໗. ຕຕຸຕ຺ຕຣິສິກ຺ຂາປທວຓ຺ຓນາ

ປກຕິຍາ ສນ຺ຕຣຸຕ຺ຕເຣນ ຈຣຕິ ກຖິນປລິໂພຘວເສນ ວາ ສາສງ຺ກສິກ຺ຂາປທວເສນ ວາ. ເອຕ຺ຖ ສິຍາ – ‘‘ນ ມຕ຺ຕໍ ຊານິຕ຺ວາ ພຫຸໍ ຈີວຣໍ ວິຎ຺ຎາເປສ຺ສນ຺ຕິ, ທຸສ຺ສວາຓິຊ຺ຊໍ ວາ’’ຕິອາທິນາ (ປາຣາ. ໕໒໒) ອຸຊ຺ຌາຍນ຺ຕານໍ ສຸຕ຺ວາ ຠຄວາປິ ຉພ຺ພຄ຺ຄິເຍ ຠິກ຺ຂູ ‘‘ກຖຎ຺ຫິ ນາມ ຕຸມ຺ເຫ ໂມຆປຸຣິສາ ນ ມຕ຺ຕໍ ຊານິຕ຺ວາ ພຫຸໍ ຈີວຣໍ ວິຎ຺ຎາເປສ຺ສຖາ’’ຕິ (ປາຣາ. ໕໒໒) ວຕ຺ວາ ສິກ຺ຂາປທສ຺ສ ປຎ຺ຎຕ຺ຕຕ຺ຕາ ຈ ອິມິສ຺ສໍ ກງ຺ຂາວິຕຣຓິຍໍ ‘‘ພຫຸຈີວຣວິຎ຺ຎາປນວຕ຺ຖຸສ຺ມິໍ ປຎ຺ຎຕ຺ຕ’’ນ຺ຕິ ວຸຕ຺ຕຕ຺ຕາ, ສມນ຺ຕປາສາທິກາຍໍ ‘‘ນ ຫິ ອນຈ຺ຉິນ຺ນຈີວຣາ ອຕ຺ຕໂນ ອຕ຺ຖາຍ ສາຂາປລາສໍ ຠຎ຺ຊິຕຸໍ ລຠນ຺ຕິ, ອຈ຺ຉິນ຺ນຈີວຣານໍ ປນ ອຕ຺ຖາຍ ລຠນ຺ຕີ’’ຕິ ວຸຕ຺ຕຕ຺ຕາ ຈ ອຎ຺ຎສ຺ສຕ຺ຖາຍ ປມາຓໍ ວິຎ຺ຎາເປຕຸໍ ວຏ຺ຏຕີຕິ ເຈ? ນ, ກສ຺ມາ? ອຎ຺ຎາຕກວິຎ຺ຎຕ຺ຕິສິກ຺ຂາປທສ຺ສ ອຏ຺ຐຸປ຺ປຕ຺ຕິຍາ ເອວ ອຎ຺ຎາຕກວິຎ຺ຎຕ຺ຕິ ວາຣິຕາ. ຕສ຺ສ ສິກ຺ຂາປທສ຺ສ ອນາປຕ຺ຕິ. ປາຬິຍໍ (ປາຣາ. ໕໒໑) ‘‘ອຎ຺ຎສ຺ສຕ຺ຖາຍາ’’ຕິ ອິມິສ຺ສາ ອນາປຕ຺ຕິປາຬິຍາ ອຎ຺ຎສ຺ສຕ຺ຖາຍ ວິຎ຺ຎາເປນ຺ໂຕ ຕສ຺ສ ຎາຕກປ຺ປວາຣິເຕ ເອວ ວິຎ຺ຎາເປຕິ, ນ ອຎ຺ເຎຕິ ວຈນໂຕ ຈ ວາຣິຕາ. ຕສ຺ມາ ຠຄວາປິ ‘‘ພຫຸໍ ຈີວຣໍ ວິຎ຺ຎາເປສ຺ສຖາ’’ຕິ (ປາຣາ. ໕໒໒) ວິຄຣຫິຕ຺ວາ ສິກ຺ຂາປທໍ ປຎ຺ຎາເປນ຺ໂຕ ‘‘ອຠິຫຏ຺ຐຸໍ ປວາເຣຍ຺ຍາ’’ຕິ ວຸຕ຺ຕນເຍເນວ ປມາຓໂຕ ຄຫຓໍ ອນຸຊານິ, ນ ອຎ຺ຎສ຺ສຕ຺ຖາຍ ປມາຓໂຕ ວິຎ຺ຎາປນໍ. ຍສ຺ມາ ປນິມໍ ສິກ຺ຂາປທໍ ອຎ຺ຎສ຺ສຕ຺ຖາຍ ວິຎ຺ຎາປນວຕ຺ຖຸສ຺ມິໍເຍວ ປຎ຺ຎຕ຺ຕໍ, ຕສ຺ມາ ອິຘ ‘‘ອຎ຺ຎສ຺ສຕ຺ຖາຍາ’’ຕິ ນ ວຸຕ຺ຕໍ, ນ ນ ລພ຺ຠຕີຕິ ກຕ຺ວາ.

ອຏ຺ຐກຖາສຸ ‘‘ອຎ຺ຎາຕກປ຺ປວາຣິຕຏ຺ຐາເນ ປກຕິຍາ ພຫຸມ຺ປິ ວຏ຺ຏຕິ, ອຈ຺ຉິນ຺ນກາຣຓາ ປມາຓເມວ ວຏ຺ຏຕີ’’ຕິ ວຸຕ຺ຕໍ. ຕໍ ‘‘ອນາປຕ຺ຕິ ຎາຕການໍ ປວາຣິຕານ’’ນ຺ຕິ (ປາຣາ. ໕໒໖) ວຸຕ຺ຕອນາປຕ຺ຕິປາຬິຍາ ນ ສເມຕີຕິ ສມນ຺ຕປາສາທິກາຍໍ (ປາຣາ. ອຏ຺ຐ. ໒.໕໒໖) ວຸຕ຺ຕຕ຺ຕາ ອິຘາປິ ວຸຕ຺ຕນເຍເນວ ຎາຕກປ຺ປວາຣິເຕ ວິຎ຺ຎາເປນ຺ຕສ຺ສ ອຕ຺ຕໂນ ຘເນນ ຄຓ຺ຫນ຺ຕສ຺ສ ອນາປຕ຺ຕີຕິ ລິຂິຕໍ. ‘‘ອຎ຺ຎສ຺ສຕ຺ຖາຍາ’’ຕິ ນິທານວິໂຣຘໂຕ ນ ວຸຕ຺ຕໍ, ຕຖາປິ ອນນ຺ຕເຣ ວຸຕ຺ຕນເຍເນວ ລພ຺ຠຕິ ເອວາຕິ ວທນ຺ຕິ.

ຕຕຸຕ຺ຕຣິສິກ຺ຂາປທວຓ຺ຓນາ ນິຏ຺ຐິຕາ.