ນິສ຺ສຄ຺ຄິຍກຓ຺ໂຑ

໑. ປຕ຺ຕສນ຺ນິຈຍສິກ຺ຂາປທວຓ຺ຓນາ

ນິສ຺ສຄ຺ຄິເຍສຸ ອາທິວຄ຺ຄສ຺ສ ຕາວ ປຐເມ ປຕ຺ຕສນ຺ນິຈຍໍ ກເຣຍ຺ຍາຕິ ປຕ຺ຕສນ຺ນິຘິໍ ກເຣຍ຺ຍ, ເອກາຫໍ ອນຘິຏ຺ຐຫິຕ຺ວາ ວາ ອວິກປ຺ເປຕ຺ວາ ວາ ອຘິຏ຺ຐານຸປຄໍ ປຕ຺ຕໍ ຐເປຍ຺ຍາຕິ ອຕ຺ໂຖ.

ສາວຕ຺ຖິຍໍ ຉພ຺ພຄ຺ຄິຍາ ຠິກ຺ຂຸນິໂຍ ອາຣພ຺ຠ ປຕ຺ຕສນ຺ນິຈຍວຕ຺ຖຸສ຺ມິໍ ປຎ຺ຎຕ຺ຕໍ, ເສສກຖາມຄ຺ໂຄ ຠິກ຺ຂຸປາຕິໂມກ຺ຂວຓ຺ຓນາຍໍ ວຸຕ຺ຕນເຍເນວ ເວທິຕພ຺ໂພ, ຕຕ຺ຣ ຫິ ທສາຫາຕິກ຺ກເມ ອາປຕ຺ຕິ, ອິຘ ເອກາຫາຕິກ຺ກເມຕິ ເອຕ຺ຕກເມວ ຕສ຺ສ ຈ ອິມສ຺ສ ຈ ນານາກຣຓໍ, ເສສໍ ຕາທິສເມວາຕິ.

ປຕ຺ຕສນ຺ນິຈຍສິກ຺ຂາປທວຓ຺ຓນາ ນິຏ຺ຐິຕາ.

໒. ອກາລຈີວຣສິກ຺ຂາປທວຓ຺ຓນາ

ທຸຕິເຍ ອກາລຈີວຣນ຺ຕິ ອຕ຺ຖເຕ ກຖິເນ ກຖິນມາເສຫິ, ອນຕ຺ຖເຕ ຈີວຣມາສໂຕ ອຎ຺ຎສ຺ມິໍ ກາເລ ອຸປ຺ປນ຺ນໍ, ຍໍ ວາ ປນ ກາເລປິ ອາທິສ຺ສ ທິນ຺ນໍ. ອາທິສ຺ສ ທິນ຺ນໍ ນາມ ‘‘ສມ຺ປຕ຺ຕາ ຠາເຊນ຺ຕູ’’ຕິ ວຕ຺ວາ ວາ, ‘‘ອິທໍ ຄຓສ຺ສ, ອິທໍ ຕຸມ຺ຫາກໍ ທມ຺ມີ’’ຕິ ວຕ຺ວາ ວາ, ທາຕຸກາມຕາຍ ປາທມູເລ ຐເປຕ຺ວາ ວາ ທິນ຺ນໍ. ອິຈ຺ເຈຕໍ ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊາເປນ຺ຕິຍາ ປໂຍເຄ ທຸກ຺ກຏໍ, ຍໍ ອຕ຺ຕນາ ລທ຺ຘໍ, ຕໍ ນິສ຺ສຄ຺ຄິຍໍ ໂຫຕິ. ນິສ຺ສຏ຺ຐໍ ປຏິລຠິຕ຺ວາປິ ຍຖາທາເນເຍວ ອຸປເນຕພ຺ພໍ, ອຎ຺ຎສ຺ມິມ຺ປິ ເອວຣູເປ ສິກ຺ຂາປເທ ເອເສວ ນໂຍ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອກາລຈີວຣໍ ‘‘ກາລຈີວຣ’’ນ຺ຕິ ອຘິຏ຺ຐຫິຕ຺ວາ ຠາຊນວຕ຺ຖຸສ຺ມິໍ ປຎ຺ຎຕ຺ຕໍ, ອກາລຈີວເຣ ເວມຕິກາຍ, ກາລຈີວເຣ ອກາລຈີວຣສຎ຺ຎາຍ ເຈວ ເວມຕິກາຍ ຈ ທຸກ຺ກຏໍ. ອຸໂຠສຸ ກາລຈີວຣສຎ຺ຎາຍ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອກາລຈີວຣຕາ, ຕຖາສຎ຺ຎິຕາ, ‘‘ກາລຈີວຣ’’ນ຺ຕິ ອຘິຏ຺ຐາຍ ເລເສນ ຠາຊາປນໍ, ປຏິລາໂຠຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານີຕິ.

ອກາລຈີວຣສິກ຺ຂາປທວຓ຺ຓນາ ນິຏ຺ຐິຕາ.

໓. ຈີວຣປຣິວຕ຺ຕນສິກ຺ຂາປທວຓ຺ຓນາ

ຕຕິເຍ ຫນ຺ທາຕິ ຄຓ຺ຫ. ອຈ຺ຉິນ຺ເທຍ຺ຍາຕິ ສຍໍ ອຈ຺ຉິນ຺ທນ຺ຕິຍາ ພນ຺ຘິຕ຺ວາ ຐປິເຕສຸ ພຫູສຸປິ ເອກາປຕ຺ຕິ, ອິຕເຣສຸ ວຕ຺ຖຸຄຓນາຍ ອາປຕ຺ຕິໂຍ. ອຈ຺ຉິນ຺ທາປເນ ປນ ເອກາຍ ອາຓຕ຺ຕິຍາ ພຫູສຸ ອຈ຺ຉິນ຺ເນສຸປິ ເອກາວາປຕ຺ຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຈີວຣໍ ປຣິວຕ຺ເຕຕ຺ວາ ອຈ຺ຉິນ຺ທນວຕ຺ຖຸສ຺ມິໍ ປຎ຺ຎຕ຺ຕໍ, ສາຓຕ຺ຕິກໍ, ຕິກປາຈິຕ຺ຕິຍໍ, ອຎ຺ຎສ຺ມິໍ ປຣິກ຺ຂາເຣ ຕິກທຸກ຺ກຏໍ, ອນຸປສມ຺ປນ຺ນາຍ ຈີວເຣປິ ຕິກທຸກ຺ກຏເມວ. ຍາ ປນ ຕາຍ ວາ ທິຍ຺ຍມານໍ, ຕສ຺ສາ ວາ ວິສ຺ສາສໍ ຄຓ຺ຫາຕິ, ຕສ຺ສາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ອຸປສມ຺ປນ຺ນຕາ, ປຣິວຕ຺ຕິຕຈີວຣສ຺ສ ວິກປ຺ປນຸປຄຕາ, ສກສຎ຺ຎາຍ ອຈ຺ຉິນ຺ທນໍ ວາ ອຈ຺ຉິນ຺ທາປນໍ ວາຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານິ, ອິທໍ ປນ ທຸກ຺ຂເວທນນ຺ຕິ.

ຈີວຣປຣິວຕ຺ຕນສິກ຺ຂາປທວຓ຺ຓນາ ນິຏ຺ຐິຕາ.

໔. ອຎ຺ຎວິຎ຺ຎາປນສິກ຺ຂາປທວຓ຺ຓນາ

ຈຕຸຕ຺ເຖ ວິຎ຺ຎາເປຕ຺ວາຕິ ຊານາເປຕ຺ວາ, ‘‘ອິທໍ ນາມ ອາຫຣາ’’ຕິ ຍາຈິຕ຺ວາ ວາ. ອຎ຺ຎໍ ວິຎ຺ຎາເປຍ຺ຍາຕິ ຍໍ ປຸພ຺ເພ ‘‘ກິນ຺ເຕ, ອຍ຺ເຍ, ອຜາສຸ, ກິໍ ອາຫຣິຍຕູ’’ຕິ ວຸຕ຺ຕາຍ ວິຎ຺ຎາປິຕໍ, ຕໍ ປຏິກ຺ຂິປິຕ຺ວາ ຕຎ຺ເຈວ ອຎ຺ຎຎ຺ຈ ຄເຫຕຸກາມາ ຕໂຕ ອຎ຺ຎໍ ວິຎ຺ຎາເປຍ຺ຍ, ຕສ຺ສາ ວິຎ຺ຎຕ຺ຕິຍາ ທຸກ຺ກຏໍ, ປຏິລາເຠນ ນິສ຺ສຄ຺ຄິຍໍ ໂຫຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ອຎ຺ຎໍ ວິຎ຺ຎາເປຕ຺ວາ ອຎ຺ຎໍ ວິຎ຺ຎາປນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອນຎ຺ເຎ ທ຺ວິກທຸກ຺ກຏໍ. ອນຎ຺ເຎ ອນຎ຺ຎສຎ຺ຎາຍ ປນ, ຕສ຺ມິໍ ອປ຺ປໂຫນ຺ເຕ ປຸນ ຕຎ຺ເຎວ, ອຎ຺ເຎນປິ ອຕ຺ເຖ ສຕິ ເຕນ ສທ຺ຘິໍ ອຎ຺ຎຎ຺ຈ, ຍຎ຺ຈ ວິຎ຺ຎຕ຺ຕໍ, ຕໂຕ ເຈ ອຎ຺ຎໍ ສມຄ຺ຆຕຣໍ ໂຫຕິ, ອິມໍ ອານິສໍສໍ ທສ຺ເສຕ຺ວາ ສຸທ຺ຘໍ ອຎ຺ຎເມວ ຈ ວິຎ຺ຎາເປນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ເລເສນ ຄເຫຕຸກາມຕາ, ອຎ຺ຎສ຺ສ ວິຎ຺ຎາປນໍ, ປຏິລາໂຠຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານີຕິ.

ອຎ຺ຎວິຎ຺ຎາປນສິກ຺ຂາປທວຓ຺ຓນາ ນິຏ຺ຐິຕາ.

໕. ອຎ຺ຎເຈຕາປນສິກ຺ຂາປທວຓ຺ຓນາ

ປຎ຺ຈເມ ອຎ຺ຎໍ ເຈຕາເປຕ຺ວາຕິ ອຕ຺ຕໂນ ກປ຺ປິຍຠຓ຺ເຑນ ‘‘ອິທໍ ນາມ ອາຫຣາ’’ຕິ ອຎ຺ຎໍ ປຣິວຕ຺ຕາເປຕ຺ວາ. ອຎ຺ຎໍ ເຈຕາເປຍ຺ຍາຕິ ‘‘ເອວໍ ເມ ອິທໍ ທຕ຺ວາ ອຎ຺ຎມ຺ປິ ອາຫຣິສ຺ສຕີ’’ຕິ ມຎ຺ຎມານາ ‘‘ນ ເມ ອິມິນາ ອຕ຺ໂຖ, ອິທໍ ນາມ ເມ ອາຫຣາ’’ຕິ ຕໂຕ ອຎ຺ຎໍ ເຈຕາເປຍ຺ຍ. ຕສ຺ສາ ເຈຕາປນປ຺ປໂຍເຄ ທຸກ຺ກຏໍ, ປຏິລາເຠນ ເຕນ ວາ ອຎ຺ເຎນ ວາ ມູເລນ ອາຫຏໍ ນິສ຺ສຄ຺ຄິຍໍ ໂຫຕິ, ເສສໍ ຈຕຸຕ຺ຖສທິສເມວາຕິ.

ອຎ຺ຎເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໖. ປຐມສງ຺ຆິກເຈຕາປນສິກ຺ຂາປທວຓ຺ຓນາ

ຉຏ຺ເຐ ອຎ຺ຎທຕ຺ຖິເກນາຕິ ອຎ຺ຎສ຺ສຕ຺ຖາຍ ທິນ຺ເນນ. ອຎ຺ຎຸທ຺ທິສິເກນາຕິ ອຎ຺ຎໍ ອຸທ຺ທິສິຕ຺ວາ ທິນ຺ເນນ. ສງ຺ຆິເກນາຕິ ສງ຺ຆສ຺ສ ປຣິຈ຺ຈຕ຺ເຕນ. ປຣິກ຺ຂາເຣນາຕິ ກປ຺ປິຍຠຓ຺ເຑນ. ອຎ຺ຎໍ ເຈຕາເປຍ຺ຍາຕິ ‘‘ອິທໍ ນາມ ປຣິຠຸຎ຺ເຊຍ຺ຍາຖາ’’ຕິ ຍໍ ອຸທ຺ທິສິຕ຺ວາ ນິຍເມຕ຺ວາ ໂຍ ປຣິກ຺ຂາໂຣ ທິນ຺ໂນ, ຕໂຕ ອຎ຺ຎໍ ປຣິວຕ຺ຕາເປຍ຺ຍ, ຕສ຺ສາ ປໂຍເຄ ທຸກ຺ກຏໍ, ປຏິລາເຠນ ນິສ຺ສຄ຺ຄິຍໍ.

ສາວຕ຺ຖິຍໍ ສມ຺ພຫຸລາ ຠິກ຺ຂຸນິໂຍ ອາຣພ຺ຠ ຕາທິເສນ ປຣິກ຺ຂາເຣນ ອຎ຺ຎໍ ເຈຕາປນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອນຎ຺ຎທຕ຺ຖິເກ ທ຺ວິກທຸກ຺ກຏໍ. ຕສ຺ມິໍ ປນ ອນຎ຺ຎທຕ຺ຖິກສຎ຺ຎາຍ, ເສສກໍ ອຸປເນນ຺ຕິຍາ, ‘‘ຕຸມ຺ເຫຫິ ເອຕທຕ຺ຖາຍ ທິນ຺ໂນ, ອມ຺ຫາກຎ຺ຈ ອິມິນາ ນາມ ອຕ຺ໂຖ’’ຕິ ສາມິເກ ອປໂລເກຕ຺ວາ ອຸປເນນ຺ຕິຍາ, ຍທາ ຠິກ຺ຂຸນິໂຍ ວິຫາຣມ຺ປິ ຉຑ຺ເຑຕ຺ວາ ປກ຺ກມນ຺ຕິ, ເອວຣູປາສຸ ອາປທາສຸ ອຸປເນນ຺ຕີນໍ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ເສສໍ ຈຕຸຕ຺ຖສທິສເມວາຕິ.

ປຐມສງ຺ຆິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໗. ທຸຕິຍສງ຺ຆິກເຈຕາປນສິກ຺ຂາປທວຓ຺ຓນາ

ສຕ຺ຕເມ ສຎ຺ຎາຈິເກນາຕິ ສຍໍ ຍາຈິຕເກນາປິ. ເອຕເທເວຕ຺ຖ ນານາກຣຓໍ, ເສສໍ ຉຏ຺ຐສທິສເມວາຕິ.

ທຸຕິຍສງ຺ຆິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໘. ປຐມຄຓິກເຈຕາປນສິກ຺ຂາປທວຓ຺ຓນາ

ອຏ຺ຐເມ ມຫາຊນິເກນາຕິ ຄຓສ຺ສ ປຣິຈ຺ຈຕ຺ເຕນ, ອິທເມຕ຺ຖ ຉຏ຺ຐໂຕ ນານາກຣຓໍ.

ປຐມຄຓິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໙. ທຸຕິຍຄຓິກເຈຕາປນສິກ຺ຂາປທວຓ຺ຓນາ

ນວເມ ສຎ຺ຎາຈິເກນາຕິ ອິທໍ ອຏ຺ຐມໂຕ ອຕິຣິຕ຺ຕໍ, ເສສໍ ທ຺ວີສຸປິ ຉຏ຺ຐສິກ຺ຂາປທສທິສເມວາຕິ.

ທຸຕິຍຄຓິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໑໐. ປຸຄ຺ຄລິກເຈຕາປນສິກ຺ຂາປທວຓ຺ຓນາ

ທສເມ ປຸຄ຺ຄລິເກນາຕິ ເອກຠິກ຺ຂຸນິຍາ ປຣິຈ຺ຈຕ຺ເຕນ. ສຎ຺ຎາຈິເກນາຕິ ສຍໍ ຍາຈິຕເກນ ຈ. ອຎ຺ຎໍ ເຈຕາເປຍ຺ຍາຕິ ຍໍ ອຸທ຺ທິສິຕ຺ວາ ທິນ຺ນໍ, ຕໂຕ ອຎ຺ຎໍ ເຈຕາເປນ຺ຕິຍາ ປໂຍເຄ ທຸກ຺ກຏໍ, ປຏິລາເຠນ ນິສ຺ສຄ຺ຄິຍໍ ໂຫຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຕາທິເສນ ປຣິກ຺ຂາເຣນ ອຎ຺ຎໍ ເຈຕາປນວຕ຺ຖຸສ຺ມິໍ ປຎ຺ຎຕ຺ຕໍ, ເສສໍ ຉຏ຺ຐສທິສເມວາຕິ.

ປຸຄ຺ຄລິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

ປຕ຺ຕວຄ຺ໂຄ ປຐໂມ.

໑໑. ຄຣຸປາວຸຣຓສິກ຺ຂາປທວຓ຺ຓນາ

ທຸຕິຍສ຺ສ ປຐເມ ຄຣຸປາວຸຣຓນ຺ຕິ ສີຕກາເລ ປາວຸຣຓໍ. ຈຕຸກ຺ກໍສປຣມນ຺ຕິ ກໍໂສ ນາມ ຈຕຸກ຺ກຫາປຓິໂກ ໂຫຕິ, ຕສ຺ມາ ໂສຬສກຫາປຓຄ຺ຆນກໍ. ເຈຕາເປຕພ຺ພນ຺ຕິ ຐເປຕ຺ວາ ສຫຘມ຺ມິເກ ຈ ຎາຕກປ຺ປວາຣິເຕ ຈ ອຎ຺ເຎນ ກິສ຺ມິຎ຺ຈິເທວ ຄຸເຓ ປຣິຕຸຏ຺ເຐນ ‘‘ວເທຖາຍ຺ເຍ, ເຍນຕ຺ໂຖ’’ຕິ ວຸຕ຺ຕາຍ ວິຎ຺ຎາເປຕພ຺ພໍ. ຕໂຕ ເຈ ອຸຕ຺ຕຣີຕິ ຕຕຸຕ຺ຕຣິ ວິຎ຺ຎາເປນ຺ຕິຍາ ທຸກ຺ກຏໍ, ປຏິລທ຺ຘໍ ນິສ຺ສຄ຺ຄິຍໍ ໂຫຕິ.

ສາວຕ຺ຖິຍໍ ຖຸລ຺ລນນ຺ທໍ ອາຣພ຺ຠ ຣາຊານໍ ກມ຺ພລໍ ວິຎ຺ຎາປນວຕ຺ຖຸສ຺ມິໍ ປຎ຺ຎຕ຺ຕໍ, ຕິກປາຈິຕ຺ຕິຍໍ, ອູນກຈຕຸກ຺ກໍເສ ທ຺ວິກທຸກ຺ກຏໍ. ຕສ຺ມິໍ ປນ ອູນກສຎ຺ຎາຍ, ຈຕຸກ຺ກໍສປຣມໍ ເຈຕາເປນ຺ຕິຍາ, ຎາຕກປ຺ປວາຣິເຕ ວາ, ອຎ຺ຎສ຺ສ ວາ ອຕ຺ຖາຍ, ອຕ຺ຕໂນ ວາ ຘເນນ, ມຫຄ຺ຆໍ ເຈຕາເປນ຺ຕໍ ອປ຺ປຄ຺ຆໍ ເຈຕາເປນ຺ຕິຍາ, ອຸມ຺ມຕ຺ຕິກາທີນຎ຺ຈ ອນາປຕ຺ຕິ. ຄຣຸປາວຸຣຓຕາ, ອຕິເຣກຈຕຸກ຺ກໍສຕາ, ອນນຸຎ຺ຎາຕຏ຺ຐາເນ ວິຎ຺ຎຕ຺ຕິ, ປຏິລາໂຠຕິ ອິມາເນຕ຺ຖ ຈຕ຺ຕາຣິ ອງ຺ຄານິ. ສມຸຏ຺ຐານາທີນິ ສຎ຺ຈຣິຕ຺ຕສທິສານີຕິ.

ຄຣຸປາວຸຣຓສິກ຺ຂາປທວຓ຺ຓນາ ນິຏ຺ຐິຕາ.

໑໒. ລຫຸປາວຸຣຓສິກ຺ຂາປທວຓ຺ຓນາ

ທຸຕິເຍ ລຫຸປາວຸຣຓນ຺ຕິ ອຸຓ຺ຫກາເລ ປາວຸຣຓໍ. ອຑ຺ຒເຕຍ຺ຍກໍສປຣມນ຺ຕິ ທສກຫາປຓຄ຺ຆນກໍ, ເສສໍ ປຐມສທິສເມວາຕິ.

ລຫຸປາວຸຣຓສິກ຺ຂາປທວຓ຺ຓນາ ນິຏ຺ຐິຕາ.

ອິໂຕ ປຣານິ ອິມສ຺ມິໍ ວຄ຺ເຄ ອຏ຺ຐ, ຕຕິຍວຄ຺ເຄ ທສາຕິ ອິມານິ ອຏ຺ຐາຣສ ສິກ຺ຂາປທານິ ຠິກ຺ຂຸປາຕິໂມກ຺ຂວຓ຺ຓນາຍໍ ວຸຕ຺ຕນເຍເນວ ເວທິຕພ຺ພານີຕິ.

ຊາຕຣູປວຄ຺ໂຄ ຕຕິໂຍ.

ອຸທ຺ທິຏ຺ຐາ ໂຂ ອຍ຺ຍາໂຍ ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ຘມ຺ມາຕິ ຠິກ຺ຂູ ອາຣພ຺ຠ ປຎ຺ຎຕ຺ຕາ ສາຘາຣຓາ ອຏ຺ຐາຣສ, ອສາຘາຣຓາ ທ຺ວາທສາຕິ ເອວໍ ຕິໍສ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ ຠິກ຺ຂຸນິປາຕິໂມກ຺ເຂ

ນິສ຺ສຄ຺ຄິຍປາຈິຕ຺ຕິຍວຓ຺ຓນາ ນິຏ຺ຐິຕາ.