໒໕. ອກປ຺ປິຍສຍນນິທ຺ເທສວຓ຺ຓນາ

໑໘໗-໙. ‘‘ອຸຈ຺ຈໂກ ອາສນ຺ທິໂກ ອຸປ຺ປນ຺ໂນ ໂຫຕິ, ອນຸຊານາມິ ຠິກ຺ຂເວ ອຸຈ຺ຈກມ຺ປິ ອາສນ຺ທິກ’’ນ຺ຕິ (ຈູຬວ. ໒໙໗) ວຈນໂຕ ມຎ຺ຈສ຺ສ ອຸປຑ຺ຒຠາຄປ຺ປມາເຓນ ເອກໂຕຠາເຄນ ທີຆມ຺ປິ ສຸຄຕງ຺ຄຸເລນ ອຕິເຣກຏ຺ຐງ຺ຄຸລປາທກໍ ອິຘ ອາສນ຺ທີຕິ ອຘິປ຺ເປຕໍ, ຈຕຸຣໍສາສນ຺ທິໂກ ປນ ປມາຓາຕິກ຺ກນ຺ຕໂກປິ ວຏ຺ຏຕິ. ຕູລີຕິ ປກຕິຕູລິກາ. ປລ຺ລງ຺ໂກນາມ ອາຫຣິເມຫິ ວາເຬຫິ ກໂຕຕິ ວຸຕ຺ໂຕ. ຕຕ຺ເຖວ ‘‘ສີຫຣູປາທິໍ ທສ຺ເສຕ຺ວາ ກໂຕ ປນ ວຏ຺ຏຕີ’’ຕິ ວທນ຺ຕິ. ປຏິກນ຺ຕິ ເສຕຕ຺ຖຣຓໍ. ໂຄນຈິຕ຺ຕກນ຺ຕິ ເອຕ຺ຖ ຈຕຸຣງ຺ຄຸລາຘິກໂລໂມ ໂກຊໂວ ‘‘ໂຄນໂກ’’ຕິ ວຸຈ຺ຈຕິ. ‘‘ອນຸຊານາມິ, ຠິກ຺ຂເວ, ໂກຊວ’’ນ຺ຕິ (ມຫາວ. ໓໓໗) ຈີວຣກ຺ຂນ຺ຘເກ ວຸຕ຺ຕຕ຺ຕາ ຈຕຸຣງ຺ຄຸລໂລມກໍ ປກຕິໂກຊວໍ ວຏ຺ຏຕິ. ຣຕນຈິຕ຺ຕໍ ຈິຕ຺ຕກໍ ນ ວຏ຺ຏຕິ. ປຏລີຕິ ຆນປຸປ຺ຜຣຕ຺ຕອຕ຺ຖຣຓໍ. ວິກຕີຕິ ສີຫພ຺ຍຄ຺ຆາທິຣູປວິຈິຕ຺ໂຕ ອຸຓ຺ຓາມຍຕ຺ຖຣຓໂກ. ອຸທ຺ທໂລມີຕິ ເອກໂຕອຸຄ຺ຄຕປຸປ຺ຜໍ. ເອກນ຺ຕໂລມິກາຕິ ອຸຠໂຕອຸຄ຺ຄຕປຸປ຺ຜໍ.

ກຸຕ຺ຕນ຺ຕິ ໂສຬສນ຺ນໍ ນາຏກິຕ຺ຖີນໍ ຐຕ຺ວາ ນຈ຺ຈນໂຍຄ຺ຄໍ ອຸຓ຺ຓາມຍຕ຺ຖຣຓໍ. ໂກເສຍ຺ຍນ຺ຕິ ຣຕນປຣິສິພ຺ພິຕໍ ໂກເສຍ຺ຍສຸຕ຺ຕມຍໍ ປຈ຺ຈຕ຺ຖຣຓໍ. ກຏ຺ຏິສ຺ສນ຺ຕິ ຣຕນປຣິສິພ຺ພິຕໍ ໂກເສຍ຺ຍກຏ຺ຏິສ຺ສມຍໍ ປຈ຺ຈຕ຺ຖຣຓໍ. ໂກເສຍ຺ຍຎ຺ຈ ກຏ຺ຏິສ຺ສຎ຺ຈ ຣຕນປຣິສິພ຺ພິຕາເນວ ນ ວຏ຺ຏນ຺ຕິ, ສຸທ຺ຘານິ ວຏ຺ຏນ຺ຕິ. ຫຕ຺ຖິອສ຺ສຣຖຕ຺ຖຣາ ເຕສໍ ອຸປຣິ ອຕ຺ຖຣຓກອຕ຺ຖຣຓາວ. ອຊິນປ຺ປເວຓີຕິ ອຊິນຈມ຺ເມຫິ ມຎ຺ຈປ຺ປມາເຓນ ສິພ຺ພິຕ຺ວາ ກຕາ ປເວຓີ, ເຕນ ຈ ກທລີມິຄຈມ຺ມໍ ເສຕວຕ຺ຖສ຺ສ ອຸປຣິ ປຕ຺ຖຣິຕ຺ວາ ສິພ຺ພິຕ຺ວາ ກຕໍ ປວຣປ຺ປຈ຺ຈຕ຺ຖຣຓໍ ກທລີມິຄປ຺ປວຣປ຺ປຈ຺ຈຕ຺ຖຣຓໍ, ເຕນ ຈ ອຕ຺ຖຕໍ ອຊິນປ຺ປເວຓີກທລີມິຄປ຺ປວຣປ຺ປຈ຺ຈຕ຺ຖຣຓຕ຺ຖຕໍ.

ເສຕວິຕານມ຺ປິ ເຫຏ຺ຐາ ອກປ຺ປິຍປ຺ປຈ຺ຈຕ຺ຖຣເຓ ສຕິ ນ ວຏ຺ຏຕິ, ກປ຺ປິຍປ຺ປຈ຺ຈຕ຺ຖຣເຓ ສຕິ ວຏ຺ຏຕິ, ຣຕ຺ຕວິຕານສ຺ສ ເຫຏ຺ຐາ ກປ຺ປິຍປ຺ປຈ຺ຈຕ຺ຖຣເຓ ສຕິປິ ນ ວຏ຺ຏຕິ ເອວ. ສີສູປຘານໍ ປາທູປຘານນ຺ຕິ ມຎ຺ຈສ຺ສ ອຸຠໂຕໂລຫິຕກໍ ອຸປຘານໍ ນ ວຏ຺ຏຕິ. ຍໍ ປນ ເອກເມວ ອຸປຘານໍ ໂຫຕິ, ອຸໂຠສຸ ອນ຺ເຕສຸ ຣຕ຺ຕໍ ວາ ປທຸມວຓ຺ຓໍ ວາ ຈິຕ຺ຕໍ ວາ, ສເຈ ປມາຓຍຸຕ຺ຕໍ, ວຏ຺ຏຕິ, ມຫາອຸປຘານໍ ປນ ປຏິກ຺ຂິຕ຺ຕໍ.

໑໙໐. ອາສນ຺ທາທິຕ຺ຕຍາຕິ ອາສນ຺ທີ ຕູລີ ປລ຺ລງ຺ໂກຕິ ອິທໍ ຕຍໍ ນາມໍ. ‘‘ອນຸຊານາມິ, ຠິກ຺ຂເວ, ຐເປຕ຺ວາ ຕີຓິ ອາສນ຺ທິໍ ປລ຺ລງ຺ກໍ ຕູລິກໍ ເສສກໍ ຄິຫິວິກຏໍ ອຠິນິສີທິຕຸໍ, ນ ຕ຺ເວວ ອຠິນິປຊ຺ຊິຕຸ’’ນ຺ຕິ (ຈູຬວ. ໓໑໔) ຫິ ວຸຕ຺ຕໍ. ເສເສ ຄິຫິສນ຺ຕເກ ນິສີທິຕຸໍ ລພ຺ຠຕີຕິ ອຕ຺ໂຖ. ຍທິ ຘມ຺ມາສເນ ສງ຺ຆິກມ຺ປິ ໂຄນກາທິໍ ຠິກ຺ຂູຫິ ອນາຓຕ຺ຕາ ອາຣາມິກາທໂຍ ສຍເມວ ປຎ຺ຎເປນ຺ຕິ ເຈວ ນີຫຣນ຺ຕິ ຈ, ເອຕໍ ຄິຫິວິກຏນີຫາຣໍ ນາມ, ອິມິນາ ຄິຫິວິກຏນີຫາເຣນ ວຏ຺ຏຕິ. ຠຕ຺ຕຄ຺ຄໍ ນາມ ວິຫາເຣ ເອວ ທານຏ຺ຐານໍ.

໑໙໑. ຈຕຸນ຺ນໍ ປາທານໍ, ຕີສຸ ປສ຺ເສສຸ ອປສ຺ສຍານຎ຺ຈ ວເສນ ສຕ຺ຕງ຺ໂຄ. ເອກປສ຺ເສນ ຍຸຕ຺ໂຕ ປຎ຺ຈງ຺ໂຄ. ອິເມ ປນ ສຕ຺ຕງ຺ຄປຎ຺ຈງ຺ຄາ ‘‘ອນຸຊານາມິ, ຠິກ຺ຂເວ, ອຸຈ຺ຈກມ຺ປິ ສຕ຺ຕງ຺ຄ’’ນ຺ຕິ (ຈູຬວ. ໒໙໔) ວຸຕ຺ຕຕ຺ຕາ ປມາຓາຕິກ຺ກນ຺ຕາປິ ວຏ຺ຏນ຺ຕິ. ເຕນ ວຸຕ຺ຕໍ ‘‘ອຸຈ຺ຈປາທກາ’’ຕິ. ຕູໂລນທ຺ຘາ ມຎ຺ຈປີຐາ ຆເຣເຍວ ນິສີທິຕຸໍ ກປ຺ປນ຺ຕີຕິ ສມ຺ພນ຺ໂຘ.

໑໙໒. ຈີວຣຈ຺ຉວິໂຍຕິ ຉນ຺ນໍ ຈີວຣານໍ, ຉນ຺ນໍ ອນຸໂລມຈີວຣານຎ຺ຈ ອຎ຺ຎຕຣຈີວຣຈ຺ຉວິໂຍຕິ ອຕ຺ໂຖ. ສພ຺ພຕ຺ຖາຕິ ມຎ຺ເຈປິ ປີເຐປິ ຠຕ຺ຕຄ຺ເຄປິ ອນ຺ຕຣຆເຣປີຕິ ອຕ຺ໂຖ. ອິມາສໍ ປນ ຠິສີນໍ ປມາຓປຣິຈ຺ເຉໂທປິ ນຕ຺ຖິ, ມຎ຺ຈປີຐາທີນໍ ວເສນ ອນຸຣູປໍ ສລ຺ລກ຺ເຂຕ຺ວາ ປມາຓໍ ກາຕພ຺ພໍ.

໑໙໓. ‘‘ຕູລິກາ ອຸປ຺ປນ຺ນາ ໂຫຕິ. ອນຸຊານາມິ, ຠິກ຺ຂເວ, ວິຊເຏຕ຺ວາ ພິມ຺ໂພຫນໍ ກາຕຸໍ, ຕີຓິ ຕູລານິ ຣຸກ຺ຂຕູລໍ ລຕາຕູລໍ ໂປຏກິຕູລ’’ນ຺ຕິ (ຈູຬວ. ໒໙໗) ວຸຕ຺ຕຕ຺ຕາ ຕູລຕ຺ຕຍຎ຺ຈ (ຈູຬວ. ອຏ຺ຐ. ໒໙໗; ກງ຺ຂາ. ອຏ຺ຐ. ຕູໂລນນ຺ທສິກ຺ຂາປທວຓ຺ຓນາ) ພິມ຺ໂພຫເນ ວຏ຺ຏຕິ. ອິເມຫິ ຕີຫິ ຕູເລຫິ ສພ຺ເພສໍ ຣຸກ຺ຂລຕາຕິຓານໍ ຕູລໍ ອນຸຎ຺ຎາຕນ຺ຕິ ເວທິຕພ຺ພໍ. ຠິສິຍໍ ປນ ກິຎ຺ຈິ ຕູລໍ ນ ວຏ຺ຏຕິເຍວ. ຠິສິຄພ຺ໂຠຕິ ຠິສິຍາ ວຸຕ຺ຕໍ ໂຈຬາທິປຎ຺ຈກໍ ພິມ຺ໂພຫເນ ອນຸຎ຺ຎາຕນ຺ຕິ ສມ຺ພນ຺ໂຘ. ມິຄປກ຺ຂິນນ຺ຕິ ສີຫາທີນໍ ສພ຺ພຈຕຸປ຺ປທານໍ ຫໍສໂມຣາທີນໍ ສພ຺ພປກ຺ຂີນໍ ໂລມານິ ກປ຺ປນ຺ຕິ. ມສູຣເກ ອນຸຎ຺ຎາຕນ຺ຕິ ສມ຺ພນ຺ໂຘ.

໑໙໔. ອິທານິ ຠິສິຍໍ ກປ຺ປິຍາກປ຺ປິຍໍ ທສ຺ເສຕຸໍ ‘‘ມນຸສ຺ສໂລມ’’ນ຺ຕິອາທິມາຫ. ອຸຓ຺ຓາຍນ຺ຕິ (ຈູຬວ. ໒໙໗; ຈູຬວ. ອຏ຺ຐ. ໒໙໗) ອຸຓ຺ຓາຠິສິຍໍ ມນຸສ຺ສໂລມໍ ນ ລພ຺ຠຕີຕິ ອຕ຺ໂຖ. ອຸຓ຺ຓາຠິສິຍມ຺ປິ ມນຸສ຺ສໂລມໍ ຐເປຕ຺ວາ ເຍສໍ ເກສຎ຺ຈິ ປກ຺ຂິຈຕຸປ຺ປທານໍ ໂລມໍ ວຏ຺ຏຕີຕິ ອຕ຺ໂຖ. ປຓ຺ເຓຕິ ປຓ຺ຓຠິສິຍຎ຺ຈ ປຸປ຺ຜຎ຺ຈ ສຸທ຺ຘໍ ຕມາລປຕ຺ຕຎ຺ຈ ນ ລພ຺ຠໍ, ອວເສສໍ ຍໍ ກິຎ຺ຈິ ປຓ຺ຓໍ ລພ຺ຠຕີຕິ ອຕ຺ໂຖ. ຕມາລປຕ຺ຕກມ຺ປິ ອຎ຺ເຎຫິ ມິສ຺ສໍ ວຏ຺ຏຕີຕິ. ໂຈຬວາກຕິເຓສຸ ອກປ຺ປິຍໍ ນາມ ນຕ຺ຖິ. ອາສນຎ຺ເຈວ ອປ຺ປຏິເວກ຺ຂິຕໍ ນ ລພ຺ຠນ຺ຕິ ອາສນສາມຎ຺ຎໂຕ ປສງ຺ເຄນ ວຸຕ຺ຕໍ. ອກປ຺ປິຍສຍນວິນິຈ຺ຉໂຍ.

ອກປ຺ປິຍສຍນນິທ຺ເທສວຓ຺ຓນາ ນິຏ຺ຐິຕາ.