໑໓. ສມຓກປ຺ປນິທ຺ເທສວຓ຺ຓນາ

໑໒໕. ຠູຕານໍ ຊາຕານໍ ນິພ຺ພຕ຺ຕານໍ ຄາໂມ ຠູຕຄາໂມ (ປາຈິ. ໙໑; ປາຈິ. ອຏ຺ຐ. ໙໑; ກງ຺ຂາ. ອຏ຺ຐ. ຠູຕຄາມສິກ຺ຂາປທວຓ຺ຓນາ). ສມາຣມ຺ໂຠຕິ ເຉທນຜາລນປຈນາທິ, ຕສ຺ມິໍ ຠູຕຄາມສມາຣມ຺ເຠ ຠູຕຄາມສມາຣມ຺ຠເຫຕຸ ປາຈິຕ຺ຕິ ໂຫຕີຕິ ອຕ຺ໂຖ. ກຕກປ຺ປິຍໍ (ກງ຺ຂາ. ອຏ຺ຐ. ຠູຕຄາມສິກ຺ຂາປທວຓ຺ຓນາ) ປນ ສມຓກປ຺ປິຍໍ ຠເວຕິ ສມ຺ພນ຺ໂຘ. ສມຓານໍ ກປ຺ປິຍໍ ສມຓກປ຺ປິຍໍ. ອິທານິ ເຍນ ກຕໍ ກປ຺ປິຍໍ ສມຓກປ຺ປິຍໍ ໂຫຕິ, ຕໍ ທສ຺ເສຕຸໍ ‘‘ນເຂນ ວາ’’ຕິອາທິມາຫ. ‘‘ອນຸຊານາມິ, ຠິກ຺ຂເວ, ປຎ຺ຈຫິ ສມຓກປ຺ເປຫິ ຜລໍ ປຣິຠຸຎ຺ຊິຕຸໍ, ອຄ຺ຄິປຣິຊິຕໍ ສຕ຺ຖປຣິຊິຕໍ ນຂປຣິຊິຕໍ ອພີຊໍ ນິພ຺ພຏ຺ຏພີຊຎ຺ເຎວ ປຎ຺ຈມ’’ນ຺ຕິ (ຈູຬວ. ໒໕໐) ຫິ ວຸຕ຺ຕໍ.

໑໒໖. ອິທານິ ຕໍ ຠູຕຄາມໍ ທສ຺ເສຕຸໍ ‘‘ສມູລາ’’ຕິອາທິມາຫ. ຕຕ຺ຖ (ປາຈິ. ໙໑; ປາຈິ. ອຏ຺ຐ. ໙໑) ສ-ອິຕິ ໂສ ຠູຕຄາໂມ ນາມາຕິ ອຕ຺ໂຖ, ມູລພີຊາທີຫິ ປຎ຺ຈຫິ ພີເຊຫິ ປຠາວິໂຕ ໂຫຕີຕິ ວຸຕ຺ຕໍ ໂຫຕິ. ຕຕ຺ຖ ມູລພີຊໍ ນາມ ຫລິທ຺ທິສິງ຺ຄິເວຣາທິ. ຂນ຺ຘພີຊໍ ນາມ ອສ຺ສຕ຺ໂຖ ນິຄ຺ໂຣໂຘຕິ ເອວມາທິ. ອຄ຺ຄພີຊໍ ນາມ ອຊ຺ຊຸກຜຓິຊ຺ຊກາທິ. ຜຬຸພີຊໍ ນາມ ອຸຈ຺ຉຸເວຬຸນຬາທິ. ‘‘ພີຊພີຊໍ ນາມ ປຸພ຺ພຓ຺ຓໍ ອປຣຓ຺ຓໍ, ຍານິ ວາ ປນຎ຺ຎານິປິ ອຕ຺ຖິ ພີເຊ ຊາຍນ຺ຕິ ພີເຊ ສຎ຺ຊາຍນ຺ຕິ, ເອຕໍ ພີຊພີຊໍ ນາມາ’’ຕິ ວຸຕ຺ຕໍ. ອິທານິ ‘‘ພີຊຄາມຠູຕຄາມສມາຣມ຺ຠາ ປຏິວິຣໂຕ ໂຫຕີ’’ຕິ (ທີ. ນິ. ໑.໑໐, ໑໙໕; ມ. ນິ. ໑.໒໙໓, ໔໑໑; ໒.໑໑; ອ. ນິ. ໑໐.໙໙; ປຸ. ປ. ໑໗໙) ວຸຕ຺ຕຕ຺ຕາ ຘມ຺ມານຸໂລເມນ ອາຄຕໍ ພີຊຄາມສມາຣມ຺ຠໍ ທສ຺ເສຕຸໍ ‘‘ອາຣມ຺ເຠ ທຸກ຺ກຏ’’ນ຺ຕິອາທິມາຫ. ຕສ຺ມາ ເອຕໍ ປຐມໍ ‘‘ກປ຺ປິຍໍ ກໂຣຫີ’’ຕິ ຠູຕຄາມປຣິໂມຈນໍ ກາເຣຕ຺ວາ ພີຊຄາມປຣິໂມຈນຕ຺ຖໍ ປຸນ ກປ຺ປິຍໍ ກາເຣຕພ຺ພໍ.

໑໒໗. ນິພ຺ພຏ຺ຏພີຊໍ (ປາຈິ. ອຏ຺ຐ. ໙໒; ກງ຺ຂາ. ອຏ຺ຐ. ຠຸຕຄາມສິກ຺ຂາປທວຓ຺ຓນາ) ນາມ ອມ຺ພປນສາທິ. ໂນພີຊໍ ນາມ ຕຣຸຓມ຺ພຜລາທິ, ເອຕໍ ປນ ສພ຺ພໍ ອກປ຺ປິຍມ຺ປິ ວຏ຺ຏຕີຕິ ອຕ຺ໂຖ. ກຏາຫພທ຺ຘພີຊານິ ກປິຕ຺ຖຜລາທີນິ. ພຫິທ຺ຘາ ວາປິ ກາຣເຍຕິ ກປາເລປິ ກາຕຸໍ ວຏ຺ຏຕິ, ສເຈ ເອກາພທ຺ຘານີຕິ ອຕ຺ໂຖ. ກຏາຫມຸຕ຺ຕໍ ປນ ຠິນ຺ທິຕ຺ວາ ກາເຣຕພ຺ພໍ.

໑໒໘. ຠາຊເນ ວາ ຠູມິຍໍ ວາ ເອກາພທ຺ເຘສຸ ພີເຊສຸ ເອກສ຺ມິໍ ພີເຊ ກປ຺ປິເຍ ກເຕ ສພ຺ເພສ຺ເວວ ກຕໍ ຠເວຕິ ອຕ຺ໂຖ. ຍຖາ ຈ ພີເຊ, ເອວໍ ຣຸກ຺ຂສຫສ຺ສໍ ວາ ອຸຈ຺ຉຸສຫສ຺ສໍ ວາ ຉິນ຺ທິຕ຺ວາ ເອກາພທ຺ເຘ ກເຕປິ ວິນິຈ຺ຉໂຍ ເວທິຕພ຺ໂພ.

໑໒໙. ກປ຺ປິຍໍ ກຕ຺ວາ ນິກ຺ຂິຕ຺ເຕ ພີຊຄາເມ ປຸນ ມູລປຓ຺ຓານິ ສເຈ ຊາຍຣຸໍ, ປຸນ ກປ຺ປິຍໍ ກາເຣຍ຺ຍາຕິ ອຕ຺ໂຖ. ຕທາຕິ ມູເລ ຈ ອງ຺ກຸເຣ ຈ ຊາເຕຕິ ອຕ຺ໂຖ.

໑໓໐. ອຸທກສມ຺ຠໂວຕິ ອຸທກຊາໂຕ. ເຈຕິຍາທີສູຕິ ເອຕ຺ຖ ອາທິ-ສທ຺ເທນ ເຄຫປ຺ປມຸຂປາກາຣເວທິກາທີສຸ ນິພ຺ພຕ຺ຕາ ຄຫິຕາ. ນິພ຺ພຕ຺ຕທ຺ວຕ຺ຕິປຕ຺ຕໂກ ຠູຕຄາໂມວ, ອນິພ຺ພຕ຺ຕໂກ ອຄ຺ຄພີເຊ ສງ຺ຄຫໍ ຄຈ຺ຉຕິ. ພີຊມ຺ປິ ຍາວ ມູລໍ ວາ ປຓ຺ຓໍ ວາ ນ ນິກ຺ຂມຕິ, ຕາວ ພີຊຄາໂມວ, ມູເລ ຈ ນິກ຺ຂນ຺ເຕ ປຓ຺ເຓ ຈ ຫຣິເຕ ຊາເຕ ຠູຕຄາໂມວ ໂຫຕີຕິ ອຕ຺ໂຖ.

໑໓໑. ມກຸຬນ຺ຕິ ອຜຸລ຺ລໍ. ອຫິຉຕ຺ຕກໍ ນາມ ຣຸກ຺ເຂ ຊາຕໍ ອຫິຉຕ຺ຕກໍ.

໑໓໒. ອລ຺ລຣຸກ຺ເຂ ຄຓ຺ຫໂຕຕິ ສມ຺ພນ຺ໂຘ. ຕຕ຺ຖາຕິ ອລ຺ລຣຸກ຺ເຂ ຉິນ຺ທໂຕ ວາປີຕິ ສມ຺ພນ຺ໂຘ.

໑໓໔. ‘‘ອິມໍ ຣຸກ຺ຂໍ, ອິມໍ ລຕໍ, ອິມໍ ກນ຺ທໍ ຉິນ຺ທ, ຠິນ຺ທາ’’ຕິອາທິນາ ນເຍນ ນິຍເມຕ຺ວາ ຠາສິຕຸໍ ນ ວຏ຺ຏຕິ. ‘‘ອິທໍ, ເອຕ’’ນ຺ຕິ ອວຕ຺ວາ ເກວລໍ ‘‘ຣຸກ຺ຂໍ ຉິນ຺ທາ’’ຕິອາທິນາ (ປາຈິ. ອຏ຺ຐ. ໙໒; ກງ຺ຂາ. ອຏ຺ຐ. ຠູຕຄາມຫິກ຺ຂາປທວຓ຺ຓນາ) ນເຍນ ວຕ຺ຕຸໍ ວຏ຺ຏຕີຕິ. ສມຓກປ຺ປວິນິຈ຺ຉໂຍ.

ສມຓກປ຺ປນິທ຺ເທສວຓ຺ຓນາ ນິຏ຺ຐິຕາ.