໙. ຣຕນວຄ຺ໂຄ

໑. ອນ຺ເຕປຸຣສິກ຺ຂາປທວຓ຺ຓນາ

ຣຕນວຄ຺ຄສ຺ສ ປຐເມ ຂຕ຺ຕິຍສ຺ສາຕິ ຂຕ຺ຕິຍຊາຕິກສ຺ສ, ມຸທ຺ຘາຠິສິຕ຺ຕສ຺ສາຕິ ຂຕ຺ຕິຍາຠິເສເກນ ມຸທ຺ຘນິ ອຠິສິຕ຺ຕສ຺ສ. ອນິກ຺ຂນ຺ໂຕ ຣາຊາ ອິໂຕຕິ ອນິກ຺ຂນ຺ຕຣາຊກໍ, ຕສ຺ມິໍ ອນິກ຺ຂນ຺ຕຣາຊເກ, ສຍນິຆເຣຕິ ອຕ຺ໂຖ. ຣຕນໍ ວຸຈ຺ຈຕິ ມເຫສີ, ນິຄ຺ຄຕນ຺ຕິ ນິກ຺ຂນ຺ຕໍ, ອນິຄ຺ຄຕໍ ຣຕນໍ ອິໂຕຕິ ອນິຄ຺ຄຕຣຕນກໍ, ຕສ຺ມິໍ ອນິຄ຺ຄຕຣຕນເກ, ສຍນິຆເຣຕິ ອຕ຺ໂຖ. ອິນ຺ທຂີລໍ ອຕິກ຺ກເມຍ຺ຍາຕິ ເອຕ຺ຖ ອຕ຺ຕໂນ ອາຄຕຠາວໍ ອຊານາເປຕ຺ວາ ສຍນິຆຣສ຺ສ ອຸມ຺ມາຣໍ ປຐມໍ ປາທໍ ອຕິກ຺ກາເມນ຺ຕສ຺ສ ທຸກ຺ກຏໍ, ທຸຕິຍໍ ປາຈິຕ຺ຕິຍໍ.

ສາວຕ຺ຖິຍໍ ອາຍສ຺ມນ຺ຕໍ ອານນ຺ທໍ ອາຣພ຺ຠ ຣຎ຺ໂຎ ອນ຺ເຕປຸຣປ຺ປວິສນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ປຏິສໍວິທິເຕ ອປ຺ປຏິສໍວິທິຕສຎ຺ຎິໂນ, ເວມຕິກສ຺ສ ຈ ທຸກ຺ກຏໍ. ປຏິສໍວິທິຕສຎ຺ຎິສ຺ສ, ນ ຂຕ຺ຕິຍສ຺ສ ວາ, ນ ຂຕ຺ຕິຍາຠິເສເກນ ອຠິສິຕ຺ຕສ຺ສ ວາ, ອຸໂຠສຸ ວາ, ອຸຠິນ຺ນໍ ວາ ອຎ຺ຎຕຣສ຺ມິໍ ນິກ຺ຂນ຺ເຕ ສຍນິຆຣໍ ປວິສນ຺ຕສ຺ສ, ອສຍນິຆເຣ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ຂຕ຺ຕິຍຕາ, ອຠິສິຕ຺ຕຕາ, ອຸຠິນ຺ນມ຺ປິ ສຍນິຆຣໂຕ ອນິກ຺ຂນ຺ຕຕາ, ອປ຺ປຏິສໍວິທິຕຕາ, ອິນ຺ທຂີລາຕິກ຺ກໂມຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ປຐມກຖິນສທິສານິ, ອິທໍ ປນ ກິຣິຍາກິຣິຍນ຺ຕິ.

ອນ຺ເຕປຸຣສິກ຺ຂາປທວຓ຺ຓນາ ນິຏ຺ຐິຕາ.

໒. ຣຕນສິກ຺ຂາປທວຓ຺ຓນາ

ທຸຕິເຍ ຣຕນນ຺ຕິ ມຸຕ຺ຕາທິທສວິຘໍ. ຣຕນສມ຺ມຕນ຺ຕິ ຍໍກິຎ຺ຈິ ມນຸສ຺ສານໍ ອຸປໂຠຄປຣິໂຠຄໍ. ອຊ຺ຌາຣາເມ ວາຕິ ປຣິກ຺ຂິຕ຺ຕສ຺ສ ອນ຺ໂຕປຏິກ຺ເຂເປ ອປຣິກ຺ຂິຕ຺ຕສ຺ສ ທ຺ວິນ຺ນໍ ເລຑ຺ຑຸປາຕານໍ ອນ຺ໂຕ. ອຊ຺ຌາວສເຖຕິ ປຣິກ຺ຂິຕ຺ຕສ຺ສ ອນ຺ໂຕປຏິກ຺ເຂເປ, ອປຣິກ຺ຂິຕ຺ຕສ຺ສ ມຸສລປາຕພ຺ຠນ຺ຕເຣ. ອຍໍ ປເນຕ຺ຖ ວິນິຈ຺ຉໂຍ – ຊາຕຣູປຣຊຕໍ ອຕ຺ຕໂນ ອຕ຺ຖາຍ ອຸຄ຺ຄຓ຺ຫນ຺ຕສ຺ສ ວາ ອຸຄ຺ຄຓ຺ຫາເປນ຺ຕສ຺ສ ວາ ນິສ຺ສຄ຺ຄິຍໍ ປາຈິຕ຺ຕິຍໍ. ສງ຺ຆຄຓປຸຄ຺ຄລເຈຕິຍນວກມ຺ມານໍ ອຕ຺ຖາຍ ທຸກ຺ກຏໍ, ອວເສເສ ມຸຕ຺ຕາທິຣຕເນ ສພ຺ເພສມ຺ປິ ອຕ຺ຖາຍ ທຸກ຺ກຏເມວ. ກປ຺ປິຍວຕ຺ຖຸໍ ວາ ອກປ຺ປິຍວຕ຺ຖຸໍ ວາ ອນ຺ຕມໂສ ມາຕຸສນ຺ຕກມ຺ປິ ຠຓ຺ຑາຄາຣິກສີເສນ ປຏິສາເມນ຺ຕສ຺ສ ປາຈິຕ຺ຕິຍໍ, ຕາທິສໍ ປນ ອຕ຺ຕໂນ ສນ຺ຕກໍ ກຕ຺ວາ ປຏິສາເມຕຸໍ ວຏ຺ຏຕິ. ‘‘ອິທໍ ປຏິສາເມຖາ’’ຕິ ວຸຕ຺ເຕ ປນ ‘‘ນ ວຏ຺ຏຕີ’’ຕິ ປຏິກ຺ຂິປິຕພ຺ພໍ. ສເຈ ກຸປິຕາ ປາເຕຕ຺ວາ ຄຈ຺ຉນ຺ຕິ, ປລິໂພໂຘ ນາມ ໂຫຕິ, ປຏິສາເມຕພ຺ພໍ. ວິຫາເຣ ກມ຺ມໍ ກໂຣນ຺ຕາ ວຑ຺ຒກີອາທໂຍ ວາ ຣາຊວລ຺ລຠາ ວາ ‘‘ຍໍກິຎ຺ຈິ ອຸປກຣຓໍ ວາ ສຍນຠຓ຺ຑໍ ວາ ປຏິສາເມຕ຺ວາ ເທຖາ’’ຕິ ວທນ຺ຕິ, ຉນ຺ເທນປິ ຠເຍນປິ ນ ກາຕພ຺ພເມວ, ຄຸຕ຺ຕຏ຺ຐານໍ ປນ ທສ຺ເສຕຸໍ ວຏ຺ຏຕິ.

ອຊ຺ຌາຣາມອຊ຺ຌາວສເຖສຸປິ ຍາທິເສ ຐາເນ ‘‘ຠິກ຺ຂູຫິ ວາ ສາມເຓເຣຫິ ວາ ຄຫິຕໍ ຠວິສ຺ສຕີ’’ຕິ ອາສງ຺ກາ ອຸປ຺ປຊ຺ຊຕິ, ຕາທິເສເຍວ ຐາເນ ອຸຄ຺ຄເຫຕ຺ວາ ວາ ອຸຄ຺ຄຫາເປຕ຺ວາ ວາ ສຎ຺ຎາຓໍ ກຕ຺ວາ ນິກ຺ຂິປິຕພ຺ພໍ, ‘‘ຍສ຺ສ ຠຓ຺ຑໍ ນຏ຺ຐໍ, ໂສ ອາຄຈ຺ຉຕູ’’ຕິ ຈ ອາຈິກ຺ຂິຕພ຺ພໍ. ອຖ ໂຍ ອາຄຈ຺ຉຕິ, ໂສ ‘‘ກີທິສໍ ເຕ ຠຓ຺ຑໍ ນຏ຺ຐ’’ນ຺ຕິ ປຸຈ຺ຉິຕພ຺ໂພ, ສເຈ ສຎ຺ຎາເຓນ ສມ຺ປາເທຕິ, ທາຕພ຺ພໍ. ໂນ ເຈ, ‘ວິຈິນາຫີ’ຕິ ວຕ຺ຕພ຺ໂພ. ຕມ຺ຫາ ອາວາສາ ປກ຺ກມນ຺ເຕນ ປຕິຣູປານໍ ຠິກ຺ຂູນໍ ຫຕ຺ເຖ, ເຕສຸ ອສຕິ ປຕິຣູປານໍ ຄຫປຕິການໍ ຫຕ຺ເຖ ນິກ຺ຂິປິຕ຺ວາ ປກ຺ກມິຕພ຺ພໍ. ໂຍ ປນ ເນວ ປກ຺ກມຕິ, ນ ສາມິກໍ ປສ຺ສຕິ, ເຕນ ຖາວຣໍ ເສນາສນໍ ວາ ເຈຕິຍໍ ວາ ໂປກ຺ຂຣຓິໍ ວາ ກາເຣຕພ຺ໂພ. ສເຈ ທີຆສ຺ສ ອທ຺ຘຸໂນ ອຈ຺ຈເຍນ ສາມິໂກ ອາຄຈ຺ຉຕິ, ຕໍ ທສ຺ເສຕ຺ວາ ‘ອນຸໂມທາຫີ’ຕິ ວຕ຺ຕພ຺ໂພ. ສເຈ ນານຸໂມທຕິ, ‘‘ເທຫິ ເມ ຘນ’’ນ຺ຕິ ໂຈເທຕິ, ສມາທເປຕ຺ວາ ທາຕພ຺ພໍ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸໍ ອາຣພ຺ຠ ຣຕນອຸຄ຺ຄຓ຺ຫນວຕ຺ຖຸສ຺ມິໍ ປຎ຺ຎຕ຺ຕໍ, ‘‘ອຎ຺ຎຕ຺ຣ ອຊ຺ຌາຣາມາ ວາ, ອຊ຺ຌາວສຖາ ວາ’’ຕິ ອຍເມຕ຺ຖ ທຸວິຘາ ອນຸປຎ຺ຎຕ຺ຕິ, ສາຘາຣຓປຎ຺ຎຕ຺ຕິ, ສາຓຕ຺ຕິກໍ, ອນຸຎ຺ຎາຕຏ຺ຐາເນ ອນາທຣິເຍນ ອຸຄ຺ຄເຫຕ຺ວາ ອນິກ຺ຂິປນ຺ຕສ຺ສ ທຸກ຺ກຏໍ. ອນຸຎ຺ຎາຕຏ຺ຐາເນ ຄເຫຕ຺ວາ ນິກ຺ຂິປນ຺ຕສ຺ສ, ຍໍ ໂຫຕິ ອາມາສໍ ຣຕນສມ຺ມຕໍ, ຕໍ ວິສ຺ສາສໍ ວາ ຕາວກາລິກໍ ວາ ອຸຄ຺ຄຓ຺ຫນ຺ຕສ຺ສ, ປໍສຸກູລສຎ຺ຎາຍ ຄຓ຺ຫໂຕ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ອນນຸຎ຺ຎາຕກຣຓໍ, ປຣສນ຺ຕກຕາ, ວິສ຺ສາສຄ຺ຄາຫປໍສຸກູລສຎ຺ຎານໍ ອຠາໂວ, ອຸຄ຺ຄຫຓໍ ວາ ອຸຄ຺ຄຫາປນໍ ວາຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານີຕິ.

ຣຕນສິກ຺ຂາປທວຓ຺ຓນາ ນິຏ຺ຐິຕາ.

໓. ວິກາລຄາມປ຺ປເວສນສິກ຺ຂາປທວຓ຺ຓນາ

ຕຕິເຍ ສນ຺ຕໍ ຠິກ຺ຂຸໍ ອນາປຸຈ຺ຉາຕິ ອິທໍ ຈາຣິຕ຺ເຕ ວຸຕ຺ຕນຍເມວ. ວິກາເລຕິ ມຊ຺ຌນ຺ຫິກາຕິກ຺ກມໂຕ ປຏ຺ຐາຍ ອນ຺ໂຕອຣຸເຓ, ເອຕສ຺ມິໍ ອນ຺ຕເຣ ‘‘ວິກາເລ ຄາມປ຺ປເວສນໍ ອາປຸຈ຺ຉາມີ’’ຕິ ວາ, ‘‘ຄາມໍ ປວິສິສ຺ສາມີ’’ຕິ ວາ ອນາປຸຈ຺ຉິຕ຺ວາ ອສຕິ ຕຖາຣູເປ ອຈ຺ຈາຍິເກ ກຣຓີເຍ ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ ອຕິກ຺ກມນ຺ຕສ຺ສ, ອປຣິກ຺ຂິຕ຺ຕສ຺ສ ອຸປຈາຣໍ ໂອກ຺ກມນ຺ຕສ຺ສ ປຐມປາເທ ທຸກ຺ກຏໍ, ທຸຕິຍປາເທ ປາຈິຕ຺ຕິຍໍ. ສເຈປິ ສມ຺ພຫຸລາ ເກນຈິ ກມ຺ເມນ ຄາມໍ ປວິສນ຺ຕິ, ສພ຺ເພຫິ ອຎ຺ຎມຎ຺ຎໍ ອາປຸຈ຺ຉິຕພ຺ພໍ. ‘‘ຕສ຺ມິໍ ຄາເມ ຕໍ ກມ຺ມໍ ນ ສມ຺ປຊ຺ຊຕີ’’ຕິ ອຎ຺ຎໍ ຄາມໍ ຄຈ຺ຉນ຺ຕານໍ ປຸນ ອາປຸຈ຺ຉນກິຈ຺ຈໍ ນຕ຺ຖິ. ສເຈ ປນ ອຸສ຺ສາຫໍ ປຏິປ຺ປສ຺ສມ຺ເຠຕ຺ວາ ວິຫາຣໍ ຄຈ຺ຉນ຺ຕາ ອນ຺ຕຣາ ອຎ຺ຎໍ ຄາມໍ ປວິສິຕຸກາມາ ໂຫນ຺ຕິ, ອາປຸຈ຺ຉິຕພ຺ພເມວ. ກຸລຆເຣ ວາ ອາສນສາລາຍໍ ວາ ຠຕ຺ຕກິຈ຺ຈໍ ກຕ຺ວາ ເຕລຠິກ຺ຂາຍ ວາ ສປ຺ປິຠິກ຺ຂາຍ ວາ ຈຣິຕຸກາເມນ ສເຈ ປສ຺ເສ ຠິກ຺ຂຸ ອຕ຺ຖິ, ອາປຸຈ຺ຉິຕພ຺ໂພ, ອສນ຺ເຕ ‘ນຕ຺ຖີ’ຕິ ຄນ຺ຕພ຺ພໍ. ວີຖິໍ ໂອຕຣິຕ຺ວາ ປນ ຠິກ຺ຂຸໍ ທິສ຺ວາປິ ອາປຸຈ຺ຉນກິຈ຺ຈໍ ນຕ຺ຖິ. ໂຍ ປນ ຄາມມຊ຺ເຌນ ມຄ຺ໂຄ ໂຫຕິ, ສເຈ ເຕນ ຄຈ຺ຉນ຺ຕສ຺ສ ‘‘ເຕລາທີນໍ ອຕ຺ຖາຍ ຈຣິສ຺ສາມີ’’ຕິ ຈິຕ຺ຕໍ ອຸປ຺ປຊ຺ຊຕິ, ປສ຺ເສ ຠິກ຺ຂຸໍ ທິສ຺ວາ ອາປຸຈ຺ຉິຕພ຺ພໍ. ມຄ຺ຄາ ອໂນກ຺ກມ຺ມ ຈຣນ຺ຕສ຺ສ ປນ ອາປຸຈ຺ຉນກິຈ຺ຈໍ ນຕ຺ຖິ, ໂອກ຺ກມນ຺ຕສ຺ສ ວຸຕ຺ຕນເຍເນວ ປາຈິຕ຺ຕິຍໍ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ວິກາເລ ຄາມປ຺ປເວສນວຕ຺ຖຸສ຺ມິໍ ປຎ຺ຎຕ຺ຕໍ, ‘‘ສນ຺ຕໍ ຠິກ຺ຂຸ’’ນ຺ຕິ ຈ ‘‘ອນາປຸຈ຺ຉາ’’ຕິ ຈ ‘‘ອຎ຺ຎຕ຺ຣ ຕຖາຣູປາ ອຈ຺ຈາຍິກາ ກຣຓີຍາ’’ຕິ ຈ ອິມາ ປເນຕ຺ຖ ຕິສ຺ໂສ ອນຸປຎ຺ຎຕ຺ຕິໂຍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ກາເລ ວິກາລສຎ຺ຎິໂນ, ເວມຕິກສ຺ສ ຈ ທຸກ຺ກຏໍ. ກາລສຎ຺ຎິໂນ ປນ, ໂຍ ຈ ອຈ຺ຈາຍິເກ ວາ ກຣຓີເຍ, ສນ຺ຕໍ ວາ ອາປຸຈ຺ຉິຕ຺ວາ, ອສນ຺ຕໍ ວາ ອນາປຸຈ຺ຉິຕ຺ວາ ປວິສຕິ, ອນ຺ຕຣາຣາມຠິກ຺ຂຸນຸປສ຺ສຍຕິຕ຺ຖິຍເສຍ຺ຍປຏິກ຺ກມເນສຸ ວາ ອຎ຺ຎຕຣໍ ຄຈ຺ຉຕິ, ຕສ຺ສ, ຄາເມນ ມຄ຺ໂຄ ໂຫຕິ, ເຕນ ຄຈ຺ຉໂຕ, ອາປທາສຸ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ສນ຺ຕໍ ຠິກ຺ຂຸໍ ອນາປຸຈ຺ຉຕາ, ອນຸຎ຺ຎາຕກາຣຓາຠາໂວ, ວິກາເລ ຄາມປ຺ປວິສນນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ກຖິນສທິສາເນວ, ອິທໍ ປນ ກິຣິຍາກິຣິຍນ຺ຕິ.

ວິກາລຄາມປ຺ປເວສນສິກ຺ຂາປທວຓ຺ຓນາ ນິຏ຺ຐິຕາ.

໔. ສູຈິຆຣສິກ຺ຂາປທວຓ຺ຓນາ

ຈຕຸຕ຺ເຖ ເຠທນເມວ ເຠທນກໍ, ຕໍ ອສ຺ສ ອຕ຺ຖີຕິ ເຠທນກໍ. ຕສ຺ມາ ເອວຣູເປ ສູຈິຆເຣ ກຣຓກາຣາປເນສຸ ທຸກ຺ກຏໍ, ປຏິລາເຠນ ປນ ຕໍ ຠິນ຺ທິຕ຺ວາ ປາຈິຕ຺ຕິຍໍ ເທເສຕພ຺ພໍ.

ສກ຺ເກສຸ ສມ຺ພຫຸເລ ຠິກ຺ຂູ ອາຣພ຺ຠ ພຫຸສູຈິຆຣວິຎ຺ຎາປນວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ສາຓຕ຺ຕິກໍ, ອຕ຺ຕນາ ວິປ຺ປກຕໍ ອຕ຺ຕນາ ວາ, ປເຣຫິ ວາ, ປເຣຫິ ວິປ຺ປກຕມ຺ປິ ອຕ຺ຕນາ ວາ, ປເຣຫິ ວາ ປຣິໂຍສາເປຕ຺ວາ ລຠນ຺ຕສ຺ສ ຈຕຸກ຺ກປາຈິຕ຺ຕິຍໍ. ອຎ຺ຎສ຺ສຕ຺ຖາຍ ກຣຓກາຣາປເນສຸ, ອຎ຺ເຎນ ກຕໍ ປຏິລຠິຕ຺ວາ ປຣິຠຸຎ຺ຊເນ ທຸກ຺ກຏໍ. ຄຓ຺ຐິເກ ອຣຓິເກ ວິເຘ ອຎ຺ຊນິຍາ ອຎ຺ຊນິສລາກາຍ ວາສິຊເຏ ອຸທກປຸຎ຺ຉນິຍາຕິ ເອເຕສຸ ຍໍກິຎ຺ຈິ ອຏ຺ຐິອາທີຫິ ກໂຣນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ສູຈິຆຣຕາ, ອຏ຺ຐິມຍາທິຕາ, ອຕ຺ຕໂນ ອຕ຺ຖາຍ ກຣຓໍ ວາ ກາຣາເປຕ຺ວາ ວາ ປຏິລາໂຠຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານີຕິ.

ສູຈິຆຣສິກ຺ຂາປທວຓ຺ຓນາ ນິຏ຺ຐິຕາ.

໕. ມຎ຺ຈປີຐສິກ຺ຂາປທວຓ຺ຓນາ

ປຎ຺ຈເມ ມຎ຺ຈນ຺ຕິ ມສາຣກາທີສຸ ອຎ຺ຎຕຣໍ. ປີຐມ຺ປິ ຕາທິສເມວ, ຕໍ ປນ ມຎ຺ໂຈ ວິຍ ອຕິທີຆໍ, ອາສນ຺ທິໂກ ວິຍ ຈ ສມໍ ຈຕຸຣສ຺ສໍ ນ ໂຫຕິ. ເຉທນກໍ ເຠທນກສທິສເມວ.

ສາວຕ຺ຖິຍໍ ອຸປນນ຺ທໍ ອາຣພ຺ຠ ອຸຈ຺ເຈ ມຎ຺ເຈ ສຍນວຕ຺ຖຸສ຺ມິໍ ປຎ຺ຎຕ຺ຕໍ, ປມາຓິກໍ ກໂຣນ຺ຕສ຺ສ, ປມາຓາຕິກ຺ກນ຺ຕໍ ລຠິຕ຺ວາ ຉິນ຺ທິຕ຺ວາ ຍຖາ ປມາຓເມວ ອຸປຣິ ທິສ຺ສຕິ, ເອວໍ ນິຂຓິຕ຺ວາ ວາ, ອຸຕ຺ຕານໍ ວາ ກຕ຺ວາ, ອຏ຺ຏກໍ ວາ ພນ຺ຘິຕ຺ວາ ປຣິຠຸຎ຺ຊນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ປມາຓາຕິກ຺ກນ຺ຕມຎ຺ຈປີຐຕາ, ອຕ຺ຕໂນ ອຕ຺ຖາຍ ກຣຓໍ ວາ ກາຣາເປຕ຺ວາ ວາ ປຏິລາໂຠຕິ ອິມາເນຕ຺ຖ ທ຺ເວ ອງ຺ຄານິ. ເສສໍ ສພ຺ພໍ ສູຈິຆຣສິກ຺ຂາປທສທິສເມວາຕິ.

ມຎ຺ຈປີຐສິກ຺ຂາປທວຓ຺ຓນາ ນິຏ຺ຐິຕາ.

໖. ຕູໂລນທ຺ຘສິກ຺ຂາປທວຓ຺ຓນາ

ຉຏ຺ເຐ ຕູລໍ ໂອນທ຺ຘເມຕ຺ຖາຕິ ຕູໂລນທ຺ຘໍ, ຈິມິລິກໍ ປຕ຺ຖຣິຕ຺ວາ ຕູລໍ ປກ຺ຂິປິຕ຺ວາ ອຸປຣິ ຈິມິລິກາຍ ໂອນທ຺ຘນ຺ຕິ ວຸຕ຺ຕໍ ໂຫຕິ. ອຸທ຺ທາລນກໍ ເຠທນກສທິສເມວ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ຕູໂລນທ຺ຘກາຣາປນວຕ຺ຖຸສ຺ມິໍ ປຎ຺ຎຕ຺ຕໍ, ອາໂຍເຄ ກາຍພນ຺ຘເນ ອໍສພທ຺ຘເກ ປຕ຺ຕຕ຺ຖວິກາຍ ປຣິສ຺ສາວເນ ພິມ຺ໂພຫເນ, ອຎ຺ເຎນ ກຕໍ ຕູໂລນທ຺ຘໍ ປຏິລຠິຕ຺ວາ ອຸທ຺ທາເລຕ຺ວາ ປຣິຠຸຎ຺ຊນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ພິມ຺ໂພຫນຎ຺ເຈຕ຺ຖ ສີສປ຺ປມາຓເມວ ວຏ຺ຏຕິ, ສີສປ຺ປມາຓໍ ນາມ ຍສ຺ສ ວິຕ຺ຖາຣໂຕ ຕີສຸ ໂກເຓສຸ ທ຺ວິນ຺ນໍ ອນ຺ຕຣໍ ວິທຕ຺ຖິຈຕຸຣງ຺ຄຸລໍ ໂຫຕິ, ມຊ຺ເຌ ມຸຏ຺ຐິຣຕນໍ, ທີຆໂຕ ທິຍຑ຺ຒຣຕນໍ ວາ ທ຺ວິຣຕນໍ ວາ. ຕູໂລນທ຺ຘມຎ຺ຈປີຐຕາ, ອຕ຺ຕໂນ ອຕ຺ຖາຍ ກຣຓໍ ວາ ກາຣາເປຕ຺ວາ ວາ ປຏິລາໂຠຕິ ອິມາເນຕ຺ຖ ທ຺ເວ ອງ຺ຄານິ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ.

ຕູໂລນທ຺ຘສິກ຺ຂາປທວຓ຺ຓນາ ນິຏ຺ຐິຕາ.

໗. ນິສີທນສິກ຺ຂາປທວຓ຺ຓນາ

ສຕ຺ຕເມ ນິສີທນນ຺ຕິ ສນ຺ຖຕສທິສໍ ສນ຺ຖຣິຕ຺ວາ ເອກສ຺ມິໍ ອນ຺ເຕ ສຸຄຕວິທຕ຺ຖິປ຺ປມາຓໍ ທ຺ວີສຸ ຐາເນສຸ ຜາເລຕ຺ວາ ກຕາຫິ ຕີຫິ ທສາຫິ ຍຸຕ຺ຕສ຺ສ ປຣິກ຺ຂາຣສ຺ເສຕໍ ນາມໍ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ອປ຺ປມາຓິການິ ນິສີທນານິ ຘາຣຓວຕ຺ຖຸສ຺ມິໍ ປຎ຺ຎຕ຺ຕໍ, ‘‘ທສາ ວິທຕ຺ຖີ’’ຕິ ອຍເມຕ຺ຖ ອນຸປຎ຺ຎຕ຺ຕິ, ອສາຘາຣຓປຎ຺ຎຕ຺ຕິ, ປມາຓິກໍ ວາ ອູນກໍ ວາ ກໂຣນ຺ຕສ຺ສ, ອຎ຺ເຎນ ກຕໍ ປມາຓາຕິກ຺ກນ຺ຕໍ ປຏິລຠິຕ຺ວາ ຉິນ຺ທິຕ຺ວາ ປຣິຠຸຎ຺ຊນ຺ຕສ຺ສ, ວິຕານາທີສຸ ຍໍກິຎ຺ຈິ ກໂຣນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ນິສີທນສ຺ສ ປມາຓາຕິກ຺ກນ຺ຕຕາ, ອຕ຺ຕໂນ ອຕ຺ຖາຍ ກຣຓໍ ວາ ກາຣາເປຕ຺ວາ ວາ ປຏິລາໂຠຕິ ອິມາເນຕ຺ຖ ທ຺ເວ ອງ຺ຄານິ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ.

ນິສີທນສິກ຺ຂາປທວຓ຺ຓນາ ນິຏ຺ຐິຕາ.

໘. ກຓ຺ຑຸປ຺ປຏິຈ຺ຉາທິສິກ຺ຂາປທວຓ຺ຓນາ

ອຏ຺ຐເມ ກຓ຺ຑຸປ຺ປຏິຈ຺ຉາທິນ຺ຕິ ອໂຘນາຠິອຸພ຺ຠຊາຓຸມຓ຺ຑລໍ ກຓ຺ຑຸປີຬກອສ຺ສາວຖຸລ຺ລກຈ຺ຉາພາຘານໍ ປຏິຈ຺ຉາທນຕ຺ຖໍ ອນຸຎ຺ຎາຕໍ ຈີວຣໍ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ອປ຺ປມາຓິກາໂຍ ກຓ຺ຑຸປ຺ປຏິຈ຺ຉາທິກາໂຍ ຘາຣຓວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ເສສໍ ນິສີທເນ ວຸຕ຺ຕນເຍເນວ ເວທິຕພ຺ພນ຺ຕິ.

ກຓ຺ຑຸປ຺ປຏິຈ຺ຉາທິສິກ຺ຂາປທວຓ຺ຓນາ ນິຏ຺ຐິຕາ.

໙. ວສ຺ສິກສາຏິກສິກ຺ຂາປທວຓ຺ຓນາ

ນວເມ ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ອປ຺ປມາຓິກາໂຍ ວສ຺ສິກສາຏິກາໂຍ ຘາຣຓວຕ຺ຖຸສ຺ມິໍ ປຎ຺ຎຕ຺ຕໍ, ເສສເມຕ຺ຖ ຍໍ ວຕ຺ຕພ຺ພໍ, ຕໍ ນິສີທເນ ວຸຕ຺ຕນຍເມວາຕິ.

ວສ຺ສິກສາຏິກສິກ຺ຂາປທວຓ຺ຓນາ ນິຏ຺ຐິຕາ.

໑໐. ນນ຺ທສິກ຺ຂາປທວຓ຺ຓນາ

ທສເມ ສາວຕ຺ຖິຍໍ ອາຍສ຺ມນ຺ຕໍ ນນ຺ທໍ ອາຣພ຺ຠ ສຸຄຕຈີວຣປ຺ປມາຓໍ ຈີວຣໍ ຘາຣຓວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ເສສໍ ນິສີທເນ ວຸຕ຺ຕນຍເມວາຕິ.

ນນ຺ທສິກ຺ຂາປທວຓ຺ຓນາ ນິຏ຺ຐິຕາ.

ຣຕນວຄ຺ໂຄ ນວໂມ.

ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ສຸທ຺ຘປາຈິຕ຺ຕິຍວຓ຺ຓນາ ນິຏ຺ຐິຕາ.