໑໔. ຠູມິນິທ຺ເທສວຓ຺ຓນາ

໑໓໖. ອິທານິ ‘‘ອນຸຊານາມິ, ຠິກ຺ຂເວ, ຈຕສ຺ໂສ ກປ຺ປິຍຠູມິໂຍ ອຸສ຺ສາວນນ຺ຕິກໍ ໂຄນິສາທິກໍ ຄຫປຕິໍ ສມ຺ມຸຕິ’’ນ຺ຕິ (ມຫາວ. ໒໙໕) ເອວໍ ວຸຕ຺ຕາ ຈຕສ຺ໂສ ກປ຺ປິຍຠູມິໂຍ ທສ຺ເສຕຸໍ ‘‘ສມ຺ມຸຕຸສ຺ສາວນນ຺ຕາ ຈາ’’ຕິອາທິມາຫ. ຍາສູຕິ ກປ຺ປິຍຠູມີສຸ (ກງ຺ຂາ. ອຏ຺ຐ. ສນ຺ນິຘິກາຣກສິກ຺ຂາປທວຓ຺ຓນາ).

໑໓໗. ອິທານິ ຍຕ຺ຖ ກປ຺ປິຍກຸຏິ ອິຈ຺ຉິຕພ຺ພາ, ຕໍ ທສ຺ເສຕຸໍ ‘‘ວາສຕ຺ຖາຍາ’’ຕິອາທິມາຫ. ວາສຕ຺ຖາຍາຕິ ອິມິນາ ໂກຏ຺ຐາຄາຣຠຕ຺ຕສາລາເຈຕິຍຆຣສມ຺ມຸຎ຺ຊນີມາຬກາທິ ຍໍ ຍໍ ອຎ຺ຎມ຺ປິ ວາສຕ຺ຖາຍ ກຣີຍຕິ, ຕຕ຺ຖ ຕຕ຺ຖ ກປ຺ປິຍກຸຏິກຣຓກິຈ຺ຈໍ ນຕ຺ຖີຕິ ທີປິຕໍ ໂຫຕິ. ໂຠຊນສາລາ ປນ ເສນາສນເມວ, ຕສ຺ມາ ຕຕ຺ຖ ກາຕພ຺ພາ ເອວາຕິ ວທນ຺ຕິ. ສງ຺ຆິເກເວກສນ຺ຕເກຕິ ເອຕ຺ຖ ເອກສນ຺ຕໂກ ອຸປສມ຺ປນ຺ນສນ຺ຕໂກວ ເວທິຕພ຺ໂພ.

໑໓໘. ອິທານິ ກຕ຺ຕພ຺ພາກາຣໍ ທສ຺ເສຕຸໍ ‘‘ເຄເຫ’’ຕິອາທິມາຫ. ຕຕ຺ຖ ສງ຺ຆສ຺ສ ວາ ເອກສ຺ສ ວາ ເຄເຫ ວິຫາເຣ ກຣິຍມາເນ ເອວໍ ອີຣຍໍ ‘‘ກປ຺ປິຍກຸຏິໍ ກໂຣມ, ກປ຺ປິຍກຸຏິໍ ກໂຣມາ’’ຕິ ວາ ‘‘ກປ຺ປິຍກຸຏິ ກປ຺ປິຍກຸຏີ’’ຕິ ວາ ວທນ຺ໂຕ ປຐມິຏ຺ຐກຕ຺ຖມ຺ຠາທິໍ ຐເປຍ຺ຍ, ເອວໍ ກຕາ ອຸສ຺ສາວນນ຺ຕິກາ ນາມ, ເອວໍ ອຸທາຫຣິຕວຈນນ຺ຕິກາຕິ ອຕ຺ໂຖ.

໑໓໙. ເຍຠຸຍ຺ເຍນ ວາ ອປຣິກ຺ຂິຕ຺ໂຕ, ສກໂລປິ ວາ ອປຣິກ຺ຂິຕ຺ໂຕ ອາຣາໂມ ‘‘ໂຄນິສາທີ’’ຕິ ວຸຈ຺ຈຕີຕິ ສມ຺ພນ຺ໂຘ. ເອຕ຺ຖ ປນ ເສນາສເນສຸ ປຣິກ຺ຂິຕ຺ເຕສຸປິ ອາຣາເມ ອປຣິກ຺ຂິຕ຺ເຕ ກປ຺ປິຍກຸຏິກຣຓກິຈ຺ຈໍ ນຕ຺ຖິ. ສມ຺ມຸຕິໍ ກໂຣນ຺ເຕຫິ ກຕໍ ປຣິໂຍສິຕໍ ‘‘ອິມໍ ວິຫາຣໍ ອຑ຺ຒໂຍຄໍ ປາສາທໍ ຫມ຺ມິຍໍ ຄຸຫໍ ຕິຓກຸຏິກໍ ມຓ຺ຑປ’’ນ຺ຕິ ເຕສໍ ນາມໍ ຄເຫຕ຺ວາ ຕສ຺ສາ ກຸຏິຍາ ຫຕ຺ຖປາເສ ວາ ຐຕ຺ວາ, ຕສ຺ສາ ອນ຺ໂຕ ວາ ປວິສິຕ຺ວາ ວຸຕ຺ຕນເຍເນວ ຎຕ຺ຕິທຸຕິຍກມ຺ມວາຈາຍ ສມ຺ມນ຺ນິຕພ຺ພໍ.

໑໔໐. ‘‘ຠິກ຺ຂຸໍ ຐເປຕ຺ວາ ອຎ຺ເຎຫີ’’ຕິ ວຈນໂຕ ເສສສຫຘມ຺ມິເກຫິປິ ເທວມນຸສ຺ເສຫິປິ ອຎ຺ເຎຫິ ກປ຺ປິຍກຸຏິຍາ ອຕ຺ຖາຍ ທິນ຺ໂນ ວາ ເຕສໍ ສນ຺ຕໂກ ວາ ເຄໂຫ ‘‘ຄຫປຕີ’’ຕິ ມໂຕ ຎາໂຕຕິ ອຕ຺ໂຖ, ສງ຺ຆສນ຺ຕກຎ຺ຈ ຠິກ຺ຂຸສນ຺ຕກຎ຺ຈ ຐເປຕ຺ວາ ສພ຺ເພສໍ ເຄໂຫ ຄຫປຕີຕິ ອຘິປ຺ປາໂຍ.

໑໔໑. ສປ຺ປິອາທີຫິ ມິສ຺ສິຕນ຺ຕິ ສປ຺ປິອາທີຫິ ປຎ຺ຈຫິ ຈ ຫລິທ຺ທິສິງ຺ຄິເວຣາທິຍາວຊີວິເກນ ຈາຕິ ອຕ຺ໂຖ. ວເຊຍ຺ຍ ອນ຺ໂຕວຸຕ຺ຖຕ຺ຕນ຺ຕິ ເອຕ຺ຖ ຍາວກາລິກຍາມກາລິກສງ຺ຂາຕໍ ປຸຣິມກາລິກທ຺ວຍໍ ສງ຺ຆິກໍ ວາ ຠິກ຺ຂຸສ຺ສ ວາ ຠິກ຺ຂຸນິຍາ ວາ ສນ຺ຕກໍ ສຍໍ ກປ຺ປິຍກຸຏິຍາ ວຸຕ຺ຖມ຺ປິ ອິຕເຣຫິ ອກປ຺ປິຍກຸຏິຍາ ວຸຕ຺ເຖຫິ ມິສ຺ສິຕໍ ອນ຺ໂຕວຸຕ຺ຖຠາວໍ ອາຄຈ຺ເຉຍ຺ຍາຕິ ອຕ຺ໂຖ.

໑໔໒. ເຕເຫວາຕິ ອກປ຺ປິຍກຸຏິຍໍ ວຸຕ຺ຖສປ຺ປິເຕລາທີຫິ. ສາມປາກຕນ຺ຕິ ສາມໍປກ຺ກຠາວໍ ຄຈ຺ຉຕີຕິ ອຕ຺ໂຖ.

໑໔໓-໔. ອິມາ ປນ ກປ຺ປິຍກຸຏິໂຍ ຍທາ ຊຫິຕວຕ຺ຖຸກາ ໂຫນ຺ຕິ, ຕໍ ທສ຺ເສຕຸໍ ‘‘ອຸສ຺ສາວນນ຺ຕິກາ’’ຕິອາທິມາຫ. ສເຈ ຖມ຺ເຠ ວາ ຠິຕ຺ຕິປາເທ ວາ ປຣິວຕ຺ເຕນ຺ຕິ, ໂຍ ໂຍ ຐິໂຕ, ຕຕ຺ຖ ຕຕ຺ຖ ປຕິຏ຺ຐາຕິ, ເອເຕນຸປາເຍນ ສພ຺ເພສຸ ປຣິວຕ຺ເຕສຸປິ ນ ວິຊຫິຕວຕ຺ຖຸກາວ ໂຫຕີຕິ ອຕ຺ໂຖ. ປຣິກ຺ຂິຕ຺ເຕ ໂຄນິສາທິ ວິຊຫິຕວຕ຺ຖຸກາ. ເສສາ ຉທນວິພ຺ຠມາຕິ ຉທນວິນາສາ ຊຫິຕວຕ຺ຖຸກາ ໂຫນ຺ຕີຕິ ອຘິປ຺ປາໂຍ. ຠູມິວິນິຈ຺ຉໂຍ.

ຠູມິນິທ຺ເທສວຓ຺ຓນາ ນິຏ຺ຐິຕາ.