໓໑. ວິກປ຺ປນານິທ຺ເທສວຓ຺ຓນາ

໒໒໑. ສມ຺ມຸຂາຍາຕິ (ປາຈິ. ໓໗໔; ປາຣາ. ອຏ຺ຐ. ໒.໔໖໙; ກງ຺ຂາ. ອຏ຺ຐ. ວິກປ຺ປນສິກ຺ຂາປທວຓ຺ຓນາ) ສມ຺ມຸເຂ ຐິຕສ຺ສາຕິ ອຕ຺ໂຖ. ພ຺ຍຕ຺ຕສ຺ສາຕິ ວິກປ຺ປນວິຘານໍ ປຈ຺ຈຸທ຺ຘຣຓາທິວິຘານຎ຺ຈ ຊານນ຺ຕສ຺ສ. ອພ຺ຍຕ຺ໂຕ ປນ ‘‘ອິມິນາ ມຍ຺ຫໍ ທິນ຺ນ’’ນ຺ຕິ ຄເຫຕ຺ວາປິ ຄຈ຺ເຉຍ຺ຍາຕິ ອຕ຺ໂຖ. ເອກສ຺ສາຕິ ເອກສ຺ສ ຠິກ຺ຂຸສ຺ສ.

໒໒໒. ນິເຘຕຸໍວາຕິ ນິເຘຕຸໍ ເອວ, ນິສ຺ສຄ຺ຄິຍໍ ນ ໂຫຕີຕິ ອຕ຺ໂຖ. ປຣິຠຸຎ຺ຊິຕຸໍ ວາ ວິສ຺ສຊ຺ເຊຕຸໍ ວາ ອຘິຏ຺ຐາຕຸໍ ວາ ນ ວຏ຺ຏຕີຕິ ອຕ຺ໂຖ.

໒໒໔-໕. ອປຣາ ສມ຺ມຸຂາ ວາຕິ ສມ຺ມຸຂາ ວິກປ຺ປນາ ເອວາຕິ ອຕ຺ໂຖ. ອິມາ ທ຺ເວ ວິກປ຺ປນາ ອຕ຺ຕນາ ເອວ ວິກປ຺ເປຕ຺ວາ ປເຣນ ປຈ຺ຈຸທ຺ຘຣາປິຕຕ຺ຕາ ສມ຺ມຸຂາ ວິກປ຺ປນາ ເອວາຕິ ວຸຕ຺ຕາ.

໒໒໗. ມິຕ຺ໂຕຕິ ທຬ຺ຫມິຕ຺ໂຕ. ສນ຺ທິຏ຺ໂຐຕິ ທິຏ຺ຐມຕ຺ໂຕ ນາຕິທຬ຺ຫມິຕ຺ໂຕ. ‘‘ອິຕເຣນ ຈ ປຸພ຺ເພ ວຸຕ຺ຕນເຍນ ‘ຕິສ຺ໂສ ຠິກ຺ຂູ’ຕິ ວາ ‘ຕິສ຺ສາ ຠິກ຺ຂຸນີ’ຕິ ວາ ວຕ຺ຕພ຺ພໍ. ປຸນ ເຕນ ‘ອຫໍ ຕິສ຺ສສ຺ສ ຠິກ຺ຂຸໂນ, ຕິສ຺ສາຍ ຠິກ຺ຂຸນິຍາ ວາ ທມ຺ມີ’ຕິ ວິກປ຺ເປຕ຺ວາ ເຕເນວ ‘ຕິສ຺ສສ຺ສ ຠິກ຺ຂຸໂນ, ຕິສ຺ສາຍ ຠິກ຺ຂຸນິຍາ ສນ຺ຕກໍ ປຣິຠຸຎ຺ຊ ວາ ວິສ຺ສຊ຺ເຊຫິ ວາ ຍຖາປຈ຺ຈຍໍ ວາ ກໂຣຫີ’ຕິ ປຈ຺ຈຸທ຺ຘຣິຕພ຺ພ’’ນ຺ຕິ ເອວໍ ປາໂຐ ຄເຫຕພ຺ໂພ.

໒໒໘. ທູຣສນ຺ຕິກຕ຺ເຕກຕ຺ຕ-ພຫຸຠາວໍ ວິຊານິຍາຕິ ເອຕ຺ຖ ທູຣຕ຺ຕຎ຺ຈ ສນ຺ຕິກຕ຺ຕຎ຺ຈ ເອກຕ຺ຕຎ຺ຈ ພຫຸຠາວຎ຺ຈ ວິຊານິຕ຺ວາຕິ ອຕ຺ໂຖ.

໒໒໙. ‘‘ທສາຫປຣມໍ ອຕິເຣກຈີວຣໍ ຘາເຣຕພ຺ພ’’ນ຺ຕິ (ປາຣາ. ໔໖໒) ວຸຕ຺ຕຕ຺ຕາ ‘‘ທສາຫໍ ວາ’’ຕິ ວຸຕ຺ຕໍ. ‘‘ຈີວຣກາລສມໂຍ ນາມ ອນຕ຺ຖເຕ ກຖິເນ ວສ຺ສານສ຺ສ ປຈ຺ຉິໂມ ມາໂສ, ອຕ຺ຖເຕ ກຖິເນ ປຎ຺ຈ ມາສາ’’ຕິ (ປາຣາ. ໖໔໙) ວຸຕ຺ຕຕ຺ຕາ ‘‘ມາສເມກໍ ວາ ປຎ຺ຈ ວາ’’ຕິ ວຸຕ຺ຕໍ, ມາສໍ ວາ ເອກໍ ປຎ຺ຈ ວາ ມາເສຕິ ອຕ຺ໂຖ. ‘‘ຠິກ຺ຂຸໂນ ປເນວ ອກາລຈີວຣໍ ອຸປ຺ປຊ຺ເຊຍ຺ຍ, ອາກງ຺ຂມາເນນ ຠິກ຺ຂຸນາ ປຏິຄ຺ຄເຫຕພ຺ພໍ. ປຏິຄ຺ຄເຫຕ຺ວາ ຂິປ຺ປເມວ ກາເຣຕພ຺ພໍ. ໂນ ຈສ຺ສ ປາຣິປູຣິ, ມາສປຣມໍ ເຕນ ຠິກ຺ຂຸນາ ຕໍ ຈີວຣໍ ນິກ຺ຂິປິຕພ຺ພໍ ອູນສ຺ສ ປາຣິປູຣິຍາ ສຕິຍາ ປຈ຺ຈາສາຍາ’’ຕິ (ປາຣາ. ໔໙໙) ວຸຕ຺ຕຕ຺ຕາ ‘‘ປຈ຺ຈາສາ ສຕິ ມາສກ’’ນ຺ຕິ ວຸຕ຺ຕໍ. ນຸປ຺ປາທຍຕີຕິ ອນຘິຏ຺ຐິຕໍ ອວິກປ຺ປິຕໍ ນິສ຺ສຄ຺ຄິໍ ນ ຊນຍຕີຕິ ອຕ຺ໂຖ. ວິກປ຺ປນາວິນິຈ຺ຉໂຍ.

ວິກປ຺ປນານິທ຺ເທສວຓ຺ຓນາ ນິຏ຺ຐິຕາ.