໑. ອນ຺ເຕປຸຣສິກ຺ຂາປທວຓ຺ຓນາ

ຣຕນວຄ຺ຄສ຺ສ ປຐເມ ຂຕ຺ຕິຍສ຺ສາຕິ ຂຕ຺ຕິຍຊາຕິກສ຺ສ, ມຸທ຺ຘາຠິສິຕ຺ຕສ຺ສາຕິ ຂຕ຺ຕິຍາຠິເສເກນ ມຸທ຺ຘນິ ອຠິສິຕ຺ຕສ຺ສ. ອນິກ຺ຂນ຺ໂຕ ຣາຊາ ອິໂຕຕິ ອນິກ຺ຂນ຺ຕຣາຊກໍ, ຕສ຺ມິໍ ອນິກ຺ຂນ຺ຕຣາຊເກ, ສຍນິຆເຣຕິ ອຕ຺ໂຖ. ຣຕນໍ ວຸຈ຺ຈຕິ ມເຫສີ, ນິຄ຺ຄຕນ຺ຕິ ນິກ຺ຂນ຺ຕໍ, ອນິຄ຺ຄຕໍ ຣຕນໍ ອິໂຕຕິ ອນິຄ຺ຄຕຣຕນກໍ, ຕສ຺ມິໍ ອນິຄ຺ຄຕຣຕນເກ, ສຍນິຆເຣຕິ ອຕ຺ໂຖ. ອິນ຺ທຂີລໍ ອຕິກ຺ກເມຍ຺ຍາຕິ ເອຕ຺ຖ ອຕ຺ຕໂນ ອາຄຕຠາວໍ ອຊານາເປຕ຺ວາ ສຍນິຆຣສ຺ສ ອຸມ຺ມາຣໍ ປຐມໍ ປາທໍ ອຕິກ຺ກາເມນ຺ຕສ຺ສ ທຸກ຺ກຏໍ, ທຸຕິຍໍ ປາຈິຕ຺ຕິຍໍ.

ສາວຕ຺ຖິຍໍ ອາຍສ຺ມນ຺ຕໍ ອານນ຺ທໍ ອາຣພ຺ຠ ຣຎ຺ໂຎ ອນ຺ເຕປຸຣປ຺ປວິສນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ປຏິສໍວິທິເຕ ອປ຺ປຏິສໍວິທິຕສຎ຺ຎິໂນ, ເວມຕິກສ຺ສ ຈ ທຸກ຺ກຏໍ. ປຏິສໍວິທິຕສຎ຺ຎິສ຺ສ, ນ ຂຕ຺ຕິຍສ຺ສ ວາ, ນ ຂຕ຺ຕິຍາຠິເສເກນ ອຠິສິຕ຺ຕສ຺ສ ວາ, ອຸໂຠສຸ ວາ, ອຸຠິນ຺ນໍ ວາ ອຎ຺ຎຕຣສ຺ມິໍ ນິກ຺ຂນ຺ເຕ ສຍນິຆຣໍ ປວິສນ຺ຕສ຺ສ, ອສຍນິຆເຣ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ຂຕ຺ຕິຍຕາ, ອຠິສິຕ຺ຕຕາ, ອຸຠິນ຺ນມ຺ປິ ສຍນິຆຣໂຕ ອນິກ຺ຂນ຺ຕຕາ, ອປ຺ປຏິສໍວິທິຕຕາ, ອິນ຺ທຂີລາຕິກ຺ກໂມຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ປຐມກຖິນສທິສານິ, ອິທໍ ປນ ກິຣິຍາກິຣິຍນ຺ຕິ.

ອນ຺ເຕປຸຣສິກ຺ຂາປທວຓ຺ຓນາ ນິຏ຺ຐິຕາ.