໒. ເອຬກໂລມວຄ຺ໂຄ

໑. ໂກສິຍສິກ຺ຂາປທວຓ຺ຓນາ

ເອຬກໂລມວຄ຺ຄສ຺ສ ປຐເມ ໂກສິຍມິສ຺ສກນ຺ຕິ ເອເກນາປິ ໂກສິຍໍສຸນາ ອນ຺ຕມໂສ ຕສ຺ສ ກຣຓຏ຺ຐາເນ ວາຕເວເຄນ ນິປາຕິເຕນາປິ ມິສ຺ສີກຕໍ. ສນ຺ຖຕນ຺ຕິ ສເມ ຠູມິຠາເຄ ໂກສິຍໍສູນິ ອຸປຣູປຣິ ສນ຺ຖຣິຕ຺ວາ ກຎ຺ຊິຍາທີຫິ ສິຎ຺ຈິຕ຺ວາ ກຕ຺ຕພ຺ພຕາລກ຺ຂຓໍ. ກາຣາເປຍ຺ຍ ນິສ຺ສຄ຺ຄິຍນ຺ຕິ ກຣຓກາຣາປນປ຺ປໂຍເຄສຸ ທຸກ຺ກຏໍ, ປຏິລາເຠນ ນິສ຺ສຄ຺ຄິຍໍ ໂຫຕິ. ເອຕ຺ຖ ຈ ‘‘ອິທໍ ເມ, ຠນ຺ເຕ, ໂກສິຍມິສ຺ສກໍ ສນ຺ຖຕໍ ກາຣາປິຕໍ ນິສ຺ສຄ຺ຄິຍ’’ນ຺ຕິ (ປາຣາ. ໕໔໔) ອິມິນາ ນເຍນ ນິສ຺ສຊ຺ຊນວິຘານໍ ເວທິຕພ຺ພໍ, ອິມສ຺ເສວ ວຈນສ຺ສ ອນຸສາເຣນ ອິໂຕ ປຣໍ ສພ຺ພສນ຺ຖຕໍ ເວທິຕພ຺ພໍ. ສກ຺ກາ ຫິ ເອຕ຺ຕາວຕາ ຊານິຕຸນ຺ຕິ ນ ຕໍ ອິໂຕ ປຣໍ ທສ຺ສຍິສ຺ສາມ.

ອາຬວິຍໍ ຉພ຺ພຄ຺ຄິເຍ ອາຣພ຺ຠ ໂກສິຍມິສ຺ສກໍ ສນ຺ຖຕໍ ກາຣາປນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອຕ຺ຕໂນ ອຕ຺ຖາຍ ກາຣາປນວເສນ ສາຓຕ຺ຕິກໍ, ອຕ຺ຕນາ ວິປ຺ປກຕປອໂຍສາປນນເຍນ ຈຕຸກ຺ກປາຈິຕ຺ຕິຍໍ, ອຎ຺ຎສ຺ສຕ຺ຖາຍ ກຣຓກາຣາປເນສຸ ອຎ຺ເຎນ ກຕໍ ປຏິລຠິຕ຺ວາ ປຣິຠຸຎ຺ຊເນ ຈ ທຸກ຺ກຏໍ. ວິຕານາທິກຣເຓ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ໂກສິຍມິສ຺ສກຠາໂວ, ອຕ຺ຕໂນ ອຕ຺ຖາຍ ສນ຺ຖຕສ຺ສ ກຣຓກາຣາປນໍ, ປຏິລາໂຠ ຈາຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ໂຘວາປນສິກ຺ຂາປເທ ວຸຕ຺ຕນເຍເນວາຕິ.

ໂກສິຍສິກ຺ຂາປທວຓ຺ຓນາ ນິຏ຺ຐິຕາ.

໒. ສຸທ຺ຘກາຬກສິກ຺ຂາປທວຓ຺ຓນາ

ທຸຕິເຍ ສຸທ຺ຘກາຬການນ຺ຕິ ສຸທ຺ຘານໍ ກາຬການໍ ອຎ຺ເຎຫິ ອມິສ຺ສີກຕານໍ. ເວສາລິຍໍ ຉພ຺ພຄ຺ຄິເຍ ອາຣພ຺ຠ ຕາທິສໍ ສນ຺ຖຕໍ ກຣຓວຕ຺ຖຸສ຺ມິໍ ປຎ຺ຎຕ຺ຕໍ, ເສສໍ ປຐມສທິສເມວາຕິ.

ສຸທ຺ຘກາຬກສິກ຺ຂາປທວຓ຺ຓນາ ນິຏ຺ຐິຕາ.

໓. ທ຺ເວຠາຄສິກ຺ຂາປທວຓ຺ຓນາ

ຕຕິເຍ ທ຺ເວ ຠາຄາຕິ ທ຺ເວ ໂກຏ຺ຐາສາ. ອາທາຕພ຺ພາຕິ ຄເຫຕພ຺ພາ. ໂຄຈຣິຍານນ຺ຕິ ກປິລວຓ຺ຓານໍ. ອຍໍ ປເນຕ຺ຖ ວິນິຈ຺ຉໂຍ – ຍຕ຺ຕເກຫິ ກຕ຺ຕຸກາໂມ ໂຫຕິ, ເຕສຸ ຕຸລຍິຕ຺ວາ ທ຺ເວ ໂກຏ຺ຐາສາ ກາຬການໍ ຄເຫຕພ຺ພາ, ເອໂກ ໂອທາຕານໍ, ເອໂກ ໂຄຈຣິຍານໍ. ເອກສ຺ສາປິ ກາຬກໂລມສ຺ສ ອຕິເຣກຠາເວ ນິສ຺ສຄ຺ຄິຍໍ ໂຫຕິ, ອູນກໍ ວຏ຺ຏຕິ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ຕາທິສໍ ສນ຺ຖຕໍ ກຣຓວຕ຺ຖຸສ຺ມິໍ ປຎ຺ຎຕ຺ຕໍ, ກິຣິຍາກິຣິຍໍ, ເສສໍ ປຐມສທິສເມວາຕິ. ອິມານິ ປນ ຕີຓິ ນິສ຺ສຊ຺ຊິຕ຺ວາ ປຏິລທ຺ຘານິປິ ປຣິຠຸຎ຺ຊິຕຸໍ ນ ວຏ຺ຏນ຺ຕິ.

ທ຺ເວຠາຄສິກ຺ຂາປທວຓ຺ຓນາ ນິຏ຺ຐິຕາ.

໔. ຉພ຺ພສ຺ສສິກ຺ຂາປທວຓ຺ຓນາ

ຈຕຸຕ຺ເຖ ໂອເຣນ ເຈ ຉນ຺ນໍ ວສ຺ສານນ຺ຕິ ຉນ຺ນໍ ວສ຺ສານໍ ໂອຣິມຠາເຄ, ອນ຺ໂຕຕິ ອຕ຺ໂຖ. ອຎ຺ຎຕ຺ຣ ຠິກ຺ຂຸສມ຺ມຸຕິຍາຕິ ຍໍ ສງ຺ໂຆ ຄິລານສ຺ສ ຠິກ຺ຂຸໂນ ສນ຺ຖຕສມ຺ມຸຕິໍ ເທຕິ, ຕໍ ຐເປຕ຺ວາ ອລທ຺ຘສມ຺ມຸຕິກສ຺ສ ຉພ຺ພສ຺ສພ຺ຠນ຺ຕເຣ ອຎ຺ຎໍ ສນ຺ຖຕໍ ກໂຣນ຺ຕສ຺ສ ນິສ຺ສຄ຺ຄິຍໍ ໂຫຕິ.

ສາວຕ຺ຖິຍໍ ສມ຺ພຫຸເລ ຠິກ຺ຂູ ອາຣພ຺ຠ ອນຸວສ຺ສໍ ສນ຺ຖຕໍ ກາຣາປນວຕ຺ຖຸສ຺ມິໍ ປຎ຺ຎຕ຺ຕໍ, ‘‘ອຎ຺ຎຕ຺ຣ ຠິກ຺ຂຸສມ຺ມຸຕິຍາ’’ຕິ ອຍເມຕ຺ຖ ອນຸປຎ຺ຎຕ຺ຕິ, ສາ ເຍນ ລທ຺ຘາ ໂຫຕິ, ຕສ຺ສ ຍາວ ໂຣໂຄ ນ ວູປສມ຺ມຕິ, ວູປສນ຺ໂຕ ວາ ປຸນ ກຸປ຺ປຕິ, ຕາວ ຄຕຄຕຏ຺ຐາເນ ອນຸວສ຺ສມ຺ປິ ກາຕຸໍ ວຏ຺ຏຕິ, ອຎ຺ຎສ຺ສຕ຺ຖາຍ ກາເຣຕຸໍ, ກຕຎ຺ຈ ປຏິລຠິຕ຺ວາ ປຣິຠຸຎ຺ຊິຕຸມ຺ປິ ວຏ຺ຏຕິ, ເສສໍ ປຐມສທິສເມວາຕິ.

ຉພ຺ພສ຺ສສິກ຺ຂາປທວຓ຺ຓນາ ນິຏ຺ຐິຕາ.

໕. ນິສີທນສິກ຺ຂາປທວຓ຺ຓນາ

ປຎ຺ຈເມ ປຸຣາຓສນ຺ຖຕໍ ນາມ ຍຕ຺ຖ ສກິມ຺ປິ ນິສິນ຺ໂນ ວາ ໂຫຕິ ນິປນ຺ໂນ ວາ. ສມນ຺ຕາຕິ ເອກປສ຺ສໂຕ ວຏ຺ຏໍ ວາ ຈຕຸຣສ຺ສໍ ວາ ຉິນ຺ທິຕ຺ວາ ຄຫິຕຏ຺ຐານໍ ຍຖາ ວິທຕ຺ຖິມຕ຺ຕໍ ໂຫຕິ, ເອວໍ ຄເຫຕພ຺ພໍ. ສນ຺ຖຣນ຺ເຕນ ປນ ເອກເທເສ ວາ ສນ຺ຖຣິຕພ຺ພໍ, ວິຊເຏຕ຺ວາ ວາ ມິສ຺ສກໍ ກຕ຺ວາ ສນ຺ຖຣິຕພ຺ພໍ, ເອວໍ ຖິຣຕຣໍ ໂຫຕິ. ອນາທາ ເຈຕິ ສຕິ ປຸຣາຓສນ຺ຖເຕ ອຄ຺ຄເຫຕ຺ວາ. ອສຕິ ປນ ອຄ຺ຄເຫຕ຺ວາປິ ວຏ຺ຏຕິ, ອຎ຺ຎສ຺ສຕ຺ຖາຍ ກາເຣຕຸໍ, ກຕຎ຺ຈ ປຏິລຠິຕ຺ວາ ປຣິຠຸຎ຺ຊິຕຸມ຺ປິ ວຏ຺ຏຕິ.

ສາວຕ຺ຖິຍໍ ສມ຺ພຫຸເລ ຠິກ຺ຂູ ອາຣພ຺ຠ ສນ຺ຖຕວິສ຺ສຊ຺ຊນວຕ຺ຖຸສ຺ມິໍ ປຎ຺ຎຕ຺ຕໍ, ເສສໍ ຕຕິຍສທິສເມວາຕິ.

ນິສີທນສິກ຺ຂາປທວຓ຺ຓນາ ນິຏ຺ຐິຕາ.

໖. ເອຬກໂລມສິກ຺ຂາປທວຓ຺ຓນາ

ຉຏ຺ເຐ ອທ຺ຘານມຄ຺ຄປ຺ປຏິປນ຺ນສ຺ສາຕິ ອທ຺ຘານສງ຺ຂາຕໍ ທີຆມຄ຺ຄໍ ປຏິປນ຺ນສ຺ສ, ສພ຺ພຎ຺ເຈຕໍ ວຕ຺ຖຸມຕ຺ຕທີປນເມວ, ຍຕ຺ຖ ກຕ຺ຖຈິ ປນ ຘມ຺ເມນ ລຠິຕ຺ວາ ຄຓ຺ຫໂຕ ໂທໂສ ນຕ຺ຖິ. ຕິໂຍຊນປຣມນ຺ຕິ ຄຫິຕຏ຺ຐານໂຕ ຕິໂຍຊນປ຺ປມາຓໍ ເທສໍ. ສຫຕ຺ຖາຕິ ສຫຕ຺ເຖນ, ອຕ຺ຕນາ ຫຣິຕພ຺ພານີຕິ ອຕ຺ໂຖ. ອສນ຺ເຕ ຫາຣເກຕິ ອສນ຺ເຕເຍວ ອຎ຺ຎສ຺ມິມ຺ປິ ຫາຣເກ. ສເຈ ປນ ອຕ຺ຖິ, ຕໍ ຄາເຫຕຸໍ ວຏ຺ຏຕິ. ອຕ຺ຕນາ ປນ ອນ຺ຕມໂສ ວາຕາພາຘປ຺ປຏິກາຣຕ຺ຖໍ ສຸຕ຺ຕເກນ ອພນ຺ຘິຕ຺ວາ ກຓ຺ຓຈ຺ຉິທ຺ເທ ປກ຺ຂິຕ຺ຕານິປິ ອາທາຍ ຕິໂຍຊນໍ ເອກໍ ປາທໍ ອຕິກ຺ກາເມນ຺ຕສ຺ສ ທຸກ຺ກຏໍ, ທຸຕິຍປາທາຕິກ຺ກເມ ນິສ຺ສຄ຺ຄິຍໍ ປາຈິຕ຺ຕິຍໍ.

ສາວຕ຺ຖິຍໍ ອຎ຺ຎຕຣໍ ຠິກ຺ຂຸໍ ອາຣພ຺ຠ ຕິໂຍຊນາຕິກ຺ກມນວຕ຺ຖຸສ຺ມິໍ ປຎ຺ຎຕ຺ຕໍ, ອສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຕິກປາຈິຕ຺ຕິຍໍ, ອູນກຕິໂຍຊເນ ອຕິເຣກສຎ຺ຎິໂນ ເວມຕິກສ຺ສ ວາ ທຸກ຺ກຏໍ. ຕິໂຍຊນໍ ຫຣຓປຈ຺ຈາຫຣເຓ, ວາສາຘິປ຺ປາເຍນ ຄນ຺ຕ຺ວາ ຕໂຕ ປຣໍ ຫຣເຓ, ອຈ຺ຉິນ຺ນໍ ວາ ນິສ຺ສຏ຺ຐໍ ວາ ປຏິລຠິຕ຺ວາ ຫຣເຓ, ອຎ຺ຎໍ ຫຣາປເນ, ອນ຺ຕມໂສ ສຸຕ຺ຕເກນປິ ພທ຺ຘກຕຠຓ຺ຑຫຣເຓ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ເອຬກໂລມານໍ ອກຕຠຓ຺ຑຕາ, ປຐມປ຺ປຏິລາໂຠ, ອຕ຺ຕນາ ອາທາຍ ວາ ອຎ຺ຎສ຺ສ ອຊານນ຺ຕສ຺ສ ຍາເນ ປກ຺ຂິປິຕ຺ວາ ວາ ຕິໂຍຊນາຕິກ຺ກມນໍ, ອາຫຣຓປຈ຺ຈາຫຣຓໍ, ອວາສາຘິປ຺ປາຍຕາຕິ ອິມາເນຕ຺ຖ ປຎ຺ຈ ອງ຺ຄານິ. ເອຬກໂລມສມຸຏ຺ຐານໍ, ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ເອຬກໂລມສິກ຺ຂາປທວຓ຺ຓນາ ນິຏ຺ຐິຕາ.

໗. ເອຬກໂລມໂຘວາປນສິກ຺ຂາປທວຓ຺ຓນາ

ສຕ຺ຕເມ ສກ຺ເກສຸ ຉພ຺ພຄ຺ຄິເຍ ອາຣພ຺ຠ ເອຬກໂລມໂຘວາປນວຕ຺ຖຸສ຺ມິໍ ປຎ຺ຎຕ຺ຕໍ. ຕຕ຺ຖ ປຸຣາຓຈີວຣໂຘວາປເນ ວຸຕ຺ຕນເຍເນວ ສພ຺ໂພປິ ວິນິຈ຺ຉໂຍ ເວທິຕພ຺ໂພ.

ເອຬກໂລມໂຘວາປນສິກ຺ຂາປທວຓ຺ຓນາ ນິຏ຺ຐິຕາ.

໘. ຊາຕຣູປສິກ຺ຂາປທວຓ຺ຓນາ

ອຏ຺ຐເມ ຊາຕຣູປຣຊຕນ຺ຕິ ສຸວຓ຺ຓຎ຺ເຈວ ຣູປິຍຎ຺ຈ, ອປິຈ ກຫາປໂຓ ໂລຫມາສກທາຣຸມາສກຊຕຸມາສກາທໂຍປິ ເຍ ໂວຫາຣໍ ຄຈ຺ຉນ຺ຕິ, ສພ຺ເພ ເຕ ອິຘ ຣຊຕນ຺ຕ຺ເວວ ວຸຕ຺ຕາ. ອຸຄ຺ຄຓ຺ເຫຍ຺ຍ ວາຕິ ອຕ຺ຕໂນ ອຕ຺ຖາຍ ທິຍ຺ຍມານໍ ວາ ຍຕ຺ຖກຕ຺ຖຈິ ຐິຕໍ ວາ ນິປ຺ປຣິຄ຺ຄຫິຕໍ ທິສ຺ວາ ສຍໍ ຄຓ຺ເຫຍ຺ຍ ວາ. ອຸຄ຺ຄຓ຺ຫາເປຍ຺ຍ ວາຕິ ຕເທວ ອຎ຺ເຎນ ຄາຫາເປຍ຺ຍ ວາ. ອຸປນິກ຺ຂິຕ຺ຕໍ ວາ ສາທິເຍຍ຺ຍາຕິ ‘‘ອິທໍ ອຍ຺ຍສ຺ສ ໂຫຕູ’’ຕິ ເອວໍ ສມ຺ມຸຂາ ວາ, ‘‘ອສຸກສ຺ມິໍ ນາມ ຐາເນ ມມ ຫິຣຎ຺ຎສຸວຓ຺ຓໍ, ຕໍ ຕຸຍ຺ຫໍ ໂຫຕູ’’ຕິ ເອວໍ ປຣມ຺ມຸຂາ ຐິຕໍ ວາ ເກວລໍ ວາຈາຍ ວາ ຫຕ຺ຖມຸທ຺ທາຍ ວາ ‘‘ຕຸຍ຺ຫ’’ນ຺ຕິ ວຕ຺ວາ ປຣິຈ຺ຈຕ຺ຕໍ ໂຍ ກາຍວາຈາຫິ ອປ຺ປຏິກ຺ຂິປິຕ຺ວາ ຈິຕ຺ເຕນ ອຘິວາເສຍ຺ຍ, ອຍໍ ‘‘ສາທິເຍຍ຺ຍາ’’ຕິ ວຸຈ຺ຈຕິ. ສເຈ ປນ ຈິຕ຺ເຕນ ສາທິຍຕິ, ຄຓ຺ຫິຕຸກາໂມ ໂຫຕິ, ກາເຍນ ວາ ວາຈາຍ ວາ ‘‘ນຍິທໍ ກປ຺ປຕີ’’ຕິ ປຏິກ຺ຂິປຕິ, ກາຍວາຈາຫິ ອປ຺ປຏິກ຺ຂິປິຕ຺ວາ ສຸທ຺ຘຈິຕ຺ໂຕ ຫຸຕ຺ວາ ‘‘ນຍິທໍ ອມ຺ຫາກໍ ກປ຺ປຕີ’’ຕິ ນ ສາທິຍຕິ, ວຏ຺ຏຕິ. ນິສ຺ສຄ຺ຄິຍນ຺ຕິ ອຸຄ຺ຄຫຓາທີສຸ ຍໍກິຎ຺ຈິ ກໂຣນ຺ຕສ຺ສ ອຆນພທ຺ເຘສຸ ວຕ຺ຖູສຸ ວຕ຺ຖຸຄຓນາຍ ນິສ຺ສຄ຺ຄິຍໍ ປາຈິຕ຺ຕິຍໍ. ຕໍ ນິສ຺ສຊ຺ຊນ຺ເຕນ ‘‘ອຫໍ, ຠນ຺ເຕ, ຣູປິຍໍ ປຏິຄ຺ຄເຫສິໍ, ອິທໍ ເມ, ຠນ຺ເຕ, ນິສ຺ສຄ຺ຄິຍໍ, ອິມາຫໍ ສງ຺ຆສ຺ສ ນິສ຺ສຊ຺ຊາມີ’’ຕິ (ປາຣາ. ໕໘໔) ເອວໍ ສງ຺ຆມຊ຺ເຌເຍວ ນິສ຺ສຊ຺ຊິຕພ຺ພໍ. ສເຈ ຕຕ຺ຖ ໂກຈິ ຄຫຏ຺ໂຐ ອາຄຈ຺ຉຕິ, ‘‘ອິທໍ ຊານາຫີ’’ຕິ ວຕ຺ຕພ຺ໂພ. ‘‘ອິມິນາ ກິໍ ອາຫຣິຍ຺ຍຕູ’’ຕິ ຠຓນ຺ເຕ ປນ ‘‘ອິທໍ ນາມາ’’ຕິ ອວຕ຺ວາ ‘‘ສປ຺ປິອາທີນິ ຠິກ຺ຂູນໍ ກປ຺ປນ຺ຕີ’’ຕິ ເອວໍ ກປ຺ປິຍໍ ອາຈິກ຺ຂິຕພ຺ພໍ. ສເຈ ໂສ ອາຫຣຕິ, ຣູປິຍປ຺ປຏິຄ຺ຄາຫກໍ ຐເປຕ຺ວາ ສພ຺ເພຫິ ຠາເຊຕ຺ວາ ປຣິຠຸຎ຺ຊິຕພ຺ພໍ. ຣູປິຍປ຺ປຏິຄ຺ຄາຫກສ຺ສ ປນ ຍໍ ຕປ຺ປຈ຺ຈຍາ ອຸປ຺ປນ຺ນໍ, ຕໍ ອຎ຺ເຎນ ລຠິຕ຺ວາ ທິຍ຺ຍມານມ຺ປິ ອນ຺ຕມໂສ ຕໂຕ ນິພ຺ພຕ຺ຕຣຸກ຺ຂຈ຺ຉາຍາປິ ປຣິຠຸຎ຺ຊິຕຸໍ ນ ວຏ຺ຏຕິ. ສເຈ ປນ ໂສ ກິຎ຺ຈິ ອາຫຣິຕຸໍ ນ ອິຈ຺ຉຕິ, ‘‘ອິມໍ ຉຏ຺ເຏຫີ’’ຕິ ວຕ຺ຕພ຺ໂພ. ສເຈ ຍຕ຺ຖ ກຕ຺ຖຈິ ນິກ຺ຂິປຕິ, ຄເຫຕ຺ວາ ວາ ຄຈ຺ຉຕິ, ນ ວາເຣຕພ຺ໂພ. ໂນ ເຈ ຉຏ຺ເຏຕິ, ປຎ຺ຈງ຺ຄສມນ຺ນາຄໂຕ ຠິກ຺ຂຸ ຣູປິຍຉຏ຺ຏໂກ ສມ຺ມນ຺ນິຕພ຺ໂພ. ເຕນ ອນິມິຕ຺ຕໍ ກຕ຺ວາວ ຄູຖໍ ວິຍ ຉຏ຺ເຏຕພ຺ພໍ. ສເຈ ນິມິຕ຺ຕໍ ກໂຣຕິ, ທຸກ຺ກຏໍ ອາປຊ຺ຊຕິ.

ຣາຊຄເຫ ອຸປນນ຺ທໍ ອາຣພ຺ຠ ຣູປິຍປ຺ປຏິຄ຺ຄຫຓວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ສາຓຕ຺ຕິກໍ, ຕິກປາຈິຕ຺ຕິຍໍ, ອຣູປິເຍ ຣູປິຍສຎ຺ຎິໂນ ເວມຕິກສ຺ສ ວາ, ສງ຺ຆເຈຕິຍາທີນໍ ອຕ຺ຖາຍ ຄຓ຺ຫນ຺ຕສ຺ສ, ມຸຕ຺ຕາມຓິອາທິປ຺ປຏິຄ຺ຄຫເຓ ຈ ທຸກ຺ກຏໍ. ຣຕນສິກ຺ຂາປທນເຍນ ນິກ຺ຂິປນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ຊາຕຣູປຣຊຕຠາໂວ, ອຕ຺ຕຸທ຺ເທສິກຕາ, ຄຫຓາທີສຸ ອຎ຺ຎຕຣຠາໂວຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີສຸ ສິຍາ ກິຣິຍໍ ຄຫເຓນ ອາປຊ຺ຊນໂຕ, ສິຍາ ອກິຣິຍໍ ປຏິກ຺ເຂປສ຺ສ ອກຣຓໂຕ, ເສສໍ ສຎ຺ຈຣິຕ຺ເຕ ວຸຕ຺ຕນຍເມວາຕິ.

ຊາຕຣູປສິກ຺ຂາປທວຓ຺ຓນາ ນິຏ຺ຐິຕາ.

໙. ຣູປິຍສໍໂວຫາຣສິກ຺ຂາປທວຓ຺ຓນາ

ນວເມ ນານປ຺ປກາຣກນ຺ຕິ ກຕາທິວເສນ ອເນກວິຘໍ. ຣູປິຍສໍໂວຫາຣນ຺ຕິ ຊາຕຣູປຣຊຕປຣິວຕ຺ຕນໍ. ປຸຣິມສິກ຺ຂາປເທນ ຫິ ນິສ຺ສຄ຺ຄິຍວຕ຺ຖຸທຸກ຺ກຏວຕ຺ຖູນໍ ປຏິຄ຺ຄຫຓໍ ວາຣິຕໍ, ອິມິນາ ປຣິວຕ຺ຕນໍ. ຕສ຺ມາ ທຸກ຺ກຏວຕ຺ຖຸນາ ທຸກ຺ກຏວຕ຺ຖຸກປ຺ປິຍວຕ຺ຖູນິ, ກປ຺ປິຍວຕ຺ຖຸນາ ຈ ທຸກ຺ກຏວຕ຺ຖຸໍ ປຣິວຕ຺ເຕນ຺ຕສ຺ສ ທຸກ຺ກຏໍ. ນິສ຺ສຄ຺ຄິຍວຕ຺ຖຸນາ ປນ ນິສ຺ສຄ຺ຄິຍວຕ຺ຖຸໍ ວາ ທຸກ຺ກຏວຕ຺ຖຸໍ ວາ ກປ຺ປິຍວຕ຺ຖຸໍ ວາ, ທຸກ຺ກຏວຕ຺ຖຸກປ຺ປິຍວຕ຺ຖູຫິ ຈ ນິສ຺ສຄ຺ຄິຍວຕ຺ຖຸໍ ປຣິວຕ຺ເຕນ຺ຕສ຺ສ ນິສ຺ສຄ຺ຄິຍໍ ໂຫຕິ, ຕໍ ປຸຣິມນຍານຸສາເຣເນວ ສງ຺ຆມຊ຺ເຌ ນິສ຺ສຊ຺ຊິຕພ຺ພໍ, ນິສ຺ສຏ຺ຐວຕ຺ຖຸສ຺ມິຎ຺ຈ ຕຕ຺ຖ ວຸຕ຺ຕນເຍເນວ ປຏິປຊ຺ຊິຕພ຺ພໍ.

ສາວຕ຺ຖິຍໍ ຉພ຺ພຄ຺ຄິເຍ ອາຣພ຺ຠ ຣູປິຍສໍໂວຫາຣວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ອນາຓຕ຺ຕິກໍ, ຍໍ ອຕ຺ຕໂນ ຘເນນ ປຣິວຕ຺ເຕຕິ, ຕສ຺ສ ວາ ຘນສ຺ສ ວາ ຣູປິຍຠາໂວ ເຈວ, ປຣິວຕ຺ຕນຎ຺ຈາຕິ ອິມາເນຕ຺ຖ ທ຺ເວ ອງ຺ຄານິ. ກິຣິຍໍ, ເສສໍ ອນນ຺ຕຣສິກ຺ຂາປເທ ວຸຕ຺ຕນຍເມວາຕິ.

ຣູປິຍສໍໂວຫາຣສິກ຺ຂາປທວຓ຺ຓນາ ນິຏ຺ຐິຕາ.

໑໐. ກຍວິກ຺ກຍສິກ຺ຂາປທວຓ຺ຓນາ

ທສເມ ນານປ຺ປກາຣກນ຺ຕິ ຈີວຣາທີນໍ ກປ຺ປິຍຠຓ຺ຑານໍ ວເສນ ອເນກວິຘໍ. ກຍວິກ຺ກຍນ຺ຕິ ກຍຎ຺ເຈວ ວິກ຺ກຍຎ຺ຈ. ‘‘ອິມິນາ ອິມໍ ເທຫິ, ອິມໍ ອາຫຣ, ປຣິວຕ຺ເຕຫິ, ເຈຕາເປຫີ’’ຕິ ອິມິນາ ຫິ ນເຍນ ປຣສ຺ສ ກປ຺ປິຍຠຓ຺ຑໍ ຄຓ຺ຫນ຺ໂຕ ກຍໍ ສມາປຊ຺ຊຕິ, ອຕ຺ຕໂນ ກປ຺ປິຍຠຓ຺ຑໍ ເທນ຺ໂຕ ວິກ຺ກຍໍ ສມາປຊ຺ຊຕິ. ຕສ຺ມາ ຐເປຕ຺ວາ ປຎ຺ຈ ສຫຘມ຺ມິເກ ຍໍ ເອວໍ ອຕ຺ຕໂນ ກປ຺ປິຍຠຓ຺ຑໍ ທຕ຺ວາ ມາຕຸ ສນ຺ຕກມ຺ປິ ກປ຺ປິຍຠຓ຺ຑໍ ຄຓ຺ຫາຕິ, ຕໍ ນິສ຺ສຄ຺ຄິຍໍ ໂຫຕິ. ວຸຕ຺ຕລກ຺ຂຓວເສນ ສງ຺ຆຄຓປຸຄ຺ຄເລສຸ ຍສ຺ສ ກສ຺ສຈິ ນິສ຺ສຊ຺ຊິຕພ຺ພໍ, ‘‘ອິມໍ ຠຸຎ຺ຊິຕ຺ວາ ວາ ຄເຫຕ຺ວາ ວາ ອິທໍ ນາມ ອາຫຣ ວາ ກໂຣຫິ ວາ’’ຕິ ຣຊນາທິໍ ອາຫຣາເປຕ຺ວາ ວາ ຘມກຣຓາທິປຣິກ຺ຂາຣໍ ຠູມິໂສຘນາທິຎ຺ຈ ນວກມ຺ມໍ ກາເຣຕ຺ວາ ວາ ສນ຺ຕໍ ວຕ຺ຖຸ ນິສ຺ສຊ຺ຊິຕພ຺ພໍ, ອສນ຺ເຕ ປາຈິຕ຺ຕິຍໍ ເທເສຕພ຺ພເມວ.

ສາວຕ຺ຖິຍໍ ອຸປນນ຺ທໍ ອາຣພ຺ຠ ກຍວິກ຺ກຍວຕ຺ຖຸສ຺ມິໍ ປຎ຺ຎຕ຺ຕໍ, ‘‘ອິທໍ ກິໍ ອຄ຺ຆຕີ’’ຕິ ເອວໍ ອຄ຺ຆໍ ປຸຈ຺ຉນ຺ຕສ຺ສ, ຍສ຺ສ ຫຕ຺ຖໂຕ ຠຓ຺ຑໍ ຄຓ຺ຫິຕຸກາໂມ ໂຫຕິ, ຕໍ ຐເປຕ຺ວາ ອຎ຺ຎໍ ອນ຺ຕມໂສ ຕສ຺ເສວ ປຸຕ຺ຕຠາຕຸກມ຺ປິ ກປ຺ປິຍກາຣກໍ ກຕ຺ວາ ‘‘ອິມິນາ ອິທໍ ນາມ ຄເຫຕ຺ວາ ເທຫີ’’ຕິ ອາຈິກ຺ຂນ຺ຕສ຺ສ, ‘‘ອິທໍ ອມ຺ຫາກໍ ອຕ຺ຖິ, ອມ຺ຫາກຎ຺ຈ ອິມິນາ ຈ ອິມິນາ ຈ ອຕ຺ໂຖ’’ຕິ ເອວໍ ວຕ຺ວາ ອຕ຺ຕໂນ ຘເນນ ລທ຺ຘໍ ຄຓ຺ຫນ຺ຕສ຺ສ, ສຫຘມ຺ມິເກຫິ ສທ຺ຘິໍ ກຍວິກ຺ກຍໍ ກໂຣນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ຍໍ ອຕ຺ຕໂນ ຘເນນ ປຣິວຕ຺ເຕຕິ, ເຍນ ຈ ປຣິວຕ຺ເຕຕິ, ເຕສໍ ກປ຺ປິຍວຕ຺ຖຸຕາ, ອສຫຘມ຺ມິກຕາ, ກຍວິກ຺ກຍາປຊ຺ຊນຎ຺ຈາຕິ ອິມາເນຕ຺ຖ ຕີຓິ ອງ຺ຄານິ. ເສສໍ ຣູປິຍສໍໂວຫາເຣ ວຸຕ຺ຕນຍເມວາຕິ.

ກຍວິກ຺ກຍສິກ຺ຂາປທວຓ຺ຓນາ ນິຏ຺ຐິຕາ.

ເອຬກໂລມວຄ຺ໂຄ ທຸຕິໂຍ.