໕. ສຎ຺ຈຣິຕ຺ຕສິກ຺ຂາປທວຓ຺ຓນາ

ອລໍວຈນີຍາຕິ ນ ວຈນີຍາ, ນິວາຣເຓ ອລໍ-ສທ຺ໂທ, ນ ອລໍວຈນີຍາ ນາລໍວຈນີຍາ. ‘‘ປຏິຄ຺ຄຓ຺ຫາຕິ ວີມໍສຕິ ປຈ຺ຈາຫຣຕິ, ອາປຕ຺ຕິ ສງ຺ຆາທິເສສສ຺ສາ’’ຕິ (ປາຣາ. ໓໐໕) ວຸຕ຺ຕຕ຺ຕາ ຍສ຺ສ ເອກນ຺ເຕນ ສງ຺ຆາທິເສໂສ ໂຫຕິ, ຕສ຺ສ ປຏິຄ຺ຄຓ຺ຫນວີມໍສນປໂຍຄາ ເອເຕ ທຸກ຺ກຏຖຸລ຺ລຈ຺ຈຍາ ນຕ຺ຖີຕິ ວທນ຺ຕີຕິ ລິຂິຕໍ. ກິຎ຺ຈາປິ ເອຕ຺ຖ ‘‘ອິຕ຺ຖີ ນາມ ມນຸສ຺ສິຕ຺ຖີ, ນ ຍກ຺ຂີ ນ ເປຕີ ນ ຕິຣຈ຺ຉານຄຕາ. ປຸຣິໂສ ນາມ ມນຸສ຺ສປຸຣິໂສ, ນ ຍກ຺ໂຂ ນ ເປໂຕ ນ ຕິຣຈ຺ຉານຄໂຕ’’ຕິ ປາຬິ ນຕ຺ຖິ, ຕຖາປິ ກາຍສໍສຄ຺ຄາທີສຸ ‘‘ມາຕຸຄາໂມ ນາມ ມນຸສ຺ສິຕ຺ຖີ’’ຕິ (ປາຣາ. ໒໘໕) ອິຕ຺ຖິວວຕ຺ຖານສ຺ສ ກຕຕ຺ຕາ ອິຘາປິ ມນຸສ຺ສິຕ຺ຖີ ເອວາຕິ ປຎ຺ຎາຍຕິ. ເມຖຸນປຸພ຺ພຠາຄສາມຎ຺ຎໂຕ ອິຕ຺ຖິວວຕ຺ຖາເນນ ປຸຣິສວວຕ຺ຖານໍ ກຕເມວ ໂຫຕິ. ເຕເນວາຫ ‘‘ເຍສຸ ສຎ຺ຈຣິຕ຺ຕໍ ສມາປຊ຺ຊຕິ, ເຕສໍ ມນຸສ຺ສຊາຕິກຕາ’’ຕິ (ກງ຺ຂາ. ອຏ຺ຐ. ສຎ຺ຈຣິຕ຺ຕສິກ຺ຂາປທວຓ຺ຓນາ). ກາຍສໍສຄ຺ຄາທີສຸ ຈ ປຓ຺ຑກຍກ຺ຂິເປຕິໂຍ ຖຸລ຺ລຈ຺ຈຍວຕ຺ຖຸກາວ ວຸຕ຺ຕາ, ຕຖາ ອິຘາປິ, ປຓ຺ຑກສຠາວຕ຺ຕາ ມນຸສ຺ສອຸຠໂຕພ຺ຍຎ຺ຊນໂກ ຈ ຖຸລ຺ລຈ຺ຈຍວຕ຺ຖຸໂກວ ໂຫຕິ. ເສສາ ມນຸສ຺ສປຸຣິສອມນຸສ຺ສປຓ຺ຑກອຸຠໂຕພ຺ຍຎ຺ຊນກຕິຣຈ຺ຉານຄຕປຸຣິສາທໂຍ ທຸກ຺ກຏວຕ຺ຖຸກາວ ມິຈ຺ຉາຈາຣທສ຺ສນສຠາວໂຕຕິ ເວທິຕພ຺ພໍ.

ສຎ຺ຈຣິຕ຺ຕສິກ຺ຂາປທວຓ຺ຓນາ ນິຏ຺ຐິຕາ.