໓໐. ວຕ຺ຕນິທ຺ເທສວຓ຺ຓນາ

໒໑໓. ອິທານິ ອາຄນ຺ຕຸກວຕ຺ຕາທີນິ ທສ຺ເສຕຸໍ ‘‘ວຕ຺ຕ’’ນ຺ຕິ ມາຕິກາປທໍ ອຸທ຺ຘຏໍ. ປຣິກ຺ຂິຕ຺ຕສ຺ສ (ຈູຬວ. ໓໕໖ ອາທໂຍ; ຈູຬວ. ອຏ຺ຐ. ໓໕໗ ອາທໂຍ) ວິຫາຣສ຺ສ ປຣິກ຺ເຂປໍ, ອປຣິກ຺ຂິຕ຺ຕສ຺ສ ທ຺ວີຫິ ເລຑ຺ຑຸປາເຕຫິ ປຣິຈ຺ຉິນ຺ນຏ຺ຐານໍ ປຕ຺ວາ ອຸປາຫນໍ ໂອມຸຎ຺ຈິຕ຺ວາ ນີຈໍ ກຕ຺ວາ ປປ຺ໂຜເຏຕ຺ວາ ອຸປາຫນໍ ທຓ຺ຑເກນ ຄເຫຕ຺ວາ ຉຕ຺ຕໍ ອປນາເມຕ຺ວາ ສີສໍ ວິວຣິຕ຺ວາ ສີເສ ຈີວຣໍ ຂນ຺ເຘ ກຣິຕ຺ວາ ສາຘຸກໍ ອຕຣມາເນນ ອາຣາໂມ ປວິສິຕພ຺ໂພຕິ ອຕ຺ໂຖ.

໒໑໔. ປຸຈ຺ເຉຍ຺ຍ ສຍນາສນນ຺ຕິ ‘‘ກຕມໍ ເມ ເສນາສນໍ ປາປຸຓາຕິ, ກິໍ ອຊ຺ຌາວຸຕ຺ຖໍ ວາ ອນຊ຺ຌາວຸຕ຺ຖໍ ວາ’’ຕິ ເອວໍ ປຸຈ຺ຉິຕພ຺ພນ຺ຕິ ອຕ຺ໂຖ.

໒໑໕-໖. ມຎ຺ຈປີຐາທິທາຣຸຠຓ຺ຑຎ຺ຈ (ຈູຬວ. ໓໖໐; ຈູຬວ. ອຏ຺ຐ. ໓໖໐) ຣຊນຠາຊນາທິມຕ຺ຕິກາຠຓ຺ຑຎ຺ຈ. ອາປຸຈ຺ຉາຕິ ຠິກ຺ຂຸສ຺ສ ວາ ສາມເຓຣສ຺ສ ວາ ອາຣາມິກສ຺ສ ວາ ‘‘ອາວຸໂສ ອິມໍ ຊຄ຺ຄາຫີ’’ຕິ ອາໂຣເຈຕ຺ວາຕິ ອຕ຺ໂຖ. ອຎ຺ຎຖາຕິ ເອວໍ ອກຕ຺ວາຕິ ອຕ຺ໂຖ.

໒໑໗-໘. ວຸຑ຺ຒາຄນ຺ຕຸກສ຺ສາຕິ ເອຕ຺ຖ (ຈູຬວ. ໓໕໘ ອາທໂຍ; ຈູຬວ. ອຏ຺ຐ. ໓໕໙ ອາທໂຍ) ທູຣໂຕວ ທິສ຺ວາ ຍທິ ‘‘ວຸຑ຺ໂຒ’’ຕິ ຊານາຕິ, ຕສ຺ມິໍ ອນາຄເຕ ເອວ ອາສນປຎ຺ຎາປນາທິວຕ຺ຕໍ ກາຕພ຺ພນ຺ຕິ ອຕ຺ໂຖ. ປາໂທທປ຺ປຠຸຕິນ຺ຕິ ປາໂທທກໍ ປາທປີຐໍ ປາທກຖລິກໍ ອຸປນິກ຺ຂິປິຕພ຺ພນ຺ຕິ ອຕ຺ໂຖ. ປານີເຍນ ອາປຸຈ຺ຉນ຺ເຕນ ສເຈ ສກິໍ ອານີຕໍ ປານີຍໍ ສພ຺ພໍ ປິວຕິ, ປຸນປິ ອາປຸຈ຺ຉິຕພ຺ໂພ ເອວ. ປຎ຺ຎເປຕິ ‘‘ເອຕໍ ຕຸມ຺ຫາກໍ ເສນາສນໍ ປາປຸຓາຕີ’’ຕິ ເອວໍ ອາຈິກ຺ຂິຕພ຺ພນ຺ຕິ ອຕ຺ໂຖ.

໒໑໙-໒໐. ‘‘ຠິກ຺ຂາຈາຣຄາໂມ ອິໂຕ ທູເຣ’’ຕິ ວາ ‘‘ສນ຺ຕິເກ’’ຕິ ວາ ‘‘ກາລສ຺ເສວ ປິຓ຺ຑາຍ ຈຣິຕພ຺ພ’’ນ຺ຕິ ວາ ‘‘ອຸປຏ຺ຐາເກ ຈຣິຕພ຺ພ’’ນ຺ຕິ ວາ ໂຄຈໂຣ ອາຈິກ຺ຂິຕພ຺ໂພ. ອໂຄຈໂຣຕິ ມິຈ຺ຉາທິຏ຺ຐິການໍ ວາ ຄາໂມ, ປຣິຈ຺ຉິນ຺ນຠິກ຺ຂໂກ ວາ ຄາໂມ, ຍຕ຺ຖ ເອກສ຺ສ ວາ ທ຺ວິນ຺ນໍ ວາ ຠິກ຺ຂາ ທີຍຕິ, ໂສ ອາຈິກ຺ຂິຕພ຺ໂພຕິ ອຕ຺ໂຖ. ກຕິກນ຺ຕິ ສງ຺ຆສ຺ສ ກຕິກຏ຺ຐານໍ. ‘‘ອິມໍ ກາລໍ ປວິສິຕພ຺ພໍ, ອິມໍ ກາລໍ ນິກ຺ຂມິຕພ຺ພ’’ນ຺ຕິ ເອວໍ ປເວສນນິກ຺ຂມນກາລໍ ອາຈິກ຺ຂິຕພ຺ພໍ. ເກສຸຈິ ຐາເນສຸ ອມນຸສ຺ສາ ວາ ວາຬາ ວາ ໂຫນ຺ຕິ, ຕສ຺ມາ ເອວໍ ອາຈິກ຺ຂິຕພ຺ພເມວ. ນິສິນ຺ໂນວາຕິ ອິທໍ ອາປຕ຺ຕິອຠາວມຕ຺ຕທີປກໍ, ອຸຏ຺ຐຫິຕ຺ວາປິ ສພ຺ພໍ ກາຕຸໍ ວຏ຺ຏເຕວ. ວຕ຺ຕວິນິຈ຺ຉໂຍ.

ວຕ຺ຕນິທ຺ເທສວຓ຺ຓນາ ນິຏ຺ຐິຕາ.