໒. ອກາລຈີວຣສິກ຺ຂາປທວຓ຺ຓນາ

ທຸຕິເຍ ອກາລຈີວຣນ຺ຕິ ອຕ຺ຖເຕ ກຖິເນ ກຖິນມາເສຫິ, ອນຕ຺ຖເຕ ຈີວຣມາສໂຕ ອຎ຺ຎສ຺ມິໍ ກາເລ ອຸປ຺ປນ຺ນໍ, ຍໍ ວາ ປນ ກາເລປິ ອາທິສ຺ສ ທິນ຺ນໍ. ອາທິສ຺ສ ທິນ຺ນໍ ນາມ ‘‘ສມ຺ປຕ຺ຕາ ຠາເຊນ຺ຕູ’’ຕິ ວຕ຺ວາ ວາ, ‘‘ອິທໍ ຄຓສ຺ສ, ອິທໍ ຕຸມ຺ຫາກໍ ທມ຺ມີ’’ຕິ ວຕ຺ວາ ວາ, ທາຕຸກາມຕາຍ ປາທມູເລ ຐເປຕ຺ວາ ວາ ທິນ຺ນໍ. ອິຈ຺ເຈຕໍ ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊາເປນ຺ຕິຍາ ປໂຍເຄ ທຸກ຺ກຏໍ, ຍໍ ອຕ຺ຕນາ ລທ຺ຘໍ, ຕໍ ນິສ຺ສຄ຺ຄິຍໍ ໂຫຕິ. ນິສ຺ສຏ຺ຐໍ ປຏິລຠິຕ຺ວາປິ ຍຖາທາເນເຍວ ອຸປເນຕພ຺ພໍ, ອຎ຺ຎສ຺ມິມ຺ປິ ເອວຣູເປ ສິກ຺ຂາປເທ ເອເສວ ນໂຍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊນວຕ຺ຖຸສ຺ມິໍ ປຎ຺ຎຕ຺ຕໍ, ອກາລຈີວເຣ ເວມຕິກາຍ, ກາລຈີວເຣ ອກາລຈີວຣສຎ຺ຎາຍ ເຈວ ເວມຕິກາຍ ຈ ທຸກ຺ກຏໍ. ອຸໂຠສຸ ກາລຈີວຣສຎ຺ຎາຍ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອກາລຈີວຣຕາ, ຕຖາສຎ຺ຎິຕາ, ‘‘ກາລຈີວຣ’’ນ຺ຕິ ອຘິຏ຺ຐາຍ ເລເສນ ຠາຊາປນໍ, ປຏິລາໂຠຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານີຕິ.

ອກາລຈີວຣສິກ຺ຂາປທວຓ຺ຓນາ ນິຏ຺ຐິຕາ.