໒໖. ສມານາສນິກນິທ຺ເທສວຓ຺ຓນາ

໑໙໕. ຕິຓ຺ຓໍ ວສ຺ສານໍ ອນ຺ຕຣໍ ຕິວສ຺ສນ຺ຕຣໍ. ‘‘ອນຸຊານາມິ, ຠິກ຺ຂເວ, ຕິວສ຺ສນ຺ຕເຣນ ສຫ ນິສີທິຕຸ’’ນ຺ຕິ (ຈູຬວ. ໓໒໐) ຫິ ວຸຕ຺ຕໍ. ໂຍ ທ຺ວີຫິ ວສ຺ເສຫິ (ຈູຬວ. ອຏ຺ຐ. ໓໒໐) ວຸຑ຺ໂຒ ວາ ນໂວ ວາ, ໂສ ຕິວສ຺ສນ຺ຕໂຣ ນາມ.

໑໙໖. ມຸນີຕິ ພຸທ຺ຘມຸນິ. ສພ຺ເພເຫວາຕິ ອນຸປສມ຺ປນ຺ເນຫິປິ.

໑໙໗. ອນ຺ຕນ຺ຕິ ປຈ຺ຉິມໍ. ‘‘ອນຸຊານາມິ, ຠິກ຺ຂເວ, ຍໍ ຕິຓ຺ຓໍ ປໂຫຕິ, ເອຕ຺ຕກໍ ປຈ຺ຉິມໍ ທີຆາສນ’’ນ຺ຕິ (ຈູຬວ. ໓໒໐) ວຸຕ຺ຕຕ຺ຕາ ຍໍ ຕິຓ຺ຓໍ ປໂຫຕິ, ເອຕໍ ສໍຫາຣິມໍ ວາ ໂຫຕຸ ອສໍຫາຣິມໍ ວາ, ຕຖາຣູເປສຸ ຜລກຂຓ຺ເຑສຸປິ ນິສີທິຕຸໍ ວຏ຺ຏຕິ. ທ຺ວິນ຺ນນ຺ຕິ ທ຺ວິນ຺ນໍ ສມານາສນິການໍ. ‘‘ອນຸຊານາມິ, ຠິກ຺ຂເວ, ທຸວຄ຺ຄສ຺ສ ມຎ຺ຈໍ ທຸວຄ຺ຄສ຺ສ ປີຐ’’ນ຺ຕິ (ຈຸຬວ. ໓໒໐) ວຸຕ຺ຕຕ຺ຕາ ທ຺ເວ ສມານາສນິກາ ສຫ ນິສີທິຕຸໍ ລຠນ຺ຕິ. ອຎ຺ເຎຫິ ອສມານາສນິເກຫິ, ອນຸປສມ຺ປນ຺ນາທີຫິ ວາ ທ຺ເວ ຫຸຕ຺ວາປິ ນິສີທິຕຸໍ ນ ລຠນ຺ຕິ. ສມານາສນິກວິນິຈ຺ຉໂຍ.

ສມານາສນິກນິທ຺ເທສວຓ຺ຓນາ ນິຏ຺ຐິຕາ.