູກຣນ຺ຕໍ ນາມ ກຸຎ຺ຈິກາໂກສກາ ວິຍ ອນ຺ເຕ ສຸສິຣໍ ກຕ຺ວາ ໂກຏ຺ຏິຕໍ. ຣຊ຺ຊຸ ຈ ເອກາຕິ ເອກວຏ຺ຏາ ຣຊ຺ຊຸ ຈ. ຕທນຸໂລມິກາຕິ ເຕສໍ ທ຺ວິນ຺ນໍ ອນຸໂລມິກາ.

໒໓໗. ມຈ຺ຉກຓ຺ຑກຂຊ຺ຊຸຣີ-ປຕ຺ຕາ ມຏ຺ຐາ ຈ ປຏ຺ຏິກາຕິ ເອຕ຺ຖ (ຈູຬວ. ອຏ຺ຐ. ໒໗໘) ເອເຕ ມຈ຺ຉກຓ຺ຏກາທໂຍ ມຏ຺ຐາ ວິກາຣຣຫິຕາ ປຏ຺ຏິກາ ຈ ຕທນ຺ໂຕຄຘາຕິ ອຘິປ຺ປາໂຍ. ລພ຺ຠາ ທສາ ຈຕສ຺ໂສຕິ ເອກາຍ ວາ ທ຺ວີສຸ ວາ ຕີສຸ ວາ ກຖາ ເອວ ນຕ຺ຖີຕິ ອຘິປ຺ປາໂຍ, ຕໂຕ ປຣໍ ນ ວຏ຺ຏຕິ. ອນ຺ເຕສູຕິ ອຸໂຠສຸ ອນ຺ເຕສຸ. ຄຸຓສຸຕ຺ຕກນ຺ຕິ ທິຄຸຓສຸຕ຺ຕກໍ.

໒໓໙. ມກຣມຸຂາທິນ຺ຕິ ອາທິ-ສທ຺ເທນ ເທຑ຺ຑຸຠສີສໍ ຄຫິຕໍ. ອຸຠນ຺ເຕຕິ ອຸໂຠສຸ ອນ຺ເຕສຸ. ກສ຺ສາຕິ? ວິຘສ຺ສ. ຆຏກາຕິ ຆຏກໂຕ. ເລຂາຕິ ເລຂາຍ. ຆຏກໂຕ ຈ ເລຂາຍ ຈ ອຎ຺ຎໍ ຈິຕ຺ຕກໍ ນ ກປ຺ປຕີຕິ ອຕ຺ໂຖ.

໒໔໐. ເທຑ຺ຑຸຠກນ຺ຕິ (ຈູຬວ. ໒໗໘; ຈູຬວ. ອຏ຺ຐ. ໒໗໘) ອຸທກສປ຺ປສິຣສທິສໍ. ມຸຣຊນ຺ຕິ ພຫຸຣຊ຺ຊຸເກ ເອກໂຕ ສງ຺ກຑ຺ຒິຕ຺ວາ ເອກາຍ ຣຊ຺ຊຸຍາ ປລິເວເຐຕ຺ວາ ກຕຣຊ຺ຊຸ. ມທ຺ທວີຓນ຺ຕິ ປາມງ຺ຄສທິສໍ. ກລາພຸກນ຺ຕິ ອເນກວຏ຺ຏໍ. ເອຕານິ ປນ ສພ຺ພານິ ນ ກປ຺ປນ຺ຕິ. ທສາສຸ ທ຺ເວ ມຊ຺ຌິມາຕິ ມຸຣຊໍ ມທ຺ທວີຓນ຺ຕິ ທ຺ເວ ມຊ຺ຌິມາ ເອວ. ກປ຺ປເຣຕິ ກປ຺ປນ຺ຕີຕິ ອຕ຺ໂຖ.

໒໔໑. ຄຓ຺ຐິໂຍ ຈາປີຕິ (ຈູຬວ. ໒໗໙) ຈີວຣຄຓ຺ຐິໂຍປິ. ເວຬຸອາທິມຍາ ກປ຺ປນ຺ຕີຕິ ປສງ຺ເຄນ ວຸຕ຺ຕໍ. ກາຍພນ຺ຘນວິນິຈ຺ຉໂຍ.

ກາຍພນ຺ຘນນິທ຺ເທສວຓ຺ຓນາ ນິຏ຺ຐິຕາ.

ປຐມຠາຓວາຣໍ.