໗. ຘມ຺ມເທສນາສິກ຺ຂາປທວຓ຺ຓນາ

ສຕ຺ຕເມ ອຸຕ຺ຕຣິຉປ຺ປຎ຺ຈວາຈາຫີຕິເອຕ຺ຖ ເອໂກ ຄາຖາປາໂທ ເອກາ ວາຈາຕິ ເອວໍ ສພ຺ພຕ຺ຖ ວາຈາປມາຓໍ ເວທິຕພ຺ພໍ. ຘມ຺ມໍ ເທເສຍ຺ຍາຕິ ປທໂສຘມ຺ມສິກ຺ຂາປເທ ວຸຕ຺ຕລກ຺ຂຓໍ ຘມ຺ມໍ ວາ ອຏ຺ຐກຖາຘມ຺ມໍ ວາ ຠາເສຍ຺ຍ. ອຎ຺ຎຕ຺ຣ ວິຎ຺ຎຸນາ ປຸຣິສວິຄ຺ຄເຫນາຕິ ວິນາ ວິຎ຺ຎຸນາ ປຸຣິເສນ. ມນຸສ຺ສວິຄ຺ຄຫໍ ຄເຫຕ຺ວາ ຐິເຕນ ປນ ຍກ຺ເຂນ ວາ ເປເຕນ ວາ ຕິຣຈ຺ຉາເນນ ວາ ສທ຺ຘິໍ ຐິຕາຍປິ ຘມ຺ມໍ ເທເສຕຸໍ ນ ວຏ຺ຏຕິ. ປາຈິຕ຺ຕິຍນ຺ຕິ ທຸຕິຍານິຍເຕ ວຸຕ຺ຕລກ຺ຂເຓນ ມນຸສ຺ເສນ ວິນາ ວິຎ຺ຎຸມນຸສ຺ສິຕ຺ຖິຍາ ຉນ຺ນໍ ວາຈານໍ ອຸປຣິ ປທາທິວເສນ ຘມ຺ມໍ ເທເສນ຺ຕສ຺ສ ປທາທິຄຓນາຍ, ພຫູນໍ ເທສຍໂຕ ມາຕຸຄາມຄຓນາຍ ຈ ປາຈິຕ຺ຕິຍໍ.

ສາວຕ຺ຖິຍໍ ອຸທາຍິຕ຺ເຖຣໍ ອາຣພ຺ຠ ມາຕຸຄາມສ຺ສ ຘມ຺ມເທສນາວຕ຺ຖຸສ຺ມິໍ ປຎ຺ຎຕ຺ຕໍ, ‘‘ອຎ຺ຎຕ຺ຣ ວິຎ຺ຎຸນາ’’ຕິ ອຍເມຕ຺ຖ ອນຸປຎ຺ຎຕ຺ຕິ, ສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ອມາຕຸຄາເມ ມາຕຸຄາມສຎ຺ຎິໂນ ເວມຕິກສ຺ສ ວາ ຍກ຺ຂິເປຕິປຓ຺ຑກມນຸສ຺ສວິຄ຺ຄຫຕິຣຈ຺ຉານິຕ຺ຖີນໍ ເທເສນ຺ຕສ຺ສ ຈ ທຸກ຺ກຏໍ. ຉຫິ ວາຈາຫິ, ຕໂຕ ວາ ໂອຣໍ ເທເສນ຺ຕສ຺ສ, ວຸຕ຺ຕລກ຺ຂເຓ ວາ ປຸຣິເສ ສຕິ, ສຍໍ ວາ ອຸຏ຺ຐາຍ, ປຸນ ນິສີທິຕ຺ວາ ມາຕຸຄາມສ຺ສ ວາ ອຸຏ຺ຐຫິຕ຺ວາ ປຸນ ນິສິນ຺ນສ຺ສ, ອຎ຺ຎສ຺ສ ວາ ມາຕຸຄາມສ຺ສ ເທສຍໂຕ, ‘‘ທີຆນິກາໂຍ ນາມ ຠນ຺ເຕ ກິມຕ຺ຖິໂຍ’’ຕິ ເອວໍ ປນ ປຸຏ຺ເຐ ສພ຺ພມ຺ປິ ທີຆນິກາຍໍ ເທເສນ຺ຕສ຺ສ, ອຎ຺ຎສ຺ສຕ຺ຖາຍ ວຸຈ຺ຈມານໍ ມາຕຸຄາເມ ສຸຓນ຺ເຕ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ວຸຕ຺ຕລກ຺ຂຓສ຺ສ ຘມ຺ມສ຺ສ ຉນ຺ນໍ ວາຈານໍ ອຸປຣິ ເທສນາ, ວຸຕ຺ຕລກ຺ຂໂຓ ມາຕຸຄາໂມ, ອິຣິຍາປຖປຣິວຕ຺ຕາຠາໂວ, ກປ຺ປິຍກາຣກສ຺ສາຠາໂວ, ອປຎ຺ຫາວິສ຺ສຊ຺ຊນາຕິ ອິມາເນຕ຺ຖ ປຎ຺ຈ ອງ຺ຄານິ. ສມຸຏ຺ຐານາທີນິ ປທໂສຘມ຺ມສທິສາເນວ, ເກວລໍ ອິຘ ກິຣິຍາກິຣິຍໍ ໂຫຕີຕິ.

ຘມ຺ມເທສນາສິກ຺ຂາປທວຓ຺ຓນາ ນິຏ຺ຐິຕາ.